Real Madrid លក់សំបុត្រក្នុងថ្ងៃប្រកួត (Matchday) បានលុយច្រីនជាងគេបំផុតក្នុងចំណោមក្លិបបាល់ទាត់នៅក្នុងលីគកំពូលទាំង ៥ របស់អឺរ៉ុបសម្រាប់ឆ្នាំ ២០២៣-២៤ ។ នេះបើយោងតាមការចុះផ្សាយរបស់សារព័ត៌មាន BCC ។ Real Madrid ប្រមូលលុយបានជាង ១៩៧ លានដុល្លារពីការលក់សំបុត្រចូលទស្សនានាំមុខក្លិបយក្សបារាំង Paris Saint Germain ដែលរកចំណូលបានជាង ១៧៩ លានដុល្លារឈរលំដាប់លេខ ២ ក្នុងតារាង។ ប្រភពខាងលើដដែលបានឱ្យដឹងថា Real Madrid ជាមធ្យមប្រាក់ចំណូលបានមកពីការលក់សំបុត្រ ១ ប្រកួតក្នុងផ្ទះគឺជាង ៧,៨លានដុល្លារ ។

តម្លៃសំបុត្រប្រកួតក្នុងផ្ទះជាមធ្យមម្នាក់ជាង ១០៩ ដុល្លារ។ PSG ជាមធ្យមប្រាក់ចំណូលបានមកពីការលក់សំបុត្រ ១ ប្រកួតក្នុងផ្ទះគឺជាង ៧,៧ លានដុល្លារតែតម្លៃសំបុត្រប្រកួតក្នុងផ្ទះម្នាក់ជាមធ្យមថ្លៃជាង Real Madrid គឺ ជាង១៤៦ដុល្លារ។ ចំណែកឯនៅ Premier league វិញ ក្រុមកាំភ្លីងធំ Arsenal ឈរកំពូលតារាង និងទទួលបានចំណាត់លេខ៣នៅអឺរុប។  Arsenal រកចំណូលបានមកពីការលក់សំបុត្រគឺជាង ១៦៧ លានដុល្លារ។ ប្រាក់ចំណូល ១ ប្រកួតក្នុងផ្ទះជាមធ្យមគឺជាង ៦ លានដុល្លារ។ តម្លៃសំបុត្រប្រកួតក្នុងផ្ទះម្នាក់ជាមធ្យមគឺជាង ១០៩ ដុល្លារដូចគ្នាទៅនឹង Real Madrid ផងដែរ៕

ប្រភព៖ BBC

គ្រូបង្វឹករបស់ក្លិប Tiffy Army FC លោក ភា សុភ័ក្ត្រា ចង់ឱ្យសហព័ន្ធកីទ្បាបាល់ទាត់កម្ពុជា FFC ធ្វើការរៀបចំវគ្គសិក្សាអាជ្ញាប័ណ្ណកម្រិតខ្ពស់ (Pro Licence) សម្រាប់ការអភិវឌ្ឍន៍ និងបណ្តុះបណ្តាលសមត្ថភាពលើគ្រូបង្វឹកនៅកម្ពុជាបន្ថែតទៀត នាថ្ងៃអនាគត។

ជាការពិតណាស់ បច្ចុប្បន្ននេះ សម្រាប់គ្រូបង្វឹកនៅកម្ពុជា ភាគច្រើនគឺកាន់អាជ្ញាប័ណ្ណកម្រិត A-Licence ដូចជាគ្រូបង្វឹកលោក ភា សុភ័ក្ត្រា (Tiffy Army FC) , ឃឹម បូរី (ណាហ្គាវើលដ៍), ទុំ សារ៉ាយ (អាយអេសអាយ ដង្កោសែនជ័យ), និង ស៊ុំ វណ្ណា (សមាគមកីឡាបាល់ទាត់ក្រសួងមហាផ្ទៃ) ដែលកំពុងដឹកនាំក្រុមនៅលីគកំពូលកម្ពុជា Cambodia Premier League រដូវកាល ២០២៤-២៥ ។ នៅកម្ពុជា សម្រាប់គ្រូបង្វឹកជនជាតិខ្មែរ មានតែលោក ប្រាក់ សុវណ្ណារ៉ា ប៉ុណ្ណោះដែលកាន់អាជ្ញាប័ណ្ណកម្រិតខ្ពស់ Pro Licence ហើយបច្ចុប្បន្នលោកកំពុងតែទំនេរពីការងារជាគ្រូបង្វឹក បន្ទាប់ពីចែកផ្លូវគ្នាជាមួយនឹងក្លិប Life FC កាលពីខែតុលា ឆ្នាំ២០២៤ កន្លងទៅ ។

យ៉ាងណា ទាក់ទងនឹងរឿងខាងលើនេះ លោក ភា សុភ័ក្ត្រា បានថ្លៃងប្រាប់មកកាន់គេហទំព័រកីទ្បា PSB Sport News តាមរយៈសារអេលិចត្រនិចថា៖ «ខ្ញុំចង់ស្នើសុំឱ្យ FFC រៀបចំវគ្គសិក្សាអាជ្ញាប័ណ្ណកម្រិតខ្ពស់ Pro Licence ដូចទៅនឹងប្រទេសទ្បាវ ដែលអាចបើកវគ្គសិក្សានេះបាន។ ពួកយើងគួរតែធ្វើវាដូចគ្នា ដោយសារ គ្រូៗខ្មែរភាគច្រើនគឺសុទ្ធសឹងតែកាន់អាជ្ញាប័ណ្ណកម្រិត A-Licence យ៉ាងហោចណាស់ក៏លើស ៣០ ជាងនាក់ផងដែរ។ មានន័យថាការកសាងហេដ្ឋារចនាសម្ព័ន្ធរបស់សហព័ន្ធផ្សេងៗនាថ្ងៃអនាគត សម្រាប់បាល់ទាត់នៅកម្ពុជាFFC គួរតែគិតអំពីការអភិវឌ្ឍន៍ និងបណ្តុះបណ្តាលសមត្ថភាពលើគ្រូៗនៅកម្ពុជាបន្ថែមទៀត នាថ្ងៃអនាគត»។

លោកបន្តទៀតថា៖ «ខ្ញុំចង់ឱ្យ FFC គិតអំពីការអភិឌ្ឍន៍ បណ្តុះបណ្តាលធនធានគ្រូបង្វឹកបន្ថែមលើសមត្ថភាពទៅដល់កម្រិត Pro Licence ។ បើនិយាយអំពីការចំណាយក្នុងការសិក្សាវគ្គខាងលើនៅក្រៅប្រទេសវិញ គឺក៏ចំណាយជាង ២ ម៉ឺនដុល្លារផងដែរ។ វាមិនមែនជារឿងងាយស្រួលទេក្នុងការមានឱកាសចុះឈ្មោះចូលរៀន សម្រាប់គ្រូក្រៅប្រទេស។ ដូច្នេះហើយ ឱកាសរៀនមានតិចតួចថែមទាំងចំណាយថ្លៃទៀតផង។ បើ FFC មានគំនិតក្នុងការជួយអភិវឌ្ឍន៍លើសមត្ថភាព គឺវាជារឿងដ៏ប្រសើរដែលគ្រូៗបានរៀននៅក្នុងស្រុក និងមានការប្រកួតប្រជែងបន្ថែមទៀត សម្រាប់បាល់ទាត់នៅកម្ពុជា។ ខ្ញុំចង់បានន័យថាមិនមែនចង់សំដៅរៀននៅក្រៅស្រុកទេ គឺចង់ឱ្យដូចប្រទេសទ្បាវ ដែលបង្កើតវគ្គសិក្សានេះក្នុងប្រទេសពួកគេ។ នៅឥណ្ឌូនេស៊ី វៀតណាម ម៉ាឡេស៊ី សឹង្ហបុរី និងថៃ គឺពួកគេបានបង្កើតអស់ហើយ សម្រាប់វគ្គសិក្សានេះ បើនិយាយពីគ្រូបង្វឹកកាន់អាជ្ញាប័ណ្ណកម្រិតខ្ពស់នេះទ្បើងសុទ្ធតែ ៥០ ឬ ៦០ នាក់ហើយ ប្រទេសខ្លះក៏រាប់រយនាក់ ហើយនៅខ្មែរមានតែ ១ ប៉ុណ្ណោះ ស្របពេលទ្បាវកំពុងតែធ្វើទៀត។ ដូច្នេះហើយ ពួកយើងគួរតែធ្វើរឿងនេះដូចគ្នា»។

គួរបញ្ជាក់ថា សម្រាប់ក្រុម Tiffy Army FC ត្រូវប៉ះគ្នាជាមួយនឹងគិរីវង់សុខសែនជ័យ សម្រាប់ការប្រកួតលីគកំពូលកម្ពុជា Cambodia Premier League សប្តាហ៍ទី ២៥ រដូវកាល ២០២៤-២៥ នាវេលាម៉ោង ១៨:០០ ថ្ងៃទី០៨ ខែមីនា ឆ្នាំ២០២៥ ៕

សមាគមកីឡាបាល់ទាត់ចក្រភពអង់គ្លេស រួមមានអៀរឡង់ខាងជើង ស្កុតឡែន និងវែលបានបង្ហាញចំណាប់អារម្មណ៍ទៅកាន់ FIFA ចំពោះការដេញថ្លៃធ្វើម្ចាស់ផ្ទះការប្រកួតបាល់ទាត់ពិភពលោកនារីឆ្នាំ ២០៣៥ ។ វា​នឹង​ជា​លើក​ទី​មួយ​ដែល​ការ​ប្រកួត​ត្រូវ​បាន​រៀប​ចំ​ឡើង​នៅ​លើ​ទឹក​ដី​ចក្រភព​អង់គ្លេស បន្ទាប់​ពី​ការ​ប្រកួត​ជើង​ឯក​អឺរ៉ុប​នារី​ចំនួន​ពីរ​លើក​ក្នុង​ប្រទេស​អង់គ្លេស​ក្នុង​ឆ្នាំ ២០០៥ និង ២០២២។

លោក Mark Bullingham នាយកប្រតិបត្តិនៃសមាគមកីឡាបាល់ទាត់អង់គ្លេសមានប្រសាសន៍ថា៖ យើងជឿជាក់យ៉ាងមុតមាំថាយើងអាចរៀបចំការប្រកួតដ៏អស្ចារ្យមួយ ជាមួយនឹងភាពជោគជ័យនៃពានរង្វាន់ UEFA Women’s EURO នៅឆ្នាំ២០២២ និងការរីកចម្រើនយ៉ាងឆាប់រហ័សជាបន្តបន្ទាប់នៃការប្រកួតកីឡានារីក្នុងប្រទេសអង់គ្លេស។

ថ្មីៗនេះក្រុមប្រឹក្សារបស់ FIFA បានសម្រេចចិត្តណែនាំប្រទេសនៅអឺរ៉ុប ឬអាហ្រ្វិក ឱ្យធ្វើជាម្ចាស់ផ្ទះដ៏មានសក្តានុពលសម្រាប់ការប្រកួតឆ្នាំ ២០២៥ ។ FIFA បានប្រកាសថាការដេញថ្លៃសម្រាប់ការប្រកួតបាល់ទាត់ពិភពលោកនារីឆ្នាំ ២០៣១ និង ២០៣៥ នឹងត្រូវដាក់ជូននៅចុងឆ្នាំ ២០២៥ ជាមួយនឹងការសម្រេចចិត្តរំពឹងទុកនៅពាក់កណ្តាលឆ្នាំ ២០២៦។

ការប្រកួតបាល់ទាត់នារីពិភពលោកឆ្នាំ២០២៧ នឹងធ្វើឡើងនៅប្រទេសប្រេស៊ីល ដែលជាការប្រកួតលើកទីមួយដែលបានធ្វើឡើងនៅអាមេរិកខាងត្បូង។ ម្ចាស់ផ្ទះនៃព្រឹត្តិការណ៍ឆ្នាំ២០៣១ មិនទាន់ត្រូវបានសម្រេចចិត្តនៅឡើយទេ៕

ប្រភព៖ Reuters

ខ្សែប្រយុទ្ធ Neymar JR ត្រូវបានកោះហៅចូលក្រុមជម្រើសជាតិប្រេស៊ីល សម្រាប់ការប្រកួតជម្រុះ World Cup នាខាងលើទល់នឹងកូឡុំប៊ី និង​អាហ្សង់ទីន បន្ទាប់ពីរូបគេអវត្តមានរយពេល ១៧ ខែ។ កីទ្បាករវ័យ ៣៣ ឆ្នាំរូបនេះមិនបានលេងឱ្យប្រេស៊ីលចាប់តាំងពីខែតុលា ឆ្នាំ២០២៣ ដោយសារូបគេរងរបួសដាច់សរសៃពួរជង្គង់ ACL អំទ្បុងពេលប្រកួតទល់នឹងក្រុមជម្រើសជាតិអ៊ុយរូហ្គាយ។

សូមបញ្ជាក់ថា Neymar បានស៊ូទ្រាំនឹងការខកចិត្តនៅ Al-Hilal ជាកន្លែងដែលរូបគេបង្ហាញខ្លួនត្រឹមតែ ៧ លើកក្នុងរយៈពេល ១៨ ខែដោយសាររបួស ACL ហើយបានត្រលប់ទៅក្លិប Santos ដែលជាក្រុមរូបគេធ្លាប់លេងតាំងពីក្មេងក្នុងខែមករាក្នុងកិច្ចសន្យារយៈពេល ៦ ខែ៕

ប្រភព៖ beinsports

ខ្សែការពារប្រេស៊ីល Cassio de Jesus របស់ក្លិប Royal Navy នៃសមាជិកលីគទី ៣ ប្រទេសថៃ បានទទួលមរណភាពក្នុងវ័យ ៣៥ ឆ្នាំហើយ ដោយសារជំងឺកង្វះគ្រាប់ឈាមក្រហម (Anemia) កាលពីថ្ងៃពុធទី០៥ ខែមីនា ឆ្នាំ២០២៥ ។ វេជ្ជបណ្ឌិតបានកំណត់មូលហេតុថា ភាពស្លេកស្លាំង aplastic ដែលជាក្រុមនៃជំងឺដែលចំនួនកោសិកាដើមឈាមថយចុះ ដែលបណ្តាលឱ្យកោសិកាឈាមតិចត្រូវបានផលិតនៅក្នុងខួរឆ្អឹង។

នៅចុងឆ្នាំ ២០២៤ កីទ្បាករប្រេស៊ីលខាងលើ បានរងប៉ះពាល់ចំនួនគ្រាប់ឈាមប្លាកែតធ្លាក់មកកម្រិតទាប ហើយរូបគេត្រូវបានសម្រាកព្យាបាលនៅមន្ទីរពេទ្យឈុនបុរី បន្ទាប់ពីស្ថានភាពរបស់រូបគេប្រសើរទ្បើង ក៏សម្រេចចិត្តត្រលប់ទៅផ្ទះវិញ។ ប៉ុន្តែបន្ទាប់ពីត្រលប់មកផ្ទះវិញ រោគសញ្ញាក៏ត្រលប់មកវិញ ប៉ុន្តែលើកនេះ ក្រុមគ្រូពេទ្យមិនអាចជួយសង្គ្រោះជីវិតរូបគេបានទេ ទើបធ្វើឱ្យរូបគេបានទទួលមរណភាពក្នុងវ័យ ៣៥ ឆ្នាំ ។

សូមជម្រាបថា ខ្សែការពារ Cassio de Jesus បានចាប់ផ្តើមលេងអាជីពបាល់ទាត់នៅឆ្នាំ ២០០៩ ជាមួយនឹងក្លិប Guarani របស់ប្រទេសប្រេស៊ីល មុនពេលផ្លាស់មកលេងនៅតំបន់អាស៊ានជាមួយក្លឹបមួយចំនួនក្នុងលីគឥណ្ឌូនេស៊ី ម៉ាឡេស៊ី និងថៃ កាលពីខែសីហាឆ្នាំមុន៕

ប្រភព៖ sanook

FIFA គ្រោងនឹងផ្តល់ប្រាក់រង្វាន់ជាង១ពាន់លានដុល្លារដល់ក្លឹបដែលចូលរួមប្រកួត Club World Cup ខណៈសមាគមក្លិបអឺរ៉ុប (ECA) ដែលកំពុងចរចាតំណាងឱ្យក្លិបនៅអឺរ៉ុបរួមទាំងក្លឹប Chelsea និង Manchester City បានខិតជិតដល់កិច្ចព្រមព្រៀង។

ប្រភពជាច្រើនបានបញ្ជាក់ប្រាប់ BBC Sport ថាក្លិបចំនួន ៣២ ដែលពាក់ព័ន្ធ រួមទាំងក្លិបនៅអឺរ៉ុបចំនួន ១២ នឹងបែងចែកអ្វីដែលរំពឹងទុកថាជាប្រាក់រង្វាន់ដ៏ធំបំផុតមិនធ្លាប់មាន។ ប្រាក់រង្វាន់នេះ វាគឺជាចំណែកមួយផ្អែកលើកិច្ចព្រមព្រៀងទូរទស្សន៍សកលផ្តាច់មុខចំនួន ១ ពាន់លានដុល្លារដែលយល់ព្រមជាមួយសេវាកម្មផ្សព្វផ្សាយកីឡា DAZN កាលពីខែធ្នូ។

ការ​ប្រកួត​បើក​ឆាក​ដំបូងដែល​ប្រព្រឹត្ត​ទៅ​នៅ​សហរដ្ឋ​អាមេរិក​នឹង​ចាប់​ផ្តើម​នៅ​ថ្ងៃ​ទី ១៤ ខែ​មិថុនា ហើយ​នឹង​បញ្ចប់​ដោយ​ការ​ប្រកួត​វគ្គ​ផ្តាច់ព្រ័ត្រ​នៅ​រដ្ឋ New Jersey នៅ​ថ្ងៃ​ទី ១៣ ខែ​កក្កដា។ ក្លិបនីមួយៗដែលចូលប្រកួតនឹងទទួលបានថ្លៃចូលរួមសម្រាប់ការចូលលេងវគ្គដំបូង និងជាបន្តបន្ទាប់ដោយផ្អែកលើលទ្ធផលប្រកួតរបស់ពួកគេ៕

ប្រភព៖ CNA

អ្នកចាត់ការរបស់ក្លិប Lyon លោក Paulo Fonseca ត្រូវបានពិន័យ ៩ ខែមិនឱ្យចូលដឹកនាំក្រុម ដោយសារកាយវិការមិនសមរម្យរបស់លោកធ្វើហួសហេតុមកលើអាជ្ញាកណ្តាល កាលពីចុងសប្តាហ៍មុន។

ជុំវិញបញ្ហាខាងលើ​នេះ​កើត​ឡើង អំទ្បុងពេលក្រុម Lyon ​បាន​យក​ឈ្នះ​ទៅ​លើ​ Brest ក្នុងលទ្ធផល ២-១ សម្រាប់ការប្រកួតលីគកំពូលបារាំង Ligue 1 ដោយសារបុរសសញ្ជាតិព័រទុយហ្គាល់វ័យ ៥២ ឆ្នាំរូបនេះបានបញ្ចេញកាលវិការមិនសមរម្យ ចំពោះការសម្រេចចិត្តរបស់អាជ្ញាកណ្តាលគឺលោក Benoit Millot ជាខ្លាំងរហូតស្ទើរតែប៉ះមុខអាជ្ញាកណ្តាល និងស្រែកខ្លាំងៗដាក់ឱ្យអាជ្ញាកណ្តាលថែមទៀត។ ជាមួយគ្នានោះអាជ្ញាកណ្តាលក៏បានផ្តល់ក្រហមទៅកាន់លោក Paulo Fonseca បណ្តេញចេញពីលានភ្លាមៗតែម្តង។

យ៉ាងណា បន្ទាប់ពីបញ្ហាខាងលើនេះ នៅក្នុងសេចក្តីថ្លៃងការណ៍របស់សហព័ន្ធកីទ្បាបាល់ទាត់បារាំង FFF បានបញ្ជាក់ថា៖ លោក Paulo Fonseca ត្រូវបានពិន័យរយៈពេល ៩ ខែពោលគឺរហូតដល់ថ្ងៃទី៣០ ខែវិច្ឆកា ហើយរូបលោកក៏មិនត្រូវអនុញ្ញាតឱ្យឈរបញ្ជាកូនក្រុមនៅលើទីលានបានទេ សូម្បីតែបន្ទប់ស្លៀកពាក់ និងបំពេញមុខងារផ្លូវការណាមួយមុន ឬក្រោយការប្រកួត រហូតដល់ថ្ងៃទី១៥ ខែកញ្ញា ឆ្នាំ២០២៥ ថែមទៀតផង៕

ប្រភព៖ BBC

តំណាងស្ថានទូតអ៊ីរ៉ង់បានធ្វើអត្ថាធិប្បាយលើព័ត៌មានដែលថាខ្សែប្រយុទ្ធ Al-Nassr គឺ Cristiano Ronaldo មិនត្រូវបានបញ្ចូលក្នុងក្រុមសម្រាប់ការប្រកួតពានរង្វាន់ AFC Champions Leagueជុំទី១៦ ទល់នឹង Esteghlal ដោយសារហេតុផលបំពានច្បាប់នៅក្នុងប្រទេសអ៊ីរ៉ង់។ ចំណែកឯកាសែត Saudi Gazette បានរាយការណ៍ថា Ronaldo ពិតជាខកខានក្នុងការធ្វើដំណើរដោយសារតែអស់បញ្ហារបួសសាច់ដុំ។

តំណាងស្ថានទូតអ៊ីរ៉ង់បាននិយាយថា៖ យើងប្រឆាំងដាច់ខាតចំពោះសេចក្តីសម្រេចរបស់តុលាការប្រឆាំងនឹងអត្តពលិកអន្តរជាតិណាមួយនៅក្នុងប្រទេសអ៊ីរ៉ង់។ ការជួបដោយស្មោះស្ម័គ្រ និងមនុស្សធម៌របស់គាត់ជាមួយ Fatemeh Hammami ក៏ទទួលបានការសរសើរ និងការកោតសរសើរពីប្រជាជន និងអាជ្ញាធរកីឡានៃប្រទេសនេះ។

សូមរំឭកថានៅខែកញ្ញាឆ្នាំ 2023 Al-Nassr បានប្រកួតក្រៅដីជាមួយក្លឹបអ៊ីរ៉ង់ Persepolis ជាកន្លែងដែល Ronaldo បានជួបជាមួយអ្នកគាំទ្រ សិល្បការិនីពិការ Fatemeh Hammami ដែលគូររូបដោយប្រើជើងរបស់នាង។ Cristiano បាន​ឱប និង​ថើប Fatemeh លើ​ថ្ងាស ដែល​បាន​បំពាន​ច្បាប់​អ៊ីរ៉ង់។ គាត់បានប្រឈមមុខនឹងការពិន័យចំនួន ៩៩ ហើយវាត្រូវបានគេរាយការណ៍ថានេះជាហេតុផលដែលគាត់មិនធ្វើដំណើរទៅប្រទេសអ៊ីរ៉ង់សម្រាប់ការប្រកួតជាមួយ Esteghlal។

នៅឆ្នាំ២០២៣ បណ្តាញអ៊ីរ៉ង់ Sharq Emroz យោងទៅតាមតាមលោក Mundo Deportivo បានអះអាងថា៖ មេធាវីមួយចំនួនធំនៅក្នុងប្រទេសអ៊ីរ៉ង់បានដាក់ពាក្យបណ្តឹងជុំវិញសកម្មភាពរបស់ Ronaldo ជាមួយវិចិត្រករ Hamima ។ Hamima ដែល​បានប្រី​ជើង​គូរ​រូប Ronaldo ជាច្រើន​សន្លឹក ហើយ​ញញឹម​ពេល​គាត់​ឱប​នាង​ក្នុង​ការ​ជួប​គ្នា​កាល​ពី ១៨ ខែ​មុន។ វាត្រូវបានគេនិយាយថា Ronaldo បានថើបនាងនៅលើថ្ពាល់ហើយឱ្យអាវដែលមានហត្ថលេខាឱ្យនាងខណៈពេលដែលគាត់ក៏បានថតរូបឱបនាងផងដែរ។ នៅពេលនោះ មានសេចក្តីរាយការណ៍ថា Ronaldo នឹងត្រូវចាប់ខ្លួន ប្រសិនបើគាត់ចូលអ៊ីរ៉ង់ម្តងទៀត៕