ក្លិបបាល់ទាត់បឹងកេតបានប្រកាសក្នុងបណ្ដាញសង្គមផ្លូវការរបស់ខ្លួនថា ពួកគេបានចែកផ្លូវគ្នាជាមួយអ្នកចាំទី ហ៊ុល គឹមហ៊ុយ និងខ្សែការពារស្លាប សេត រ៉ស៊ីបបន្ទាប់ពីចប់រដូវកាល២០២២នេះ។
អ្នកចាំទីហ៊ុល គឹមហ៊ុយបានមកចូលរួមជាមួយក្លិបបឹងកេតតាំងពីឆ្នាំ២០១៨ បន្ទាប់ពីបញ្ចប់ការហ្វឹកហាត់និងសិក្សាពីសាលាបាល់ទាត់ជាតិបាទី។ កីឡាកររូបនេះតែងតែជាអ្នកចាំទីដៃទីមួយរហូតមកនៅបឹងកេតបន្ទាប់ពីរៀមច្បង ស៊ូ យ៉ាទីចាកចេញមកលេងនៅណាហ្គាវើលដ៏។ ពេញមួយអាជីននៅបឹងកេតអ្នកចាំទីរូបនេះ ជួយក្លិបលើកពាន Hun Sen Cup ឆ្នាំ២០១៩ ពានរង្វាន់លីគកំពូលកម្ពុជាឆ្នាំ២០២០ ។
ចំណែកខ្សែការពារសេត រ៉ស៊ីបបានមកចូលរួមជាមួយបឹងកេតតាំងពីឆ្នាំ២០១៦ ក្រោយចាកចេញពីណាហ្គាវើលដ៏។ កីឡាកររូបនេះធ្លាប់ជួយក្លិបលើកពានលីគកំពូលកម្ពុជាឆ្នាំ២០១៧, ២០២០និងពានរង្វាន់ Hun Sen Cup ឆ្នាំ២០១៩ ព្រមទាំងពានរង្វាន់មួយចំនួនទៀត។
គេមិនដឹងទេថាតើកីឡាករទាំងពីររូបនេះ នឹងផ្ទេរទៅលេងនៅក្លិបណានោះទេ ក្នុងរដូវកាលក្រោយខណៈពួកគេចាកចេញពីបឹងកេតនេះសុទ្ធតែអស់សុពលភាពកុងត្រា៕
