ព័ត៌មានកីឡាអាស៊ី
(English) ក្រោយពីបញ្ចប់វគ្គសន្សំពិន្ទុក្នុងពូល A នៅទីបំផុតរកឃើញក្រុមដែលអាចឡើងទៅវគ្គ ៤ ក្រុមចុងក្រោយ នៃពានរង្វាន់ប្រចាំតំបន់អាស៊ាន ASEAN Club Championship ឆ្នាំ២០២៤ កាលពីយប់មិញ។ ក្នុងនោះក្រុម BG Pathum United (ថៃ) និង PSM Makassar (ឥណ្ឌូនេស៊ី) បានទ្បើងទៅវគ្គបន្ត ខណៈដែលក្រុមព្រះខ័នរាជស្វាយរៀង (កម្ពុជា), Terengganu FC (ម៉ាឡេស៊ី), Dong A Thanh Hoa FC (វៀតណាម) និង Shan United (ភូមា) សុទ្ធតែធ្លាក់ចេញពីពានរង្វាន់ខាងលើនេះ។
BG Pathum United បានបញ្ចប់ចំណាត់ថ្នាក់លេខ ១ ដោយមាន ១១ ពិន្ទុ ខណៈដែល PSM Makassar ជាក្រុមលេខ ២ ដោយមាន ១០ ពិន្ទុ។ ដូច្នេះហើយ ក្រុមលេខ ១ នៅក្នុងពូល A នឹងត្រូវប៉ះគ្នាជាមួយក្រុមលេខ ២ នៅក្នុងពូល B ខណៈដែល Cong An Hanoi FC (វៀតណាម) ដែលជាក្រុមស្ថិតនៅក្នុងពូល B ក៏បានកក់កៅអីទៅវគ្គពាក់កណ្តាលផ្តាច់ព្រ័ត្រ នៃពានរង្វាន់ខាងលើនេះផងដែរ បន្ទាប់ពីពួកគេស្ថិតនៅចំណាត់ថ្នាក់លេខ ១ ដោយមាន ១២ ពិន្ទុ និង Buriram United (ថៃ) ជាក្រុមលេខ ២ ដែលមាន ៧ ពិន្ទុ។ គួរបញ្ជាក់ថា សម្រាប់ការប្រកួតចុងក្រោយ នៃពានរង្វាន់ ASEAN Club Championship ឆ្នាំ២០២៤ នាវគ្គសន្សំពិន្ទុនៅក្នុងពូល B ក្រុម Buriram United (ថៃ) ប៉ះ Kuala Lumpur City (ម៉ាឡេស៊ី) , Cong An Ha Noi ) (វៀតណាម) ប៉ះ Borneo (ឥណ្ឌូនេស៊ី) និង Kaya (ហ្វីលីពីន) ប៉ះ Lion City (សិង្ហបុរី) នាថ្ងៃ០៦ ខែកុម្ភៈ ឆ្នាំ២០២៥ ផងដែរ៕
ព័ត៌មានកីឡាជាតិ
(English) គិតត្រឹមសប្តាហ៍ទី២០ ខ្សែប្រយុទ្ធ សៀង ចន្ធា របស់ក្លិបបឹងកេត នៅតែបន្តឈរឈ្មោះក្នុងនាមជាកីទ្បាករខ្មែរក្នុងតារាង Top Scorers នៃការរកគ្រាប់បាល់ច្រើនជាងគេនៅលីគកំពូលកម្ពុជា Cambodia Premier League សម្រាប់រដូវកាល ២០២៤-២៥។
សៀង ចន្ធា ដែលមានវ័យ ២២ ឆ្នាំខាងលើ ឆ្លងកាត់ការលេង ១៨ ប្រកួតនៅក្នុងលីគកំពូលកម្ពុជា Cambodia Premier League រូបគេបានក្លាយជាកីទ្បាករខ្មែរទី ១ ដែលរកគ្រាប់បាល់ច្រើនជាងគេ ពោលគឺគិតមកត្រឹមពេលនេះរូបគេរកបាន៩គ្រាប់ទៅហើយ។ ចន្ធា នៅតែបន្តឈរឈ្មោះក្នុងតារាង Top Scorers កំពូលអ្នកស៊ុតបញ្ចូលទីបានច្រើនជាងគេក្នុងនាមជាកីទ្បាករខ្មែរនៅចំណោមកីទ្បាករ ៤ នាក់ទៀត ដែលអាចរកគ្រាប់បាល់ចាប់ពី ៥ ទ្បើងទៅ មកពីក្លឹបផ្សេងគ្នាទាំង ១១ ក្នុងលីគកំពូលកម្ពុជា រួមមាន៖
១- សៀង ចន្ធា របស់ក្លិបបឹងកេត រកបាន ៩ គ្រាប់
២- ស រតនា របស់ក្លិបវិសាខា រកបាន ៨ គ្រាប់
៣- កាន់ ម៉ូ របស់ក្លិបវិសាខា រកបាន ៦ គ្រាប់
៤- ហៅ សុខណេត របស់ក្លិប អាយអេសអាយ រកបាន ៦ គ្រាប់
៥- ម៉ាត់ ណូរ៉ុន របស់ក្លិបបឹងកេត រកបាន ៦ គ្រាប់ផងដែរ៕
ព័ត៌មានកីឡាអន្តរជាតិ
(English) យោងតាមការចុះផ្សាយរបស់សារព័ត៌មាន BBC បានឱ្យដឹងថា៖ ប្រព័ន្ធវីដេអូជំនួយការអាជ្ញាកណ្ដាល (VAR) ត្រូវបានរកឃើញថាបានបង្កកំហុសចំនួន ១៣ លើកនៅក្នុងក្របខណ្ឌ English Premier League នារដូវកាលនេះ តិចជាងកាលរដូវកាលមុន ដែលមានចំនួន ២០ លើក។
ប្រភពដដែល តាមរយៈការដកស្រង់ចេញពីស្ថាប័នស្រាវជ្រាវឯករាជ្យ KMI បានឱ្យដឹងថា គិតត្រឹមសប្តាហ៍ទី ២៣ សម្រាប់ការប្រកួតនៅ Premier League VAR បានបង្កកំហុសចំនួន ៤ លើក និង ៩ លើកផ្សេងទៀតពុំបានចាប់កំហុសតែម្តង។ VAR បានធ្វើឱ្យមានភាពចម្រូងចម្រាស់ និងអន្តរាគមន៍មានដល់ទៅ ៧០លើកក្នុងចំណោមការប្រកួតលីគ ២៣៩ ប្រកួតនៅរដូវកាលនេះ ដោយមាន ១ លើកក្នុងចំណោម ៣ ប្រកួតក្នុងលីគ៕
ប្រភព៖ BBC
(English) ខ្សែការពារកូដឆ្វេង Alphonso Davies បានសម្រេចចិត្តចុះកិច្ចសន្យាថ្មីជាមួយនឹងក្លិប Bayern Munich ដើម្បីបញ្ចប់ការរំពឹងទុកដែលចង់ផ្លាស់ទៅកាន់ Real Madrid។
នៅថ្ងៃអង្គារ៍ទី០៤ ខែកុម្ភៈ ឆ្នាំ២០២៥ Bayern Munich បានបញ្ជាក់ថា Alphonso Davies ដែលមានវ័យ ២៤ ឆ្នាំបានចុះកិច្ចសន្យាថ្មីជាមួយនឹងក្លិបរយៈពេល ៥ ឆ្នាំបន្ថែមទៀត ពោលគឺកិច្ចសន្យារបស់រូបគេនឹងអស់សុពលភាពនៅខែមិថុនា ឆ្នាំ២០៣០ ឯណោះ ខណៈដែលកិច្ចសន្យាមុនរបស់កីទ្បាករអន្តរជាតិកាណាដាខាង នឹងត្រូវអស់សុពលភាពនៅខែមិថុនា ឆ្នាំ២០២៥ ខាងមុខនេះ ហើយរូបគេរំពឹងថានឹងផ្លាស់ទៅកាន់ Real Madrid ក្នុងលក្ខខណ្ឌគ្មានតម្លៃខ្លួន (free agent)។
Alphonso Davies បានផ្លាស់មកកាន់ក្លិប Bayern Munich ពី Vancouver Whitecaps ក្នុងខែមករា ឆ្នាំ២០១៩ ដោយរូបគេបានរួមចំណែកជួយឱ្យក្លិបយក្សអាល្លឺម៉ង់នេះឈ្នះពានរង្វាន់ Bundesliga ចំនួន ៥ លើក និង Champions League ចំនួន ១ លើកផងដែរ។ រដូវកាលនេះ Davies ក៏បានបង្ហាញខ្លួនឱ្យក្រុម ២៥ ប្រកួតគ្រប់កម្មវិធី និងរកបាន ១ គ្រាប់ និងបញ្ជូនបាល់ឱ្យមិត្តរួមក្រុមចំនួន ៣ លើកផងដែរ៕
(English)
អ្នកចាំទី Manuel Neuer បានសម្រេចចិត្តតកុងត្រាថ្មីជាមួយនឹងក្លិប Bayern Munich រហូតដល់ឆ្នាំ ២០២៦ ខណៈដែលកិច្ចសន្យាពីមុនរបស់រូបគេជាមួយក្លិបនឹងត្រូវផុតកំណត់នៅចុងរដូវកាលនេះ។ អ្នកចាំទីសញ្ជាតិអាល្លឺម៉ង់វ័យ ៣៨ ឆ្នាំរូបនេះបានផ្ទេរមកកាន់ក្លិប Bayern Munich ពី Schalke ក្នុងឆ្នាំ ២០១១ ដែលគិតមកទល់ពេលនេះរូបគេបង្ហាញខ្លួនឱ្យក្រុមចំនួន ៥៤៧ ប្រកួត និងរក្សាសំណាញ់ទីមិនឱ្យគូប្រកួតទាត់ចូល (Clean-Sheets) ចំនួន ២៥៨ ដងឯណោះ។
គួរជម្រាបថា អំទ្បុងពេលលេងឱ្យក្លិប Bayern Munich អ្នកចាំទី Manuel Neuer បានរួមចំណែកជួយឱ្យក្រុមឈ្នះពានរង្វាន់ជាច្រើន ដូចជា៖ Bundesliga ១១ដង German Cup ៥ដង German Super Cup ៦ដង UEFA Champions League ២ដង UEFA Super Cup ២ដង និង FIFA Club World Cup ២ដងផងដែរ៕
(English) នាយិការគ្រប់គ្រងក្លិបវិសាខា កញ្ញា អ៊ូ បញ្ញាសុកិត្យា បានប្រាប់មូលហេតុ នៃការចាកចេញរបស់គ្រូបង្វឹក លោក Jurģis Kalns គឺជាការសម្រេចចិត្តផ្ទាល់របស់លោក មិនមែនក្លិបជាអ្នកបញ្ចប់ទ្បើយ។ ជាការពិតណាស់! បុរសសញ្ជាតិឡាតវីវ័យ ៤២ ឆ្នាំរូបនេះត្រូវបានក្លិបប្រកាសអំពីការចែកផ្លូវគ្នា កាលពីថ្ងៃទី៣១ ខែមករា ឆ្នាំ២០២៥ កន្លងទៅ ក្រោយពីលោកដឹកនាំក្រុមបរាជ័យក្រោមថ្វីជ់ើងរបស់ក្រុមម្ចាស់ផ្ទះ ISI ៤-២ សម្រាប់ការប្រកួតលីគកំពូលកម្ពុជា។ បញ្ហាខាងលើនេះ បានធ្វ់ើឱ្យមានមាតិជាច្រើនផ្ទុះការវែកញែកលើបណ្ដាញសង្គមផងដែរ បន្ទាប់ពីរឿងខាងលើត្រូវបានប្រកាសជាផ្លូវ។
យ៉ាងណា នៅថ្ងៃទី០៣ ខែកុម្ភៈ ឆ្នាំ២០២៥ ក្នុងសន្និសីទសារព័ត៌មាននៅឯកីទ្បដ្ឋានព្រីនស៍ នាយិការគ្រប់គ្រងក្លិបវិសាខា កញ្ញា អ៊ូ បញ្ញាសុកិត្យា ប្រាប់ពីមូលហេតុសំខាន់ៗពីចាកចេញរបស់លោក Jurģis Kalns ដោយលោកគ្រូយល់ថា៖ កម្រិត នៃការប្រកួតប្រជែងនៅលីគកំពូលកម្ពូជា គឺនៅមានកម្រិតដែលមិនត្រូវតាមស្តង់ដាអឺរ៉ុបទាំងអស់ទេ។ ជាហេតុធ្វើឱ្យលោកពិបាកក្នុងការធ្វើការ។ ការកាត់សេចក្តីនាៗ ក៏ជាហេតុចម្បងផងដែរ ធ្វើឱ្យលោកមិនអាចនៅបន្តនៅទីនេះទៀតបាន ព្រោះវាមនដូចអ្វីដែលឆ្លងកាត់ក្នុងបង្វឹកពីមុនៗមក។ ហើយកត្តាផ្ទាល់ខ្លួន ដោយសារលោករស់នៅឃ្លាតឆ្ងាយពីគ្រួសាររបស់លោក និងអាចមួយផ្នែកទៀត គឺលោកក៏សម្លឹងឃើញឱកាសការងារនៅក្លិបថ្មីផងដែរ។ កញ្ញា អ៊ូ បញ្ញាសុកិត្យា ក៏បានបន្ថែតទៀតថា៖ លោក Jurģis Kalns មានគម្រោងចាកចេញជាច្រើនដងហើយ ប៉ុន្តែក្លិបបានព្យាយាមសម្របសម្រួល ប៉ុន្តែចុងក្រោយក្លិបនៅតែគោរពការសម្រេចចិត្តរបស់គ្រូបង្វឹក។
សូមជម្រាបថា លោក Jurģis Kalns ត្រូវបានសារព័ត៌មានឡាតវី Baltic Football News បានប្រាប់ឱ្យដឹងថា លោកនឹងចូលរួមជាមួយក្លិប FK Auda ក្នុងក្របខណ្ឌលីគទី ១ របស់ប្រទេសឡាតវី បន្ទាប់ពីលោកសម្រេចចិត្តចាកចេញពីក្លិបវិសាខា៕
អត្ថបទដោយ៖ យ៉េ សេរីជប៉ុន
(English) អស់រយៈពេលជាងមួយទស្សវត្សរ៍កន្លងមកនេះ ការជជែកវែកញែកជុំវិញថាតើកីឡាកររូបណាជាកីឡាករល្អបំផុតនៅក្នុងពិភពលោកភាគច្រើនសំដៅតែទៅលេីកីឡាករពីរនាក់ប៉ុណ្ណោះគឺ Cristiano Ronaldo និងLionel Messi ។ ទោះជាយ៉ាងណាក្តីយុគសម័យរបស់ពួកគេទាំងពីរដែលគ្រប់គ្រងពិភពលោកហាក់ដូចជាចប់ហើយ។ Messi វ័យ៣៧ឆ្នាំបច្ចុប្បន្នលេងឱ្យ Inter Miami និង Ronaldo វ័យ៣៩ឆ្នាំកំពុងលេងនៅប្រទេសអារ៉ាប៊ីសាអ៊ូឌីតជាមួយ Al-Nassr អ្នកទាំងពីរបានបរាជ័យក្នុងការជាប់ចំណាត់ថ្នាក់លេខ ៣០ ក្នុងការបោះឆ្នោត Ballon d’Or កាលពីឆ្នាំមុន។ ផ្ទុយទៅវិញ Rodri បានឈ្នះពានរង្វាន់ Ballon d’Or ឆ្នាំ២០២៤ខណៈ Vinicius Junior និង Jude Bellingham ទទួលបានចំណាត់ថ្នាក់លេខ២ និងទី ៣។
ជុំវិញនឹងបញ្ហានេះ បើតាមកូនប្រុសរបស់ Ronaldo កីឡាករ Mateo ដែលទើបតែប្រារព្ធខួបកំណើតគម្រប់ ៨ ឆ្នាំរបស់គេ បាននិយាយថា កីឡាករដែលឈរនៅកំពូលនៃភពផែនដីនាពេលនេះមិនមែនជាឪពុករបស់ខ្ញុំឬក៏កីឡាករ Messi នោះទេ។ តាមគំនិតរបស់ខ្ញុំខ្សែប្រយុទ្ធបារាំង Kylian Mbappe ដែលបានជាប់លេខចំណាត់ថ្នាក់ទី ៦ ក្នុងការបោះឆ្នោត Ballon d’Or កាលពីឆ្នាំមុន។ Ronaldo បានពន្យល់ថា Mateo រូបគេពិតជាចូលចិត្ត Mbappe ។ ពេលខ្លះគេប្រាប់ខ្ញុំថា ហេ ប៉ា Mbappe ល្អជាងប៉ា ហើយខ្ញុំឆ្លើយថាទេ ប៉ាល្អជាងគេ ប៉ារកបានគ្រាប់ច្រើនជាង។
ជាការពិតណាស់ Ronaldo បានស៊ុតបាល់បញ្ចូលទីច្រើនជាង Mbappe ។ អតីតតារារបស់ Real Madrid និង Manchester United រូបនេះបច្ចុប្បន្នមានគ្រាប់បាល់ចំនួន៩២១ នៅទូទាំងអាជីពរបស់គេ រួមទាំង១៣៥សម្រាប់ព័រទុយហ្គាល់នៅកម្រិតអន្តរជាតិ។ ទន្ទឹមនឹងនេះដែរ Mbappe ដែលមានអាយុ២៦ឆ្នាំមកទល់ពេលនេះបានស៊ុតបញ្ចូលទី៣៤៩ គ្រាប់សម្រាប់ក្រុមដំបូងក្នុងអាជីព ៤៨៧ ប្រកួត៕
(English) ក្លិបហង្សក្រហម Liverpoolដែលឈរតំណែងកំពូលតារាង UEFA Champions League ទទួលបានប្រាក់រង្វាន់ជាង ១០២ លានដុល្លាររួចហើយ បើទោះបីចាញ់ការប្រកួតចុងក្រោយរបស់ពួកគេក៏ដោយ។ Liverpool រកបានជាង ១៩ លានដុល្លារសម្រាប់ការមានកៅអីប្រកួតជម្រុះដំបូង បូកនឹងជាង ១៥ លានដុល្លារបន្ថែមទៀតសម្រាប់ការឈ្នះប្រាំពីររបស់ពួកគេ ជាដែលជ័យជម្នះនីមួយៗមានតម្លៃជាង២លានដុល្លារ។ ហង្សក្រហមបានយកប្រាក់បន្ថែមជាង ១០ លានដុល្លារ សម្រាប់ការឈរកំពូលតារាងលុយជាង ២ លានដុល្លារសម្រាប់ការបញ្ចប់ក្នុងចំណាត់ថ្នាក់កំពូលទាំង៨និង១១លានដុល្លារសម្រាប់ការកក់កន្លែងរបស់ពួកគេក្នុងវគ្គ១៦ ក្រុមចុងក្រោយ។
ចំណែកឯក្លិប Inter Milan តាមពីក្រោយ Liverpool ជាមួយនឹងប្រាក់រង្វាន់ចំនួនជាង៩៤លានដុល្លារ ខណៈ Arsenal ឈរលេខទី៣ដែលមានប្រាក់រង្វាន់ជាង៩២លានដុល្លារ។ហើយក្រុម Anfield អាចនឹងទទួលបានប្រាក់រង្វាន់សរុបមិនគិតពីពាណិជ្ជម្មចំនួនជាង ១៥៧លានដុល្លារ ប្រសិនបើពួកគេលើកពានជាលើកទីប្រាំពីរនៅទីក្រុង Munich ក្នុងខែឧសភា៕
(English) ក្លិប BG Pathum United បានប្រកាសតែងតាំងលោក Anthony Hudson ជាគ្រូបង្វឹកថ្មីផ្លូវការ។ បុរសសញ្ជាតិអាម៉េរិកវ័យ ៤៣ ឆ្នាំរូបនេះគឺជាគ្រូបង្វឹកកាន់អាជ្ញាប័ណ្ណ UEFA Pro License ធ្លាប់មានបទពិសោធន៍ក្រុមជម្រើសជាតិបារ៉ែន, នូវែលសេឡង់ និងសហរដ្ឋអាម៉េរិក ក្នុងកម្រិតយុវជន និងក្រុមធំ ចន្លោះពីឆ្នាំ ២០១៣-២០២៣។
លោក Anthony Hudson បានចាកចេញពីក្លិប Al Arabi SC របស់ប្រទេសកាតា មុនពេលផ្លាស់មកកាន់ BG Pathum United របស់ប្រទេសថៃ។ ការចូលរួមរបស់ Anthony Hudson ក៏បានធ្វើឱ្យរូបលោកក្លាយជាគ្រូបង្វឹកទី ១ សញ្ជាតិអាម៉េរិកក្នុងប្រវត្តិសាស្រ្តរបស់ក្លិប BG Pathum United ផងដែរ។ គួរបញ្ជាក់ថា សម្រាប់ការប្រកួត BG Pathum United នឹងត្រូវបើកកីទ្បដ្ឋាន BG Stadium ដើម្បីស្វាគមន៍ក្រុមខ្លាំងមកពីប្រទេសម៉ាឡេស៊ី គឺ Terengganu FC ក្នុងការប្រកួត Shopee Cup នាថ្ងៃទី០៥ ខែកុម្ភៈ ឆ្នាំ២០២៥ ខាងមុខនេះ៕
ប្រភព៖ Ball Thai
