លោក Thierry Henry ដែលជាអតីតកីឡាករជម្រើសជាតិបារាំង បានចេញមុខការពារ Lionel Messi បន្ទាប់ពី Paris Saint Germain បានរង់បរាជ័យក្នុងការប្រកួតក្របខណ្ឌ Ligue 1 កាលពីយប់មិញ។

PSG បានចាញ់ Monaco យ៉ាងអាម៉ាស់ជាទីបំផុតក្នុងលទ្ធផល ៣ទល់នឹង០ កាលពីយប់មិញ ខណៈ Messi ពុំមានវត្តមានក្នុងការប្រកួតនេះឡើយដោយសាររូបគេមានបញ្ហាជំងឺ។

លោក Henry បាននិយាយថា៖«កាលពីសប្តាហ៍មុន អ្នកគាំទ្របានស្រែកបង្អាប់ Messi។ តើហេតុអ្វីបានជាអ្នកបង្អាប់កីឡាករដែលល្អជាងគេក្នុងប្រវត្តិសាស្រ្តបាល់ទាត់? Messi ជា កីឡាករដែលបញ្ជូនបាល់ឲ្យមិត្តរួមក្រុមរកគ្រាប់បាល់បានច្រើនជាងគេនៅ Ligue 1? នៅថ្ងៃនេះ ការដែលអវត្តមាន Messi គឺ ក្រុមធ្វើអ្វីមិនចេញទេ»៕

លោក Carlo Ancelotti ដែលជាគ្រូបង្វឹកក្លិប Real Madrid បានលើកឡើងថា លោកនឹងទទួលខុសត្រូវចំពោះបរាជ័យដ៏ធ្ងន់ធ្ងរទល់នឹង Barcelona កាលពីយប់មិញ។

វាជារឿងដ៏មិនគួរឲ្យជឿ Real Madrid បានរង់បរាជ័យធ្ងន់ធ្ងរជាងគេនៅក្នុងរដូវកាលនេះ ក្រោមថ្វីជើង Barcelona ក្នុងលទ្ធផល ៣ទល់នឹង០ នៅលើដីខ្លួនឯង ប៉ុន្តែ យ៉ាងណាក៏ដោយក្រុមអធិរាជសនៅតែឈរនៅក្នុងចំណាត់ថ្នាក់លេខ១ដដែល។

លោក Ancelotti បាននិយាយថា៖«វាជាការប្រកួតដ៏តឹងតែងព្រោះវាជា Classico ជាពិសេសសម្រាប់អ្នកគាំទ្រពេលដែលយើងលេងទល់នឹង Barcelona។ ពួកយើងត្រូវតែអត់ធ្មត់ និង បន្តរង់ចាំកីឡាករដែលកំពុងមានបញ្ហារបួស។ ពួកយើងលេងមិនយល់ទាល់តែសោះ ហើយ ក្នុងនាមខ្ញុំជាគ្រូបង្វឹក វា គឺ ជាកំហុសរបស់ខ្ញុំ»៕

បទសម្ភាសន៍នាពេលថ្មីៗនេះរបស់ Edwin van der Sar បានលើកឡើងថា Ajax ត្រៀមខ្លួនដើម្បីបាត់បង់ Erik ten Hag នៅរដូវក្តៅនេះ​ហើយ។

នៅពេលសួរអំពីការចាប់អារម្មណ៍ពីក្លិប​នៅ​បរទេសលើអ្នកចាត់ការវ័យ 52 ឆ្នាំ វីរបុរស Manchester United និងជានាយកប្រតិបត្តិ Ajax បានប្រាប់ទូរទស្សន៍ហូឡង់ RTL7 ថា៖ “នេះមានន័យថាយើងកំពុងធ្វើអ្វីមួយបានល្អដូចគ្នាជាមួយកីឡាករ”។

“នៅពេលយើងសម្តែងបាន​ល្អ ការចាប់អារម្មណ៍នឹងមក។ ប្រសិនបើមានការចាប់អារម្មណ៍លើកីឡាករ ឬគ្រូបង្វឹករបស់យើង… យើងទាំងអស់គ្នាបាន​ដឹង​ហើយ​ថា កាលពីអតីតកាលយើង​ធ្លាប់​ត្រូវ​គេ​ចាកចេញ​ទៅ​កាន់​គោលដៅបន្ទាប់”។

“អ៊ីចឹង​ត្រូវ​តែ​ធ្វើ​ឱ្យ​ប្រាកដ​ថា​យើង​បាន​ត្រៀម​ខ្លួន​រួច​ជា​ស្រេច​នៅ​ពេល​នោះ។ បញ្ជី​ត្រូវ​បាន​បំពេញរួច​រាល់”។

បិសាចក្រហមត្រូវបានផ្សារភ្ជាប់យ៉ាងខ្លាំងជាមួយនឹងការតែងតាំងលោក Ten Hag ជាអ្នកស្នងតំណែងរបស់ Ralf Rangnick សូម្បីតែបន្ទាប់ពី Ajax ធ្លាក់ចេញពី Champions League ដោយ​សារ Benfica  ក៏ដោយ។ កាសែត​ល្បីៗរបស់ហូឡង់ក៏បានរាយការណ៍ផងដែរថាក្លឹបកំពុងស្វែងរកអ្នកជំនួសរួចហើយ ហើយនឹងមិនបញ្ឈប់ Ten Hag ពីការចាកចេញនោះទេ។

ប្រភព៖ RTL7 via MEN

លោក Thomas Tuchel បានចេញមុខបដិសេធចំពោះរាល់ការចុះផ្សាយដែលបានលើកឡើងថា លោកនឹងចាកចេញពី Chelsea ដើម្បីទៅដឹកនាំ Manchester United។

លោក Tuchel បានចូលមកកាន់តំណែងជាអ្នកចាត់ការទូទៅរបស់ Chelsea កាលពីឆ្នាំ២០២១ ហើយ នៅក្នុងរដូវកាលដំបូងរបស់លោក គឺ លោកបានជួយក្រុមឈ្នះពានរង្វាន់ Champions League ផងដែរ។ យ៉ាងណាក៏ដោយ បញ្ហាទណ្ឌកម្មមកលើ Chelsea ទាក់ទងនឹងការហាមមិនឲ្យទិញលក់កីឡាករ បន្តកុងត្រាថ្មី ជាដើមធ្វើឲ្យមានការលើកឡើងថា លោក Tuchel នឹងទៅដឹកនាំ Man Utd។

លោក Tuchel បាននិយាយថា៖«ខ្ញុំមិនមានប្រតិកម្មអ្វីទាំងអស់។ តើអ្នកមានអារម្មណ៍ថាខ្ញុំមិនសូវមានការប្តេជ្ញាចិត្តចំពោះក្លិបនៅក្នុងក្លឹបក្នុងស្ថានភាពបែបនេះមែនទេ? ខ្ញុំគិតថា មិនទេ ខ្ញុំពេញចិត្តនៅទីនេះ ហើយ ខ្ញុំពេញចិត្តធ្វើការឱ្យ Chelsea។ ក្លិបនេះមានអ្វីគ្រប់យ៉ាងដែលធ្វើឱ្យខ្ញុំសប្បាយចិត្ត ហើយ យើងមានហេតុផលជាច្រើនដើម្បីបន្តនៅទីនេះ ហើយ នោះជាអ្វីដែលយើងកំពុងធ្វើ»៕

លោក Luis Enrique ដែលជាគ្រូបង្គោលក្រុមជម្រើសជាតិអេស្ប៉ាញ បានពន្យល់ពីហេតុផលសំខាន់ដែលលោកមិនបានកោះហៅអ្នកចាំទី David De Gea ឲ្យជាប់ក្រុមជម្រើសជាតិប្រកួតមិត្តភាពនៅចុងខែមិនានេះ។

លោក Enrique មិនបានជ្រើសរើស De Gea ទោះបីជារដូវកាលនេះ គេបានបង្ហាញថ្វីដៃសង្គ្រោះបាល់ដ៏អស្ចារ្យនៅក្នុងលីគក៏ដោយ ផ្ទុយទៅវិញលោកបានកោះហៅអ្នកចាំទី Unai Simon, David Raya និង Robert Sanchez។

ទាក់ទងនឹងមូលហេតុដែលលោកសម្រេចចិត្តមិនកោះហៅ De Gea នោះ គឺ ខ្លីៗងាយយល់នោះទេ លោកបានបកស្រាយថា របៀបលេងរបស់អ្នកចាំទី Man Utd ខាងលើមិនត្រូវជាមួយនឹងទម្រង់លេងរបស់លោក៕

ខ្សែការពារ កុក បូរីស របស់ Sarawak United នៃលីគកំពូលម៉ាឡេស៊ី បានតាំងចិត្តផ្តោតលើការជួយក្រុមជាងការរកគ្រាប់បាល់បញ្ចូលទី។

អតីតខ្សែការពាររបស់ភ្នំពេញក្រោនខាងលើ រកគ្រាប់បាល់ជាលើកដំបូងនៅលើទឹកដីម៉ាឡេស៊ីកាលពីសប្តាហ៍មុន ក្នុងជ័យជម្នះលើ Ultimate FC ៧ទល់នឹង០ នៃការប្រកួតពានរង្វាន់ Malaysia FA Cup។

ថ្លែងប្រាប់ The Morning បូរីស បាននិយាយថា៖«ខ្ញុំពិតជាសប្បាយចិត្តណាស់ព្រោះក្នុងការប្រកួតដំបូងរបស់ខ្ញុំនៅម៉ាឡេស៊ី ខ្ញុំស្ទើរតែរកបានមួយគ្រាប់ហើយ»។

«ជាមួយនឹងសំណាង ខ្ញុំក៏រកបានគ្រាប់បាល់មែន។ ជាដំបូង អ្វីដែលសំខាន់បំផុតសម្រាប់ខ្ញុំគឺជួយមិត្តរួមក្រុមរបស់ខ្ញុំនៅលើទីលានជាមួយនឹងស្មារតីប្រយុទ្ធរបស់ខ្ញុំ និងការប្រកួតប្រជែងជាមួយគូប្រជែងរបស់យើង។ ពិតណាស់ ប្រសិនបើខ្ញុំអាចស៊ុតបញ្ចូលទីបានច្រើនជាងនេះ នោះពិតជាអស្ចារ្យសម្រាប់ខ្ញុំ និង ក្រុមផងដែរ ប៉ុន្តែការផ្តោតអារម្មណ៍របស់ខ្ញុំគឺការជួយក្រុមរបស់ខ្ញុំនៅលើទីលាន ជាជាងការស៊ុតបញ្ចូលទី»៕