Cristiano Ronaldo បាននិយាយនៅក្នុងបទសម្ភាសន៍ផ្តាច់មុខរបស់គាត់សម្រាប់កម្មវិធី Piers Morgan Uncensored ថា៖ «ខ្ញុំមិនមានការគោរពចំពោះ Erik ten Hag ទេ ពីព្រោះគាត់មិនបង្ហាញការគោរពចំពោះខ្ញុំ» ។

«​បើ​អ្នក​មិន​គោរព​ខ្ញុំ ខ្ញុំ​នឹង​មិន​មាន​អ្វី​សម្រាប់​អ្នក​ឡើយ»។

Ronaldo បាន​ក្លាយ​ជា​កីឡាករ​បម្រុង​ក្រោម​ការ​ដឹក​នាំ​របស់​អ្នក​ចាត់​ការ​ថ្មី ដោយ​បាន​ចាប់​ផ្តើម​លេង១១នាក់​បាន​ត្រឹម​តែ​បួន​ប៉ុណ្ណោះ​ក្នុង​ចំណោម​ការ​ប្រកួត​លីក​ចំនួន 14 ដែល​អាច​ធ្វើ​បាន​សម្រាប់ Manchester United ក្នុង​រដូវ​កាល​នេះ​។

ខ្សែ​ប្រយុទ្ធ​រូប​នេះ​ក៏​បរាជ័យ​ក្នុង​ការ​បង្ហាញ​ខ្លួន​ក្នុង​ការ​ប្រកួត​មុន​រដូវ​កាល​ទាន់​ពេល​ដែរ ដោយ​លើក​ឡើង​ពី​ហេតុផល​គ្រួសារ និង​ធ្លាប់​បាន​ចាក​ចេញ​ពី​ទីលាន​មុន​ចប់​ការ​ប្រកួត។

ប្រភព៖ Fabrizio Romano

Memphis Depay គឺជាកីឡាករតែម្នាក់គត់ដែល Barcelona ពិចារណាលក់ក្នុងខែមករា នេះបើយោងតាមលោក Jordi Carne របស់ស្ថាប័ន Diario Sport។

បន្ថែមពីលើការចូលនិវត្តន៍របស់ Gerard Pique ការចាកចេញរបស់កីឡាករសញ្ជាតិហូឡង់រូបនេះនឹងអនុញ្ញាតឱ្យក្លឹបចុះឈ្មោះកីឡាករថ្មីដែលមានសក្តានុពល ខណៈដែលក្រុមមានមូលដ្ឋាននៅ Catalans ចង់ពង្រឹងក្រុមនៅក្នុងខែមករា។

កិច្ចសន្យារបស់ Memphis នឹងផុតកំណត់នៅចុងបញ្ចប់នៃរដូវកាលនេះ ហើយ Barca មិនត្រូវបានគេរំពឹងថានឹងផ្តល់ឱ្យគាត់នូវការបន្តនោះទេ។ ដូចកាលពីរដូវក្តៅដែរ ក្លឹបអាចពិចារណាអនុញ្ញាតឱ្យ Depay ចាកចេញដោយឥតគិតថ្លៃ។

សូម្បីតែពេលគ្មានរបួសក៏ដោយ Xavi មិនបានពឹងផ្អែកលើ Memphis ទេ។ ខ្សែ​ប្រយុទ្ធ​រូប​នេះ​លេង​បាន​តែ​១៣១​នាទី​ប៉ុណ្ណោះ​ក្នុង​ការ​ប្រកួត​៣​ប្រកួត​ដោយ​ស៊ុត​បញ្ចូល​ទី​បាន​មួយ​គ្រាប់។

Karim Benzema និង Cristiano Ronaldo មានអាជីពជោគជ័យមិនគួរឱ្យជឿក្នុងអំឡុងពេល 9 ឆ្នាំរួមគ្នានៅ Real Madrid ។ ក្រៅ​ពី​រួម​បញ្ចូល​គ្នា​បាន​យ៉ាង​ល្អ​នៅ​លើ​ទីលាន អ្នក​ទាំង​ពីរ​ហាក់​មាន​ទំនាក់​ទំនង​ដ៏​កក់ក្តៅ​នៅ​ក្រៅ​ទីលាន​ផង​ដែរ។

នៅក្នុងបទសម្ភាសន៍ថ្មីៗនេះជាមួយ Telefoot កីឡាករ Benzema ត្រូវបានគេសួរថាតើ Cristiano បានអបអរសាទរគាត់រួចហើយក្នុងការឈ្នះ Ballon d’Or នាពេលថ្មីៗនេះដែរឬទេ។

Karim ឆ្លើយថា “អត់ទេ មិនទាន់ទេ”។ (h/t Mundo Deportivo)

អ្នក​សម្ភាសន៍​បាន​អត្ថាធិប្បាយ​ថា៖ «វា​មិន​ល្អ​ពេក​ទេ»។

ខ្សែប្រយុទ្ធ Madrid បាននិយាយបែបកំប្លែងថា “អត់ធ្មត់សិនទៅ”។

កីឡាករសញ្ជាតិព័រទុយហ្គាល់រូបនេះបានឈ្នះ Ballon d’Ors ចំនួនប្រាំដង ហើយ Benzema ប្រាកដជាបានរួមចំណែកឱ្យគាត់ក្នុងការ​ឈ្នះនោះ ដូច្នេះវាចម្លែកដែរដែល Cristiano មិនទាន់បានផ្ញើសារទៅកាន់អតីតមិត្តរួមក្រុមរបស់គាត់។

ទោះជាយ៉ាងណាក៏ដោយ ខ្សែប្រយុទ្ធទាំងពីរនឹងស្ថិតនៅក្នុងប្រទេសកាតា សម្រាប់ការប្រកួតបាល់ទាត់ពិភពលោកឆ្នាំ 2022 ប្រហែលជា Ronaldo នឹង​ទាញយកប្រយោជន៍ពីឱកាសនេះ ហើយទាក់ទងជាមួយ Big Benz ផង​ក៏មិនដឹង។

ប្រភព៖ Mundo Deportivo

Barcelona ត្រូវបានគេរាយការណ៍ថាកំពុងតាមដានស្ថានភាពកិច្ចសន្យារបស់ Alejandro Garnacho នៅ Manchester United ។ យោងតាមរបាយការណ៍របស់ Fichajes ក្លិបមានមូលដ្ឋាននៅ Catalans សង្ឃឹមថានឹងទទួលបានគាត់ដោយឥតគិតថ្លៃ។

Garnacho បានបង្ហាញថ្វីជើងគួរឱ្យចាប់អារម្មណ៍កាលពីពេលថ្មីៗនេះ ស៊ុតបញ្ចូលទីបានមួគ្រាប់ និង Assist ពីរដងក្នុង 3 ប្រកួតចុងក្រោយរបស់គាត់សម្រាប់ United ។ ហាងឆេងរបស់កីឡាករយុវជនរូបនេះបានកើនឡើងយ៉ាងខ្លាំង ហើយបានទាក់ទាញចំណាប់អារម្មណ៍របស់ក្លិបកំពូល ៗនៅអឺរ៉ុប។

អញ្ចឹងក៏ដោយ បិសាចក្រហមត្រូវបានគេនិយាយថាកំពុងពិភាក្សាលើកិច្ចសន្យាថ្មីរយៈពេល 5 ឆ្នាំសម្រាប់ Garnacho ដែលកិច្ចសន្យាបច្ចុប្បន្នផុតកំណត់នៅឆ្នាំ 2025 ។ ទោះបីជាមិនទំនងក៏ដោយ វាត្រូវបានគេអះអាងថា Barca នឹងរង់ចាំឱ្យកិច្ចព្រមព្រៀងផុតកំណត់។

ដោយធ្លាប់ហ្វឹកហាត់នៅថ្នាលយុវជនរបស់ Atletico Madrid កីឡាករ Garnacho បានចូលរួមជាមួយសាលាយុវជនថ្នាលរបស់ United ក្នុងឆ្នាំ 2020។ បន្ទាប់ពីមានការចាប់អារម្មណ៍ក្នុងកម្រិតយុវវជន គាត់បានចាប់ផ្តើមចូលរួមជាមួយក្រុមឈុតធំ រហូតដល់ចុងបញ្ចប់នៃរដូវកាលមុន ដោយបានបង្ហាញខ្លួនពីរដងក្នុងក្របខ័ណ្ឌ Premier League ។

Garnacho ក៏បានឈ្នះពានរង្វាន់កីឡាករវ័យក្មេង Jimmy Murphy របស់ក្លឹបផងដែរ។

ប្រភព៖ Fichajes

នៅក្នុងបទសម្ភាសន៍ជាមួយ Marca កីឡាករ Pedri បានបង្ហើបថា គាត់ចង់ឱ្យជំនាញនៃការស៊ុតបញ្ចូលទីរបស់គាត់កាន់​តែប្រសើរ​ឡើង ហើយកីឡាកររូប​នេះ​បាន​ចាត់​ទុកខ្សែបម្រើរបស់ Real Madrid Fede Valverde ជាឧទាហរណ៍ដើម្បីអនុវត្តតាម។

Pedri បានប្រាប់ Marca ថា៖ “បាទ មែនហើយ Fede ឥឡូវនេះកំពុងតែលេង​បាន​ល្អជាង​គេ ប៉ុន្តែវាច្បាស់ណាស់ថាគាត់គឺជាគំរូដ៏ល្អ។ ខ្ញុំត្រូវតែកែលម្អនៅក្នុងទិដ្ឋភាពនោះ”។

“ប្រសិនបើខ្ញុំមានចង្កៀងរបស់ Aladdin ខ្ញុំនឹងសុំឱ្យរកគ្រាប់បាល់បន្ថែមទៀត។ វាមិនមែនជាការគិតមមៃនោះទេ ទោះបីជាវាជាការពិត ដែលនៅក្នុងក្រុមជម្រើសជាតិខ្ញុំមិនទាន់បានស៊ុតបញ្ចូលទីក៏ដោយ។ វាគឺជាអ្វីដែលខ្ញុំដឹងថា ខ្ញុំត្រូវតែកែលម្អ ហើយខ្ញុំសង្ឃឹមថាគ្រាប់បាល់ដំបូងនឹងមកដល់ក្នុង World Cup»។

កាល​ពី​រដូវ​កាល​មុន Valverde រក​បាន​តែ​មួយ​គ្រាប់​គត់​ក្នុង​ការ​ប្រកួត​ចំនួន 46លើក។ ឥឡូវនេះគាត់ទទួលបាន ៨ គ្រាប់ក្នុង ២០ ប្រកួតប៉ុណ្ណោះ។ ប៉ុន្តែដូចដែល Pedri បានកត់សម្គាល់ត្រឹមត្រូវ កីឡាករអ៊ុយរូហ្គាយរូបនេះតែងតែលេងជាខ្សែបម្រើស្លាបស្តាំនាពេលបច្ចុប្បន្ន។

បើប្រៀបធៀបខ្សែបម្រើរបស់ Barcelona ពេល​នេះ Pedri រកបាន 3 គ្រាប់ក្នុង 19 ប្រកួត។ ក្នុង​រដូវ​កាល​មុន​ទាំង​ពីរ​បូក​បញ្ចូល​គ្នា កីឡាករ​វ័យ​ក្មេង​រូប​នេះ​រក​បាន​៩​គ្រាប់​ក្នុង​៧៤​ប្រកួត។ គាត់​ត្រូវ​ការ​ព្យាយាម​ឱ្យ​ខ្លាំង​ជាង​នេះ ប្រសិន​បើ​គាត់​ចង់ប្រៀបធៀបតួរលេខស៊ុតបញ្ចូលទីរបស់ Valverde។

ប្រភព៖ Marca

សេណេហ្គាល់​ចង់​ស្វែង​រក​គ្រូ​ពេទ្យ​វេទមន្តបុរាណព្យាបាលរបួស Sadio Mane ជា​បន្ទាន់។ ខ្សែ​ប្រយុទ្ធ Bayern Munich រូប​នេះ​បាន​រង​របួស​មុន​ការ​ប្រកួត World Cup ចាប់​ផ្តើម។

របួសរបស់គាត់ត្រូវបានគេរាយការណ៍ថាតម្រូវឱ្យគាត់ត្រូវសម្រាកយ៉ាងហោចណាស់ 4 សប្តាហ៍ឬមួយខែ។ អគ្គលេខាធិការ FIFA មកពីប្រទេសសេណេហ្គាល់ អ្នក​ស្រី Fatma Samoura បាននិយាយបែបនេះនៅក្នុងបទសម្ភាសន៍ជាមួយ Europe 1។ នាងបាននិយាយថា ពួកគេនឹងធ្វើគ្រប់យ៉ាងតាម​តែអាចធ្វើបាន ដើម្បីធានាថា Sadio Mane លេងក្នុង World Cup ឆ្នាំ 2022 ។

វា​មិន​មែន​ជារឿងចម្លែកទេ​សម្រាប់​ជនជាតិ​អាហ្វ្រិក​ ខណៈពួកគេនៅតែមានជំនឿយ៉ាងមុតមាំលើគ្រូធ្មប់ និង អ្នកចេះវេទមន្តរបស់ពួកគេ។ កាលពីប៉ុន្មានខែមុន Paul Pogba ដែលមានឈាមអាហ្រ្វិកបានសារភាពថា គាត់បានចំណាយប្រាក់រាប់លានដុល្លារជួលគ្រូធ្មប់ម្នាក់ដើម្បីការពារគាត់ពីរបួស។

ជាមួយនឹងវិធីសាស្រ្តនៃការព្យាបាលបែបទំនើប បានផ្តល់រយៈពេលនៃការជាសះស្បើយរបស់ Mane រួចហើយគឺប្រហែល 4 សប្តាហ៍  តែទីបំផុត Fatma បាននិយាយថាឥឡូវនេះពួកគេកំពុងស្វែងរកវិធីផ្សេងទៀតដើម្បីស្វែងរកគ្រូធ្មប់ដែលពូកែ ដែលអាចបន្ថយការឈឺចាប់របស់ Mane បាន។

ក្នុង​ការ​ប្រកួត​លើក​មុន​ជាមួយ Werder Bremen កីឡាករ​វ័យ​៣០​ឆ្នាំ​លេង​បាន​តែ​២០​នាទី​ប៉ុណ្ណោះ។ បន្ទាប់​មក​គាត់​បាន​អង្គុយ​លើ​វាល​ស្មៅដោយ​និយាយ​ថា​ជើង​គាត់​ឈឺ។ Fatma Samoura បាននិយាយថា៖ “វាជាដំណឹងដ៏ធំ និងសោកសៅណាស់” ។

អ្នកស្រី​បាន​បន្ថែម​ថា៖ «យើង​នឹង​ប្រើ​គ្រូ​ពេទ្យ​របស់​យើង​ដើម្បី​ព្យាបាល​គាត់»។ នៅពេលសួរថាតើគាត់មានទំនុកចិត្តថាវិធីសាស្ត្រនេះអាចជួយបានឬអត់នោះ Samoura បាននិយាយថា៖ “ខ្ញុំមិនដឹងទេ ប៉ុន្តែនៅពេលនេះយើងនឹងប្រឹងប្រែងឱ្យអស់លទ្ធភាព» ។

“យើងកំពុងសង្ឃឹមសម្រាប់អព្ភូតហេតុមួយ គាត់គួរតែនៅទីនោះ” ។

ទោះបីជាអញ្ចឹងក៏ដោយុ អ្នក​ចាត់​ការ​ក្រុម​ជម្រើស​ជាតិ​សេណេហ្គាល់ Alliou Cisse បាន​បញ្ចូលឈ្មោះ Sadio Mane ក្នុង​ក្រុម​របស់​គាត់។ Cisse បានត្រៀមខ្លួនរួចជាស្រេចក្នុងការនាំយក Mane ជាប្រធានក្រុម ហើយប្រសិនបើអាចធ្វើទៅបានគាត់​នឹង​អាច​បាន​ក្នុងការ​ប្រកួតទី៣ ប្រសិនបើកីឡាករអាចជាសះស្បើយលឿនជាងការរំពឹងទុកដំបូង។

លោក Conor Nestor នឹងត្រូវដឹកនាំក្រុមព្រះខ័នរាជស្វាយរៀងទៅជួបវិសាខា នៅកីឡដ្ឋានព្រីននាល្ងាចថ្ងៃសៅរ៍នេះ។ ជំនួបចុងក្រោយក្រុមមានមូលដ្ឋាន​មក​ពី​ខេត្តស្វាយរៀងទទួលបានត្រឹមមួយពិន្ទុពីវិសាខា ខណៈ Conor បាន​បង្ហាញទីដ្ឋភាពនានាជុំវិញការរៀបចំក្រុមសម្រាប់ការប្រកួតដ៏ធំមួយនេះ។

លោក​បាន​និយាយក្នុង​វេបសាយផ្លូវការរបស់ក្លិប មព្រះខ័នរាជស្វាយរៀងថា៖«ជាដំបូង អបអរសាទរ វិសាខា ដែលបានឈ្នះពាន Hun Sen Cup ៣ឆ្នាំជាប់គ្នា។ ពួក​គេ​បាន​បង្ហាញ​ឱ្យ​ឃើញ​នៅ​លើ​ទីលាន​ថា​ហេតុ​អ្វី​បាន​ជា​ពួក​គេ​មាន​កីឡាករ​ជម្រើស​ជាតិ​ច្រើន​ម្ល៉េះ។

«ការប្រកួតចុងក្រោយគឺជារឿងចាស់តែប៉ុណ្ណោះ។ រាល់ពេលដែលអ្នកលេងគូប្រកួតកំពូល អ្វីៗក៏អាចកើតឡើង ហើយការប្រកួត Hun ​Sen Cup បានបង្រៀនយើងថា ទោះបីជាអ្នកខំប្រឹងយ៉ាងណាក៏ដោយ ក៏អ្នកត្រូវការសំណាងដែរ»។

លោកបាន​បន្ត​ទៀត​ថា៖ «កីឡាកររបស់យើងកំពុងខិតខំប្រឹងប្រែងយ៉ាងខ្លាំង ដើម្បីធ្វើឱ្យអ្នកគាំទ្រសប្បាយចិត្ត យើងទន្ទឹងរង់ចាំជួបអ្នកទាំងអស់គ្នាម្តងទៀតនៅថ្ងៃសៅរ៍។ យើងទៅជាមួយគ្នា»។

អ្នកចាំទី អ៊ុំ សេរីរ័ត្ន និង ឃៀង ម៉េងហ៊ួ គឺត្រូវអវត្តមានដោយ​សារបួស ចំណែកឯ សំអឿន ពិដោរស្ថិតនៅសង្ស័យនៅឡើយថាអាចបានចូលលេងឬអត់។សម្រាប់ការ​ប្រកួតជម្រើសជើងឯកខេមបូឌានព្រីមៀរលីគ ឆ្នាំ២០២២ (សប្តាហ៍ទី២៣)នៅថ្ងៃសៅរ៍ ទី១២ ខែវិច្ឆិកា ឆ្នាំ២០២២  បឹងកេត​នឹងប្រកួតជាមួយ ភ្នំពេញក្រោននៅវេលាម៉ោង ១៥:៤៥នាទីរសៀល នៅកីឡដ្ឋាន ខេមបូឌាអ៊ែរវ៉េ ដែលផ្សាយផ្ទាល់ដោយ CPL។

ចំណែកវិសាខានិងព្រះខ័នរាជស្វាយរៀង ត្រូវ​ប្រកួតនៅម៉ោង ១៨:៣០នាទីល្ងាច នៅកីឡដ្ឋាន ព្រីនស៍ ដែលផ្សាយផ្ទាល់ TV5 Cambodia ។