(Khmer) ក្លិប Paris Saint Germain ត្រូវប្រកួតជាមួយក្លិប Lyon នាក្របខណ្ឌ Ligue 1 ដោយអវត្តមានកីឡាករសំខាន់ៗរហូតដល់ទៅ១១រូប។

នៅរាត្រីនេះ PSG នឹងត្រូវធ្វើដំណើរទៅកាន់កីឡដ្ឋាន Groupama Stadium របស់ Lyon ដើម្បីធ្វើការប្រកួតក្នុងសប្តាហ៍ទី២០ ប៉ុន្តែ ក្រុមទាំងមូលកំពុងប្រឈមមុខខ្លាំងទាក់ទងនឹងបញ្ហាកីឡាកររបួស និង កីឡាករជាប់ភារកិច្ចជាមួយក្រុមជម្រើសជាតិចូលរួមការប្រកួត African Cup of Nations ជាដើម។

សម្រាប់កីឡាករដែលមានបញ្ហារបួស និង បញ្ហាកូវីដ-១៩ មានដូចជា Angel Di Maria, Julian Draxler, Danilo Pereira, Layvin Kurzawa, Gianluigi Donnarumma, Lionel Messi, Alexandre Letellier និង Neymar ខណៈ Achraf Hakimi, Abou Diallo និង Idrissa Gueye ជាប់បំពេញភារកិច្ចជាមួយនឹងក្រុមជម្រើសជាតិ៕

(Khmer) លោក Bruno Lage ដែលជាអ្នកចាត់ការក្រុម Wolves បានលើកឡើងថា ក្រុមលោកមិនមានគម្រោងក្នុងការលក់កីឡាករ Ruben Neves ទៅកាន់ Manchester United ឡើយ លុះត្រាតែក្រុមទទួលបានសំណើរដែលមានតម្លៃធំធេងមួយ។

Man Utd កំពុងតែរៀបចំផែនការមួយក្នុងការពង្រឹងតំបន់កណ្តាលរបស់ខ្លួននៅក្នុងខែមករានេះ ឬ អាចនឹងចប់រដូវកាល ដោយក្លិបគ្រោងនឹងចំណាយទឹកប្រាក់ចំនួន៣៥លានផោន សម្រាប់កីឡាករសញ្ជាតិព័រទុយហ្កាល់ខាងលើ ក្រោយរូបគេបង្ហាញទម្រង់លេងបានល្អមែនទែនក្នុងជ័យជម្នះ ១ទល់នឹង០ ទល់នឹងក្រុមបិសាចក្រហមកាលពីដើមសប្តាហ៍កន្លងទៅ។

លោក Bruno បាននិយាយថា៖”ផែនការរបស់ក្លិបពួកយើង គឺ រក្សាកីឡាករដដែល ព្យាយាមកែលម្អពួកគេ ដើម្បីឈានទៅដល់កម្រិតបន្ទាប់។ យ៉ាងណាក្តី អ្នកបានដឹងហើយពីគំរូរបស់បាល់ទាត់។ ប្រសិនបើការផ្ទេរដ៏ធំមួយលេចឡើង ខ្ញុំអាចប្រៀបធៀបជាមួយនឹងពេលដែលខ្ញុំនៅដឹកនាំ Benfica ហើយក្រុមមួយបានចំណាយទឹកប្រាក់ចំនួន ១២០លានអឺរ៉ូ សម្រាប់កីឡាករ Joao Felix ហើយ អ្នកមិនអាចនិយាយថាទេនោះទេ”៕

(Khmer) ខ្សែការពារស្លាបឆ្វេង Sergio Reguilon របស់ Tottenham បានចាត់ទុកអ្នកចាំទី David De Gea ជា កីឡាករសញ្ជាតិអេស្ប៉ាញល្អដាច់គេនៅក្នុងក្លិប Manchester United។

De Gea បច្ចុប្បន្នទោះមានវ័យ៣១ រៀងជ្រេបន្តិចមែន ប៉ុន្តែ រូបគេនៅតែបានបង្ហាញថ្វីដៃសង្គ្រោះបាល់បានល្អដដែល ជាក់ស្តែង រូបគេតែងតែជាប់ឈ្មោះនៅជម្រើសដំបូងជាមួយបិសាចក្រហម និង ទទួលបានការកោះហៅឲ្យចូលរួមជាមួយក្រុមជម្រើសជាតិអេស្ប៉ាញជានិច្ចកាលផងដែរ។

Reguilon បាននិយាយថា៖

«ខ្ញុំធ្លាប់បានលេងជាមួយ De Gea នៅក្នុងក្រុមជម្រើសជាតិ ហើយ វត្តមានរបស់គាត់ធ្វើឲ្យក្រុមយើងមានសុវត្ថិភាព។ គាត់បានផ្តល់ភាពជឿជាក់យ៉ាងខ្លាំងមកកាន់ក្រុម៕»

(Khmer) ក្រុមជម្រើស​ជាតិវៀតណាមបានចាប់ផ្តើមការរៀបចំសម្រាប់ការប្រកួតពានរង្វាន់ AFF U-23 Championship នៅខែក្រោយ ដោយការហៅកីឡាករអាយុក្រោម 21 ឆ្នាំមកបោះជំរុំហ្វឹកហាត់ ដែលចាប់ផ្តើមកាលពីម្សិលមិញ នៅមជ្ឈមណ្ឌលបណ្តុះបណ្តាលបាល់ទាត់យុវជនវៀតណាម។

ប្រភពវេបសាយផ្ល្ូវការរបស់​ ASEAN Football បានឱ្យ​ដឹងផែនការនេះគឺក្រោមការដឹកនាំរបស់គ្រូបង្វឹកលោក Dinh The Nam ដើម្បីកំណត់អត្តសញ្ញាណកីឡាករល្អ មិនត្រឹមតែសម្រាប់ជំនួបប្រកួត​នៅ​ទឹក​ដីកម្ពុជាប៉ុណ្ណោះទេ ប៉ុន្តែថែមទាំងប្រើប្រាស់វាដើម្បីអភិវឌ្ឍកីឡាករសម្រាប់ក្រុមកីឡាស៊ីហ្គេមឆ្នាំ 2023 របស់វៀតណាមផងដែរ។

ទន្ទឹមនឹងនោះផងដែរ កីឡាករដែលមានទេពកោសល្យដែលធ្វើបានល្អនៅកម្ពុជា ក៏នឹងត្រូវបញ្ចូលទៅក្នុងក្រុមវៀតណាម ដែលនឹងចូលរួមប្រកួតកីឡាស៊ីហ្គេមនៅខែឧសភាឆ្នាំនេះផងដែរ។ ស្ទើរតែទាំងអស់នៃកីឡាករដែលត្រូវបានកោះហៅគឺជាកីឡាករដែលបង្ហាញថ្វី​ជើងបានល្អក្នុងការប្រកួតជើងឯកជាតិ U21 វៀតណាមឆ្នាំ 2021 ដែលទើបបញ្ចប់ថ្មីៗនេះ។

សម្រាប់​ការ​ប្រកួត AFF U23 Championship ដែល​​កម្ពុជាជាម្ចាស់​ផ្ទះវិញ​វិញ វៀតណាម​​ស្ថិត​ក្នុង​ពូល C ទល់​នឹង​ថៃ និង​សិង្ហបុរី។ពូល A មានកម្ពុជា ទីម័រខាងកើត ហ្វីលីពីន និងប្រ៊ុយណេ ខណៈពូល B មាន ឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ។ ការប្រកួតពានរង្វាន់ AFF U23 Championship នឹងធ្វើឡើងនៅប្រទេស​កម្ពុជា នៅថ្ងៃទី 14-26 ខែកុម្ភៈ ឆ្នាំ 2022៕