ការទន្ទឹងរង់ចាំ! ពេលនេះបានបញ្ចប់ហើយទីបំផុតកម្ពុជាបានរក​ឃើញអ្នកជំនួសគ្រូបង្វឹក Honda គឺអតីតគ្រូបង្វឹក និងសញ្ជាតិអាហ្សង់ទីនលោក Felix Dalmas ។

ការប្រកាសដែលធ្វើឡើងនៅក្នុងសន្និសីទសារព័ត៌មានដែលរៀបចំដោយសហព័ន្ធកីឡាបាល់ទាត់កម្ពុជា (FFC) នៅជាន់ទី ៣៦ នៃអគារវឌ្ឍនៈ កាលពីម្សិលមិញ ដែលគួរឲ្យចាប់អារម្មណ៍នោះ រួមមានការប្រកាស​គ្រូបង្វឹក ក៏ដូចជាការសួរដេញដោលចំពោះភាគីពាក់ព័ន្ធ និងសមាជិកសារព័ត៌មាន។ ក្នុង​នោះដែរ​លោក Felix Dalmas បាន​ថ្លែង​ថា៖

«ខ្ញុំពិតជារីករាយដែល​បានត្រឡប់​មក​វិញ។ ខ្ញុំពិតជានឹករលឹកប្រទេសកម្ពុជាជាខ្លាំង។ ខ្ញុំចង់​អរគុណ​ដល់​លោកអគ្គលេខាធិការ ជាពិសេស​ប្រធានសហព័ន្ធកីឡាបាល់ទាត់កម្ពុជា លោក សៅ​ សុខា និង​អ្នក​រាល់​គ្នា​ដែល​បាន​ជឿទុក​ចិត្តខ្ញុំ»។

«វាពិតជាល្អមែនទែន​ដែល​លីគ​មាន​ការរីកចម្រើនជាងមុន គ្រូបង្វឹក​ចាស់ថ្មី​បាន​នាំមក​នូវបទពិសោធន៍ល្អ និង​ភាព​ជាកីឡាករអាជីពជូន​ដល់​កីឡាករ។ ខ្ញុំបានឃើញកីឡាករថ្មីៗជាច្រើន ចំណែក​កីឡាករ​ចាស់ៗដែល​យើង​មានពីមុន​ក៏​រីកចម្រើន​ជាងមុន។ វាពិតជារំភើប​ដែល​ឃើញនូវអ្វីៗទាំងអស់នេះ»។

«យើងចង់​បន្ត​ធ្វើការងារឱ្យបាន​ល្អដូចអ្វីដែល​យើង​បានកាលពីមុន។ យើងចង់​បង្កើតក្រុម​មួយដែល​តំណាងឱ្យអ្នកទាំងអស់គ្នា ជាក្រុម​ដែល​នាំមក​នូវ​មោទនកភាព និង​នាំភាពរីករាយពេល​ដែល​មើល​យើងប្រកួត។ អ្វីដែល​ខ្ញុំបាន​រៀន​សូត្រពីអតីតកាល​គឺថា​គ្មាន​នរណាម្នាក់អាច​ធ្វើ​បាន​ដោយ​ម្នាក់ឯងនោះទេ យើង​ត្រូវ​ការ​ចូលរួមទាំងអស់គ្នា»។

លោកបាន​បង្ហាញមូលហេតុ​ចាកចេញពីប្រទេសកម្ពុជា​កាលពីឆ្នាំ២០២០​ថា៖« តាម​ពិតទៅ! ខ្ញុំមិន​ចង់​ចាកចេញពីប្រទេសកម្ពុជានោះទេ។ ប៉ុន្តែដោយសារស្ថានភាពគ្រួសារ​ ក៏ដូចជាស្ថានភាពក្នុងសម័យកូវីដ ដូច្នេះវាបានបង្ខំឱ្យខ្ញុំត្រូវចាកចេញពីកិច្ចការដែលត្រូវធ្វើជាមួយលោក Honda»។

Felix Dalmas ចុះកុងត្រាដឹកនាំជម្រើសជាតិកម្ពុជារយៈពេល​៤ឆ្នាំ​ហើយ ក្រោយ​ព្រឹត្តិការណ៍ស៊ីហ្គេមបញ្ចប់​លោក​នឹង​រ៉ាប់រង​ការងារជម្រើសជាតិ ក្នុងពាន​រង្វាន់​នានាដូចជា វគ្គជម្រុះ World Cup 2026, AFC Asian Cup និង​ការ​ប្រកួតជាច្រើនទៀត៕

សហព័ន្ធកីឡាបាល់ទាត់អាស៊ី (AFC) ថ្កោលទោសយ៉ាងដាច់អហង្ការចំពោះការវាយប្រហារដែលបង្កហេតុ និងរន្ធត់ដោយកងកម្លាំងអ៊ីស្រាអែលទៅលើកីឡាករ និងអ្នកទស្សនាក្នុងការប្រកួតវគ្គផ្តាច់ព្រ័ត្រ Abu Ammar Cup រវាង Balata FC និង Jabal Al Mukabber នៅកីឡដ្ឋានអន្តរជាតិ Faisal Al Husseini ក្នុងទីក្រុង al-Ram កាលពីយប់ថ្ងៃព្រហស្បតិ៍។

ឧស្ម័នបង្ហូរទឹកភ្នែក និងគ្រាប់កាំភ្លើងជ័រត្រូវបានប្រើប្រាស់ដោយកងកម្លាំងអ៊ីស្រាអែល ក្នុងអំឡុងពេលវាយប្រហា ដែលនាំឱ្យការប្រកួតត្រូវផ្អាក ខណៈដែលកីឡាករ និងអ្នកគាំទ្រប៉ាឡេស្ទីនជាច្រើននាក់ រួមទាំងកុមារ និងស្ត្រី បានទទួលរងនូវការ​ថប់ដង្ហើម ដោយសារការស្រូបឧស្ម័នបង្ហូរទឹកភ្នែក ហើយត្រូវបញ្ជូនទៅព្យាបាលអ្ទាងក្នុងទីលាន និងក្នុងមន្ទីរពេទ្យ។

AFC អំពាវនាវឱ្យបញ្ចប់ជាបន្ទាន់ នូវរាល់អំពើហឹង្សារបស់កងកម្លាំងអ៊ីស្រាអែលប្រឆាំងនឹងប្រជាជនប៉ាឡេស្ទីន ហើយឈរក្នុងសាមគ្គីភាពយ៉ាងរឹងមាំជាមួយសមាគមបាល់ទាត់ប៉ាឡេស្ទីន និងសហគមន៍បាល់ទាត់ប៉ាឡេស្ទីន។

គ្រូបង្វឹកជម្រើសជាតិវៀតណាមលោក Philippe Troussier កំពុងទទួលយកការបរាជ័យនៅការប្រកួត Doha Cup 2023 ក្រោមអាយុ 23 ឆ្នាំ នៅពេលដែលគាត់បានគូសបញ្ជាក់ថា «ដើម្បីទទួលបានមេរៀនដ៏អស្ចារ្យ វៀតណាម​ត្រូវ​តែ​ទូទាត់គ្រប់​យ៉ាង»។

ជាមួយនឹងការប្រកួតកីឡា SEA Games 2023 ដែលនឹងឈានមកដល់នៅខែក្រោយនេះនៅក្នុងប្រទេសកម្ពុជា ហើយនឹងក្រុមដែលរំពឹងថានឹងការពារមេដាយមាសកីឡាបាល់ទាត់បុរស លោក Troussier នឹងមើលទៅលើភាពវិជ្ជមានរបស់​ក្រុមច្រើនជាងអ្វីទាំងអស់។

«ខ្ញុំ​មិន​មាន​ការ​សោកស្ដាយ​ឡើយ ​បន្ទាប់​ពី​ចាញ់​បី​លើក​ក្នុង​ Doha Cup នេះ។ ពីការប្រកួតទាំងនេះ កីឡាករនឹងរៀនមេរៀនជាច្រើនដោយខ្លួនឯង ដោយដឹងពីចំណុចខ្លាំង និងចំណុចខ្សោយរបស់ពួកគេ។ ខ្ញុំបាននិយាយថា ដើម្បីទទួលបានមេរៀនដ៏អស្ចារ្យ យើងនឹងត្រូវចំណាយប្រាក់ដ៏ធ្ងន់។  ក្រុម U23 វៀតណាម​នៅ​តែ​កែ​លម្អ​មួយ​ជំហាន​ទៅ​មុខ​ក្នុង​ការ​ប្រកួត​ស៊ីហ្គេម»។

នៅ Doha Cup ឆ្នាំ 2023 ក្រុម U23 វៀតណាម បានបើកយុទ្ធនាការរបស់ពួកគេជាមួយនឹងការចាញ់ក្រុម U23 អ៊ីរ៉ាក់ 3-0 មុនពេលរងបរាជ័យលើក្រុម U23 UAE 4-0 ។

បន្ទាប់មកពួកគេបានបញ្ចប់យុទ្ធនាការរបស់ពួកគេជាមួយនឹងការចាញ់ 5-4 ក្រោមស្នាដៃក្រុម Kyrgyzstan U23 ។ លទ្ធផល​នេះ​មាន​ន័យ​ថា U23 វៀតណាម​ស្ថិត​នៅ​បាត​តារាង​នៃ​ក្រុម​ទាំង ១០ ដែល​ចូល​រួម​ក្នុង​ការ​ប្រកួត Doha Cup 2023។

«កីឡាករ​របស់​យើង​មិន​បាន​លេង​ច្រើន​នោះ​ទេ ​ក្នុង​រយៈ​ពេល​ប្រាំមួយ​ខែ​កន្លង​មក​នេះ។ ពួកគេមិនស្ថិតក្នុងស្ថានភាពល្អបំផុតទេ។ ដូច្នេះសម្រាប់ខ្ញុំ និងគ្រូបង្វឹក U23 Doha Cup គឺជាកន្លែងដ៏ល្អបំផុតសម្រាប់កីឡាករទាំងនេះ ដើម្បីទទួលបានបទពិសោធន៍ និងមានឱកាសលេងការប្រកួតធំៗជាមួយគូប្រជែងធំៗ»។

«បន្ទាប់ពីនេះ កីឡាករនឹងត្រលប់ទៅក្លឹបរបស់ពួកគេវិញ។ ខ្ញុំនឹងជួបពួកគេម្តងទៀតនៅថ្ងៃទី 17 ខែមេសា ឆ្នាំ 2023 ដើម្បីត្រៀមខ្លួនសម្រាប់ដំណាក់កាលចុងក្រោយឆ្ពោះទៅស៊ីហ្គេមលើកទី 32 »។

Alejandro Garnacho ប្រហែលជាបានលេងការប្រកួតចុងក្រោយរបស់គាត់សម្រាប់ Man United នៅរដូវកាលនេះ។ ខ្សែ​បម្រើ​ស្លាប​សញ្ជតិអាហ្សង់ទីន​បាន​អវត្តមាន​ចាប់​តាំង​ពី​របួស​កជើង​ទល់​នឹង Southampton កាល​ពី​ដើម​ខែ​មីនា។

ទោះជាយ៉ាងណាក៏ដោយ United អាចនឹងបាត់បង់ Garnacho ទៅឱ្យជម្រើសជាតិអាហ្សង់ទីន ប្រសិនបើពួកគេទទួលបានសិទ្ធិធ្វើម្ចាស់ផ្ទះ World Cup U-20 នៅរដូវក្តៅនេះ។ តាម​ពិត​ទៅ! ក្រុមជម្រើសជាតិ U-20 អាហ្សង់ទីន​មិន​មាន​កៅអីលេង​ក្នុង​ជុំផ្ដាច់ព្រ័ត្រ​នេះ​ទេ។

ដើមឡើយប្រទេសឥណ្ឌូណេស៊ីត្រូវបានគេសន្មត់ថាធ្វើជាម្ចាស់ផ្ទះការប្រកួត ប៉ុន្តែ FIFA បានបញ្ជាក់ថានឹងមានការផ្លាស់ប្តូរម្ចាស់ផ្ទះ បន្ទាប់ពីកោះបាលីបដិសេធមិនស្វាគមន៍ក្រុមអ៊ីស្រាអែល។ ម្ចាស់ផ្ទះថ្មីនឹងត្រូវបានជ្រើសរើសក្នុងពេលឆាប់ៗនេះ ហើយរបាយការណ៍បានបង្ហាញថា អាហ្សង់ទីន គឺជាប្រទេសតែមួយគត់ដែលបានដាក់សំណើដេញថ្លៃ។

ប្រធាន FIFA លោក Gianni Infantino បាននិយាយថា៖ «មានប្រទេសផ្សេងទៀតដែលបានប្រកាសចំណាប់អារម្មណ៍ផងដែរ ប៉ុន្តែក្នុងនាមជាបេក្ខភាព ជាមួយនឹងការធានារបស់រដ្ឋាភិបាល និងព័ត៌មានលម្អិតផ្សេងទៀត អាហ្សង់ទីនគឺជាប្រទេសដំបូង ហើយយើងនឹងធ្វើការសម្រេចចិត្តក្នុងរយៈពេលពីរឬបីថ្ងៃខាងមុខ»។

ប្រសិនបើអាហ្សង់ទីនទទួលបានសិទ្ធិធ្វើជាម្ចាស់ផ្ទះ នោះក្រុម U20 របស់​ពួកគេក៏នឹងត្រូវបានរំពឹងថានឹងត្រូវបានដាក់ឱ្យចូលការប្រកួតឡើងវិញ ហើយវាអាចមានផលប៉ះពាល់ដល់ក្រុម United ។

អាហ្សង់ទីនទំនងជានឹងកោះហៅ Garnacho សម្រាប់ការប្រកួតដែលនឹងចាប់ផ្តើមនៅថ្ងៃទី 20 ខែឧសភា ហើយច្បាប់របស់ FIFA នឹងបញ្ជាឱ្យ Man United ដោះលែងគាត់ទៅលេង​នៅជម្រើសជាតិ ដោយសារតែក្លឹបមិនអាចបដិសេធការហៅសម្រាប់ការប្រកួតសំខាន់ៗដូចជា World Cup ជាដើម។

Garnacho បានបង្ហាញទម្រង់លេងឱ្យ Man Utd ក្នុងរដូវកាលនេះ ដោយរកបាន 4 គ្រាប់ និងបញ្ជូនបាល់ឱ្យមិត្តរួមក្រុមចំនួន 4 ដងនៅគ្រប់ការប្រកួតទាំងអស់។

យោងតាមលោក Erik ten Hag បានឱ្យដឹងថា Anthony Martial កំពុងតែស្ថិតក្នុងស្ថានភាពត្រលប់មកក្រុម Manchester United សម្រាប់ការធ្វើដំណើរទៅកាន់កីឡដ្ឋាន St James’ Park នៅថ្ងៃអាទិត្យ។

ខ្សែ​ប្រយុទ្ធ​អន្តរជាតិ​បារាំង​រូប​នេះ​មិន​បាន​បង្ហាញ​ខ្លួន​ឲ្យបិសាចស​ក្រហម​ ចាប់​តាំង​ពី​ការ​ឈ្នះ​២-០ លើ​ក្រុម Nottingham Forest ក្នុងពាន Carabao Cup កាល​ពី​ដើម​ខែ​កុម្ភៈ។

Martial បាននឹងកំពុងគ្រប់គ្រងបញ្ហាត្រគាកក្នុងពេលនេះ ប៉ុន្តែគាត់បានប្រឹងប្រែងហ្វឹកហាត់ក្នុងអំឡុងពេលសម្រាកអន្តរជាតិ ហើយ Ten Hag សង្ឃឹមថាគាត់អាចស្ថិតក្នុងចំណោមកីឡាករដែលធ្វើដំណើរទៅភាគខាងជើងឆៀងខាងកើតប្រទេស​អង់គ្លេស សម្រាប់ការប្រកួតដ៏សំខាន់មួយដើម្បីប្រជែងតំណែងកំពូលទាំង​បួន។

លោក Ten Hag បានប្រាប់អ្នកយកព័ត៌មាននៅឯ Carrington កាលពីថ្ងៃសុក្រថា៖ «គាត់កំពុងហ្វឹកហាត់ ដូច្នេះរយៈពេលពីរសប្តាហ៍ឥឡូវនេះ» ។

«ខ្ញុំគិតថាគាត់អាចមានវត្តមាននៅក្នុងក្រុមសម្រាប់ថ្ងៃអាទិត្យ»។

Martial បានបង្ហាញខ្លួនក្នុងក្រុមចំនួន 14 ដងក្នុងការប្រកួតទាំងអស់នៅរដូវកាលនេះ ដោយស៊ុតបញ្ចូលទីបាន 6 គ្រាប់ និងបញ្ជូនបាល់ឱ្យមិត្តរួមក្រុមចំនួន 2 ដង។

ឥទ្ធិពលរបស់កីឡាករវ័យ 27 ឆ្នាំមកលើក្រុមរបស់ Ten Hag ត្រូវបានបង្ហាញឱ្យឃើញនៅពេលគាត់នៅលើទីលាន ទោះបីជារដូវកាលរបស់គាត់មានរបួសជាច្រើន​លើក​ក៏​ដោយ៕

លោក Worawut Srimaka អតីតគ្រូបង្វឹកជម្រើសជាតិថៃ U23 និងម្ចាស់ជើងឯក SEA Games លើកទី២៩ នៅប្រទេសម៉ាឡេស៊ី បានពោលពាក្យកោតសរសើរ “ក្រុមថៃU23” ក្រោមការដឹកនាំរបស់លោក Issara Sritaro ដែលទើបធ្វើដំណើរទៅដណ្តើមយកចំណាត់ថ្នាក់លេខ៤ នៅ Doha Cup 2023 នៅ​ប្រទេស​កាតា ថា ​មាន​​​គម្រោង​ហ្វឹកហាត់​ល្អ​ ហើយ​លោកជឿ​ជាក់​ថា​នៅ​ស៊ីហ្គេម​ ក្រុម u23 នេះមិន​គួរ​ជាមាន​បញ្ហា​ជាមួយ​នឹង​ការ​ឈ្នះ​មេដាយ​មាស​ទេ​ ហើយ​លោកបានត្រៀម​នឹង​ផ្តល់​ដំបូន្មាន​ បង្កើន​ពេលវេលា​នៃ​ការ​រក​គ្រាប់​បាល់​ និង​ការ​គ្រប់គ្រង​បាល់។

លោក Worawut Srimaka អតីតគ្រូបង្វឹកជម្រើសជាតិថៃ U23

លោក​បាន​និយាយ​ក្នុង​ siamsport ថា៖«ខ្ញុំ​មាន​ឱកាស​បាន​ទស្សនា​តែ​ពីរ​ប្រកួត​ប៉ុណ្ណោះ។ ខ្ញុំ​ត្រូវ​ដឹង​គុណ​ដែល​យុវជន និង​បុគ្គលិក​បង្វឹក​បាន​បន្ត​អភិវឌ្ឍខ្លួន។ គ្រូបង្វឹកមានផែនការហ្វឹកហាត់ច្បាស់លាស់។ សម្រាប់ជម្រើសជា U23 មួយ​ឈុត​នេះ ខ្ញុំ​គិត​ថា​ក្រុម​គ្រូ​បង្វឹក​មាន​ព័ត៌មាន និង​ស្គាល់​កីឡាករ​ទាំង​អស់​បាន​ច្បាស់។ នេះមានន័យ​ថា ពួក​គេ​មិនគួរជាមានបញ្ហាក្នុងការ​ប្រកួតប្រជែង​ទេ ជាពិសេស ក្នុង​ស៊ីហ្គេម»។

លោក Issara Sritaro គ្រូបង្វឹក​ U23 ថៃបច្ចុប្បន្ន

«ខ្ញុំគិតថា យុវជននៃក្រុមនេះនៅកម្រិតអាស៊ីអាចតទល់ជាមួយក្រុមផ្សេងៗដែលមិនធ្លាប់មាននៅកម្រិតអាស៊ាន ជាពិសេសនៅស៊ីហ្គេមដែលនឹងប្រកួតនៅខែឧសភាខាងមុខនេះ។»

លើសពីនេះ Worawut Srimaka ដែលជាអតីតម្ចាស់មេដាយមាសស៊ីហ្គេម ក៏បាននិយាយផងដែរថា៖«ផ្ទាល់ខ្លួន ប្រសិនបើណែនាំដល់កីឡាករក្នុងក្រុមនេះ ដើម្បីមានសក្តានុពលខ្ពស់ជាងនេះ ខ្ញុំគិតថាអ្វីដែលត្រូវកែតម្រូវ ឬបន្ថែមគឺពេលវេលានៃការ​គ្រប់​គ្រង់បាល់ ការ​ស៊ុត បញ្ចូលទី និងអត់ធ្មត់។»

សម្រាប់​ការ​ប្រកួត​កីឡា​បាល់​ទាត់​ស៊ីហ្គេម​លើក​ទី​៣២​នៅ​កម្ពុជា ​មាន​ទាំង​ក្រុម​ជម្រើស​ជាតិ​បុរស និង​ក្រុម​នារីដែល​ថៃ​នឹង​ចូលរួមទាំងអស់។ យោងតាមគណៈ​កម្មការរៀបចំការប្រកួត ការចាប់ឆ្នោតជ្រើសរើសពូលលើ​វិញ្ញាសាបាល់ទាត់នៅថ្ងៃទី០៥ ខែមេសា ឆ្នាំ២០២៣ ខណៈកាលវិភាគប្រកួតនឹងធ្វើឡើងនៅចន្លោះថ្ងៃទី២៩ ខែមេសា ដល់ថ្ងៃទី១៦ ខែឧសភា ឆ្នាំ២០២៣។