(Khmer) ​លោក Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជា បានចាត់ទុក​ការប្រកួត​នេះគឺជា​ការត្រៀមខ្លួនសម្រាប់​ចូលរួម​វគ្គ​ជម្រុះ​ជុំ​ទី​៣ នៃពានរង្វាន់​ជើង​ឯក​អាស៊ី AFC Asian Cup 2023 នៅ​ប្រទេស​ឥណ្ឌានាពេល​ឆាប់ៗខាងមុខ ។

លោក​រំពឹងថា កូនក្រុម​របស់ខ្លួន​នឹងធ្វើ​បានល្អ​ប្រសើរ​ក្នុងការ​ប្រកួត​នេះ ទោះបី​លោក​បាន​មើលឃើញ​ពី​ភាពខ្លាំង​របស់​ក្រុមទី​ម័​រ​ខាងកើត​យ៉ាងណាក៏ដោយ។​ ​«យើងមានការប្រកួតដ៏សំខាន់នៅឥណ្ឌា ហើយការប្រកួតនេះពិតណាស់គឺជាការប្រកួតដើម្បីត្រៀម ប៉ុន្តែយើងត្រូវតែឈ្នះទីម័រ ពីព្រោះយើងបានចាញ់នៅក្នុងការប្រកួត U-23 កាលពីខែកុម្ភៈ។ ខ្ញុំប្រាកដណាស់ វានឹងក្លាយជាការប្រកួតដ៏ពិបាក ពីព្រោះពួកគេជាក្រុមដ៏ល្អ និងមានកីឡាករមានទេពកោសល្យជាច្រើន។ ដូចដែល​អ្នកបានដឹងហើយ ពួកគេគឺជាក្រុមដែលមានបច្ចេកទេសល្អ មាឌមិនធំ ហើយក៏មិនជាខ្ពស់ ប៉ុន្តែពួកគេពិតជាមានជំនាញ។ ដូច្នេះយើងត្រូវតែយកចិត្តទុកដាក់ចំណុចខ្លាំងរបស់គេ ហើយនិងឆ្លងកាត់ចំនុចខ្លាំងមួយចំនួន ដើម្បីត្រៀមសម្រាប់ការប្រកួតដ៏សំខាន់នៅប្រទេសឥណ្ឌា»។

ក្រុមបាល់ទាត់​ជម្រើសជាតិ​កម្ពុជានឹងធ្វើ​ការប្រកួត​មិត្តភាព​អន្តរជាតិ​ផ្លូវការ ជាមួយ​ក្រុម​ជម្រើសជាតិ​ទី​ម័​រ​ខាងកើតនា​វេលា​ម៉ោង ៧​យប់​ថ្ងៃទី​០២ ខែមិថុនា ឆ្នាំ​២០២២ នេះនៅ​ពហុ​កីឡដ្ឋាន​ជាតិ​មរតក​តេ​ជោ។ នេះ​គឺជា​ការប្រកួត​ក្នុងស្រុក​លើកដំបូង​រប​ស់​ក្រុម​ធំនៃ​ក្រុម​គោព្រៃ​កម្ពុជា សម្រាប់​រយៈពេល​ជាង ២​ឆ្នាំ​ចុងក្រោយបន្ទាប់ពី​ផ្ទុះ​ជំងឺ​កូ​វីដ​-១៩ កាលពីដើមឆ្នាំ​២០២០ កន្លងទៅ។​

ជំនួប​មិត្តភាព​អន្ដរជាតិ​នេះនឹង​ចាប់ផ្ដើម​ការប្រកួត​នា​វេលា​ម៉ោង ៧​យប់នៅ​ពហុ​កីឡដ្ឋាន​ជាតិ​មរតក​តេ​ជោ ដែល​នឹង​មានការ​ផ្ទាល់​ដោយ​ក្រុមការងារ​ទូរទស្សន៍ BTV-News។ ​បន្ទាប់ពី​ចប់​ការប្រកួត​មិត្តភាព​អន្ដរជាតិ​នេះ ក្រុម​គោព្រៃ​កម្ពុជាគ្រោង​នឹងធ្វើ​ដំណើរ​ទៅ​ប្រទេស​ឥណ្ឌានាពេល​ឆាប់ៗ ដើម្បី​ចូលរួម​ប្រកួត​វគ្គ​ជម្រុះ​ជុំ​ទី​៣ នៃ​ពានរង្វាន់ AFC Asian Cup 2023 ដែល​កម្ពុជាស្ថិតក្នុង​ពូ​ល D ជាមួយ​ក្រុម​ម្ចាស់ផ្ទះ​ឥណ្ឌា ហុងកុង និង​អា​ហ្វ​ហ្គា​នី​ស្ថាន ខណៈ​ការប្រកួត​នឹងធ្វើ​ឡើង​ពី​ថ្ងៃទី​០៨ ដល់​ថ្ងៃទី​១៤ ខែមិថុនា ឆ្នាំ​២០២២ ខាងមុខ៕

(Khmer) «ខ្ញុំគិតថា វាមិនមែនសម្រាប់តែព្រឹត្តិការណ៍នេះទេ អ្វីដែលយើងបានលេងយូរមកហើយ គឺតែងតែដើម្បីឈ្នះ។ យើងចង់ទទួលបានលទ្ធផលដ៏ល្អ។ ប៉ុន្តែជាអកុសល​យើងមិនអាចឈ្នះការប្រកួតមួយចំនួន ក្នុងព្រឹត្តិការណ៍ដ៏សំខាន់ៗ» នេះ​គឺ​ជា​ការឆ្លើយតបរបស់​លោក Honda ពេល​អ្នក​សារព័ត៌មាន​សួរ​អំពីការ​លេង​យក​តែ​បទពិសោធន៍។

ជម្រើសជាតិកម្ពុជា តែងតែត្រូវបានអ្នកគាំទ្រលើកឡើងនៅមួយរយៈចុងក្រោយនេះ ជុំវិញការចេញទៅប្រកួតនានា ដើម្បីប្រមូលបទពិសោធន៍ដល់កីឡាករ ជាពិសេសកីឡាករក្មេងៗ ដើម្បីស៊ីហ្គេម ឆ្នាំ២០២៣ ខណៈមានសំណួរចោទសួរថា តើប្រកួតនេះនឹងនៅតែបន្តប្រើប្រាស់ជាបទពិសោធ៍ ឬយ៉ាងណា? អ្នកចាត់ការទូទៅវ័យ ៣៥ឆ្នាំរូបនេះ បានឆ្លើយតបថា៖

« នៅពេលយើងប្រកួតខ្ញុំតែងតែចង់ឈ្នះ។ ប៉ុន្តែដូចដែលអ្នកបានដឹង យើងក៏ត្រូវផ្ដល់បទពិសោធន៍ដល់កីឡាករក្មេងៗ ដើម្បីអនាគតកម្ពុជា។ ដូច្នេះ ខ្ញុំត្រូវដាក់​គោល​ដៅ។ ខ្ញុំតែងតែចង់ឈ្នះការប្រកួត ហើយយើងក៏ត្រូវតែគិតអំពីអនាគតបាល់ទាត់កម្ពុជា។ ជាមួយគ្នាផងដែរ វាមិនមែនជារឿងងាយស្រួលនោះទេ។ ប៉ុន្តែយើងត្រូវតែធ្វើ ហើយយើងធ្វើរឿងទាំងនេះដូចអ្វីដែលយើងជឿជាក់។ ថ្ងៃស្អែកក៏ដូចគ្នា យើងត្រូវការឈ្នះ ក៏ដូចជាសម្រាប់ការប្រកួតនៅឥណ្ឌា ពិតណាស់យើងនឹងព្យាយាមដើម្បី​ពាន​ AFC Asian Cup»។

ការប្រកួតរវាង កម្ពុជា ជាមួយ ទីម័រខាងកើត នឹងប្រព្រឹត្តទៅនាវេលាម៉ោង ៧យប់ ថ្ងៃទី០២ ខែមិថុនា ឆ្នាំ២០២២ នៅពហុកីឡដ្ឋានជាតិមរតកតេជោ ហើយ​ការ​ប្រកួត​នេះ​នឹង​ជា​ការ​ត្រៀម ការ​មើល​ជើង​កីឡាករ​ដើម្បីត្រៀម​សម្រាប់​ការ​ប្រកួត AFC Asian Cup 2023 នៅ​ប្រទេស​ឥណ្ឌា។ កម្ពុជា​ស្ថិតក្នុងពូល D ជាមួយម្ចាស់​ផ្ទះ ឥណ្ឌា ហុងកុង និង​អាហ្វហ្គានីស្ថាន៕

រូបថត៖ CAMBODIA 2023

(Khmer) អតីប្រធានក្រុមជម្រើសជាតិនារីកម្ពុជា ហួត គឹមហុង ដែលកំពុងតែប្រកបអាជីពបាល់ទាត់ និងការសិក្សារនៅលើទឹកដីសហរដ្ឋអាមេរិក បានបង្ហាញឆន្ទៈរបស់ខ្លួនចងមកជួយក្រុមជម្រើសជាតិនារីឈុតធំ ក្នុងព្រឹត្តិការ AFF Women’s Championship 2022 នៅប្រទេសហ្វីលីពីនដែលប្រកួតនាកំឡុងខែកក្កដាខាងមុខនេះ។

អតីតកីឡាការនីក្លិបបាល់ទាត់ភ្នំពេញក្រោនរូបនេះ បាននិយាយតាមរយៈសារអេឡិចត្រូនិចមកកាន់គេហទំព័រ B8SPORT ថា៖ «សួស្ដីអ្នកគាំទ្របាល់ទាត់កម្ពុជា និងកីឡាការនីកម្ពុជាទាំងអស់ដែលត្រៀមខ្លួនសម្រាប់ការប្រកួតនៅហ្វីលីពីននាពេលខាងមុខនេះ។ នាងខ្ញុំ គឹមហុង អតីតកីឡាការនីជម្រើសជាតិ ខ្ញុំបានអាហារូបករណ៍មកលេងនៅសហរដ្ឋអាមេរិក ដែលមួយរយៈចុងក្រោយខ្ញុំមិនសូវមានសកម្មភាពចូលរួមជាមួយជម្រើសជាតិ។ ហើយខ្ញុំសង្ឃឹមថា ក្រុមកីឡាការនីកម្ពុជានឹងធ្វើបានល្អក្នុងពេលប្រកួតនៅហ្វីលីពីន ទោះបីជាខ្ញុំអត់បានលេងក៏ខ្ញុំចាំគាំទ្រពីចម្ងាយនៅអាមេរិកផងដែរ។ ប្រសិនជាអាចខ្ញុំចង់ចូលរួមជួយក្រុមបាល់ទាត់ជម្រើសជាតិស្រីៗយើង នៅហ្វីលីពីន ឬក្នុងព្រឹត្តិការណ៍ផ្សេងៗនាខាងមុខនេះ»។

កីឡាការនី ហួត គឹមហុង ជាអតីតប្រធានក្រុមជម្រើសជាតិនារីកម្ពុជា ក្នុងព្រឹត្តិការណ៍ AFF Women’s Championship 2018 នៅប្រទេសឥណ្ឌូនេស៊ី ហើយក្រោយចប់ព្រឹត្តិការណ៍នោះ គាត់ត្រូវបានក្លិបលីគទី២ អាមេរិក Rochester Lady Lancers ផ្ដល់កិច្ចសន្យារយៈពេល ២ឆ្នាំ និងទទួលបានអាហាររូបករណ៍បន្តការសិក្សារថ្នាក់មហាវិទ្យាល័យ នៅប្រទេសមហាអំណាចបាល់ទាត់នារីមួយនេះ ក្នុងកំឡុងខែសីហា ឆ្នាំ២០១៨។ គឹម ហុង លេងក្នុងតួនាទីខ្សែប្រយុទ្ធស្លាប បច្ចុប្បន្នមានវ័យ២៤ឆ្នាំ កំពុងលេងជាមួយក្រុមសកលវិទ្យាល័យ Bryant & Stratton – Syracuse និងចុងក្រោយនេះបានជួយឲ្យក្រុមគ្រងជើងឯក USCAA National Title នៅចុងឆ្នាំ២០២១ផងដែរ។

បញ្ជាក់ផងដែរ ក្រុមជម្រើសជាតិនារីកម្ពុជាឈុតធំ ស្ថិតក្នុងពូល B ជាមួយវៀតណាម ឡាវ មីយ៉ាន់ម៉ា និងទីម័រខាងកើត ក្នុងពានរង្វាន់ AFF WOMEN’S CHAMPIONSHIP 2022 ដែលនឹងធ្វើឡើងចាប់ពីថ្ងៃទី០១ ដល់ថ្ងៃទី១៤ ខែកក្កដា ឆ្នាំ២០២២ នៅប្រទេសហ្វីលីពីន៕

រូបភាព៖ ផ្ដល់ឲ្យពី ហួត គឹមហុង

(Khmer) ក្នុងសន្និសីទ​កាសែត​មុន​ការ​ប្រកួត​មិត្តភាពអន្តរជាតិរវាង​ក្រុមជម្រើស​ជាតិ​កម្ពុជា និង​ក្រុម​ជម្រើស​ជាតិ​ទីម័រខាងកើត​ លោគ Keisuke Honda បាន​ចូល​រួម​ក្នុង​ពិធី​នេះ ហើយ​បាន​ឆ្លើយរាល់​សំណួរ​ទាំងអស់​របស់​អ្នក​សារព័ត៌មាន។

ក្នុងចំណោម​សំណួរ​ជា​ច្រើន B8 Sport ថា​ច្បិច​យក​រឿង​សំខាន់មួយ​​អំពី​កីឡាករ។ ប្រាក់​ធីវ៉ា​ត្រូវ​បាន​កោះ​ហៅ​ចូលលេង​ជម្រើស​ជាតិ​ចុងក្រោយគេ​ក្នុងចំណោម​កីឡាករជម្រើស​ជាតិ​ទាំងអស់​ដែល​បាន​បោះ​ជុំរំហ្វឹកហាត់ ត្រៀម​ការ​ប្រកួត​មិត្តភាព​និង​ត្រៀម AFC Asian Cup នៅ​ប្រទេស​ឥណ្ឌា។ ក្នុងករណី​របស់​ខ្សែបម្រើ​ប្រយុទ្ធ ប្រាក់ ធីវ៉ា​ លោក Honda និយាយបែបនេះ៖

«យើង​ធ្លាប់បាន​កោះ​ហៅគាត់( ប្រាក់ ធីវ៉ា)​លេង​ក្នុងពាន​រង្វាន់ AFF Suzuki Cup ឆ្នាំមុន។ យើង​បាន​ដាក់​គាត់​លេង​ក្នុងតំណែងស្លាបប៉ុន្មាន​ដង ហើយខ្ញុំក៏បាន​មើល​គាត់​លេង​ដែរ រួម​ទាំង​ការ​ហ្វឹកហាត់»។

«និយាយត្រឡប់​មក​វិញ​ក្នុងពេលនេះ យើង​បាន​មើល​ការ​ប្រកួត​ដែល​គាត់​លេង ជាមួយព្រះខ័នរាជស្វាយរៀង​ ជាមួយវិសាខា…គាត់​ស៊ុត​បញ្ចូល​ទីក្នុងការលេង​តំណែង​ប្រយុទ្ធកណ្ដាល។វាជា​កន្លែង​មួយ​ដែលខ្ញុំចង់​សាកល្បងលេង​កន្លែង​នេះ។ ខ្ញុំមិន​ប្រាកដ​ថា​ ធីវ៉ា​លេងបាន​ឬ​មិន​បាន​ទេ តែ​ខ្ញុំចង់សាកមើល ហើយ​រឿង​មួយ​ទៀត​ ធីវ៉ា​សក្តិសម​នឹង​កោះ​ហៅ​ចូល​ជម្រើស​ជាតិ»។

(Khmer) គ្រូបង្វឹកសញ្ជាតិអ៊ុយរូហ្គាយលោក Diego Alonso បានបង្ហាញពីការជឿជាក់របស់គាត់លើខ្សែបម្រើស្លាបរបស់ក្លឹប Manchester United កីឡាករ Facundo Pellistri បន្ទាប់ពីបានកោះហៅគាត់ម្តងទៀតដើម្បីតំណាងឱ្យក្រុមជម្រើសជាតិ។

Pellistri ដែលមានអាយុ 20 ឆ្នាំក្នុងខែធ្នូខាងមុខ បានចំណាយយុទ្ធនាការ 2021/22 ក្នុងលក្ខខ័ណ្ឌខ្ចីជើងជាមួយ Deportivo Alaves ប៉ុន្តែមិនសូវ​ទទួលបានឱកាសលេងក្នុងការប្រកួតនាពេលថ្មីៗនេះ ដោយក្លឹប La Liga កំពុងតែជាប់គាំងក្នុងសមរភូមិកាត់ចោល។ ទីបំផុតក្លឹបមាន​មូលដ្ឋាន​នៅតំបន់ Basque បានបញ្ចប់នៅបាតតារាងនៃក្របខ័ណ្ឌកំពូលរបស់អេស្ប៉ាញ ដោយ Pellistri បានបង្ហាញខ្លួនចំនួន 21 លើក។

គ្រូបង្វឹកលោក Alonso បាននិយាយថា៖ “ខ្ញុំជឿជាក់ច្រើនលើចរិតលក្ខណៈរបស់កីឡាករបាល់ទាត់ ហើយខ្ញុំក៏ជឿជាក់ច្រើនលើកីឡាករបាល់ទាត់របស់ខ្ញុំផងដែរ។ ខ្ញុំជឿជាក់ច្រើនលើកីឡាករបាល់ទាត់អ៊ុយរូហ្គាយ និងអ្វីដែលគាត់អាចធ្វើបាន”។ 

“ខ្ញុំបានគិតថាលក្ខណៈដែល Pellistri មានអាចជួយយើងយ៉ាងច្រើនជាមួយនឹងហ្គេមដែលយើងចង់អនុវត្ត។ ពីទីនោះខ្ញុំបានប្រាប់គាត់ពីអ្វីដែលខ្ញុំចង់បានពីគាត់ អ្វីដែលខ្ញុំមានតម្លៃចំពោះគាត់ ហើយបន្ទាប់មកអ្នកដែលផ្តល់ឱ្យនៅសល់គឺគាត់។ គាត់បានមកទីនេះនៅពេលគាត់មានអាយុ 20 ឆ្នាំគាត់បានពាក់អាវចាប់ផ្តើមក្រុមចាស់ ហើយគាត់លេងតាមរបៀបដែលគាត់លេង…)។

Edinson Cavani ដែលនឹងចាកចេញពី Man Utd នៅរដូវក្តៅនេះ ក៏ត្រូវបានកោះហៅទៅកាន់ក្រុម Uruguay សម្រាប់ការប្រកួតមិត្តភាពនាពេលខាងមុខរបស់ពួកគេ ដែលចាប់ផ្តើមជាមួយនឹងការប្រកួតជាមួយ Mexico ក្នុងទីក្រុង Phoenix រដ្ឋ Arizona នៅថ្ងៃសុក្រ៕

(Khmer) កូឡាឡាំពួរ៖ សហព័ន្ធកីឡាបាល់ទាត់ទ្វីបអាស៊ី (AFC) នៅថ្ងៃនេះបានចេញលិខិតអញ្ជើញ (Expression of Interest) (EoI) ដល់សមាគមសមាជិក AFC (MAs) ទាំងអស់ ដើម្បីធ្វើជាម្ចាស់ផ្ទះនៃព្រឹត្តិការណ៍ AFC Asian Cup 2023™។

បន្ទាប់ពីការសម្រេចចិត្តរបស់សាធារណរដ្ឋចិន ក្នុងការដកខ្លួនធ្វើជាម្ចាស់ផ្ទះនៃព្រឹត្តិការណ៍ AFC Asian Cup 2023™ ថ្មីៗនេះក្នុងមហាសន្និបាទ AFC Congress​ 2022 លើកទី 32 បានផ្តល់អាណត្តិដល់រដ្ឋបាល AFC ដើម្បីកំណត់លក្ខខណ្ឌ និងតម្រូវការនៃដំណើរការដេញថ្លៃរហ័ស ដើម្បីស្វែងរកម្ចាស់ផ្ទះជំនួសសម្រាប់ការប្រកួត។

បន្ទាប់ពីបញ្ចប់ដំណើរការដេញថ្លៃ រដ្ឋបាល AFC នឹងបញ្ជូនរបាយការណ៍មួយជាមួយនឹងអនុសាសន៍របស់ខ្លួនទៅកាន់គណៈកម្មាធិការប្រតិបត្តិ AFC ដែលនឹងជ្រើសរើសម្ចាស់ផ្ទះថ្មីនៃពានរង្វាន់ AFC Asian Cup 2023™។

ថ្ងៃផុតកំណត់សម្រាប់ សមាគមសមាជិក AFC ដែលចាប់អារម្មណ៍ក្នុងការដាក់ពាក្យរបស់ពួកគេដើម្បីធ្វើជាម្ចាស់ផ្ទះព្រឹត្តិការណ៍ AFC Asian Cup 2023™ គឺនៅថ្ងៃទី 30 ខែមិថុនា ឆ្នាំ 2022។

(Khmer) ក្លិប Manchester United នឹងធ្វើការកែប្រើចំណុចមួយចំនួននៃហេដ្ឋារចនាសម្ព័ន្ធទីលានហ្វឹកហាត់របស់ក្រុម បន្ទាប់ពីទទួលបានការរិះគន់ពីសំណាក់កីឡាករ Cristiano Ronaldo។

Man Utd ទើបតែបានបញ្ចប់រដូវកាលរបស់ខ្លួនថ្មីៗនេះ ដោយទទួលបានពិន្ទុទាបជាងគេបំផុតក្នុងប្រវត្តិសាស្រ្តរបស់ក្លិបនាក្របខណ្ឌ Premier League ហើយ ក្លិបក៏មិនមានកៅអីលេងក្នុងក្របខណ្ឌ Champions League ផងដែរ ស្របពេលដែល Ronaldo វិញដែលបញ្ចប់រដូវកាលរកបាន២៤គ្រាប់នោះ មិនខ្មាស់អៀននោះទេ ក្នុងការរិះគន់ចំណុចអវិជ្ជមានរបស់ក្លិបខ្លួន។

របាយការណ៍​បាន​អះអាង​ថា Ronaldo មិនចង់​ប្រើ​អាង​ទឹក​នៅ Carrington ព្រោះ​ក្បឿង​រលុង​និង​ប្រេះ​បាន​ធ្វើ​ឱ្យ​វា​មាន​គ្រោះថ្នាក់។ ប្រភពមួយនៅ United បានប្រាប់កាសែតថា “Cristiano គឺជាសំលេងដ៏សំខាន់នៅទីលានហ្វឹកហាត់។

បើយោងទៅតាមការចុះផ្សាយរបស់ Metro បានទម្លាយឲ្យដឹងថា Ronaldo បានធ្វើការរាយការណ៍ទៅកាន់ក្លិបឲ្យផ្លាស់ប្តូរជាបន្ទាន់នូវបរិវេណអាងទឹករបស់ក្លិបដោយសារតែការ៉ូ វាមានសភាពបែក ហើយ រូបគេស្ទើរតែមិនជឿដែលក្លិបមិនបានជួសជុលវាជាថ្មីតាំងពីគេចាកចេញពីឆ្នាំ២០០៩ មកម្ល៉េះ។

“កាលពីមុន កីឡាករប្រហែលជាបាននិយាយអ្វីមួយ ប៉ុន្តែគ្មានអ្វីកើតឡើងទេ។ ប្រសិនបើ Cristiano និយាយចេញមក មនុស្សស្តាប់ យកចិត្តទុកដាក់ ហើយអ្វីៗមានការ​ប្រែប្រួល”។ ទន្ទឹមនឹងនេះដែរ The Telegraph បានរាយការណ៍ថា United កំពុងចំណាយប្រហែល 5 លានផោនលើការកែលម្អ Carrington នៅរដូវក្តៅនេះ។

United បានកែលម្អកន្លែងផ្តល់ម្ហូបអាហារ និងកន្លែងទទួលទានអាហាររួចជាស្រេចក្នុងរដូវកាលនេះ ហើយកំពុងកែលម្អកន្លែងហាត់ប្រាណ អាងហែលទឹក និងដំឡើងទីលានថ្មីមុនពេលចាប់ផ្តើមរដូវកាលក្រោយ។