(Khmer) លោកស្រី Fayza Lamari មិនត្រឹមតែជាម្តាយរបស់កំពូលតារាបាល់ទាត់របស់ក្លឹប Paris Saint-Germain ប៉ុណ្ណោះទេ ប៉ុន្តែលោកស្រីក៏ជាភ្នាក់ងាររបស់កីឡាករូបនេះផងដែរ។ យោងតាមកាសែតបារាំង Le Parisien លោកស្រីបានអះអាងថាគាត់នឹង ‘ចូលនិវត្តន៍’ និង ‘ទៅវិស្សមកាល នៅប្រទេសម៉ាល់ឌីវ’ ប្រសិនបើ Mbappe បន្តបរិច្ចាគប្រាក់ច្រើនជាង 30 ភាគរយនៃប្រាក់ចំណេញ ទៅកាន់សមាគម KM ។

ម្តាយរបស់ Mbappe ដែលបានដើរតួយ៉ាងសំខាន់ក្នុងការចរចាកិច្ចសន្យាដ៏វែងរបស់គាត់ជាមួយ Paris Saint-Germain ក្នុងប៉ុន្មានឆ្នាំថ្មីៗនេះបានប្រាប់អ្នកឈ្នះពានរង្វាន់ World Cup ថាគាត់មិនគួរផ្តល់ឱ្យលើសពី 30 ភាគរយនៃប្រាក់ចំណេញក្រុមហ៊ុនរបស់គាត់ទៅសមាគមនោះទេ។

លោកស្រីបានបន្តថា «ខ្ញុំប្រាប់គាត់ថាគឺក្រោម ៣០ភាគរយ។ ខ្ញុំមិនធ្វើវាទៀតទេ! ខ្ញុំនឹងចូលនិវត្តន៍ដូចអ្នកផ្សេងទៀតដែរ។ ខ្ញុំនឹងទៅវិស្សមកាលនៅម៉ាល់ឌីវ ហើយខ្ញុំមិនធ្វើការឱ្យគាត់ទៀតទេ។ នេះ​បើ​តាម​ Le Parisien។ 

Mbappe ដែលយោងទៅតាមទស្សនាវដ្តី Forbes ថាគាត់មានទ្រព្យសម្បត្តិជិត១២០លានដុល្លារក្នុងអំឡុងពេលអាជីពរបស់គាត់តាមរយៈការចុះកិច្ចព្រមព្រៀងនិងប្រាក់ខែរបស់គាត់ត្រូវបានគេស្គាល់យ៉ាងច្បាស់ថាជាមនុស្សដែលមានសប្បុរសធម៌។

ត្រលប់ទៅឆ្នាំ 2018 គាត់បានបរិច្ចាគប្រាក់ឈ្នួល World Cup 2018 របស់គាត់ទាំងមូលចំនួន៤៨ម៉ឺនដុល្លារដល់អង្គការសប្បុរសធម៌។ ដោយចាប់ផ្តើមមូលនិធិរបស់គាត់នៅឆ្នាំ 2020ដែលជាគំនិតបង្កើតឡើងដោយម្តាយរបស់គាត់មានគោលបំណងដើម្បីជួយកុមារ 98 នាក់ពីទីក្រុងប៉ារីសឱ្យបំពេញមហិច្ឆតាជីវិតរបស់ពួកគេ។ អង្គការសប្បុរសធម៌មាន គុណតម្លៃជាមូលដ្ឋាន ចំនួនបួន ដើម្បីជួយកុមារ រៀន យល់ ចែករំលែក និងបន្តទៅមុខ។ វាឧបត្ថម្ភក្មេងប្រុស 49 នាក់ និងក្មេងស្រី 49 ដែលមានអាយុចន្លោះពី 9 ទៅ 16 ឆ្នាំ ដែល Mbappe អះអាងថា ‘នឹងត្រូវបានគាំទ្ររហូតដល់ជីវិតការងាពួកគេចាប់ផ្តើមានការងារធ្វើ៕

(Khmer) កីឡាកររបស់ Napoli ត្រូវបានម្នាស់ក្លឹបចាក់សោរក្នុងសណ្ឋាគារមួយកាលពីប៉ុន្មានថ្ងៃមុន ដែលជាការដាក់ទណ្ឌកម្មចំពោះទម្រង់លេងដ៏គួរឱ្យអាម៉ាស់ របស់ពួកគេ។ ម្ចាស់ជើងឯក Serie A ដែលបានបញ្ចប់ការឈឺចាប់រយៈពេល 36 ឆ្នាំដោយការឈ្នះពានរង្វាន់លីកកាលពីរដូវកាលមុន បានដាក់ការប្តេជ្ញាការពារយ៉ាងក្តៅគគុកនៃពានរង្វាន់របស់ពួកគេរហូតមកដល់ពេលនេះ។

បច្ចុប្បន្នពួកគេកំពុងឈរនៅលេខរៀងទី 9 ក្នុងតារាង បន្ទាប់ពីបានចាញ់ 5 ប្រកួតក្នុងចំណោម 8 ប្រកួតចុងក្រោយនៅ Serie A ហើយថ្មីៗនេះត្រូវបានទម្លាក់ចេញពីការប្រកួតពានរង្វាន់អ៊ីតាលីខាប់ Coppa Italia ក្រោមថ្វីជើងក្រុមចំនូលថ្មី Frosinoneដោយលទ្ធផល  4-0 ។

នៅក្នុងការប៉ុនប៉ងដើម្បីធ្វើឱ្យក្រុមដែលដួលសន្លប់របស់គាត់រស់ឡើងវិញ ប្រធាន Napoli លោក Aurelio De Laurentiis បានបញ្ជូនកីឡាករទៅសណ្ឋាគារសម្រាប់ការសម្រាករយៈពេលមួយសប្តាហ៍ដែលគេស្គាល់ថាជា ‘ritiro’ មានន័យថា “ដកចេញអោយនៅឯកោ។ក្រុមនេះត្រូវបានកាត់ផ្តាច់ពីមិត្តភ័ក្តិ និងក្រុមគ្រួសាររបស់ពួកគេ ហើយត្រូវបានគេរំពឹងថានឹងហ្វឹកហាត់យ៉ាងខ្លាំងពេញមួយកន្លែងស្នាក់នៅរបស់ពួកគេ។

ការ​ការពារ​តំណែង​ជើងឯក Serie A របស់​ពួក​គេ​តែង​តែ​មាន​បញ្ហា​បន្តិច​បន្តួច​ជា​ពិសេស​បន្ទាប់​ពី​អ្នក​ចាត់​ការ Luciano Spalletti បាន​ចាក​ចេញ​ពី​ក្លឹប​ទៅ​កាន់​តំណែង​នៅ​ប្រទេស​អ៊ីតាលី​នៅ​ចុង​រដូវ​កាល​នេះ៕

(Khmer) សុវត្ថិភាពនៅកន្លែងការងារកំពុងក្លាយជាការព្រួយបារម្ភកាន់តែខ្លាំងឡើងសម្រាប់កីឡាករបាល់ទាត់ ដែលត្រូវប្រឈមមុខនឹងការផ្ទុះឆេះ និងកាំជ្រួចដែលត្រូវគប់ចេញពីកន្លែងអង្គុយមើល ការលុកលុយក្នុងទីលាន និងអ្នកគាំទ្រជេរប្រមាថដោយពាក្យសំដី។នេះបើយោងតាមរបាយការណ៍របស់សហព័ន្ធកីឡាកបាល់ទាត់អាជីពអន្តរជាតិ(FIFPRO) ដែលបានចេញផ្សាយកាលពីថ្ងៃព្រហស្បតិ៍ទី១១ខែមករា ២០២៤។

សហជីពកីឡាករសកលបាននិយាយថា កីឡាករបាល់ទាត់ជាច្រើនបានត្អូញត្អែរថា ពួកគេជារឿយៗត្រូវទទួលយកការឈ្លានពានដោយស្ងៀមស្ងាត់ ជាជាងនិយាយអំពីវា ព្រោះខ្លាចធ្វើឲ្យប៉ះពាល់ដល់ឱកាសការងាររបស់ពួកគេ។

នៅក្នុងរបាយការណ៍កម្រាស់២៨ ទំព័រដែលមានចំណងជើងថា «ផលប៉ះពាល់នៃអំពើហិង្សាចំពោះកីឡាករបាល់ទាត់នៅកន្លែងធ្វើការរបស់ពួកគេ” កីឡាករ​ម្នាក់​បាន​សម្ភាស​ន៍ថា​៖ «​ខ្ញុំ​មាន​អារម្មណ៍​ថា​ កីឡាករ​កំពុងប្រឈមមុខនឹងបញ្ហាជាច្រើន​ក្នុង​កីឡដ្ឋាន​ដែលឈានដល់​ចំណុច​មួយ​ដែល​អ្នក​ខ្លះ​គិត​ថា​ពួកគេ​មាន​សិទ្ធិ​ធ្វើ​អ្វី​តែពួកគេ​ពិត​ជា​មិន​អាចធ្វើបាន។

របាយការណ៍នេះគឺផ្អែកលើការសម្ភាសន៍ទៅលើកីឡាករ ការស្ទង់មតិរបស់សហជីពជាតិចំនួន 41 ដែលស្រាវជ្រាវដោយលោកវេជ្ជបណ្ឌិត Joel Rookwood នៃសាកលវិទ្យាល័យ University College Dublin ។ ការរំលោភបំពានអាចមានផលប៉ះពាល់យ៉ាងធ្ងន់ធ្ងរជាមួយ ៨៨ភាគរយនៃសហជីពដែលនិយាយថាការគំរាមកំហែងនៃអំពើហិង្សានាំទៅដល់ការលេងមិនល្អដល់កីឡាករហើយ ៨៣ ភាគរយនិយាយថាវារួមចំណែកដល់បញ្ហាសុខភាពផ្លូវចិត្តដូចជាជំងឺធ្លាក់ទឹកចិត្តជាដើម។

៩៨ភាគរយដែលរាយការណ៍ដោយសហជីពបានអោយដឹងថា ពួកគេនឹងស្វាគមន៍ការកើនឡើងនៃការប្រើប្រាស់បច្ចេកវិទ្យា ដូចជាម៉ាស៊ីនស្កេនសុវត្ថិភាព និងការសម្គាល់ផ្ទៃមុខ ដើម្បីចាប់ និងឃាត់ខ្លួនជនល្មើស ខណៈ ៨៨ ភាគរយនិយាយថា ក្លឹបគួរតែត្រូវធ្វើបន្ថែមទៀតដើម្បីហាមឃាត់អ្នកគាំទ្រដែលមានអំពើហិង្សា។

របាយការណ៍បានបន្តថា ក្លឹប លីក និងសហព័ន្ធមានទំនួលខុសត្រូវក្នុងការធានាថា កីឡាករបុគ្គលិក មានបរិយាកាសការងារប្រកបដោយសុវត្ថិភាព ដើម្បីអនុវត្តនៅកម្រិតកំពូលរបស់ពួកគេ។

កាំជ្រួចបង្កការគម្រាមកំហែងខ្លាំងបំផុតចំពោះសុវត្ថិភាពអ្នកលេង ជាពិសេសអ្នករក្សា ដោយសារតែភាពជិតស្និទ្ធរបស់ពួកគេជាមួយអ្នកគាំទ្រ។ ពីរភាគបីនៃសហជីពដែលបានស្ទង់មតិបាននិយាយថាអ្នកគាំទ្រគប់វត្ថុគឺជាកង្វល់មួយដែលកើតឡើងញឹកញាប់បំផុត៕

(Khmer) នៅលើលោកនេះគ្មានអាថ៌កំបាំងទេ ដោយគ្រាន់តែត្រូវការពេលវេលាយូរឬឆាប់តែប៉ុណ្ណោះ។ ជាក់ស្តែងណាស់ជុំវិញរឿងខ្សែប្រយុទ្ធ Messi មិនត្រូវបានគេអនុញ្ញាតិឲ្យហែរពាន World Cup ដែលលោកបានឈ្នះនៅប្រទេសកាតាឆ្នាំ២០២២ ត្រូវបានប្រធានក្លឹប Paris Saint-Germain លោក Nasser Al-Khelaifi បង្ហាញពីមូលហេតុ ។

តើអ្វីជាមូលហេតុចម្បងជុំវិញរឿងនេះ?

នៅក្នុងបទសម្ភាសន៍ជាមួយ Migue Granados កាលពីឆ្នាំមុន Messi បានសារភាពថាខ្ញុំមិនសប្បាយចិត្ត នៅទឹកដីបារាំង Parc des Princes ហើយហាក់ដូចជាខកចិត្តចំពោះការហាមខ្ញុំមិនឲ្យដើរហែរពានបន្ទាប់ពីការប្រកួតបាល់ទាត់ពិភពលោកនៅប្រទេសកាតា។ Messi ​បាន​ថ្លែង​ថា ​វា​អាច​យល់​បាន​។ យើងស្ថិតក្នុងស្ថានភាពមួយដែលយើង [អាហ្សង់ទីន] ជាជើងឯកពិភពលោក ហើយវាជាកំហុសរបស់យើងដែលថាពួកគេ [បារាំង] មិនបានឈ្នះជើងឯកម្តងទៀត។

ដើម្បីសងជំងឺចិត្តកីឡាករMessi លោក Al-Khelaifi ឥឡូវនេះបានបង្ហើបថា ខ្ញុំមិនអាចអនុញ្ញាតឱ្យ Messi ប្រារព្ធពិធីហែពាននៅ Parc des Princes បានទេ ព្រោះ Mbappe ដែលជាមិត្តរួមក្រុមជាមួយMessi កំពុងស្ថិតក្លឹបParis Saint-Germain ដែលគាត់គឺជាអ្នកចាញ់។

នៅក្នុងបទសម្ភាសន៍ជាមួយទូរទស្សន៍ RMC TV លោក Al-Khelaifi បាននិយាយថា «សម្រាប់ខ្ញុំ ដូចខ្ញុំបាននិយាយចឹងថា ប្រសិនបើមាននរណាម្នាក់និយាយអំពីការពិត ដែលថាយើងមិនបានអបអរសាទរគាត់(Messi)គ្រប់គ្រាន់បន្ទាប់ពីគាត់បានឈ្នះការប្រកួត World Cup យើងនៅប្រទេសបារាំង ហើយគាត់បានឈ្នះទៅលើកីឡករបារាំងKylian។ យើង​ជា​ក្លឹប​បារាំង។ ខ្ញុំ​ក៏​មិន​ចង់​ឲ្យ​កីឡដ្ឋាន​ទាំង​មូល​ប្រឆាំង​Messiដែរ។ ខ្ញុំគិតថាយើងត្រូវតែគោរពគាត់។ យើងត្រូវតែគោរពប្រទេសដែលគាត់បានចាញ់ មិត្តរួមក្រុមរបស់គាត់នៅក្នុងក្រុមបារាំង និងអ្នកគាំទ្ររបស់យើងផងដែរ»

Messi ស៊ុតបញ្ចូលទីបាន 32 គ្រាប់ក្នុងការបង្ហាញខ្លួន 75 ដងក្នុងអំឡុងពេលរបស់គាត់នៅក្នុងរដ្ឋធានីរបស់ប្រទេសបារាំងដោយបានឈ្នះពានរង្វាន់ Ligue 1 ប៉ុន្តែអ្វីដែលប្រជាជនបារាំងមិនសប្បាយចិត្តដែរនោះដោយសារតែគាត់មិនអាចជួយក្លឹបឈ្នះពានឆេមពានលីគហើយថែមទាំងចាកចេញពីទឹកដីបារាំងទៅលេងឲ្យក្លឹបInter Miami នៅអាមេរិកទៀត។នេះក៏អាចចាត់ទុកថាជាហេតុផលបន្ទាប់បន្សំដែរ៕

(Khmer) ខ្សែប្រយុទ្ធ Tran Duc Hanh របស់ក្រុមបាល់ទះ Ha Tinh នឹងក្លាយជាកីឡាករបាល់ទះបុរសដំបូងគេក្នុងពិភពបាល់ទះវៀតណាមដែល ត្រូវបានអញ្ជើញ ហើយនឹងទៅប្រកួតនៅក្រៅប្រទេសនៅឆ្នាំ 2024 ។

នាយកមជ្ឈមណ្ឌលហ្វឹកហ្វឺន និងការប្រកួតកីឡាខេត្ត Ha Tinh – លោកស្រី Phan Thi Thu Huong បាននិយាយជាមួយ SGGP នៅថ្ងៃទី 11 ខែមករានេះថា៖«យើងបានទទួលសំណើជាផ្លូវការពីក្រុមកម្ពុជា ដែលបង្ហាញពីបំណងចង់អញ្ជើញកីឡាកររបស់យើងឱ្យចូលរួម»។

កីឡាករ Tran Duc Hanh នឹងទៅប្រកួតប្រជែងក្នុងពានរង្វាន់នេះហើយ ថ្ងៃនេះ យើងបានផ្ញើរបាយការណ៍ជាលាយលក្ខណ៍អក្សរទៅកាន់ថ្នាក់ដឹកនាំមន្ទីរវប្បធម៌ កីឡា និងទេសចរណ៍ខេត្ត Ha Tinh អំពីករណី Tran Duc Hanh ដើម្បីសុំគោលការណ៍ផ្ទេរចេញ»។

ជាមូលដ្ឋាន មជ្ឈមណ្ឌលហ្វឹកហ្វឺន និងប្រកួតប្រជែងកីឡាខេត្តតែងតែបង្កើតលក្ខខណ្ឌ និងគាំទ្រដល់កីឡាករក្នុងការប្រកួត ដើម្បីលើកកម្ពស់សមត្ថភាពអាជីពរបស់ពួកគេ ឱ្យបានល្អ ក៏ដូចជានាំមកនូវរូបភាពដ៏ស្រស់ស្អាតដល់កីឡាបាល់ទះខេត្ត Ha Tinh ។ ការប្រកួតនៅក្រៅប្រទេសរបស់ Duc Hanh នឹងទទួលបានបទពិសោធច្រើនសម្រាប់អត្តពលិកខ្លួនឯង។

យោងតាមការចែកចាយជាផ្លូវការ សមាគមកីឡាបាល់ទះក្រសួងមហាផ្ទៃរបស់កម្ពុជា បានបង្ហាញបំណងខ្ចីជើងកីឡាករ Tran Duc Hanh មកកម្ពុជា ដើម្បីចូលរួមប្រកួតកីឡាបាល់ទះតេជោលីគ ដែលប្រព្រឹត្តទៅចាប់ពីថ្ងៃទី ១៣ ខែមករា ដល់ថ្ងៃទី ១៨ ខែកុម្ភៈ។

ស្ទើរតែប្រាកដណាស់! Tran Duc Hanh នឹងទៅប្រទេសកម្ពុជា ដើម្បីចូលរួមការប្រកួត។ នេះមានន័យថា គាត់កីឡាកបាល់ទះរបុរសដំបូងគេក្នុងកីឡាបាល់ទះវៀតណាមដែលនឹងចេញទៅប្រកួតនៅក្រៅប្រទេសនៅឆ្នាំ២០២៤។ បច្ចុប្បន្នបាល់ទះវៀតណាមមានកីឡាករទៅលេងនៅប្រទេសជប៉ុន និងថៃ ប៉ុន្តែពួកគេសុទ្ធសឹងជាកីឡាការិនី។

តំណាងមជ្ឈមណ្ឌលហ្វឹកហ្វឺន និងប្រកួតប្រជែងកីឡាខេត្ត Ha Tinh បាននិយាយថា បន្ទាប់ពី Duc Hanh បញ្ចប់ការប្រកួតនៅប្រទេសកម្ពុជា គាត់នឹងត្រលប់មកមាតុប្រទេសវិញ ដើម្បីត្រៀមប្រកួតលក្ខណៈអាជីពក្នុងដំណាក់កាលទី១ នៃការប្រកួតកីឡាបាល់ទះថ្នាក់ជាតិឆ្នាំ ២០២៤។

កាលពីឆ្នាំមុន ក្រុមបាល់ទះបុរស Ha Tinh ទទួលបានចំណាត់ថ្នាក់លេខ 4 ក្នុងការប្រកួតកីឡាបាល់ទះថ្នាក់ជាតិឆ្នាំ 2023 ហើយ Tran Duc Hanh ជាប្រធានក្រុមនេះ។

(Khmer) ១-ការបោះជំហានទៅរកជម្រើស១១នាក់ដំបូង

Dragusin បានធ្វើការសម្រេចចិត្តដ៏លំបាកមួយថាតើត្រូវជ្រើសរើសយកក្លឹបTottenham ឬ Bayern។ ទោះជាយ៉ាងណាក្តីនាទីចុងក្រោយគាត់បានទម្លាក់ចុងប៊ិចចុះហត្ថលេខាជាមួយក្លឹប ដែលមានមូលដ្ឋាននៅទីក្រុងឡុងដ៍។ការរើសយកក្លឹបក៏ដោយសារតែលោកចង់មានឱកាសលេងឲ្យបានច្រើនជាប់ជម្រើស១១នាក់ដំបូង។

ប្រសិនបើគាត់ទៅBayern គាត់នឹងក្លាយជាកីឡាកករខ្សែការពារជម្រើសទី៤ដោយសារតែពេល គ្មានខ្សែការពារ Kim Min-jae សម្រាប់ខែក្រោយក្លឹបរបស់លោក Thomas Tuchel នៅមាន Matthijs de លេងជាមួយ Dayot Upamecano ។ នៅពេលដែល Kim ត្រលប់មកវិញ Dragusin នឹងក្លាយជាខ្សែការពារកណ្តាលជម្រើសទី ៤របស់ក្លឹប។ ឥឡូវនេះខ្សែការពារ Dragusin មិនត្រូវបានគេរំពឹងថានឹងក្លាយជាកីឡាករដំបូងនៅ Spurs តែយ៉ាងណាក៏នៅមានឱកាសច្រើនជាងនៅBayern។

២-ឥទ្ធិពលគ្រូបង្វឹក

លោក Ange Postecoglou គ្រូបង្វឹករបស់ Tottenhamគឺជាអ្នកដឹកនាំដ៏គួរឱ្យស្រឡាញ់និងពូកែទាក់ទាញកីឡាករនៅក្នុងទីផ្សារដោះដូររដូវក្តៅហើយជាក់ស្តែងណាស់លោកបានបញ្ចុះបញ្ចូលកីឡាករ James Maddison និង Micky van de Ven ឱ្យចុះហត្ថលេខាសម្រាប់ក្លឹបភាគខាងជើងទីក្រុងឡុងដ៍ ទោះបីជាមានការចាប់អារម្មណ៍ពីក្លឹបផ្សេងក៏ដោយ។

កីឡាករដែលបានចូលរួមជាមួយTottenhamក្នុងរដូវកាលនេះបាននិយាយសរសើរគ្រូបង្វឹកសញ្ជាតិក្រិករូបនេះ។Maddison បាននិយាយថាខ្ញុំមានទំនុកចិត្តលើលោក Ange ។មនុស្សគ្រប់គ្នាចូលមកដោយស្នាមញញឹមនៅលើមុខរបស់ពួកគេព្រោះពួកគេដឹងថាពួកគេនឹងរៀនអ្វីថ្មី ហើយយើងនឹងធ្វើការជាមួយបាល់ដើម្បីលេងបាល់ទាត់។

៣-ទំនាក់ទំនងជាមួយក្លឹបJuventus

លោកFabio Paratici អាចនឹងលែងត្រូវបានជួលជាផ្លូវការដោយ Tottenham ទៀតហើយ ប៉ុន្តែនាយកក្លឹបសញ្ជាតិអ៊ីតាលីរូបនេះត្រូវបានគេជឿថាលោកនៅតែផ្តល់យោបល់ដល់ក្លឹបនេះដដែល។

ឥទ្ធិពលរបស់លោកមានភាពច្បាស់លាស់នៅក្នុងកិច្ចព្រមព្រៀងមួយចំនួនរបស់ Spurs ចាប់តាំងពីលោក Ange បានចូលរួមជាមួយក្លឹប។ លោកParatici ដែលទំនាក់ទំនងជាមួយ Juventus បានជួយ Spurs ធ្វើកិច្ចព្រមព្រៀងសម្រាប់ Romero, Kulusevski និង Rodrigo Bentancur ហើយលោកបានដឹងយ៉ាងច្បាស់អំពី Dragusin ក្នុងពេលវេលាដែលលោកនៅទីក្រុង Turinជានាយកក្លឹបJuventus ។

ខ្សែការពាររូបនេះបានចូលក្រុមដំបូងក្រោមការដឹកនាំរបស់គ្រូបង្វឹក Andrea Pirlo ក្នុងរដូវកាល 2020/21 ទោះបីជាគាត់បានបង្ហាញខ្លួនត្រឹមតែ 4 ដងសម្រាប់ Old Lady មុនពេលត្រូវបានបញ្ជូនទៅឱ្យខ្ចីជើងចំនួន ៣ដងក៏ដោយ។ Dragusin បានចូលរួមជាមួយក្រុម Genoa ជាអចិន្ត្រៃយ៍ក្នុងខែមករា ឆ្នាំ 2023 ហើយចាប់តាំងពីពេលនោះមក គាត់ពិតជាពូកែ។ការស្គាល់របស់ Dragusin ជាមួយ Paratici អាចជួយ Tottenham ក្នុងការចរចា។

៤-កេរ្ត៍ឈ្មោះបាល់ទាត់ Premier League

Premier League គឺជាលីគដែលមានអ្នកមើលច្រើនជាងគេបំផុតក្នុងពិភពលោក ហើយឱកាសសម្រាប់ Dragusin ដើម្បីសាកល្បងខ្លួនឯងប្រឆាំងជាមួយក្រុមធំដូចជាមួយក្រុម Manchester City, Liverpool និង Arsenal នឹងត្រូវដើរតួយ៉ាងសំខាន់ក្នុងការសម្រេចចិត្តរបស់គាត់៕

(Khmer) បើទោះជាយើងមើលនឹងភ្នែកឃើញថា ខ្សែប្រយុទ្ធមុខស្លូតនឹងគ្មានរឿងអាស្រូវLionel Messi បានបំបែកកំណត់ត្រាជាច្រើនក្នុងអាជីពបាល់ទាត់ដ៏ភ្លឺស្វាងរបស់គាត់ជាមួយ Barcelona, PSG, Inter Miami និងក្រុមជម្រើសជាតិអាហ្សង់ទីន យ៉ាងណាក៏ដោយ ក៏គាត់មិនមែនជាកីឡករម្នាក់ ដែលមានវត្តមានប្រកួតបានច្រើនជាងគេនៅក្នុងសតវត្សទី ២១នេះទេ។

តើកីឡាកររូបណា ដែលគ្រងតំណែងនេះ?

យោងតាមសហព័ន្ធប្រវត្តិសាស្រ្ត និងស្ថិតិបាល់ទាត់អន្តរជាតិ (IFFHS) ចេញផ្សាយកាលពីថ្ងៃពុធទី ១០ មករា ២០២៤ បានប្រកាសថាខ្សែប្រយុទ្ធ Cristiano Ronaldo បានឈរនៅលើកំពូលតារាងជាមួយនឹងការប្រកួតចំនួន១២០៤ ហើយខ្សែប្រយុទ្ធព័រទុយហ្គាល់រូបនេះ កំពុងបន្តវត្តមានលេងនៅឡើយ ដូច្នេះបានធ្វើកីឡាករផ្សេងទៀតពិបាកនឹងយកឈ្នះកំណត់ត្រារបស់គាត់ណាស់។

ចំណែកឯកីឡាករចាំទី Fabio បច្ចុប្បន្នលេងឲ្យក្លឹប Fluminense ស្ថិតនៅលំដាប់ទី២ ដោយលេងបាន ១២០២ ប្រកួត។ គាត់ក៏ធ្លាប់លេងឱ្យក្រុមប្រេស៊ីល Vasco da Gama និង Cruzeiro ផងដែរ។ ចំណាត់ថ្នាក់លេខ ៣ គឺ Dani Alves របស់ប្រេស៊ីល ជាមួយនឹងការបង្ហាញខ្លួន១០៥៦ ប្រកួតសម្រាប់ Bahia, Sevilla, Barcelona, Juventus, PSG, Sao Paulo និង Pumas UNAM ។

ចំណែកឯបុរសជោគជ័យ Messi ស្ថិតនៅលំដាប់ទី៤ ដោយមានលេងបាន ១០៤៧ ប្រកួត។ ដោយឡែកកីឡាករ៦រូបផ្សេងទៀតដែលបង្ហាញវត្តមានបានច្រើនគួរសមដែរនោះរួមមានៈកីឡាករ Luka Modric (១០១០) កីឡាករ João Moutinho (៩៩៧), Iker Casillas (៩៧៤), Sergio Ramos (៩៧៤) Zlatan Ibrahimovic (៩៦២)និង Andrés Iniesta (៩៤៩)៕

(Khmer) KARIM BENZEMA ត្រូវ​បាន​គេ​ប្រទះ​ឃើញ​ស្និទ្ធស្នាល​ជាមួយ​អតីត​ភរិយាទីមួយរបស់លោកគឺនាងChloe de Launay ពេល​កំពុង​សម្រាក​នៅ​ប្រទេស​ម៉ូរីស(Mauritius)។ខ្សែ​ប្រយុទ្ធ​សញ្ជាតិ​បារាំង​កំពុង​រីករាយ​នឹង​វិស្សមកាលក្នុង​រដូវ​កាលរបស់លីគបាល់ទាត់អារ៉ាប៊ីសាអ៊ូឌីត Saudi Pro League។ Benzema អាយុ 36 ឆ្នាំបានជិះយន្តហោះទៅកោះអាហ្វ្រិកជាមួយអតីតប្រពន្ធរបស់គាត់ គឹអ្នកនាង Chloe អាយុ 34 ឆ្នាំនិងកូនពីរនាក់របស់គាត់។ អ្នក​ទាំង​២ ​ត្រូវ​បាន​គេ​ឃើញ​ អំឡុងពេលស្រូប​ពន្លឺ​ថ្ងៃ​នៅ​លើ​ឆ្នេរ​ជាមួយ​គ្នា។

Benzema និង Chloe មានកូនពីរនាក់អំឡុងពេលពួកគេនៅជាមួយគ្នាគឺMeliaអាយុ9 និង Nouri អាយុ ៤ឆ្នាំ។ អតីតតារារបស់ Real Madrid ក៏មានកូនម្នាក់ឈ្មោះ Ibrahim អាយុ 5 ឆ្នាំជាមួយនឹងអតីតមិត្តស្រីរបស់គាត់ម្នាក់ទៀតគឺនាង Cora Gauthier ។ មិនតែប៉ុណ្ណោះកាលពីឆ្នាំមុន គាត់បានក្លាយជាឪពុកកូនទីបួន នៅពេលដែលមិត្តស្រី Jordan Ozuna សម្រាលកូនកាលពីខែមេសា។

Jordan អាយុ 34 ឆ្នាំគឺជាតារាម៉ូដែលដែលទទួលបានជោគជ័យ ហើយត្រូវបានចុះហត្ថលេខាជាមួយម៉ាកល្បីៗជាច្រើន។

អ្នកទាំងពីរបានចាប់ផ្តើមទាក់ទងគ្នានៅឆ្នាំ 2022 ហើយត្រូវបានគេឃើញជាមួយគ្នាជាលើកដំបូងនៅពេលដែល Benzema បានឈ្នះពានរង្វាន់ Ballon d’Or នៅឆ្នាំនោះ។

ពេលជជែកជាមួយសារព័ត៌មាន Yo Dona នាងបានសារភាពថានាងមិនដឹងថា Benzema ជានរណាទេនៅពេលពួកគេជួបគ្នាដំបូង។នាង​បាន​និយាយ​ថា​៖ «​ពេល​ខ្ញុំ​ជួប Karim ខ្ញុំ​មិន​ដឹង​ថា​គាត់​ជា​នរណា​ទេ ខ្ញុំ​ជា​ជនជាតិ​អាមេរិក ខ្ញុំ​មិន​សូវ​ស្គាល់កីឡាករ​បាល់ទាត់​ទេ។តាំងពីដំបូងមក ខ្ញុំមានអារម្មណ៍ថាគាត់ខុសពីគេ។ Karim គឺជាបុរសដ៏អស្ចារ្យម្នាក់៕

(Khmer) ក្រុម​ជម្រើសជាតិ​ហ្គាំប៊ី​បាន​រួចផុតពីគ្រោះថ្នាក់ក្នុង​រយៈពេល​តែប៉ុន្មាន​នាទី​​បន្ទាប់​ពី​ការ​ផ្គត់ផ្គង់​អុកស៊ីហ្សែន​​នៅ​លើ​យន្តហោះ​របស់​ពួកគេធ្លាក់ដល់កម្រិតទាបបំផុត។​ ក្រុម​ជម្រើសជាតិ​ហ្គាំប៊ីកំពុងហោះហើរពីរដ្ឋធានី Banjul របស់ពួកគេទៅកាន់ការប្រកួតពានរង្វាន់ Africa Cup of Nations ក្នុងប្រទេស កូតឌីវ័រ (Ivory Coast) នៅពេលដែលយន្តហោះមានបញ្ហាធ្ងន់ធ្ងរបានកើតឡើង។ ត្រឹមតែប្រាំបួននាទីបន្ទាប់ពីការហោះឡើង អ្នកបើកយន្តហោះត្រូវបានបង្ខំឱ្យត្រឡប់ទៅអាកាសយានដ្ឋាន Banjul វិញសម្រាប់ការចុះចតជាបន្ទាន់ ជាមួយនឹងការផ្គត់ផ្គង់អុកស៊ីសែននៅលើយន្តហោះដែលមានកម្រិតទាប។

អតីតកីឡាករក្រុម Manchester United លោក Saidy Janko បានបង្ហោះនៅលើ Instagram ដោយនិយាយថាយន្តហោះនេះបានធ្វើឲ្យកីឡាករឈឺក្បាល និងវិលមុខខ្លាំង។ កំដៅខ្លាំងលាយឡំនឹងកង្វះអុកស៊ីសែនធ្វើឱ្យមនុស្សជាច្រើនឈឺក្បាលនិងវិលមុខខ្លាំង។

Janko ក៏បានរិះគន់សមាគមបាល់ទាត់ប្រទេសរបស់គាត់ចំពោះស្ថានភាព មិនអាចទទួលយកបាន។យើងចូលទៅក្នុងយន្តហោះខ្នាតតូចដែលត្រូវបានជួលឱ្យហោះហើរ យើងសង្កេតឃើញកំដៅដ៏ខ្លាំងដែលធ្វើឱ្យយើងស្រក់ញើស។

លោក Tom Saintfiet គ្រូបង្វឹកសញ្ជាតិបែលហ្ស៊ិករបានប្រាប់សារព័ត៌មាន Nieuwsblad ថា យើងទាំងអស់គ្នា ស្ទើរតែស្លាប់ហើយ។ យើងទាំងអស់គ្នាបានដេកលក់យ៉ាងលឿន។ ខ្ញុំផងដែរ។ ខ្ញុំមានសុបិនខ្លីអំពីរបៀបដែលជីវិតរបស់ខ្ញុំត្រូវបានបញ្ចប់។ យើងស្ទើរតែទទួលបានការពុលកាបូនម៉ូណូអុកស៊ីត។ ប្រសិនបើការហោះហើរកន្លះម៉ោងទៀត ពួកយើងទាំងអស់គ្នានឹងត្រូវស្លាប់។