Jadon Sancho គឺជាជម្រើសដ៏គួរឱ្យភ្ញាក់ផ្អើលសម្រាប់រូបភាពកីឡាករក្នុងខែមករា បើទោះជាគាត់ប្រហែលជាមិនមែនជាកីឡាកររបស់Manchester United តទៅទៀតទេនៅចុងខែនេះ។

ខ្សែបម្រើស្លាបអង់គ្លេសដែលមានតម្លៃខ្លួនជាង៩២លានដុល្លារនៅពេលដែលគាត់បានចុះហត្ថលេខានៅឆ្នាំ ២០២១ប៉ុន្តែមិនបានធ្វើឱ្យមានការចាប់អារម្មណ៍ច្រើននៅពហុកីឡដ្ឋាន Old Trafford ត្រូវបានលោក Erik ten Hag បញ្ជូនឱ្យទៅហ្វឹកហាត់ជាមួយសាលាបាល់ទាត់។

ការភ្ញាក់ផ្អើលនេះបានកើតឡើងបន្ទាប់ពីកីឡាករ Sancho បានបង្ហោះតាមប្រព័ន្ធផ្សព្វផ្សាយសង្គមដោយចោទប្រកាន់គ្រូបង្វឹកលោក Ten Hag ថានិយាយកុហកលើកម្រិតនៃការលេងរបស់លោកក្នុងការហ្វឹកហាត់ បន្ទាប់ពីគាត់ត្រូវបានទម្លាក់ចេញពីក្រុមសម្រាប់ការបរាជ័យជាមួយក្លឹប Arsenal កាលពីថ្ងៃទី ៣ ខែកញ្ញា។

Sancho បានសរសេរនៅលើបណ្តាញទំនាក់ទំនងសង្គមរបស់គាត់ថាខ្ញុំនឹងមិនអនុញ្ញាតឱ្យមនុស្សនិយាយអ្វីដែលមិនពិតទាំងស្រុងនោះទេ ខ្ញុំបានដឹកនាំខ្លួនឯងយ៉ាងល្អក្នុងការហ្វឹកហាត់ក្នុងសប្តាហ៍នេះ… ខ្ញុំបានក្លាយជាបុគ្គលដែរត្រូវបានគេស្តីបន្ទោសជាយូរមកហើយ។ វាមិនយុត្តិធម៌ទេសម្រាប់ខ្ញុំ។ កាលពីថ្ងៃទី១៤ខែកញ្ញា United បានប្រកាសថា Sancho នឹងហ្វឹកហាត់នៅឆ្ងាយពីក្រុមឈុតធំដែលត្រូវរង់ចាំដំណោះស្រាយបញ្ហាវិន័យក្រុមជាមុនសិន ។

កីឡាករវ័យ ២៣ ឆ្នាំរូបនេះមិនបានចូលលេងតាំងពីពេលនោះមក ហើយវាបានលេចចេញថាគាត់កំពុងហ្វឹកហាត់ និងញ៉ាំអាហារនៅក្នុងកន្លែងហ្វឹកហាត់នៅឯទីលានហ្វឹកហាត់ Carrington របស់ United ដែលនៅឆ្ងាយពីក្រុមឈុតធំឬជម្រើសដំបូង។

ជាមួយនឹងការរំពឹងទុកដ៏តិចតួចនៃការស្តារទំនាក់ទំនងជាមួយលោក Ten Hag Unitedឡើងវិញនោះ ក្លឹបManchester United ទំនងជាបើកផ្លូវឲ្យSancho ចាកចេញរកទ្រនំថ្មីស្របពេលជាមួយនឹងការបើកទីផ្សារដោះដូរកីឡាករក្នុងខែនេះ។

Sancho ដែលនៅតែទទួលបានតម្លៃពលកម្មជាង៤២ម៉ឺនដុល្លារ ក្នុងមួយសប្តាហ៍ជាមួយក្លឹប United បានចូលរួមជប់លៀងជាមួយអ្នករាំ និងអ្នករចនាក្បាច់រាំដ៏ល្បីគឺនាង Cocainna កាលពីសប្តាហ៍មុន។

ប្រតិទិនផ្លូវការរបស់ United ដែលត្រូវបានចុះតម្លៃបន្ថយរួចហើយពីជាង១៣ដុល្លារ មកត្រឹមជាង៨ ដុល្លារនៅលើហាងអនឡាញរបស់ក្លឹបក៏មានខ្សែការពារ Raphael Varane (ឧសភា) និង Aaron Wan-Bissaka (ខែកញ្ញា) ផងដែរ។ កីឡាករទាំងពីរអាចពិភាក្សាជាមួយក្លឹបនៅក្រៅប្រទេសចាប់ពីថ្ងៃទី១ខែមករា ជាមួយនឹងទិដ្ឋភាពនៃការផ្ទេរនៅរដូវក្តៅនៅពេលដែលកិច្ចសន្យារបស់ពួកគេផុតកំណត់៕

ក្រុមបាល់ទាត់ជម្រើសជាតិអាហ្សង់ទីននឹងដាក់អាវលេខ១០របស់ខ្សែប្រយុទ្ធដ៏មុតស្រួច Lionel Messi ឲ្យចូលនិវត្តន៍  ។  នេះ​បើយោង​តាម​ប្រព័ន្ធ​ផ្សព្វផ្សាយព័ត៍មានកីឡារបស់​អេស្ប៉ាញចេញផ្សាយកាលពីថ្ងៃអាទិត្យទី៣១ធ្នូ ២០២៤។

យោងតាមគេហទំព័រព័ត៌មានកីឡា Sports.esរបស់អេស្ប៉ាញបានឲ្យដឹងថា លោក Claudio Tapia ប្រធានសមាគមបាល់ទាត់អាហ្សង់ទីន( AFA) បានបញ្ជាក់ថា នៅពេលដែលខ្សែប្រយុទ្ធ Messi ចូលនិវត្តន៍ពីក្រុមជម្រើសជាតិ យើងនឹងមិនអនុញ្ញាតឱ្យកីឡាករណាម្នាក់ពាក់លេខ ១០ ស្នងតំណែងពីគាត់ឡើយ ហើយអាវលេខ១០នេះក៏នឹងត្រូវដាក់ឲ្យចូលនិវត្តន៍អស់មួយជីវិត ដើម្បីកិត្តិយសរបស់គាត់។ នេះវាគ្រាន់តែជារឿងតិចតួចបំផុត ដែលយើងអាចធ្វើបានសម្រាប់គាត់។

Messi ដែលបានលេងឱ្យក្លឹប Barcelona ជាងមួយទសវត្សរ៍ ស៊ុតបញ្ចូលទីបាន៦៧២គ្រាប់ក្នុងការបង្ហាញខ្លួន ៧៧៨ដង និងជាអ្នកស៊ុតបញ្ចូលទីគ្រប់ពេលវេលារបស់ក្លឹបអេស្ប៉ាញ។

គាត់បានឈ្នះពានជាច្រើននៅជាមួយក្លឹបអ្នកមានបុណ្យ Barcelona រួមទាំងពាន La Liga របស់អេស្ប៉ាញចំនួន ១០ និងពានរង្វាន់ UEFA Champions League ចំនួន៤។

កីឡាករដែលស្ទើរតែគ្មានរឿងអាស្រូវរូបនេះបច្ចុប្បន្នកំពុងលេងឲ្យក្លឹបបាល់ទាត់អាមេរិកInter Miami។នៅជាមួយក្លឹបនេះបង្ហាញវត្តមានបាន១៤ប្រកួតនិងស៊ុតបាល់បាន១១គ្រាប់។

Messi បានឈ្នះពានរង្វាន់ចំនួនសរុបចំនួន៤៤ រួមទាំងពានរង្វាន់ Copa America ឆ្នាំ ២០២១ និង World Cup ២០២២ជាមួយក្រុមជម្រើសជាតិអាហ្សង់ទីនផងដែរ៕

ក្លឹបយក្សរបស់អេស្ប៉ាញBarcelonaបានត្រៀមកញ្ចប់ថវិកាជាង៥០លានដុល្លារ សម្រាប់ទិញខ្សែប្រយុទ្ធMason Greenwood របស់ក្លឹបManchester United ។នេះបើយោងតាមការចេញផ្សាយរបស់កាសែតអង់គ្លេសThe Sun កាលពីថ្ងៃចន្ទទី១មករាឆ្នាំ២០២៤។ ប្រភពខាងលើបានឲ្យដឹងទៀតថាក្លឹបអ្នកមានបុណ្យBarcelona ថែមទាំងបានត្រៀមអាវលេខ ១០ របស់វីរបុរស Lionel Messi ក្នុងគោលបំណងបញ្ចុះបញ្ចូល Greenwood ឱ្យមករួមរស់ជាមួយក្លឹបរបស់ខ្លួន។

កីឡាករវ័យ ២២ ឆ្នាំដែលបច្ចុប្បន្នកំពុងលេងឲ្យក្លឹប Getafe ក្នុងលក្ខខ័ណ្ឌខ្ចីជើង មានស្ថិតិស៊ុតបញ្ចូលទីបាន ៥ គ្រាប់ និងបញ្ជូនបាល់ឱ្យមិត្តរួមក្រុមចំនួន៤ដងនៅក្របខ័ណ្ឌបាល់ទាត់អេស្ប៉ាញLa Ligaក្នុងរដូវកាលនេះ។ ទោះបីជា Getafe ចង់ចុះហត្ថលេខារក្សា Greenwood ក្នុងក្លឹបរបស់ខ្លួនជាអចិន្ត្រៃយ៍ក៏ដោយ មើលទៅទំនងជាមិនអាចរារាំងមហិច្ឆិតារបស់ Barcelona បានដែរ។

ជាការពិតGreenwood អាច​លេងនៅតំបន់ប្រយុទ្ធកណ្តាល​ ប៉ុន្តែ​ទំនង​ជា​អាច​ដាក់ឲ្យលេងនៅតំបន់ប្រយុទ្ធ​ស្លាប​ស្ដាំ​វិញ។ អតីតកីឡាករខ្ចីជើងរបស់ Chelsea គឺ Joao Felix គឺជាជម្រើសដែលពេញចិត្តរបស់លោក Xavi នៅផ្នែកខាងឆ្វេងក្នុងរដូវកាលនេះ។ ចំណែកឯខ្សែប្រយុទ្ធកណ្តាលនៅតែកាន់កាប់ដោយអ្នកស៊ុតបាល់បញ្ចូលទីច្រើនជាងគេ គឺខ្សែប្រយុទ្ធ Robert Lewandowski ៕

យោងតាមប្រភពព័ត៍មាន Daily Mail ចេញផ្សាយកាលពីថ្ងៃចន្ទ ទី១ ខែកមករា ឆ្នាំ២០២៤ បានឲ្យដឹងថាក្លឹបបិសាចក្រហម Man United សម្រេចចិត្តមិនប្រើជម្រើសដើម្បីបន្តកុងត្រាដល់កីឡាករ Raphael Varane ដែលមានតម្លៃពលកម្មខ្ពស់រហូតទៅដល់ ៣៤ម៉ឺនផោន ក្នុងមួយសប្តាហ៍ ដោយទុកឱ្យកីឡាកររូបនេះ មានសេរីភាពក្នុងការនិយាយជាមួយក្លឹបផ្សេងទៀត ខណៈដែលក្លឹបព្យាយាមកាត់បន្ថយប្រាក់ឈ្នួលរបស់កីឡាករ ដែលមានប្រាក់ខែខ្ពស់បំផុត។ ភាគីទាំងពីរបដិសេធមិនចរចាក្នុងការបន្តកុងត្រាថ្មី ដែលផុតកំណត់ត្រឹមថ្ងៃទី១ ខែមករា។ បដិសេធមិនទទួលយកជម្រើសក្នុងការបន្តកុងត្រារបស់ Varane ដោយស្វ័យប្រវត្តិ ក្លឹបUnited នឹងធ្វើឱ្យគាត់ចាកចេញដោយគ្មានអ្វីសោះនៅចុងរដូវកាល។

Varane ទទួលបានចំណាប់អារម្មណ៍ពីក្លឹប Real Madrid និង Bayern កាលពីប៉ុន្មានសប្តាហ៍ថ្មីៗនេះ ប៉ុន្តែត្រូវបានគេជឿថានឹងសប្បាយចិត្តនៅ United ។ ក្រៅពី Varane, Anthony Martial, Aaron Wan-Bissaka, Jonny Evans និង Tom Heaton ក៏ផុតកុងត្រាដែរនៅរដូវក្ដៅនេះ។

កិច្ចសន្យាបច្ចុប្បន្នរបស់កីឡាករអន្តរជាតិបារាំងនឹងអស់សុពលភាពនៅចុងបញ្ចប់នៃរដូវកាលនេះ ប៉ុន្តែនៅក្នុងកិច្ចសន្យានោះ ក្លឹបMan Utd បានផ្តល់ជម្រើសបន្តកុងត្រាដោយស្វ័យប្រវត្តិរយៈពេល១២ខែ ។United នៅតែចាប់អារម្មណ៍ក្នុងការបន្តការស្នាក់នៅរបស់ Varane នៅពហុកីឡដ្ឋាន Old Trafford ហើយគ្រោងនឹងបើកការពិភាក្សាលើកិច្ចព្រមព្រៀងថ្មីនៅខែក្រោយ បើទោះជាការចរចារលើកដំបូងនេះបរាជ័យក៏ដោយ។

United ក៏កំពុងស្វែងរកការកាត់បន្ថយប្រាក់ឈ្នួលកីឡាករដែលមានតម្លៃខ្ពស់បំផុត ដើម្បីបង្កើនធនធានសម្រាប់ការចុះហត្ថលេខាទិញកីឡាករថ្មីនៅរដូវក្តៅក្រោយ ខណៈដែលពួកគេកំពុងប្រយុទ្ធដើម្បីអនុវត្តតាមច្បាប់ប្រាក់ចំណេញ និងនិរន្តរភាពរបស់ Premier League ។

Varane បានក្លាយជាកីឡាករដែលមានប្រាក់ខែខ្ពស់បំផុតរបស់ United បន្ទាប់ពីការចាកចេញរបស់ខ្សែប្រយុទ្ធ Cristiano Ronaldo និង David De Gea៕

លឹម អារុណរ៉េយមិន បានបង្ហាញខ្លួនពេញមួយប្រកួតដែលក្រុម TIFFY ARMY FC យកឈ្នះក្រុមគិរីវង់សុខសែនជ័យក្នុងពានរង្វាន់ Cambodian Premier League សប្ដាហ៍ទី១១ កន្លងទៅ។ នេះគឺជាការប្រកួតទីមួយដែលកីឡាករវ័យ១៩ឆ្នាំបានលេងពេញម៉ោង ក្រោយចាកចេញពីណាហ្គាវើលដ៍ក្នុងទីផ្សារដោះដូរកីឡាករពាក់កណ្ដាលរដូវកាល។

លោក ភា សុភ័ត្រាបានផ្ដល់បទសម្ភាសន៍ជាមួយក្រុមការងារយើងថា៖« មូលហេតុដែលលោកដាក់ឱ្យកីឡាករកូនកាត់ ខ្មែរ-ណូវែលហ្សេឡង់រូបនេះលេងពេញម៉ោងគឺដោយសារតែគាត់យល់ពីតាកតិចរបស់ក្រុម យល់ពីការចង់បានរបស់គ្រូបង្វឹកពិសេសស្គាល់ចិត្តគ្នាជាមួយដៃគូក្នុងតំបន់បម្រើផ្សេងទៀត។

« គាត់មានកម្លាំងពេញលេញ អាចបន្តលេងបានគ្រប់៩០នាទី ពិសេសនៅពេលដែលក្រុមមានការបម្រែបម្រួលការលេង ការប្ដូរទីតាំងនៅវគ្គទី២»។

លោកបានបន្តថាលឹម អារុណរ៉េយមិន នឹងក្លាយជាខ្សែបម្រើដ៏ពិតប្រាកដមួយនាពេលអនាគត ពិសេសស្កដានុពលរបស់គាត់។ ការបង្ហាញគុណផលល្អបែបនេះ ស្របពេលជាកីឡាករដែលគ្រូបង្វឹករូបនេះចង់ប្រើប្រាស់ផងនោះ ពិតណាស់ លឹម អារុននឹងក្លាយជាកីឡាករមិនអាចខ្វះបានក្នុងក្រុម។

ភ្នំពេញក្រោនទើបតែប្រកាសចុះកុងត្រាខ្សែប្រយុទ្ធសញ្ជាតិហូឡង់ Jelle Goselink កាលពីថ្ងៃមិញ ដើម្បីមកបន្ថែមគ្រាប់បាល់ក្នុងការប្រកួត Cambodian Premier League League ជើងទី២ នេះតទៅ និងការប្រកួតពានរង្វាន់ AFC Cup 2023/24។

អញ្ចឹងក៏ដោយ! Jelle មិនមែនជាកីឡាករហូឡង់ដំបូងដែលលេងជាមួយក្រុមម្ចាស់ជើងឯកលីគកំពូលកម្ពុជា៨ សម័យកាលមួយនេះទេ។ កន្លងមក មានកីឡាករហូឡង់២រូបបានមកលេងនៅក្លិបមួយនេះ តែហាក់មិនសូវជោគជ័យនោះទេ។

ទីមួយ៖ Elroy van der Hooft ៖បានមកដល់ទឹកដីកម្ពុជានៅឆ្នាំ២០១៣ ដោយចុះកុងត្រាលេងឱ្យក្រុមភ្នំពេញក្រោនក្នុងរដូវកាលនោះតែម្ដង។ រូបគេបង្ហាញគុណផលលេងល្អក្នុងការប្រកួតមួយចំនួន ពិសេសក្នុងការប្រកួតជាមួយគិរីវង់ដែលរូបគេរកបាន៣គ្រាប់ក្នុងការប្រកួតនោះឱ្យភ្នំពេញក្រោនឈ្នះ ៣-១។ ឆ្នាំ២០១៣ ជាមួយភ្នំពេញក្រោនរូបគេរកបាន១២គ្រាប់។

ក្នុងរដូវកាលនោះផងដែរ រូបគេត្រូវបានចាត់ទុកជាកីឡាករបរទេសដែលទទួលបានប្រាក់ឈ្នួលច្រើនជាងគេក្នុងលីគ។ ចូលឆ្នាំ២០១៤ ជើងទី២ រូបគេបានផ្ទេរមកលេងនៅបឹងកេតបានមួយរដូវកាលហើយក៏ចាកចេញទៅ។

កីឡាករ​អឺរ៉ុប​ម្នាក់នេះ ធ្លាប់​ហាត់​នៅ​ថ្នាល​ក្លិប លី​ក​កំពូល​ហុ​ល្លង់ Ajax ចំនួន ៦ ឆ្នាំ មុន​ទៅលេង​នៅ​ក្លិប ADO Den Haag, RKC Waalwijk និង VV UDO។ ក្រោយមកទៀត​គេ​បាន​ប្តូរ​ទៅលេង នៅ​ក្លិប FC Chania ប្រទេស​ក្រិ​ក មុន​ចុះ​កុងត្រា​នៅ​ក្លិប Persekap Pasuruan ឥណ្ឌូណេស៊ី តែ​ត្រូវ​លុបចោល​ទៅវិញ និង​ចុងក្រោយ​បង្ហាញខ្លួន​ឲ្យ​ភ្នំពេញ​ក្រោ​ន នៅ​ពាក់កណ្ដាល​រដូវ​កាល ២០១៣។

ទីពីរ៖ Koen Bosma ៖ ខ្សែប្រយុទ្ធសញ្ជាតិហូឡង់បានចូលរួមជាមួយក្លិបភ្នំពេញក្រោនកាលពីខែសីហា ២០១៤ ហើយស៊ុតបញ្ចូលទីពេលលេងជាមួយក្លិប Becamex Binh Duong នៅក្នុងកម្មវិធី Toyota Mekong Cup ។

រូបគេបានមកធ្វើតេស្តិ៍ជាមួយ ក្រោនដោយស៊ុតបញ្ចូលទីប៉ុន្មានគ្រាប់ផងដែរ។ ប៉ុន្តែបានចាកចេញពីក្លិបទៅចូលរួមជាមួយ Song Lam Nghe នៅវៀតណាម បន្ទាប់មកផ្លាស់ទៅក្រុម Sydney United នៅ National Premier League នៃ New South Wales ប្រទេសអូស្រ្តាលី។

សម្រាប់ Jelle Goselink  រូប​គេ​ជាអតីត​ខ្សែប្រយុទ្ធរបស់​ក្លិបឥណ្ឌូណេស៊ី Borneo Samarinda ហើយ​ធ្លាប់​លេង​នៅ​ក្លិប Jong Almere City, Almere City និង Helmond Sport ដែលលេងក្នុងលីគទី២របស់ហូឡង់។

ឈានចូលការប្រកួតទល់នឹង Wuhan ដោយមានការលំបាកជាច្រើន ក្រុម Hanoi FC ចាប់ផ្តើមមិនបានល្អទេ ដោយបានរបូតគ្រាប់បាល់ដំបូងនៅនាទីទី 10 ។ បន្ទាប់​មកក្រុម​តំណាងប្រទេស​ចិន​មាន​ឱកាស​ជា​ច្រើន ​ប៉ុន្តែ​មិន​អាច​បន្ថែមគ្រាប់​បន្ត​ទៀត​នោះទេ។

ចូល​ដល់​តង់​ទី​២ Hanoi FC លេង​បាន​ល្អ​ជាង ហើយ​តាម​ស្មើ​ដោយ​ការ​តែត​បាល់​ពី​កីឡាករ Tuan Hai។ របត់នៃការប្រកួតបានកើតឡើងនៅនាទីទី 74 នៅពេលដែល Wei Shihao ទទួលបានកាតក្រហម ហើយ Hanoi FC បានឆ្លៀតឱកាសរកគ្រាប់បាល់ឈ្នះដោយ Tuan Hai នៅនាទីទី 90 ដោយបញ្ចប់​ការ​ប្រកួត Hanoi ឈ្នះក្នុងលទ្ធផល 2-1 ។

ជ័យជម្នះនេះបានធ្វើឱ្យក្រុម Hanoi FC ទទួលបាន 3 ពិន្ទុដំបូងរបស់ពួកគេ ក្នុងការប្រកួត Asian Champions League ឆ្នាំនេះ ហើយក៏បានបញ្ចប់នូវលទ្ធផលមិនល្អជាបន្តបន្ទាប់ផងដែរ។ នេះ​ក៏​ជា​ជ័យ​ជម្នះ​លើក​ដំបូង​ក្នុង​ប្រវត្តិសាស្ត្រ​របស់​ក្រុម​មានមូលដ្ឋានក្នុងទីក្រុងហាណូយ ​ក្នុង​ការ​ប្រកួត​ប្រជែង​ដ៏​មាន​កិត្យានុភាព​បំផុត​នៅ​អាស៊ី។

ជ័យ​ជម្នះ​របស់​ក្រុម Hanoi FC បាន​បង្កើត​ការ​លើក​ទឹក​ចិត្ត​យ៉ាង​ខ្លាំង​ដល់​កីឡា​បាល់ទាត់​វៀតណាម។ ក្រោយ​ចប់​ការ​ប្រកួត ប្រធាន​ក្រុមហ៊ុន  T&T Group, Mr. Hien បាន​ផ្តល់​រង្វាន់​ផ្ទាល់​ដល់​ក្រុម​ជា​ទឹក​ប្រាក់ ១​ពាន់​លាន​ដុង។

ក្រៅពី Mr. Hien សហព័ន្ធកីឡាបាល់ទាត់វៀតណាមក៏បានផ្តល់រង្វាន់ដល់ក្រុម Hanoi FC ចំនួន ៣០០លានដុងផងដែរ។ គួរកត់សម្គាល់ថា កីឡាករដែលបានបង្ហាញគុណផលល្អនៅកីឡដ្ឋាន My Dinh ក្នុងការប្រកួតនេះ Pham Tuan Hai បានទទួលរង្វាន់ 500 លានដុងផងដែរ។