ក្លិបបាល់​ទាត់​វិសាខា​នឹង​ចូលរួមក្នុងការ​ប្រកួតពានរង្វាន់លំដាប់អន្តរជាតិលើកដំបូងក្នុង​ប្រវត្តិសាស្រ្តរបស់ខ្លួន​ដោយ​ប្រកួតប្រជែងពាន AFC Cup វគ្គជម្រុះក្នុងពូល​G  ស្រប​ពេល​ខ្សែប្រយុទ្ធរ៉ឹង ប៊ុនហៀង​ថា​ក្រុមទាំងអស់ក្នុងពូលមាន​សមត្ថភាពប្រហាក់ប្រហែលគ្នា។

និយាយក្នុងសារ​ឆ្លើងឆ្លងជាមួយ B8 Sport កីឡាករទើប​ជាពី​របួសបាក់កជើងរូបនេះបាននិយាយថា៖«ចំពោះការ​ប្រកួតក្នុងពូលនេះ(ពូល​G)ខ្ញុំមើល​ឃើញថា​ក្រុមគេមិន​ប្រាកដ​ថា​ខ្លាំងជាង​យើង​នោះ​ទេ។ យើង​ក៏​មិន​ខ្សោយពេក​សម្រាប់​ពួក​គេ គឺសមត្ថភាពប្រដំប្រសងគ្នាតែប៉ុណ្ណោះ​។ បើ​យើងគិត​ថា​នរណាមាន​ប្រៀបជាងនរណានោះ គឺខ្ញុំមិនទាន់​អាច​និយាយបាន​ទេ តែ​ខ្ញុំគិតថា​ក្រុមយើង(វិសាខា) មិន​ខ្សោយ​ពេក​ទេ សម្រាប់​ពួក​គេ។ បើចង់​ដឹង​ច្បាស់​ទាល់តែចប់ការ​ប្រកួតទើប​អាច​និយាយបាន​ត្រូវ»។

ក្លិបបាល់​ទាត់​វិសាខានៅជាមួយក្រុមម្ចាស់​ផ្ទះ Bali United, Kadah Darul Aman, និង​ក្រុម​មកពីហ្វីលីពីន Kaya FC។​ប្រកួតបើក​ឆាក​ពួក​គេ​ត្រូវ​ជួបក្រុមមក​ពី​ហ្វីលីពីន Kaya FC នៅថ្ងៃទីសុក្រទី២៤ខែមិថុនាឆ្នាំ២០២២ វេលាម៉ោង៤​និង​០០នាទី​នៅកីឡដ្ឋាន Kapten I Wayan Dipta លើកោះបាលី ប្រទេសឥណ្ឌូនេស៊ី៕