លោក Dollah Salleh នេះហើយដែលបាននាំយកកីឡាករជម្រើសជាតិកម្ពុជា ចាន់ វឌ្ឃនាកាទៅលេងនៅ FA Pahang កាលពីឆ្នាំ២០១៨/២០១៩ មុនពេលចូលរួមជាមួយ PKNS FA ។
អ្នកគាំទ្រ Sri Pahang កំពុងចោទសួរការសម្រេចចិត្តរបស់អ្នកគ្រប់គ្រងក្រុមក្នុងការតែងតាំងលោក Dollah Salleh ជាគ្រូបង្វឹកឡើងវិញរហូតដល់ចុងបញ្ចប់នៃលីគម៉ាឡេស៊ីរដូវកាលនេះ។
Dollah ត្រលប់មកគ្រប់គ្រងក្រុម Sri Pahang វិញ បន្ទាប់ពីក្រុមបានបញ្ចប់តំណែងគ្រូបង្វឹកមុនគឺ Christophe Gamel ដោយសារការលេងមិនសូវល្អនៅក្នុង Super League ។ លើសពីនេះ Sri Pahang ក៏បានតែងតាំងវីរបុរសសិង្ហបុរី Fandi Ahmad ជាទីប្រឹក្សាបច្ចេកទេសរបស់ក្លឹបផងដែរ។
យោងតាមការស្ទង់មតិនៅលើបណ្តាញទំនាក់ទំនងសង្គម អ្នកគាំទ្របានចោទជាសំណួរថា ហេតុអ្វីបានជាក្រុមបន្តជឿជាក់លើ Dollah ក្នុងការដឹកនាំក្រុម នៅពេលដែលក្រុមមួយនេះធ្វើមិនបានល្អក្រោមការដឹកនាំរបស់គ្រូបង្វឹកកាលពីមុន។
កន្លងមកមានពាក្យចចាមអារ៉ាមថា Fandi នឹងត្រូវបានតែងតាំងជាគ្រូបង្វឹកជំនួស Gamel ហើយអ្នកគាំទ្រពិតជារំភើបចំពោះរឿងនេះ។ ទោះជាយ៉ាងណាក៏ដោយ ភាពផ្ទុយគ្នាបានកើតឡើងនៅពេលដែល Fandi ត្រូវបានតែងតាំងជានាយកបច្ចេកទេស ហើយ Dollah Salleh បានត្រលប់មកដឹកនាំក្រុមរហូតដល់រដូវកាល 2022 បិទ។
Sri Pahang បច្ចុប្បន្នកំពុងឈរនៅលេខរៀងទី 11 ក្នុងតារាង Super League ដោយមាន 8 ពិន្ទុបន្ទាប់ពីលេងបាន 11 ប្រកួត។ ពួកគេមានពិន្ទុលើសតែមួយគត់លើ Penang ដែលបច្ចុប្បន្នស្ថិតក្នុងចំណាត់ថ្នាក់ទី ១២។ សម្រាប់រដូវកាលក្រោយលីគកំពូលម៉ាឡេស៊ីនឹងផ្លាស់ប្តូរពី 12 ក្រុមទៅ 18 ក្រុម ហើយនឹងមិនមានការកាត់ចោលសម្រាប់ក្រុមបាត់តារាងនោះទេ។
ក្រុមសរុបចំនួន 18 នឹងចូលរួមក្នុងការប្រកួតប្រជែងកម្រិតកំពូលនៅរដូវកាលក្រោយ ដែលការប្រកួតក្របខ័ណ្ឌ Premier League នឹងត្រូវបានបញ្ឈប់ជាបណ្តោះអាសន្ន ហើយជំនួសដោយ Reserve League ដែលនឹងត្រូវបានបំពេញដោយក្រុមដែលមានកីឡាករក្រោមអាយុ 23 ឆ្នាំ៕
