Diogo Dalot និង Victor Lindelof នឹងមានវត្តមានប្រឈមមុខនឹងក្រុម Wolves បន្ទាប់ពីត្រលប់មកហ្វឹកហាត់ជាមួយមិត្តរួមក្រុម Manchester United របស់ពួកគេវិញ ខណៈដែល​កីឡាករ​ម្នាក់ទៀត​នៅ​តែ​មិន​ទាន់​មាន​ដំណឹង។

Dalot បានរងរបួសនៅក្នុងការប្រកួតដែលព័រទុយហ្គាល់បរាជ័យក្នុងវគ្គ 1/4 ផ្តាច់ព្រ័ត្ក្រោមស្នាដៃក្រុមម៉ារ៉ុក និងខកខានការប្រកួតពីរលើកចុងក្រោយរបស់​បិសាចក្រហម ចាប់តាំងពីកាលវិភាគ Premier League ត្រលប់មកវិញ។ ក្នុងការអវត្តមានរបស់គាត់ Aaron Wan-Bissaka បានរីកចម្រើនឡើងវិញ។

ទន្ទឹមនឹងនោះ Lindelof មិនបានបង្ហាញខ្លួនក្នុងជ័យជម្នះ Premier League លើ Nottingham Forest ដោយសារតែជំងឺ។ មេរោគមួយបានរីករាលដាលពេញជំរុំហ្វឹកហាត់ ដោយ Harry Maguire និង Scott McTominay ក៏រងផលប៉ះពាល់ផងដែរ។

ការអវត្តមានរបស់ Lindelof មានន័យថា Luke Shaw បានលេងនៅតំបន់ការពារកណ្តាលនៅពាក់កណ្តាលសប្តាហ៍នេះ ប៉ុន្តែកីឡាករស៊ុយអែតអាចត្រលប់​មកក្រុមវិញសម្រាប់ការធ្វើដំណើរទៅកាន់ទឹក​ដី​របស់ Wolves ​ហើយ Lisandro Martinez ក៏បានត្រលប់ទៅ Carrington កាលពីថ្ងៃពុធ បន្ទាប់ពីបានជួយអាហ្សង់ទីនឈ្នះ World Cup ។

ទោះយ៉ាងណាក៏ដោយ Jadon Sancho នៅតែបាត់ខ្លួន។ កីឡាករសញ្ជាតិអង់គ្លេសរូបនេះមិនបានលេងឱ្យក្លឹបតាំងពីខែតុលាមក។ ការ​បាត់​ខ្លួន​របស់​គាត់​គឺសំងំស្ដារនីតីសម្បទា ផ្លូវ​ចិត្ត និង​ទម្រង់​លេង​នៅ​ប្រទេស​ហូឡង់ ហើយ​មិន​ទាន់មាន​ដំណឹង​ថា​ធូស្រាលមក​វិញ​នៅឡើយទេ។

ប្រភព៖ MEN