(Khmer) ខ្សែការពារស្លាបស្តាំ Dani Alves របស់ Barcelona បានឆ្លើយតបទៅនឹងការសម្រេចចិត្តរបស់លោក Xavi Hernandes ដែលមិនបានបញ្ចូលឈ្មោះរូបគេចូលរួមប្រកួតក្នុងពានរង្វាន់ Europa League។

មូលហេតុដែល Barcelona មិនបានចុចឈ្មោះ Alves គឺ ដោយសារ ច្បាប់នៅក្នុងពានរង្វាន់ Europa League ខាងលើអនុញ្ញាតឲ្យក្លិបនីមួយៗចុះឈ្មោះកីឡារចំណូលថ្មីរបស់ខ្លួនបានតែ៣នាក់ប៉ុណ្ណោះ ហើយ ផ្ទុយទៅវិញ លោក Xavi បានសម្រេចចិត្តជ្រើសយក Adama Traore, Ferran Torres និង Pierre-Emerick Aubameyang ដោយសារតែលោកចង់ពង្រឹងតំបន់ប្រយុទ្ធដែលកំពុងតែមានភាពខ្វះខាតក្នុងពេលបច្ចុប្បន្ននេះ។

Alves បាននិយាយថា៖«ខ្ញុំតែងតែផ្តោតអារម្មណ៍ជារៀងរាល់ថ្ងៃ។ ដូចដែលខ្ញុំតែងតែនិយាយពីមុនមកថា យើងជាបុគ្គលិក ហើយ ក្លិបជាអ្នកសម្រេចថាអ្វីដែលល្អបំផុតសម្រាប់យើង។ ខ្ញុំមកទីនេះដើម្បីជួយ និង តាំងចិត្តខ្លួនឯងក្នុងការនាំយកអ្វីៗមកក្រុម ដើម្បីនាំយកកម្រិតនៃការប្រកួតប្រជែង និងស្មារតីវិជ្ជមាន។ ខ្ញុំក៏ចង់ចូលរួមប្រកួតដែរ ប៉ុន្តែ យើងមានកីឡាករ៤នាក់ដែលមានតំណែងលេងបីខុសៗគ្នា ហើយ វា ជា វេន របស់ ខ្ញុំ ដែល ត្រូវ ខកខាន។ អ្នកត្រូវតែទទួលយកវា ប៉ុន្តែ អ្នកត្រូវផ្តោតលើអ្វីដែលអ្នកអាចផ្តល់ជូនមកក្រុមបាន«៕

(Khmer) សហព័ន្ធកីឡាបាល់ទាត់កម្ពុជាមានកិត្តិយសប្រកាសពីភាពជាដៃគូជាមួយម៉ាកVARAMAN ជាអ្នកផ្គត់ផ្គង់ឈុតឯកសណ្ឋានផ្លូវការដល់ក្រុមជម្រើសជាតិកម្ពុជា ចាប់ពីឆ្នាំ២០២២នេះតទៅ។

VARAMAN គឺជាម៉ាកក្នុងស្រុកថ្មី បង្កើតឡើងជាមួយគោលបំណង ចង់ឱ្យក្រុមជម្រើសជាតិកម្ពុជាប្រើប្រាស់ឯកសណ្ឋានដែលរចនា​ និងផលិត នៅក្នុងព្រះរាជាណាចក្រកម្ពុជា ជាផលិតផលដែលផលិតដោយដៃបងប្អូនខ្មែរយើងផ្ទាល់​ ដើម្បីប្រើប្រាស់ក្នុងពេលប្រកួតប្រជែងលើឆាកអន្តរជាតិ។

ម៉ាក VARAMAN (វរ្ម័ន) គឺបានបំផុសគំនិតចេញពីព្រះបរមនាមព្រះមហាក្សត្រខ្មែរមួយព្រះអង្គ ដែលគួរឲ្យកោតស្ញប់ស្ញែង គឺព្រះបាទជ័យវរ្ម័នទី៧ ក្នុងសម័យកាលដ៏រុងរឿងបំផុតនៃប្រវត្តិសាស្ត្រខ្មែរ។ ពាក្យនេះក៏ជាពាក្យសំស្ក្រឹតមួយ ដែលមាន​ន័យថាអាវក្រោះ ដែលអត្ថន័យនេះ ប្រៀបបានទៅនឹងឯកសណ្ឋានក្រុមជម្រើសជាតិកម្ពុជាយើងជាអាវក្រោះការពារ ក្នុងពេលប្រកួតជាមួយអន្តរជាតិ។

ឯកសណ្ឋានផ្លូវការរបស់ក្រុមជម្រើសជាតិកម្ពុជាឆ្នាំ២០២២​ នឹងចេញជាផ្លូវការនៅ ខែឧសភា ឆ្នាំ២០២២ សម្រាប់ការប្រកួតជម្រុះជុំទី៣ នៃពានរង្វាន់បាល់ទាត់ទ្វីបអាស៊ី។ ដោយឡែក សម្រាប់ការប្រកួតពានរង្វាន់ ជើងឯកបាល់ទាត់តំបន់អាស៊ីអាគ្នេយ៍អាយុក្រោម២៣ឆ្នាំ ឆ្នាំ២០២២ ខាងមុខនេះ VARAMAN នឹងមានឯកសណ្ឋានដោយ​ឡែក​ផ្សេងជាពិសេស សម្រាប់ក្រុមជម្រើសជាតិអាយុក្រោម២៣ឆ្នាំរបស់យើង។

អត្ថបទ៖ FFC

(Khmer) កីឡាករ Pierre-Emerick Aubameyang ដែលជាខ្សែប្រយុទ្ធចំណូលថ្មីរបស់ Barcelona បានសាភាពថា បញ្ហាជាមួយនឹងលោក Mikel Arteta គឺ ជាមូលហេតុដែលធ្វើឲ្យរូបគេត្រូវបង្ខំចិត្តចាកចេញពី Arsenal។

យើងបានដឹងហើយថា មួយរយៈចុងក្រោយនេះ ក្រោមការដឹកនាំរបស់លោក Arteta គឺ Aubameyang មិនបានបង្ហាញខ្លួនឡើយសូម្បីតែស្ថិតនៅក្នុងបញ្ជីឈ្មោះសម្រាប់ការប្រកួត ហើយ រូបគេក៏ត្រូវបានក្លិបដកស្លាកជាប្រធានក្រុមផងដែរ។ មូលហេតុនេះហើយដែលរូបគេបានសម្រេចចិត្តចាកចេញពីក្លិបដើម្បីផ្លាស់ទៅកាន់ Barcelona ដោយគ្មានតម្លៃខ្លួន។

Aubameyang បាននិយាយថា៖«វាជាខែដ៏ស្មុគស្មាញ ហើយ ពេលខ្លះបាល់ទាត់ គឺ បែបនេះ។ ប្រសិនបើខ្ញុំត្រូវនិយាយអ្វីមួយអំពីរឿងនេះ ខ្ញុំនឹងនិយាយថា ខ្ញុំមិនដែលចង់ធ្វើអ្វីអាក្រក់នោះទេ។ វាជារឿងអតីតកាល ហើយ ពេលនេះខ្ញុំចង់គិតពីរឿងបច្ចុប្បន្ន។ ខ្ញុំមានបញ្ហាជាមួយលោក Arteta ហើយ ខ្ញុំក៏បានធ្វើការសម្រេចចិត្តចាកចេញ។ ខ្ញុំមិនអាចបកស្រាយបានច្រើនទេ គ្រាន់តែគាត់មិនសប្បាយចិត្តតែប៉ុណ្ណឹង»៕

(Khmer) លោក Frank Lampard ដែលជាអ្នកចាត់ការទូទៅថ្មីរបស់ Everton បានពន្យល់ពីហេតុផលដែលលោកចង់បាន Donny van de Beek និង Dele Alli មករួមក្រុម។

ថ្មីៗនេះ នៅថ្ងៃបញ្ចប់នៃទីផ្សារដោះដូរកីឡាករខែមករា គឺ Everton បានប្រកាសជាផ្លូវការអំពីការនាំយក Van de Beek មករួមក្រុមក្នុងលក្ខខណ្ឌខ្ចីជើងរហូតដល់បញ្ចប់រដូវកាលពី Manchester United និង ទិញផ្តាច់ Dele Alli ពី Tottenham ក្នុងតម្លៃប្រមាណ៤០លានអឺរ៉ូ។

លោក Lampard បាននិយាយថា៖«Van de Beek និង Alli ជា កីឡាករ ដែល មាន សមត្ថភាពល្អ ខ្លាំង ណាស់។ ខ្ញុំធ្លាប់ដឹកនាំក្រុមទល់នឹងពួកគេកាលពីមុន ហើយ ខ្ញុំចាប់អារម្មណ៍ល់ើសមត្ថភាពអ្នកទាំងពីរ។ ពួកគេមកកាន់ទីនេះដោយភាពស្រែកឃ្លាន។ ខ្ញុំជឿជាក់លើទេពកោសល្យរបស់ពួកគេ»៕

(Khmer) ក្រុមបាល់ទាត់ជម្រើស​ជាតិ​កម្ពុជាស្ថិត​ក្នុង Pot 4មុនចាប់​ឆ្នោតជ្រើសរើសពូលវគ្គជម្រុះជុំទី៣ ពាន Asian Cup ២០២៣​នៅ​ប្រទេស​ចិន។

ក្រុមទាំង២៤នឹងបែងចែកជា ៤ផត ( 4 pot​ មិនមែនពូលទេ) )ដោយផ្អែកលើចំណាត់​ថ្នាក់ FIFA World ដែល​នឹង​បន្ទាន់សម័យកាលនៅថ្ងៃទី១០ ខែកុម្ភៈ។ ក្នុងមួយ Pot មាន៦​ក្រុម​ ខណៈដែលកម្ពុជាស្ថិតក្នុង Pot 4 ជាមួយ សិង្ហបុរី នេប៉ាល់ ម៉ុងហ្គោលី បង់ក្លាដេស និងស្រីលង្កា។ នេះ​មានន័យថាកម្ពុជាមិន​ជួប​ក្រុមទាំងអស់​ក្នុង Pot 4 នេះ​ទេ។

ក្នុង​ជុំទី​៣​នេះ​គឺ​ក្រុម​ទាំ២៤​ត្រូវ​បែងចែក​ជា៦ពូល ក្នុងមួយពូល មាន​៤​ក្រុម។ ក្រុមកំពូលតារាងទាំង៦ពូល+ ក្រុម​លេខ២ល្អបំផុតចំនួន ៥ ​នឹងមានសិទ្ធិទៅ Asian Cup ជុំផ្ដាច់​ព្រ័ត្រ​នៅ​ប្រទេសចិន​ជាមួយក្រុម​ដែល​មាន​ឡើង​ទៅ​កាល​វគ្គ​ជម្រុះជុំ​ទី​២​មាន៖ ចិន (ម្ចាស់ផ្ទះ) ជប៉ុន ស៊ីរី  កាតារ កូរ៉េខាងត្បូង អូស្រ្តាលី អ៊ីរ៉ង់ អារ៉ាប់រួម អារ៉ាបីសាអួឌីត អ៊ីរ៉ាក់ អូម៉ង់  វៀតណាម និង​លីបង់។ ពិធីចាប់ឆ្នោតជ្រើសរើសពូល នឹងធ្វើឡើងនៅថ្ងៃទី ២៤ ខែកុម្ភៈ។

ការ​ប្រកួតជុំទីបីនៃវគ្គជម្រុះ AFC Asian Cup ឆ្នាំ 2023 នឹងត្រូវលេងចាប់ពីថ្ងៃទី ០៨ ដល់ថ្ងៃទី ១៤ ខែមិថុនា ឆ្នាំ 2022 នៅលើទីលាននៃ​ទឹកកណ្ដាលចំនួនប្រាំមួយ។ ដើមឡើយវាត្រូវបានគ្រោងធ្វើឡើងនៅថ្ងៃទី 30 ខែមីនា ឆ្នាំ 2021 ដល់ថ្ងៃទី 29 ខែមីនា ឆ្នាំ 2022 ប៉ុន្តែសហព័ន្ធកីឡាបាល់ទាត់អាស៊ី (AFC) បានផ្លាស់ប្តូរកាលបរិច្ឆេទជាច្រើនលើក ដោយសារការពន្យារពេលនៃការប្រកួតក្នុងជុំទី 2 ដែលរងផលប៉ះពាល់ដោយជំងឺរាតត្បាត COVID-19 នៅក្នុងតំបន់អាស៊ី។