ព័ត៌មានកីឡាជាតិ
ក្រុមបាល់ទាត់ណាហ្គាវើលដ៏បានឈ្នះពានមិត្តភាពមុនបើករដូវកាល Cambodia Aireway 2022 បន្ទាប់ពីយកឈ្នះក្រុមបឹងកេតក្នុងលទ្ធផល២ទល់២នៅវគ្គផ្ដាច់ព្រ័ត្រដែរលចប់កាលពីប៉ុន្មានម៉ោងមុន។
ការប្រកួតនៅវគ្គផ្ដាច់ព្រ័ត្រនេះដែរ ខ្សែប្រយុទ្ធស្លាបសញ្ជាតិប្រេស៊ីល កីឡាករ Christian និងខ្សែបម្រយុទ្ធប្ដូរចូលដាវ នីម រកបានគ្រាប់បាល់មួយគ្រាប់ម្នាក់ក្នុងវគ្គទី២ ល្មមគ្រប់គ្រាន់ឱ្យក្រុមរបស់សលោក ឃឹម បូរីលើកពាននៅទឹកដីនៃកីឡដ្ឋាន Cambodian Airway តែម្ដង។ នេះគឺជាលើកដំបូងហើយសម្រាប់លោក ឃឹម បូរីដែលបានចូលនិវត្តិពីបាល់ទាត់អាជីពដើមឆ្នាំ២០២២នេះ មកកាន់តំណែងគ្រូបង្គោលក្លិបណាហ្គាវើលហើយជួយក្លិបលើកពានតែម្ដង។
និយាយក្រោយការប្រកួត ប្រធានក្រុមណាហ្គាវើលដ៏ គួច សុគម្ភៈ ថា៖ «អរគុណដល់បងប្អូនទាំងអស់គ្នាដែលបានមកគាំទ្រនៅកីឡដ្ឋានផ្ទាល់។ថ្ងៃនេះពួកយើងបានខិតខំប្រឹងប្រែងរហូតឈ្នះការប្រកូត។ នេះគ្រាន់តែជាការចាប់ផ្ដើម ហើយគ្រាន់តែជាពាន Pre-Season ហើយនេះគឺជាចាប់ផ្ដើមមួយដ៏ល្អសម្រាប់ក្លិបរបស់យើង។ អរគុណដល់បងប្អូនទាំងអស់គ្នា បន្តការគាំទ្រដល់ក្លិបណាហ្គាវើលរបស់ពួកគយើង”៕
«សម្រាប់ទាត់បាល់ Set Piece! គ្រូបានឱ្យរូបខ្ញុំជាអ្នករ៉ាប់រង។ ខ្ញុំមិនដឹងថាគ្រូបានឃើញគុណសម្បត្តិរបស់ខ្ញុំ មានច្រើនដល់កម្រិតណាមួយឡើយ ។ គ្រាន់តែដឹងថា ពួកគាត់អនុញ្ញាតិ បូករួមជាមួយការផ្ដល់ទំនុកចិត្តយ៉ាងខ្ពស់មកកាន់រូបខ្ញុំ។ ដូច្នេះខ្ញុំត្រូវតែព្យាយាមឲ្យអស់ពីសមត្ថភាព ដែលខ្ញុំមាន ដើម្បីបង្ហាញនូវអ្វី ដែលពួកគាត់ចង់បាន»។ នេះគឺសម្ដីរបស់ មិន រតនៈខ្សែបម្រើជម្រើសជាតិកម្ពុជាវ័យក្រោម២៣ឆ្នាំ បានផ្ដល់បទសម្ភាសន៍មកកាន់អ្នកយកព័ត៌មានរបស់គេហទំព័រ B8 Sport។
មែនទែនទៅ! ខ្សែបម្រើវ័យក្មេងរបស់ក្លិបព្រះខ័នរាជស្វាយរៀងរូបនេះគឺជាទទួលភារៈទាត់បាល់រៀបចំ Set Piece ទាំងហ្វ្រីឃីគ បាល់ជ្រុងក្នុងការប្រកួតក្នុងពាន AFF U23 ហើយពេលខ្លះគេសង្កេតឃើញគាត់សហការគ្នាជាមួយ ញាណ សុស៊ីដាន់។ ដោយឡែកអំឡុងពេលទាត់ជ្រុងខាងស្ដាំ រតនៈជាអ្នករ៉ាប់រង ហើយខាងឆ្វេងពេលខ្លះគេឃើញ ស៊ីដាន់ជាអ្នកទទួល។
រតនៈ និងស៊ីដាន់ ត្រូវបានគេមើលឃើញថាជាកីឡាករ ដែលទាត់ពីចម្ងាយបានល្អហើយជារឿយៗពួកគេតែងតែរ៉ាប់រងគ្រប់បាល់បែបនេះក្នុង២ប្រកួតកន្លងមក។ ខ្សែបម្រើមាឌល្អិត លេងសឹងគ្របឈុតក្នុងជម្រើសជាតិកម្ពុជារូបនេះបានបន្តថា៖ «ធ្វើបានល្អប៉ុណ្ណា យើងត្រូវតែទទួលស្គាល់នូវលទ្ធផលរបស់យើង ពីព្រោះហ្នឹងជាការងារគាត់ (ក្រុមគ្រូបង្វឹក) ជាអ្នកដាក់ឱ្យយើង»។
ខ្សែបម្រើវ័យ២១ឆ្នាំរូបនេះបន្តទៀតថា៖«រឿងដែលរំភើបជាងគេក្នុងព្រឹត្តិការណ៍នេះគឺបានលេងនៅស្ដាតថ្មី ស្ដាតធំ លើកទីមួយក្នុងជីវិត។ បន្ទាប់មកទៀតឃើញអ្នកមកទស្សនាយ៉ាងច្រើនកុះករ ជាពិសេសម៉ាក់ប៉ាមកលើកទឹកចិត្ត ។ ពិតជាមានអារម្មណ៍រំភើបណាស់»។
ក្នុងវគ្គជម្រុះក្នុងពូល ក្រុមកម្ពុជាវ័យក្រោម២៣ឆ្នាំ នៅសល់មួយប្រកួតទៀតគឺប៉ះជម្រើសជាតិទីម័រខាងកើត នៅថ្ងៃអាទិត្យ ទី២០ ខែកុម្ភៈ ដែលជាការប្រកួតចុងក្រោយពូល A។ កម្ពុជាត្រូវការត្រឹមតែស្មើប៉ុណ្ណោះ ដើម្បីរក្សាតំណែងកំពូលតារាង ខណៈបច្ចុប្បន្នឈរនៅលេខ១ មាន៦ពិន្ទុពេញ និងចំណេញគ្រាប់បាល់៧គ្រាប់ក្នុងដៃលើសក្រុមលេខ២ ទីម័រខាងកើត ២ពិន្ទុ៕
កាលពីម្សិលមិញ ខ្សែបម្រើវ័យក្មេងជម្រើសជាតិកម្ពុជាវ័យក្រោម២៣ឆ្នាំ ស៊ិន សុវណ្ណមករា បានទាត់សម្រេចទីឱ្យកម្ពុជាយកឈ្នះ U23 ហ្វីលីពីន ។ ខណៈដែលមួយគ្រាប់នេះ រុញកម្ពុជាឱ្យមកឈរកំពូលតារាងពូលA ជាបណ្ដោះអាសន្ន។ តែយ៉ាងណា! សម្រាប់ជំហរនៃការឈរចាប់ទីតាំង ដើម្បីស៊ុតមួយគ្រាប់នេះ គឺជាការរៀបចំទុករបស់ក្រុមការងារគ្រូបង្វឹក រាល់ពេលក្រុមទទួលបានបាល់ហ្វ្រីឃីក ឬបាល់ជ្រុង។
«ហ្នឹងហើយបង! និយាយទៅ ឱ្យតែបាល់ជ្រុង ( Corner Kick) អីចឹង! គាត់បានប្រាប់ឱ្យមកឈរកន្លែងហ្នឹង ដើម្បីធ្វើការទទួលបាល់ពីមិត្តរួមក្រុម ឬក៏បាល់ ដែលខ្សែការពារគូប្រកួតទាត់ចេញ ហើយគ្រាប់បាល់នេះគឺជាឱកាស នៃការទាត់សម្រេចទី ពេលកីឡាករហ្វីលីពីនតែតផ្ដាច់ចេញមកចំខ្ញុំតែម្តង»។ សុវណ្ណមករានិយាយបែបនេះ មកកាន់អ្នកយកព័ត៌មានរបស់ B8 Sport តាមរយៈសារអេឡិចត្រូនិក។
គ្រាប់បាល់របស់ប្អូនប្រុស ស៊ិន កក្កដា រូបនេះកើតឡើងពីការលើកបាល់ចូលតំបន់គ្រោះថ្នាក់ហ្វីលីពីន ពីសំណាក់ មិន រតនៈ ហើយខ្សែការពារហ្វីលីពីនតែតផ្ដាច់ចេញ ប៉ុន្តែបាល់នេះហោះមកចំខ្លួន មករា ហើយទាត់ផ្ដាច់សំដៅទីបានសម្រេចតែម្ដងនៅនាទី៨១ ។ កម្ពុជាមានឱកាសមាស ឱកាសប្រាក់ច្រើន ក្នុងសម្រេចទីតាំងវគ្គទីមួយ ពោលគឺការតែតបុករបារទីរបស់ ទេស សម្បត្តិ ការទាត់ពីចម្ងាយតម្រង់ទីរបស់ មិន រតនៈតែអ្នកចាំទីហ្វីលីពីនសង្រ្គោះបាន។
លើសពីនេះ! សុវណ្ណមករាបានបង្ហាញអារម្មណ៍សប្បាយចិត្ត ពេលគ្រូបង្វឹកផ្ដល់ឱកាសឱ្យលេង ហើយក៏បានថ្លែងអំណរគុណដល់អ្នកគាំទ្រដែលបានមកលើកទឹកចិត្តក្នុងការប្រកួតកន្លងមកផងដែរ។
«ខ្ញុំសប្បាយចិត្តខ្លាំង។ សូមអរគុណដល់គ្រូបង្វឹកផ្ដល់ឱកាសឱ្យខ្ញុំបានលេងក្នុង១១នាក់ដំបូង ហើយក៏អរគុណដល់អ្នកគាំទ្រទាំងអស់គ្នា ដែលចំណាយពេលមកគាំទ្រ និងលើកទឹកចិត្តដល់កីឡាករទាំងអស់គ្នា»៕
គ្រូបង្វឹក U23 វៀតណាមលោក Dinh The Nam បាននិយាយថា គោលដៅរបស់វៀតណាមនៅ 2022 U23 AFF Youth Championship គឺការឈ្នះពានត្រឡប់ទៅផ្ទះវិញ។
នៅក្នុងសន្និសីទសារព័ត៌មានកាលពីថ្ងៃអាទិត្យ លោក Nam បាននិយាយថាក្រុមក្នុងការប្រកួតនេះមានការត្រៀមលក្ខណៈល្អបំផុត។លោក Nam បាននិយាយថា៖
“យើងបានចំណាយពេលមួយខែក្នុងការរៀបចំសម្រាប់ការប្រកួត។ គោលដៅរបស់វៀតណាមគឺដើម្បីឈ្នះជើងឯក។ ភាគច្រើនយើងយកកីឡាករ U21មកលេងដើម្បីឱ្យពួកគេដើម្បីទទួលបានបទពិសោធន៍អន្តរជាតិបន្ថែមទៀត”។
បន្ទាប់ពីធ្វើដំណើរមកប្រទេសកម្ពុជាជាម្ចាស់ផ្ទះ វៀតណាមបានហ្វឹកហាត់ជាលើកដំបូង ដើម្បីស្គាល់ពីអាកាសធាតុ និងលក្ខខណ្ឌទីលាន។ វៀតណាមស្ថិតក្នុងពូល C ជាមួយថៃ និងសិង្ហបុរី។ ក្រុមកំពូលទាំងបីនៃពូកទាំងអស់រួមជាមួយក្រុមចំណាត់ថ្នាក់លេខពីរល្អបំផុតនឹងឈានទៅវគ្គពាក់កណ្តាលផ្តាច់ព្រ័ត្រ។
ពានរង្វាន់ AFF U23 Youth Championship ឆ្នាំ 2022 នឹងប្រព្រឹត្តទៅពីថ្ងៃទី 14 ដល់ថ្ងៃទី 26 ខែកុម្ភៈ។ ឥណ្ឌូនេស៊ី គឺជាក្រុមការពារតំណែងជើងឯក ដែលបានឈ្នះជើងឯកក្នុងឆ្នាំ 2019។ វៀតណាមនឹងប្រកួតដំបូងជាមួយសិង្ហបុរីនៅថ្ងៃទី ១៩ និងថៃនៅថ្ងៃទី ២២។
កម្ពុជាបានខិតកាន់តែកៀកក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រនៃពានរង្វាន់ AFF U-23 Championship 2022 នៅពេលដែលពួកគេបានយកឈ្នះហ្វីលីពីនក្នុងលទ្ធផល ១-០ ក្នុងការប្រកួតក្នុងពូល A នាល្ងាចម្សិលមិញ នៅពហុកីឡដ្ឋានជាតិមរតកតេជោ។
ថ្វីត្បិតក្រុមទាំងពីរគ្រប់គ្រងបាល់ប្រហាក់ប្រហែលគ្នាពេញមួយការប្រកួតដ៏តឹងតែងក៏ដោយ ក៏ការស៊ុតបញ្ចូលទីចុងម៉ោងរបស់ ស៊ិន សុវណ្ណមករា ប្រាំបួននាទីមុនចប់ការប្រកួត បានដោះស្រាយបញ្ហាអ្វីៗទាំងអស់ ខណៈដែលម្ចាស់ផ្ទះទទួលបានពិន្ទុពេញជាលើកទីពីរពីការប្រកួតពីរលើក។ កម្ពុជាបានចាប់ផ្តើមយុទ្ធនាការក្នុងពូល A ដោយយកឈ្នះក្រុមប្រ៊ុយណេ ៦-០។
លោក Hirose Ryu គ្រូបង្វឹកក្រុមជម្រើសជាតិកម្ពុជាបាននិយាយថា៖ «វាជាការប្រកួតដ៏ស្វិតស្វាញ វាបានបង្ហាញពីភាពប្រសើរឡើងច្រើនពេលយើងលេងទល់នឹងប្រ៊ុយណេ»។
ចំណែកគ្រូបង្វឹកហ្វីលីពីនលោក Stewart Hall វិញបានបង្ហាញទស្សនៈក្នុងការប្រកួតនេះថា៖“ភាពរឹងមាំរបស់កីឡាករ(Fitness)តែងតែមានបញ្ហា។ កីឡាករខ្លះមិនបានលេងអស់មួយរយៈមកហើយ។ ពួកគេព្យាយាមបិទការប្រកួតសឹងតែបានទៅហើយតែរបូតនៅនាទីជិតចប់ការប្រកួតទៅវិញ។ កីឡាករបានធ្វើការយ៉ាងខ្លាំងក្នុងការប្រកួតយប់នេះ ប៉ុន្តែកាយសម្បទារបស់ពួកគេនៅតែមិនទាន់រួចរាល់នៅឡើយ”។
ក្រុមជម្រើសជាតិហ្វីលីពីនU23 នឹងត្រូវលេងប្រកួតទី២ក្នុងពូល A ជាមួយជម្រើសជាតិកម្ពុជាដែលជាក្រុមម្ចាស់ផ្ទះ នៅវេលាម៉ោង៧និង០០នាទីយប់ថ្ងៃទី១៧ខែកុម្ភៈឆ្នាំ២០២២នៅពហុកីឡដ្ឋាន មរតកតេជោ នាទីក្រុងភ្នំពេញ។
ប្រកួតទីមួយក្រុម Young Azkals លេងស្មើជាមួយក្រុមជម្រើសជាតិU23 ទីម័រខាងកើតក្នុងលទ្ធផល២ទល់២ ខណៈដែលកម្ពុជាឈ្នះក្រុម U23 ប្រ៊ុយណេក្នុងលទ្ធផល៦ទល់០។ គ្រូបង្វឹកក្រុមជម្រើសជាតិហ្វីលីពីនបាននិយាយថា បន្ទាប់ពីទទួលបានផលលំបាកពេលលេងជាមួយទីម័រខាងកើតលោកត្រូវជួបការលំបាកទ្វេរឡើងពេលប៉ះកម្ពុជា។
“យើងដឹងពីគុណភាពរបស់ទីម័រឡេស្តេ ខណៈដែលពួកគេបាននៅជាមួយគ្នាអស់រយៈពេលបីខែ បើប្រៀបធៀបទៅនឹងបីសប្តាហ៍ដែលយើងមាន។ កីឡាករវ័យក្មេងបានប្រយុទ្ធជាមួយនឹងតួអង្គដ៏អស្ចារ្យ ដោយការវាយបកវិញពីការស៊ុតបាល់បញ្ចូលទីពីរគ្រាប់។ ទីម័រខាងកើតបានផ្តល់បញ្ហាខ្លះដល់ពួកយើង ហើយកម្ពុជានឹងផ្តល់ឱ្យយើងនូវបញ្ហាផ្សេងៗគ្នានៅក្នុងការប្រកួតបន្ទាប់របស់យើង”។
“យើងមិនស្ថិតនៅក្រោមសម្ពាធទេ ខណៈពេលនេះយើងកំពុងព្យាយាមបង្កើនកីឡាករជំនាន់ថ្មី។ វាសំខាន់ណាស់ដែលយើងលេងបាល់ឱ្យបានល្អជាមួយនឹងផ្នត់គំនិតថ្មី។ យើងបាននាំយកមួយដែលកំពុងអភិវឌ្ឍន៍មួយមកជាមួយយើង ដែលជាក្រុមកីឡាករក្នុងស្រុក និងមួយចំនួនមកពីបរទេស”៕
លោក Salvador Valero Garcia អរគុណចំពោះការជឿជាក់របស់សមាគមកីឡាបាល់ទាត់ថៃក្នុងការកសាងក្រុមជាបន្តបន្ទាប់ និងរួមចំណែកជួយក្រុមជម្រើសជាតិថៃយកឈ្នះសិង្ហបុរីក្នុងការប្រកួតដំបូង U23 ជើងឯកអាស៊ាន។
សម្រាប់ក្រុមនេះកីឡាករស្នូលគឺជាកីឡាករអាយុក្រោម១៩ឆ្នាំ។ កីឡាករជាច្រើនបានធ្វើការជាមួយ Salbama តាំងពីអាយុ 14 ឆ្នាំ។គ្រូបង្វឹកសញ្ជាតិអេស្ប៉ាញនិយាយក្រោយចប់ការប្រកួតថា៖
«មនុស្សជាច្រើនអាចឃើញថាដំបូងកីឡាករទាំងអស់មានការភ័យព្រួយ ព្រោះក្នុងរយៈពេលពីរឆ្នាំចុងក្រោយនេះពួកគេមិនមានការប្រកួតអន្តរជាតិទេ ដែល ធ្វើឱ្យពួកគេភ័យ និងធ្វើខុសនៅពេលខ្លះ ប៉ុន្តែយើងមានមោទនភាពដែលយើងបានបង្វែរស្ថានការណ៍មកវិញ ហើយបានបង្ហាញពីស្មារតីក្រុម»។
“នៅក្នុងការប្រកួត ការវាយលុករបស់យើងមានប្រសិទ្ធភាព យើងបង្កើតឱកាសជាច្រើន។ ប៉ុន្តែយើងក៏ខកខានឱកាសជាច្រើនដែរ ហើយយើងត្រូវកែលម្អ។ មនុស្សជាច្រើនយល់ ពីព្រោះយើងបានធ្វើការជាមួយគ្នាជាង 4 ឆ្នាំមកហើយ។ ហ្គេមដែលយើងទទួលនៅតែត្រូវកែលម្អ។ នៅចុងបញ្ចប់នៃ ការប្រកួតយើងបើកទ្វារឲ្យក្រុមគូប្រកួតវាយប្រហារ»។
“ពិតណាស់ ការលេងជាមួយគ្នាដ៏យូរគឺជាភាពខុសគ្នានៃការប្រកួតថ្ងៃនេះ វាគឺជាលទ្ធផលនៃការរៀបចំផែនការរយៈពេលវែង។ សូមអរគុណដល់ក្លឹបដែលជឿជាក់លើផែនការរយៈពេលវែង”។
“ថ្ងៃនេះនៅក្នុងកីឡដ្ឋាន សំលេងហ៊ោកញ្ជ្រៀវរបស់អ្នកគាំទ្របាល់ទាត់ថៃបានលឺយ៉ាងច្បាស់ វាជួយបានច្រើន ហើយធ្វើអោយកីឡាករមិនសូវរំភើប និងលើកទឹកចិត្ត។ ចំណែកពួកយើងដែលនៅផ្ទះវិញ អរគុណសម្រាប់ការគាំទ្រ។ អរគុណរាល់សារដែលអ្នកទាំងអស់គ្នាបានផ្ញើ គ្រប់គ្នាអាចទទួលបានក្តីស្រលាញ់ពីអ្នកគាំទ្របាល់ទាត់ទាំងអស់។ យើងសង្ឃឹមថានឹងធ្វើឱ្យអ្នកគាំទ្របាល់ទាត់រីករាយក្នុងការប្រកួតជាមួយវៀតណាម។ បន្ទាប់ពីនេះយើងនឹងខិតខំប្រឹងប្រែងដើម្បីរៀបចំឱ្យល្អបំផុត”។
សម្រាប់ក្រុមជម្រើសជាតិថៃ ជើងឯកអាស៊ានអាយុក្រោម២៣ឆ្នាំ នឹងត្រូវប្រកួតបន្ទាប់ជាមួយក្រុមជម្រើសជាតិវៀតណាម នៅកីឡដ្ឋាន Prince Stadium ថ្ងៃទី 22 ខែកុម្ភៈ ឆ្នាំ 2565 វេលាម៉ោង 19:00 នាទី ហើយ ការផ្សាយបន្តផ្ទាល់តាមរយៈ True4U៕
ខ្សែការពារជម្រើសជាតិកម្ពុជា តាំង ប៊ុនឆៃបាននិយាយថា រូបគេពិតជាសប្បាយចិត្តដែលបានជួយជម្រើសជាតិកម្ពុជាយកឈ្នះក្នុងការប្រកួតដំបូងហើយ អារម្មណ៍ដែលទទួលបានពេលលេងឱ្យជម្រើសជាតិនាពេលនេះគឺពិតជាអស្ចារ្យ។
«អារម្មណ៍សប្បាយចិត្តណាស់បង ដែលបានចូលលេងពេញការប្រកួត បានជួយក្រុមឱ្យឈ្នះ ហើយបានស៊ុតបញ្ចូលទី និងបញ្ជូនបាល់ឱ្យមិត្តរួមក្រុម។ អារម្មណ៍ពេលដើរចូលទីលាន បងហ្ហើយ! មានអារម្មណ៍ថាព្រីក្បាល ព្រឺសម្បុរណាស់»។
ខ្សែការពារក្លិបបឹងបឹងម្នាក់បន្តថា៖«សូមអរគុណដល់អ្នកគាំទ្រដែលបានចូលជួយលើកទឹកចិត្តតាមរយៈការចូលទស្សនាដោយផ្ទាល់ ហើយក៏សូមឱ្យពួកគេប្រយ័ត្នប្រយែង សុវត្ថិភាពគ្រប់ប្រការ និងថែរក្សាសុខភាពផងដែរ»។
ប៊ុនឆៃគឺជាកីឡាករម្នាក់ក្នុងចំណោម៦នាក់ដែលស៊ុតបញ្ចូលទីក្នុងការប្រកួតដេលកម្បុជាឈ្នះប្រ៊ុយណេ៦ទល់០ គ្រាប់របស់របស់អតីតយុជនសាលាបាល់ទាត់ជាតិបាទីរូបនេះរកបាននៅនាទី៧២ក្នុងវគ្គទី២ហើយការបញ្ជូលបាល់របស់គេនៅវគ្គទី១នាទី៣២ឱ្យ ខ្សែប្រយុទ្ធសារ តីរកបានគ្រាប់បាល់ទី៣៕
រូបភាព៖សហព័ន្ធកីឡាបាល់ទាត់កម្ពុជា និងផេក Marin Chhun
សហព័ន្ធកីឡាបាល់ទាត់មីយ៉ាន់ម៉ា (MFF) បានជូនដំណឹងដល់សហព័ន្ធកីឡាបាល់ទាត់អាស៊ាន (AFF) នៅថ្ងៃនេះថាពួកគេបានដកខ្លួនចេញពីពានរង្វាន់ AFF U23 Championship 2022 ដោយសារផលវិបាកនៃជំងឺកូវីដ-១៩។
ជាផ្នែកនៃវិធានការសុខភាព និងសុវត្ថិភាពសម្រាប់ការប្រកួតដែលកំពុងដំណើរការ ក្រុម U23 មីយ៉ាន់ម៉ា បានឆ្លងកាត់ការធ្វើតេស្តជាប្រចាំមុន និងក្រោយពេលមកដល់កម្ពុជា។
បន្ទាប់ពីការបញ្ជាក់ពីការធ្វើតេស្តវិជ្ជមានក្នុងចំណោមកីឡាករមួយចំនួន ការសម្រេចចិត្តមួយត្រូវបានធ្វើឡើងដើម្បីដកក្រុមចេញពីការប្រកួត ដើម្បីជួយកាត់បន្ថយហានិភ័យនៃការឆ្លងបន្ថែមទៀត។ កីឡាករ និងបុគ្គលិកដែលត្រូវបានគេកំណត់ថាជាអ្នកមានទំនាក់ទំនងជិតស្និទ្ធ ក៏ត្រូវបានដាក់ឱ្យនៅដាច់ដោយឡែកសម្រាប់ការសង្កេតបន្ថែមផងដែរ។
នាយឧត្តមសេនីយ៍ ខៀវ សាម៉េត ប្រធានសហព័ន្ធកីឡាបាល់ទាត់កម្ពុជា (AFF) មានប្រសាសន៍ថា៖ «ពិតជាមានការសោកស្តាយជាខ្លាំង ដែលក្រុម U23 មីយ៉ាន់ម៉ា ត្រូវដកខ្លួនចេញពីពានរង្វាន់ AFF U23 Championship។ យើងយល់ថាក្រុមនេះកំពុងព្យាយាមចាប់ផ្តើមយុទ្ធនាការរបស់ពួកគេ ហើយអ្នកគាំទ្របានអន្ទះសារចង់ចាប់ក្រុមឱ្យធ្វើសកម្មភាព។ ទោះជាយ៉ាងណាក៏ដោយ សុខភាព និងសុវត្ថិភាពរបស់អ្នកគ្រប់គ្នាដែលពាក់ព័ន្ធគឺមានសារៈសំខាន់បំផុត ហើយយើងយល់ច្បាស់អំពីការសម្រេចចិត្តដែលបានធ្វើឡើង។ យើងសូមជូនពរសមាជិកដែលរងផលប៉ះពាល់បានជាសះស្បើយពេញលេញ និងឆាប់រហ័ស»។
មីយ៉ាន់ម៉ា គ្រោងនឹងចាប់ផ្តើមយុទ្ធនាការរបស់ពួកគេក្នុងពូល B នៅថ្ងៃទី ១៥ ខែកុម្ភៈ ទល់នឹងម៉ាឡេស៊ី។ កាលវិភាគប្រកួតដែលត្រូវបានកែសម្រួលនឹងត្រូវប្រកាសក្នុងពេលឆាប់ៗនេះ។
ប្រភព៖ Asean Football
