ក្លិបបាល់ទាត់កម្ពុជាព្រះខ័នរាជស្វាយរៀង ដែលជាក្រុមកំពូលតារាងបណ្ដោះអាសន្ននៅលីគកំពូលកម្ពុជាCambodian Premier League គិតត្រឹមជុំទី១ បានបញ្ចប់យុទ្ធនាការប្រកួតមិត្តភាពអន្តរជាតិលើទឹកដីម៉ាឡេស៊ី Malaysia Tour 2022 ដោយទទួលបានជ័យជំនះគ្រប់ប្រកួតក្នុងចំណោម ២ប្រកួតរបស់ពួកគេជាមួយក្លិបលីគម៉ាឡេស៊ី ចាប់ពីថ្ងៃទី៩-១៥ ខែមិថុនា ឆ្នាំ២០២២នេះ។

ជ័យជម្នះទាំងពីរប្រកួតរបស់ព្រះខ័នរាជស្វាយរៀងលើទឹកដីម៉ាឡេស៊ី គឺបានឈ្នះក្រុមសមាជិកលីគកំពូលម៉ាឡេស៊ី PJ City FC ១ទល់នឹងសូន្យ ដោយទាត់បញ្ចូលទីពីខ្សែបម្រើ សួន សុវណ្ណ នៅថ្ងៃទី១០ ខែមិថុនានេះ ។ នៅប្រកួតទី២ព្រះខ័នរាជស្វាយរៀងនៅតែធ្វើបានល្អ ជាមួយក្រុមលីគ២ម៉ាឡេស៊ី UITM FC ដោយបន្តឈ្នះ១ទល់នឹងសូន្យទៀត ពីការរកគ្រាប់បាល់របស់ខ្សែការពារ សារ៉េត គ្រីយ៉ា ធ្វើឲ្យពួកគេបញ្ចប់ភារកិច្ច Malaysia Tour លើទឹកដីម៉ាឡេស៊ីដោយជោគជ័យមុនធ្វើដំណើរត្រឡប់មកកម្ពុជាវិញនាប៉ុន្មានថ្ងៃខាងមុខនេះ។

ក្រោយបញ្ចប់ភារកិច្ច Malaysia Tour 2022 លើទឹកដីម៉ាឡេស៊ីនេះ ក្លិបព្រះខ័នរាជស្វាយរៀងនឹងត្រូវចាប់ផ្ដើមបេសកម្មក្នុងការការពាដំណែងកំពូលតារាងរបស់ពួកគេនៅក្របខណ្ឌ Cambodian Premier League 2022 ដែលនឹងត្រឡប់មកវិញនូវសប្ដាហ៍ទី៨ ក្រោយសម្រាកតាំងពីចុងខែមេសាដោយសារការប្រមូលផ្ដុំរបស់ក្រុមជម្រើសជាតិឈុតយុវជន និងឈុតធំ។ តាមការគ្រោងទុកនៅថ្ងៃទី២៥ ខែមិថុនា ឆ្នាំ២០២២ ដែលព្រះខ័នរាជស្វាយរៀងត្រូវជួបគីរីវង់សុខសែនជ័យ នៅវេលាម៉ោង ០៣៖៤៥នាទី នាកីឡដ្ឋានគីរីវង់ នៅខេត្តតាកែវ៕