ខ្សែបម្រើ Mustafa Zazai របស់ ក្លិបបឹងកេត នៅតែគិតថា ក្រុមនាគខៀវជាបេក្ខភាពឈានមុខគេក្នុងការឈ្នះពានរង្វាន់លីគកំពូលកម្ពុជានៅក្នុងរដូវកាលនេះ។

បឹងកេត ចាប់ផ្តើមរដូវកាលមិនបានល្អឡើយ ដោយបច្ចុប្បន្នពួកគេកំពុងឈរនៅក្នុងចំណាត់ថ្នាក់លេខ៦ និង តាមរយៈលទ្ធផលឈ្នះ១ និង ចាញ់២ប្រកួត ដោយកាលពីថ្ងៃសៅរ៍នេះ បានរង់បរាជ័យយ៉ាងធ្ងន់ធ្ងរក្រោមថ្វីជើង ក្រុមព្រះខ័នរាជស្វាយរៀង ក្នុងលទ្ធផល ៤ទល់នឹង០។

ថ្លែងប្រាប់ Cambodia 2023 Zazai បាននិយាយថា៖«យើងចាប់ផ្តើមយ៉ាងល្អជាមួយនឹងការឈ្នះលើណាហ្គាវើលដ៍។ ខ្ញុំគិតថាការប្រកួតទល់នឹង Tiffy Army យើងមិនគួរចាញ់នោះទេ។ យ៉ាងហោចណាស់ ការស្មើ គឺជាលទ្ធផលដែលសក្តិសម ប៉ុន្តែនេះគឺជាបាល់ទាត់»។

«ព្រះខ័នរាជស្វាយរៀង ប្រកួតជាមួយយើងធ្វើបានល្អណាស់ ហើយគេសមនឹងទទួលជ័យជម្នះ។ យើងត្រូវតែរៀនពីកំហុសរបស់យើង ហើយខ្ញុំប្រាកដថា យើងនឹងធ្វើវាបាន។ ក្នុងការប្រកួតបន្ទាប់ យើងនឹងធ្វើបានល្អជាងនេះ។ យើងមានឱកាសពីរបីដង ក្នុងការរកគ្រាប់បាល់ ប៉ុន្តែយើងធ្វើមិនបានសម្រេច។ យើងមានកីឡាករល្អ និងមានគុណភាពក្នុងក្រុម ដូច្នេះខ្ញុំប្រាកដថា យើងនឹងរកគ្រាប់បាល់បានក្នុងការប្រកួតបន្ទាប់»។ 

«ខ្ញុំគិតថា វាដូចជាឆាប់ពេក ដែលនិយាយថា ក្រុមណានឹងឈ្នះពាននៅឆ្នាំនេះ។ សម្រាប់ខ្ញុំ ខ្ញុំជឿថា វានឹងក្លាយជារដូវកាលដ៏តានតឹង។ ព្រះខ័នរាជស្វាយរៀង នឹងបាត់បង់ពិន្ទុនៅឆ្នាំនេះ ដូច្នេះខ្ញុំនៅតែជឿជាក់លើក្រុមរបស់ខ្ញុំ។ យើងមានក្រុមខ្លាំងមួយដើម្បីប្រជែងជើងឯក»៕

ក្រុមហ៊ុនខេមបូឌានព្រីមៀរលីគ ចាប់ផ្ដើមប្រកាសទទួលពាក្យក្រុមចូលរួមប្រកួតពានរង្វាន់លីគខាប់ ឆ្នាំ២០២២ ដោយការប្រកួតគ្រោងធ្វើពីថ្ងៃទី៣០ ខែមេសា ដល់ថ្ងៃទី២៦ ខែឧសភា ឆ្នាំ២០២២នេះហើយ។

ក្រុមដែលអាចចូលរួមបានគឺក្រុមទាំង៨ នៃខេមបូឌានព្រីមៀរលីគ ( Cambodian Premier League) ឆ្នាំ២០២២ និងក្រុមចំណាត់ថ្នាក់លេខ១ ដល់លេខ៨ នៃកម្ពុជាលីគ២( Cambodian League 2 ឆ្នាំ២០២២)

ចំណែក​អំពី​គោលការណ៍នៃការចុះបញ្ជីកីឡាករសម្រាប់​ពាន​រង្វាន់​ថ្មីស្រឡាងមួយ​នេះ គឺចាប់ពីអាយុ ១៦ឆ្នាំឡើងទៅសម្រាប់​កីឡាករខ្មែរ ហយើយចំណែកឯ កីឡាករបរទេសអាចចុះបញ្ជីបាន ៤នាក់។ កីឡាករបរទេសបួន​នាក់​នោះអាចដាក់ឲ្យចូលលេងបានទាំង ៤នាក់ តែត្រូវមានកីឡាករអាស៊ីម្នាក់ដាច់ខាត៕

តាមការ​ប្រកាស​ផ្លូវការ​ពីសមាគមក្លិបកីឡាបាល់ទាត់ សៀមរាប យូណាយធីត ដែល​បានជូនដំណឹងដល់សាធារណជន អ្នកស្នេហាវិស័យកីឡាបាល់ទាត់ជាតិ ឯកឧត្ដម​ ឧត្ដមនាវី​ឯក​ ទៀ​ សុខា ​មេបញ្ជាការ​រ​ងកង​ទ័ព​ជើង​ទឹក​ និង​ជា​មេបញ្ជាការ​ទី​បញ្ជាការ​ជួរមុខនៃ​គណៈកម្មា​ធិការ​​ជា​តិ​សន្តិសុខ​លម្ហសមុទ្រ បានផ្តល់ជាកិត្តិយសជា ប្រធានកិត្តិយសរបស់ក្លិប ចាប់ពីពេលនេះតទៅ។

សម្រាប់​ពេល​វេលា​នៃ​ការ​ធ្វើ​ជាប្រធាន​កិត្តិយសរបស់​ក្លិប​នេះ​គឺ​គ្មានកាល​កំណត់​ទេ​សម្រាប់លោក។ ការចូលរួមរបស់ ឯកឧត្ដម​ ឧត្ដមនាវី​ឯក​ ទៀ​ សុខា ជាការរួមចំណែកមួយផ្នែកធំនៅក្នុងការអភិវឌ្ឍយុវជនថ្នាលនៅក្នុងខេត្តសៀមរាប ។​លោក​នឹង​ជួយរក​ក្រុមហ៊ុនសហការ​ ឬ​ម្ចាស់ឧបត្ថម្ភ​ដល់​ក្លិបបាល់​ទាត់ និង​ទទួល​ដឹង​លឺ​ស្ថិត​ពី​ការ​រៀបចំផ្សេងៗទាក់​ទងប្រត្តិបត្តិការណ៍​នានារបស់​ក្លិបក្នុងន័យដើម្បីលើកស្ទួយវិស័យកីឡាបាល់ទាត់កម្ពុជា ពិសេសវិស័យបាល់​ទាត់​ក្នុងខេត្តសៀមរាបតែម្ដង។

សមាគមក្លិបកីឡាបាល់ទាត់ សៀមរាប យូណាយធីតគឺ​ជាក្លិប​បាល់​ទាត់​មួយ​ដែល​បង្កើតឡើង​កាល​ពី​ឆ្នាំ២០១៩ មាន​មូលដ្ឋាន​នៅ​ខេត្តសៀមរាប​មាន​កីឡដ្ឋាន​ហនុមាន ដែល​ជាកម្ម​សិទ្ធិរបស់​ក្លិបផ្ទាល់ ដេល​ទើប​តែ​ទទួលបាន​ការ​ឧបត្តម្ភ​ពីក្រុមហ៊ុនស្រាបៀ ហនុមាន ហើយ​ក្នុងពាន​រង្វាន់លីគ​កំពូលកម្ពុជា៣​សប្ដាហ៍​ក្នុងរដូវ​កាល​ថ្មី​នេះ​ កីឡដ្ឋាន​របស់​ក្លិប​មួយនេះ​ទទួល​បាន​អ្នក​គាំទ្រចូល​ទស្សនាច្រើន​ជាង​គេបំផុត​៕

ជម្រើសជាតិបាល់​ទាត់ហ្វូតសាលកម្ពុជានឹងត្រូវចូលរួម​ក្នុងពាន​រង្វាន់ AFF Futsal Championship 2022 ខណៈដែលកាលបរិច្ឆេទប្រកួតនឹង​ចាប់ផ្ដើម០២ ដល់ថ្ងៃ​ទី១០​ខែមករាឆ្នាំ២០២២ នៅ​ទីក្រុងបាងកកងប្រទេស​ថៃ ។ មុន​ការ​ប្រកួត​នេះមក​មើល​តារាងចំណាត់​ថ្នាក់ពិភណលោក​នៃជម្រើស​ជាតិ​កម្ពុជានិង​ប្រទេស​នៅ​អាស៊ាន។

ក្នុងពិភពលោក​ កម្ពុជាយើង​ស្ថិត​ក្នុងចំណាត់​ទី១០៩ ហើយ​នៅ​អាស៊ី​កម្ពុជាជាប់​ចំណាត់​ថ្នាក់២៩ និង​នៅ​អាស៊ាន​ឈរលេខ៧ មានពិន្ទុសរុប៥៨៨ពិន្ទុ។ ថៃ​ឈលេខ១នៅ​អាស៊ាន លេខ៣នៅ​អាស៊ី និង​លេខ២០​នៅពិភពលោក។

សម្រាប់ពានរង្វាន់ AFF Futsal Championship ឆ្នាំនេះ កម្ពុជាស្ថិតក្នុងពូល A ជាមួយម្ចាស់​ផ្ទះថៃ ម៉ាឡេស៊ី ឥណ្ឌូនេស៊ី និងប្រ៊ុយណេ DS។ ពូល B មាន វៀតណាម មីយ៉ាន់ម៉ា ទីម័រខាងកើត និងអូស្ត្រាលី។ ក្រុម​កំពូល​ទាំង​បី​នឹង​ទទួល​បាន​សំបុត្រ​ទៅ​ប្រកួត AFC Futsal Championship នៅ​ចុង​ឆ្នាំ​នេះ។

ក្រុម​ជម្រើស​ជាតិហ្វូតសាល​ថៃ​ស្ថិត​ក្នុង​ទម្រង់​នៃ​ការ​ជឿ​ជាក់​ មុន​ការ​ប្រជែង​ក្នុង​ការ​ប្រកួត​ពាន​រង្វាន់ AFF Futsal Championship 2022 ដែល​ប្រព្រឹត្ត​ទៅ​នៅ​ថ្ងៃ​ទី 2-10 ខែ​មេសា ឆ្នាំ 2022 នៅ​កីឡដ្ឋាន Indoor Stadium Huamark ក្នុង​ទីក្រុង​បាងកក។

នេះមិនមែនត្រឹមតែការឈ្នះជើងឯក NSDF Futsal Invitation Championship របស់ថៃកាលពីពីរថ្ងៃមុនប៉ុណ្ណោះទេ ប៉ុន្តែការទទួលជ័យជម្នះយ៉ាងទូលំទូលាយរបស់ពួកគេលើអ៊ីរ៉ង់បានចាក់បញ្ចូលនូវទំនុកចិត្តបន្ថែមទៀតដល់ក្រុមដែលធ្លាប់ដណ្តើមបានពាន ១៥គ្រឿងក្នុងចំណោម ១៦​លើកនៃជើងឯកបាល់ទាត់ហ្វូតសាលអាស៊ាន។

ថៃ​បាន​យក​ឈ្នះ​ក្រុម​កំពូល​អាស៊ី​អ៊ីរ៉ង់ ៣-០ នៅ​វគ្គ​ផ្ដាច់ព្រ័ត្រ ដើម្បី​លើក​ពាន NSDF។ លោក Carlos Cesar គ្រូបង្វឹកក្រុមបាល់ទាត់ជម្រើសជាតិថៃបានមានប្រសាសន៍ថា៖ “នេះ (NSDF Futsal Invitation) គឺជាការប្រកួតកម្ដៅសាច់ដុំដ៏សំខាន់មួយ ដោយសារវាបានអនុញ្ញាត​ឱ្យយើងរៀបចំខ្លួនបានប្រសើរជាងមុនសម្រាប់ AFF Futsal Championship និង SEA Games”។

«ក្នុងរយៈពេល 4 សប្តាហ៍ជាមួយគ្នានេះ ក្រុមការងារបានឃើញភាពប្រសើរឡើងជាច្រើន ហើយកីឡាករជាច្រើនធ្វើបានល្អ (នៅ NSDF)» ។

«សំខាន់ជាងនេះទៅទៀត ពួកយើងបានយកឈ្នះក្រុមជម្រើសជាតិអ៊ីរ៉ង់ក្នុងវគ្គផ្តាច់ព្រ័ត្រ ដែលជាក្រុមកំពូលនៅអាស៊ី។ ដូច្នេះ​យើង​ពេញ​ចិត្ត​នឹង​ទម្រង់​លេង​របស់​កីឡាករ​ទាំង​អស់»។

សម្រាប់ពានរង្វាន់ AFF Futsal Championship ឆ្នាំនេះ ថៃស្ថិតក្នុងពូល A ជាមួយម៉ាឡេស៊ី ឥណ្ឌូនេស៊ី កម្ពុជា និងប្រ៊ុយណេ DS។ ពូល B មាន វៀតណាម មីយ៉ាន់ម៉ា ទីម័រខាងកើត និងអូស្ត្រាលី។ ក្រុម​កំពូល​ទាំង​បី​នឹង​ទទួល​បាន​សំបុត្រ​ទៅ​ប្រកួត AFC Futsal Championship នៅ​ចុង​ឆ្នាំ​នេះ។ លោក​បាន​បន្ថែម​ថា៖

«យើង​នៅ​មាន​ពេល​វេលា​ដើម្បី​កែ​តម្រូវ​មុន​ការ​ប្រកួត AFF Futsal Championship»។

«Muhammad Osamanmusa នឹង​ចូល​រួម​ក្រុម​នៅ​ចុង​សប្តាហ៍​នេះ ហើយ​ជា​កន្លែង​ដែល​គាត់​នឹង​ក្លាយ​ជា​តួ​សំខាន់​សម្រាប់ AFF Futsal Championship និង​ស៊ីហ្គេម​ផង​ដែរ»៕

មិនមានកីឡាករ Manchester United ផ្សេងទៀតបានធ្វើ​ការតាម​ដាក់សម្ពាធ( Pressing) ទៅ​លើ​ក្រុមគូប្រកួតច្រើនដងដូច Fred ក្នុងរដូវកាលនេះទេ នេះបើតាមការរាយការណ៍របស់ Manchester Evening News។

គាត់បានចាប់ផ្តើមក្នុងជម្រើស១១នាក់ក្នុងការប្រកួតចំនួន 27 លើ​គ្រប់​ពានរង្វាន់ក្នុងឆ្នាំ 2021/22 ហើយ​នេះអាច​បញ្ជាក់បានថា វាជាភស្តុតាងដែលថាការ​ខិតខំ​និង​ទម្រង់​លេងរបស់កីឡាករប្រេស៊ីលរូបនេះកំពុងតែដំណើរការទៅក្នុងផែនការរបស់ Ralf Rangnick ។

លោក Rangnick ដែល​គេ​ចាត់​ទុក​ថាជាអ្នក​ប្រើ​ប្រាស់យុទ្ធសាស្រ្តបាល់​ទាត់ និងកលល្បិចជាប់​ពាក់​ព័ន្ធ​នឹង​ការ​ដាក់សម្ពាធ កៀបសង្កត់គូប្រកួតជា​ញឹកញាប់​បាន​អនុញ្ញាត​ឱ្យ Fred ធ្វើ​បាន​ល្អ​ក្នុង​តំបន់​បម្រើកណ្តាល ហើយ​ស្ថិតិរបស់​ខ្សែ​បម្រើ​រូប​នេះ​បាន​បង្កើត​ការ​ដាក់សម្ពាធ​សរុប 486 លើកនៅ​រដូវ​កាល​នេះ។

Bruno Fernandes គឺ​ជាកីឡាករបន្ទាប់ដែល​ដាក់​សម្ពាធគូប្រកួតច្រើន​ជាង​គេគឺ (467 លើក) ហើយ Scott McTominay (380លើក), Jadon Sancho (234លើក) និង Paul Pogba (233លើក)។

ប្រភព៖ MEN

កីឡាករ Mbarga Nkene Emmanuel ពិត​ជាបាន​បង្ហាញគុណផល​បាន​ល្អ​ក្នុង​៣​ប្រកួតដំបូងសម្រាប់​ក្រុមព្រះខ័នរាជស្វាយរៀង ដោយ​រូប​គេ​ជាតារាសំខាន់ ជាមួយ​និង​ការ​នាំលេង ដឹកនាំក្រុមក្នុងតំបន់​ប្រយុទ្ធ​ជួយក្រុមមាន​មូលដ្ឋាន​នៅ​ភាគអាគ្នេយ៍​នៃ​ប្រទេស​ក្តោបក្ដាប់​បាន​៩ពិន្ទុពេញក្នុងបាន​រង្វាន់ Cambodian Premier League ២០២២នេះ។

តាមរយៈសារឆ្លើយឆ្លងជាមួយ B8 Sport ប្អូនប្រុសរបស់​អតីតតារាឆ្នើម Privat Mbarga រូបនេះថា៖« ពួកយើងមានការប្រកួតល្អណាស់កាលពីម្សិលមិញ ។ យើងអាចយក 3 ពិន្ទុបាន ហើយប្តូរប្រវត្តិសាស្រ្តតាំងពីឆ្នាំ 2015 ។ ក្រុមពិតជាធានាបាន​នូវ​លទ្ធផ​លល្អសម្រាប់អ្នកគាំទ្រ។ យើង​បាន​គ្រប់​គ្រងការ​ប្រកួត ហើយ​មាន​ការ​ផ្លាស់​ប្តូ​រ​ខ្លះ។ ​យើង​លេង​ដោយ​ការ​គោរពគូប្រកួត ​និងតាមរយៈ​វិធី​ល្អ​បំផុត​»។

ជាការ​កត់សម្គាល់! Emmanuel ពិត​ជាលេង​បាន​ល្អ​ពេល​ចាប់​ដៃគូក្នុងតំបន់​ប្រយុទ្ធជាមួយខ្សែប្រយុទ្ធជម្រើសជាតិកាណាដា Marcus Haber ទោះ​បី​ជា​ពួក​គេហ្វឹកហាត់​និង​លេង​ជាមួយគ្នាក្នុងេយៈពេលខ្លីក៏ដោយ។ ពេល​សួរ​ថា​កត្តាអ្វីធ្វើឱ្យអ្នកលេង​បាន​ល្អ​ពេល​ចាប់ដៃគូក្នុងតំបន់ប្រយុទ្ធជាមួយ Marcus រូប​គេ​ឆ្លើយថា៖

«Marcus Haber ជាកីឡាករដែលមានគុណភាព និងបទពិសោធន៍ច្រើន ដែលធ្វើឱ្យខ្ញុំក្លាយជាកីឡាករសំខាន់ក្នុងក្រុម ហើយ​កីឡាករដទៃ​ទៀតជាមិត្តរួមក្រុមរបស់ខ្ញុំ។ ពួកគេលេងដោយ​ផ្ដោត​លើគុណភាពរបស់ខ្ញុំ ហើយដែលធ្វើឱ្យខ្ញុំអាចលេងបានតាមចិត្ត និង​មាន​សេរីភាព។ និយាយពីគុណសម្បត្តិ ខ្ញុំគិតថាយើងទាំងអស់គ្នាជាកីឡាករសំខាន់នៅក្នុងក្រុម»។

«ខ្ញុំ​ជា​ដៃគូ​ដែល​យល់​ចិត្ត​គ្នា ព្រោះ​ខ្ញុំ​លេង​ឱ្យ​អស់ពី​សមត្ថភាពជាមួយមិត្ត​រួម​ក្រុម ហើយ​វា​គឺ​តាម​រយៈ​ការ​ធ្វើ​ការ​រួម​គ្នា​ក្នុង​ការ​ហ្វឹក​ហាត់​ដែល​ខ្ញុំ​ដឹង​ពី​គុណ​សម្បត្តិ​របស់​មិត្ត​រួម​ក្រុម ពិសេសគុណភាពរបស់ Haber»។

ជាចុងក្រោយ​! កីឡាករសញ្ជាតិកាម៉េរូនរូបនេះក៏មាន​សារមួយ​សម្រាប់​អ្នក​គាំទ្រផង​ដែរ៖«ខ្ញុំសូមអរគុណអ្នកគាំទ្រចំពោះការគាំទ្រដែលផ្តល់ឱ្យក្លឹប និងបុគ្គលិកគ្មានអ្វីច្រើន​នោះ​ទេ ដោយ​គ្រាន់​តែ​ពាក្យថាអរគុណសម្រាប់​ការ​គាំទ្រ មក​ទស្សនាផ្ទាល់ ហើយពួកយើងបន្ត​ទៅមុខជាមួយគ្នា។ ខ្ញុំស្រលាញ់ព្រះខ័នស្វាយរៀង»៕

ខ្សែការពារសញ្ជាតិជប៉ុន Takaki Ose របស់ ភ្នំពេញក្រោន បានបង្ហាញអំពីចាប់អារម្មណ៍មកខ្លួនមកលើក្រុមក្រោយទទួលរង់បរាជ័យក្រោមថ្វីជើង ក្លិបអង្គរថៃហ្គឺរ កាលពីថ្ងៃសៅរ៍។

ភ្នំពេញក្រោន បានចាញ់ អង្គរថៃហ្គឺរ ក្នុងលទ្ធផល ៤ទល់នឹង២ ហើយ ឆ្លងកាត់៣ប្រកួតមកនេះ ក្នុងនាមជាក្រុមការពារតំណែងជើងឯក គឺ ពួកគេមិនទាន់ស្គាល់រសជាតិឈ្នះនៅឡើយទេ ក្នុងនោះមាន ចាញ់២ និង ស្មើ១ ហើយ ក្រុមកំពុងឈរនៅលេខរៀងទី៧។

ថ្លែងប្រាប់ The Morning Takaki បាននិយាយថា៖«ខ្ញុំខកចិត្តយ៉ាងខ្លាំងណាស់ចំពោះលទ្ធផលនេះ។ យើង មិន មែន ជា ក្រុម មិនល្អនោះទេ គឺ វា គ្រាន់ តែ ជា ថ្ងៃ ដ៏ អាក្រក់ មួយ ប៉ុណ្ណោះ។ ទោះជាយ៉ាងណាក៏ដោយ យើងនឹងមិនផ្លាស់ប្តូរអ្វីដែលយើងត្រូវធ្វើនោះទេ ហើយ យើងនឹងបន្តធ្វើវាឱ្យប្រសើរឡើង។ រាល់ពេលយើងធ្វើអ្វីដែលយើងត្រូវធ្វើ នោះ លទ្ធផលនឹងមកដល់តាមក្រោយ»៕