(Khmer) អនុប្រធានក្លឹប Barcelona លោក Eduard Romeu ជឿជាក់ថា ទឹកប្រាក់ចំនួន 500 លានអឺរ៉ូ (427 លានផោន) គឺត្រូវបានទាមទារ ដើម្បីជួយសង្គ្រោះក្លឹបពីភាពរញ៉េរញ៉ៃដែលពួកគេបានរកឃើញ។

ក្រុមអ្នក​មានបុណ្យមួយ​នេះត្រូវបានជាប់គាំងរឿងហិរញ្ញវត្ថុយ៉ាងធ្ងន់ធ្ងរ រហូតដល់ពួកគេមិនអាចចុះឈ្មោះកីឡាករថ្មីចំនួនពីរនាក់​ដែល​ទើបចុះហត្ថលេខាដោយ​សារ​តែ​ពួក​គេ​គ្មានហិរញ្ញវត្ថុដើម្បីទ្រទ្រង់។

ការផ្ទេរដោយឥតគិតថ្លៃសម្រាប់ខ្សែបម្រើកណ្តាល Franck Kessié របស់ AC Milan និងខ្សែការពារ Andreas Christensen របស់ Chelsea ត្រូវបានបញ្ចប់រួចរាល់ហើយ ប៉ុន្តែបំណុលរបស់ក្លឹបបានឈានដល់១ពាន់លានអឺរ៉ូ។ កីឡាករល្បីៗដូចជា Sergio Busquets, Jordi Alba និង Gerard Pique ត្រូវកាត់ប្រាក់បៀវត្សរ៍តាមលក្ខខណ្ឌកំណត់ប្រាក់ខែរបស់ La Liga ហើយអ្នកផ្សេងទៀតដូចជា Antoine Griezmann, Emerson Royal, Junior Firpo និង Miralem Pjanic ត្រូវបានលក់ចេញក្នុងគោលបំណងធ្វើឱ្យសៀវភៅបញ្ជីលុយមានតុល្យភាព។

លោក Romeu បានបើកចំហរអំពីស្ថានភាពហិរញ្ញវត្ថុដែល Barca កំពុងប្រឈម ហើយគាត់ជឿជាក់ថា ពាក់កណ្តាលពាន់លានអឺរ៉ូគឺចាំបាច់សម្រាប់ពួកគេដើម្បីឱ្យមានភាពសុខស្រួលម្តងទៀត។ គាត់បានប្រាប់សារព័ត៌មានអេស្ប៉ាញ Sport ថា៖“ចំនួនដែលធ្វើឱ្យខូចខាតច្រើនជាងគេគឺអតុល្យភាពនៃទ្រព្យសកម្ម” ។

“យើងមានដើមទុនអវិជ្ជមាន 500 លានអឺរ៉ូ(មានន័យថា​ត្រូវការ៥០០លានអឺរ៉ូ)។

“យើង​នឹងខាតបង់បន្ថែមសល់ 150 លានអឺរ៉ូនៅរដូវកាលនេះប្រសិនបើយើងមិនបានធ្វើអ្វីមួយ។ ខ្ញុំបាននិយាយវាពីមុនហើយ ប្រសិនបើនរណាម្នាក់ចង់ឱ្យខ្ញុំ 500 លានអឺរ៉ូ … នោះហើយជាអ្វីដែលយើងត្រូវជួយសង្គ្រោះ Barca” ។

ប្រភពដដែលរាយការណ៍ថា Barca នៅតែជំពាក់ថ្លៃផ្ទេរ 98 លានផោនសម្រាប់កីឡាករ 4 នាក់ក្នុងខែតុលា ខណៈដែលក្លឹបមានមូលដ្ឋាននៅ Catalan បានចំណាយប្រាក់ 8 លានអឺរ៉ូដល់ក្រុមពិនិត្យសមត្ថភាពកីឡាករដែលមានមូលដ្ឋាននៅអាមេរិកខាងត្បូងក្រោមរបបដឹកនាំមុន។ កិច្ចព្រមព្រៀងឧបត្ថម្ភរយៈពេល 4 ឆ្នាំដែលមានតម្លៃ 280 លានអឺរ៉ូជាមួយក្រុមហ៊ុនតន្ត្រី Spotify នឹងចាប់ផ្តើមនៅខែកក្កដា ហើយបន្ថែមលើអាវ និងឧបករណ៍ហ្វឹកហាត់ត្រូវ​ដាក់​ឈ្មោះក្រុមហ៊ុនស៊ុយអែតមួយ​នេះ រួមមានការប្តូរកីឡដ្ឋានដ៏ល្បីល្បាញរបស់ Barcelona ទៅ ‘Spotify Camp Nou’ ។

នាពេលថ្មីៗនេះ ក្លឹបយក្ស La Liga បានអនុញ្ញាតឱ្យអ្នកគាំទ្រជួលទីលានដើម្បិលេង ហើយថែមទាំងទទួលពិធីរៀបការនៅឯដីរបស់ពួកគេក្នុងតម្លៃថ្លៃ ដែលនាំឱ្យមានការចំអកពីអ្នកគាំទ្ររបស់ក្លិបគូប្រជែង។ គេជឿថា Barca ប្រហែលជាត្រូវលក់ឈ្មោះដ៏ធំមួយរបស់ពួកគេនៅរដូវក្តៅនេះ ហើយ Frenkie de Jong ដែលមានទំនាក់ទំនងយ៉ាងខ្លាំងជាមួយ Manchester United ត្រូវបានគេនិយាយថាជាបេក្ខភាពសំខាន់ម្នាក់ដើម្បីទប់ផលអវិជ្ជមាននៃ​ការ​កង្វះលុយ​នេះ។

(Khmer) ក្រុមជើងឯករងលីគកំពូលម៉ាឡេស៊ី Malaysia Super League 2021
Kedah Darul Aman Football Club បានធ្វើការនាំយកសមាជិកក្រុមដំរីសឹកថៃកីឡាករ Sanrawat Dechmitr ពីក្រុមលីគកំពូលថៃ Bangkok United ក្នុងលក្ខខណ្ឌខ្ចីជើងដល់ចប់រដូវកាលឆ្នាំ២០២២ ដើម្បីពង្រឹងក្រុមត្រៀមប្រកួតប្រជែង AFC CUP 2022 ក៏ដូចជាពានរង្វាន់លីគកំពូលម៉ាឡេស៊ីរដូវកាលថ្មីនេះ។

ខ្សែបម្រើចំណូលថ្មីរបស់ Kedah កីឡាករជនជាតិថៃ Sanrawat Dechmitr បច្ចុប្បន្នមានវ័យ៣២ឆ្នាំ លេងបាន ២៩ប្រកួត ឲ្យក្រុមជម្រើសជាតិថៃ និងធ្លាប់ជាប់ជាកីឡាករល្អទាំង១១នាក់ ប្រចាំព្រឹត្តិការ AFF Suzuki Cup 2018 ផងដែរ ។ សម្រាប់ក្លិបអាជីពវិញ Sanrawat ធ្លាប់លេងឲ្យក្លិបក្នុងតំបន់អាស៊ាន ជាមួយក្រុមជើងខ្លាំងសិង្ហបុរី Tampines Rovers FC(2008/2009)) ក្លិបធំៗក្នុងស្រុកមួយចំនួនដូចជា Bangkok Glass(2009/20010) , BEC Tero Sasana(2011/2013), Bangkok United(2013/2022) និងចុងក្រោយខ្វីជើងទៅចូលរួមជាមួយ Ratchaburi Mitr Phol មុនបន្តខ្ចីជើងមកកាន់ទឹកដីម៉ាឡេស៊ីជាមួយ Kedah Darul Aman ដែលកំពុងឈរនៅលេខរៀងទី៤ បណ្ដោះអាសន្ននៅលីគកំពូលម៉ាឡេស៊ីរដូវកាល២០២២ ក្រោយលេងបាន ៩សប្ដាហ៍កន្លងមកនេះ។

ក្នុងពានកម្រិតទី២ ប្រចាំទ្វីបអាស៊ីក្លិបបាល់ទាត់ម៉ាឡេស៊ី Kedah Darul Aman ស្ថិតក្នុងពូល G ជាមួយក្រុម Kaya–Iloilo របស់ ហ្វីលីពីន ក្រុមកម្ពុជាវិសាខា និងម្ចាស់ផ្ទះ Bali United របស់ឥណ្ឌូនេស៊ី ដោយការប្រកួតចាប់ផ្ដើមពីថ្ងៃទី ២៤-៣០ ខែមិថុនា ឆ្នាំ២០២២ខាងមុខនេះ៕

(Khmer) ក្លិប​ព្រះខ័នរាជស្វាយរៀង​កាល​ពី​ប៉ុន្មាន​នាទី​មុន​នេះ​បាន​ប្រកាសចុះកុងត្រា​កីឡាករកូតាបរទេស​ថ្មី​សញ្ជាតិ​អេស្ប៉ាញឈ្មោះ Víctor Blasco លេង​ក្នុង​តំណែង​ជាខ្សែបម្រើស្លាប។

កីឡាករសញ្ចាតិអេស្ប៉ាញ Victor Blasco Llorens នឹងចូលរួមជាមួយ ក្លិបព្រះខ័នរាជស្វាយរៀងរបស់កម្ពុជា ក្រោយចែកផ្លូវគ្នាជាមួយក្លិប CDS Vida ក្នុងលីគទី ១ របស់ប្រទេសហុងឌុយរ៉ាស ។ Victor Blasco កើតនៅថ្ងៃទី១ ខែមិថុនា ឆ្នាំ១៩៩៤ ក្នុងទីក្រុង Barcelona ប្រទេសអេស្ប៉ាញ។ បច្ចុប្បន្នគេមានកម្ពស់ ១.៧៨ ម៉ែត្រ និងលេងក្នុងតួនាទីជាខ្សែបម្រើស្លាប។

ក្នុងអាជីពជាកីឡាករបាល់ទាត់ Victor Blasco ធ្លាប់លេងអោយក្លិបជាច្រើនដូចជា ៖ VIU Mariners (កាណាដា), Whitecaps FC 2 (អាមេរិក), Pacific FC (កាណាដា) និងក្លិប CDS Vida (ហុងឌុយរ៉ាស)។ តម្លៃខ្លួននៅទីផ្សារដោះដូរកីឡាកររបស់គេបច្ចុប្បន្នមានតម្លៃ ១២,៥០០០ ដុល្លារអាមេរិក។

កីឡាកររូបនេះ​ធ្លាប់​លេង​ជាមិត្តរួម​ក្រុម​ជាមួយ Marcus Haber នៅ​ក្លិប Pacific FC នៃ​លីគកំពូលកាណាដាកាល​ពី​ឆ្នាំ២០១៩ ផង​ដែរ។

(Khmer) ប្រទេសឥណ្ឌូនេស៊ី គ្រោងនឹងធ្វើជាម្ចាស់ផ្ទះព្រឹត្តិការណ៍ AFF ធំៗចំនួន ៣ ក្នុងរយៈពេលជាច្រើនខែ បន្ទាប់ពីពិធីចាប់ឆ្នោតជ្រើសរើសពូលជាផ្លូវការដែលត្រូវបានរៀបចំឡើងដោយសមាគមកីឡាបាល់​ទាត់នៃប្រទេសឥណ្ឌូនេស៊ី (PSSI) កាលពីម្សិលមិញ។

ការប្រកួតពានរង្វាន់ AFF U-19 Championship នឹងឃើញក្រុមចំនួន១១ប៉ះគ្នាជាមួយម្ចាស់ផ្ទះឥណ្ឌូណេស៊ី ដែលស្ថិតក្នុងពូល A ជាមួយមីយ៉ាន់ម៉ា វៀតណាម ថៃ ប្រ៊ុយណេនិងហ្វីលីពីន។ ក្រុមជើងឯករងម៉ាឡេស៊ី ដែលបានចាញ់អូស្ត្រាលី 1-0 ក្នុងឆ្នាំ 2019 ស្ថិតក្នុងពូល B ជាមួយឡាវ ទីម័រខាងកើត កម្ពុជា និងសិង្ហបុរី។

សម្រាប់ពានរង្វាន់ AFF អាយុក្រោម 16 ឆ្នាំ ដោយក្រុមទាំង 12 មកពី AFF ត្រូវបានបែងចែកជា 3 ក្រុម។ ម្ចាស់ផ្ទះឥណ្ឌូនេស៊ី ស្ថិតក្នុងពូល A ជាមួយ​វៀតណាម សិង្ហបុរី និងហ្វីលីពីន ខណៈពូល B មាន ថៃ ទីម័រខាងកើត ឡាវ និងប្រ៊ុយណេ។ ក្រុម​ការពារ​តំណែង​ជើង​ឯក​ម៉ាឡេស៊ី​ស្ថិត​ក្នុង​ពូល C ប៉ះ​អូស្ត្រាលី មីយ៉ាន់ម៉ា និង​កម្ពុជា។

ជាលើកដំបូងក្នុងឆ្នាំនេះ AFF នឹងធ្វើជាម្ចាស់ផ្ទះនៃព្រឹត្តិការណ៍ AFF Under-18 Women’s Championship ដោយមានក្រុមចំនួន 9 ចូលរួម។ ពូល A មាន វៀតណាម ថៃ កម្ពុជា សិង្ហបុរី និងឥណ្ឌូនេស៊ី ខណៈពូល B មាន អូស្ត្រាលី មីយ៉ាន់ម៉ា ម៉ាឡេស៊ី និងហ្វីលីពីន។

(Khmer) ទីភ្នាក់ងារកីឡាករបាល់ទាត់ដ៏ល្បីល្បាញ លោក Roberto De Fanti បានទម្លាយឲ្យដឹងថា Tottenham បានបើកកិច្ចចរចារជាមួយ Manchester United ជុំវិញលទ្ធភាពក្នុងការនាំយក Marcus Rashford មករួមក្រុមសម្រាប់រដូវកាលថ្មីខាងមុខនេះ។

Rashford ដែលបច្ចុប្បន្នមានវ័យ២៤ឆ្នាំ បានឆ្លងនូវកាត់នូវរដូវកាលដ៏ពិបាកបំផុតរបស់ខ្លួនដែលបញ្ចប់ទៅថ្មីៗនេះ ដោយ ការធ្លាក់ទម្រង់លេងបានធ្វើឲ្យរូបគេបាត់បង់ឪកាសជាប់ជម្រើសដំបូងរបស់ Man Utd ពោល ការបង្ហាញខ្លួន៣២ប្រកួត គេអាចរកបានតែ៥គ្រាប់ និង បញ្ជូនបាល់ឲ្យមិត្តរួមក្រុមបញ្ចប់ទីបាន២ដងប៉ុណ្ណោះ។ លើសពីនេះទៀតសោត រូបគេក៏ពុំត្រូវបានកោះហៅឲ្យជាប់ក្នុងក្រុមជម្រើសជាតិអង់គ្លេសផងដែរ។

លោក De Fanti បាននិយាយថា៖«តម្លៃផ្ទេរត្រឹម ៥០លានផោន អាចនឹងសមរម្យ ប៉ុន្តែ Rashford ត្រូវបាន Man Utd ទាមទារ ពី ៧០-៨០លានផោន។ វាពិតជាមានកិច្ចពិភាក្សាគ្នារវាង Spurs និង Man Utd ប៉ុន្តែ Spurs គិតថា វាពិតជាពិបាកនឹងកើតឡើងដោយសារតែតម្លៃផ្ទេរខ្ពស់ពេក»៕

(Khmer) កីឡាករ Alexandre Lacazette បានសម្រេចចិត្តចាកចេញពី Arsenal ហើយ ដោយ រូបគេនឹងវិលត្រឡប់មកកាន់ Lyon វិញ ខណៈ ការប្រកាសផ្លូវការនឹងធ្វើឡើងនៅថ្ងៃនេះតែម្តង។

Lacazette បានចូលរួមជាមួយ Arsenal នៅក្នុងឆ្នាំ២០១៧ ពី Lyon ហើយ ក្នុងរយៈពេល៥ឆ្នាំនេះ គេបានរួមចំណែកជួយក្រុមឈ្នះពានរង្វាន់ពីររួមមាន FA Cup និង FA Community Shield។ យ៉ាងណាក្តី ដោយសារតែកុងត្រារបស់គេជាមួយក្លិបបានអស់សុពលភាព ហើយ ការចរចារក៏ពុំបានធ្វើឡើង ដូច្នេះរូបគេ និង ក្លិបបានសម្រេចចិត្តចែកផ្លូវគ្នា ខណៈ កីឡាករសញ្ជាតិបារាំងខាងលើ បានចាកចេញក្នុងនាមជាកីឡាករដែលគ្មានតម្លៃខ្លួន។

សម្រាប់ការវិលត្រឡប់ទៅកាន់ Lyon នេះផងដែរ គឺ Lacazette បានចុះកុងត្រានៅប៉ុន្មានម៉ោងមុននេះបន្តិច ហើយ គេក៏បានតេស្តសុខភាពជោគជ័យផងដែរ រង់ចាំតែការប្រកាសជាផ្លូវការនៅថ្ងៃនេះ៕

(Khmer) ឥណ្ឌា​បាន​ឈាន​ដល់​ការ​ចាប់​ផ្តើម​ដ៏​ល្អ​ឥត​ខ្ចោះ​ក្នុង​ការ​ប្រកួត AFC Asian Cup Qualifiers ជាមួយ​នឹង​ការ​យក​ឈ្នះ​លើ​កម្ពុជា ២-០ នៅ​កីឡដ្ឋាន Salt Lake Stadium ក្នុង​ទីក្រុង Kolkata កាល​ពី​ម្សិលមិញ។ ប្រធានក្រុម Sunil Chhetri រក​បាន​២​គ្រាប់​នៅ​នាទី(13′, 60′) គឺគ្រប់គ្រាន់ដើម្បីជួយក្រុម Blue Tigers ទទួលបានជ័យជម្នះដ៏ធំមួយ ដែលនាំពួកគេឡើងទៅកាន់កំពូលតារាង​ពូល D ។ Igor Stimac មានមោទនភាពយ៉ាងខ្លាំងចំពោះការខិតខំប្រឹងប្រែងរបស់កីឡាកររបស់គាត់ ហើយអរគុណពួកគេសម្រាប់ការឈ្នះនេះ។

គាត់​បាន​ប្រតិកម្ម​នឹង​ការ​ប្រកួត​ដោយ​និយាយ​ថា៖ “ខ្ញុំមានតែ​ពាក្យ​ប៉ុន្មាន​ម៉ាត់​ប៉ុណ្ណោះ​ចំពោះ​ការ​ឈ្នះនេះ។ អរគុណច្រើនចំពោះកូនក្រុមដែលបានលេងថ្ងៃនេះ។ វា​ពិត​ជា​ពិបាក​ដោយសារ​បញ្ហាការ​ដកដង្ហើម។ ខ្ញុំយល់ថាខួរក្បាលមិនដំណើរការត្រឹមត្រូវទេ ហើយអុកស៊ីសែនមិនមានគ្រប់​គ្រាន់នៅទីនោះនៅពេលចាំបាច់”។

“កីឡាករ​បាន​ធ្វើ​អស់​ពី​សមត្ថភាព​ដែល​ពួកគេ​អាច​ធ្វើ​បាន​នៅ​ថ្ងៃ​នេះ ហើយ​ទទួល​បាន​លទ្ធផល​ដែល​យើង​ចង់​បាន។ ពួក​គេ​បាន​ធ្វើ​ការ​ងារ​ដែល​ជា​ការ​សំខាន់​ណាស់​។ ខ្ញុំ​បាន​សុំ​រឿង​ពីរ​ក្នុង​ថ្ងៃ​នេះពី​កីឡាករ គឺ​គ្រាប់​បាល់​ និង​ Clean-Sheet ។ ខ្ញុំនឹងសប្បាយចិត្តជាងនេះ​បើយើង​រក​បាន​៣​ឬ​៤​គ្រាប់ ប៉ុន្តែក៏សប្បាយចិត្តជាមួយគ្រាប់​ទាំង២នេះ​ផង​ដែរ។ ខ្ញុំ​មាន​ទំនុក​ចិត្ត​ចំពោះ​អ្វី​ដែល​នឹង​កើត​ឡើង»។

Igor Stimac ក៏មានអារម្មណ៍ថាក្រុមរបស់គាត់អាចស៊ុតបញ្ចូលទីបានច្រើនជាងនេះ ហើយបានពន្យល់ពីការប្ដូរ Sunil Chhetri ចេញបន្ទាប់ពីគាត់ទទួលបានស្លាកដៃប្រធានក្រុម។  “លទ្ធផលដ៏យុត្តិធម៌នឹងកើតឡើងប្រសិនបើយើងឈ្នះ 4-0 ។ យើងមានឱកាសច្បាស់ 4-5 បន្ថែមទៀត ដូច្នេះគ្រាប់បាល់ពីរទៀតនឹងដំណើរការបានល្អ។ ប៉ុន្តែ យើងត្រូវតែបន្ទាបខ្លួន។ កីឡាករ​កំពុង​ព្យាយាម ប៉ុន្តែ​រក​មិន​ឃើញ​វិធី​ដើម្បី​រក​គ្រាប់​បាល់បានច្រើន​ជាង​នេះ”។

“អ្នកត្រូវតែឆ្ងល់ថាហេតុអ្វីបានជាខ្ញុំដក Sunil និង Brandon (Fernnandes) ចេញខណៈដែលពួក​គេកីឡាករដ៏មានឥទ្ធិពល។ យើង​មាន​ហ្គេម​បី​ហើយ​យើងត្រូវការពារ​កីឡាករ។ ប៉ុន្តែ​យើង​ត្រូវ​តែ​បង្រៀន​កីឡាករដទៃ​ទៀត​ឱ្យ​រៀន​ដោយ​មិន​មាន Sunil ។ ហើយការជំនួសគឺដើម្បីធានាថាពួកគេអាចលេងដោយគ្មាន Sunil ទោះបីជាវាមានរយៈពេលសាមសិបនាទីក៏ដោយ”។

(Khmer) ក្រុមជម្រើស​ជាតិ​កម្ពុជាទើប​តែ​រងបរាជ័យ​ក្រោម​ថ្វី​ជើង​ម្ចាស់​ផ្ទះឥណ្ឌា២ទល់០​ក្នុងការ​ប្រកួតបើក​ឆាក​ពូល D ពាន​រង្វាន់ AFC Asian Cup 2023 វគ្គ​ជម្រុះជុំ​ទី​បី​នៅ​កីឡដ្ឋាន Salt Lake ក្នុងទីក្រុងកុលកាតា​។

មុន​ការ​ប្រកួត​នេះ​កើត​ឡើង មាន​បញ្ហា​មួយចំនួន​បាន​កើត​ឡើង ទាំង​ការធ្វើ​ដំណើរ​ទៅ​កីឡដ្ឋាន រឿង​ទង់​ជាតិ​ខុស និង​រឿង​ភ្លេង​ជាតិ​កម្ពុជាមិន​អាច​ដំណើរការតាម​គ្រោង​ទុកជាដើម។ រឿងមួយ​ដែល​យើង​គួរចាប់អារម្មណ៍​គឺ​គ្មាន​វត្តមាន​របស់​កីឡាករ ឡុង ភារ៉ាត់​ ក្នុងបញ្ជី​១១​នាក់ដំបូង និង​បញ្ជីកីឡាករបម្រុង​នោះ​ទេ។ មូលហេតុ​ដែលរូប​គេ​គ្មានវត្តមានក្នុងបញ្ជី​គឺ​បញ្ហាសុខភាព​បណ្ដាល​មក​ពី​ការ​ជិះឡានក្រុង។ នេះបើតាមក្រុមការងារ B8-Sport ទទួលបានព័ត៌មានពីប្រទេស​ឥណ្ឌា។

ពេល​ធ្វើ​ដំណើពី​សណ្ឋាគារ​ទៅកាន់​កីឡដ្ឋានប្រកួត ​ក្រុមបាល់​ទាត់​ជម្រើស​ជាតិ​កម្ពុជា​ទាំងអស់បាន​ជិះឡានក្រុង​ដែលខាងសហព័ន្ធកីឡាបាល់​ទាត់​ឥណ្ឌារៀប​ចំដើម្បី​ធ្វើដំណើទៅ​កាន់​កន្លែង​ប្រកួត។ កំឡុង​ពេល​ជិះឡាន​ក្រុង​នោះ​ក្រុមកីឡាករកម្ពុជាទាំងអស់ ទទួលបានផលរំខានដោយ​សារ​អ្នក​បើក​បរឡាន​ក្រុង​នោះ​ប្រើប្រាស់​ល្បឿន​​ឡានតាម​ផ្លូវមិន​ស្ថេរភាពក្នុងកម្រិតមួយ មិន​ស្រួល​ទាល់​តែ​សោះ។ ក្នុងចំណោម​កីឡាករ​ទាំង​អស់! ឡុង​ ភារ៉ាត់​ដែលដើម​ឡើយ​មាន​ឈ្មោះ​ក្នុងបញ្ជីជម្រើស១១នាក់ដំបូង បាន​កើត​អការៈ វិលមុខ ធីងធោង រកក្អួតចង្អោរ ហើយ​មិន​អាច​លេងបាន​នោះ​ទេ។

មកដល់​ពេល​នេះ សុខភាពរបស់​ខ្សែ​បម្រើ​ក្លិប​ព្រហខ័នរាជស្វាយរៀង​វិល​មក​ប្រក្រតីភាព​វិញ​ហើយ ក្រោយ​សម្រាក​រយៈ​ពេល​មួយ​ថ្ងៃ ហើយ​រូប​គេ​នឹង​ចូលហ្វឹកហាត់​ជាមួយមិត្តរួម​ក្រុម​ត្រៀម​ប៉ះ​ជាមួយ​ជម្រើស​ជាតិកោះហុងកុង​នៅ​ថ្ងៃ​ទី​១១​ខែមិថុនាឆ្នាំ២០២២៕