លោក Pep Guardiola ដែលជាអ្នកចាត់ការទូទៅក្លិប Manchester City បានបង្ហាញអំពីអារម្មណ៍សោកស្តាយដែលមិនអាចជួយក្រុមឡើងទៅកាន់វគ្គផ្តាច់ព្រ័ត្រនៃពានរង្វាន់ Champions League បាន។

Real Madrid បានកក់កៅអីឡើងទៅកាន់វគ្គផ្តាច់ព្រ័ត្រ Champions League ក្រោយយកឈ្នះ Man City កាលពីយប់មិញ ពីការរកគ្រាប់បាល់របស់ Rodrygo ក្នុងនាទីទី ៩០ និង ៩០+១ និង មួយគ្រាប់ប៉េណាល់ទីរបស់ Karim Benzema ក្នុងនាទីថែមម៉ោង១៥នាទីដង ដើម្បីជួយក្រុមទទួលបានជ័យជម្នះក្នុងលទ្ធផល ៣ទល់នឹង១ និង សរុបទាំងពីរជើង ៦ទល់នឹង៥។

លោក Guardiola បាន​ប្រាប់ BT Sport ដោយ​ប្រតិកម្ម​នឹង​ការ​បរាជ័យយប់មិញថា៖«ពួកយើងស្ទើរតែបានឡើងទៅវគ្គផ្តាច់ព្រ័ត្រទៅហើយ ប៉ុន្តែបាល់ទាត់គឺ មិនអាចទាយទុកមុនបានទេ។ ពេលខ្លះវាកើតឡើងបែបនេះ ហើយអ្នកត្រូវតែទទួលយកវា»។

«ជិតឡើងហើយហ្នឹង។ ប៉ុន្តែ​នៅ​ទី​បញ្ចប់ យើង​មិន​អាច​ទៅ​ដល់»។

« គេ​ដាក់​កីឡាករ​ជា​ច្រើន​ក្នុង​ប្រអប់​គឺ Rodrygo, Vinicius, Benzema, Asensio ដោយ​ឆ្លង​កាត់ទៅមក និង​ស៊ុត​ចូល​២​គ្រាប់»។

នៅ​ពេល​សួរ​អំពី​អារម្មណ៍​នៅ​ក្នុង​បន្ទប់​ផ្លាស់​ប្តូរ​របស់ City លោក Guardiola បាន​បន្ថែម​ថា៖ «ពួក​គេ​សោក​ស្តាយ។ ដោយសារតែយើងជិតឡើងទៅហើយ។ ឥឡូវនេះ យើងត្រូវការពេលវេលាដើម្បីដំណើរការ ហើយត្រលប់មកវិញនៅក្នុងហ្គេមចុងក្រោយរបស់យើង»៕