(Khmer) ខ្សែបម្រើដ៏ឆ្នើមរបស់ Brighton កីឡាករ Yves Bissouma បានសម្រេចចិត្តផ្លាស់មកកាន់ Tottenham សម្រាប់ការប្រកួតប្រជែងរដូវកាលថ្មី ពោលរង់ចាំតែការប្រកាសផ្លូវការប៉ុណ្ណោះ។

Bissouma ដែលបច្ចុប្បន្នមានវ័យ២៥ឆ្នាំ មានតួនាទីលេងជាខ្សែបម្រើការពារ បានបង្ហាញទម្រង់លេងដ៏លេចធ្លោមែនទែនជាមួយ Brighton កាលពីរដូវកាលបញ្ចប់កន្លងទៅថ្មីៗនេះ ខណៈ រូបគេក៏ធ្លាប់មានពាក្យចចាមអារ៉ាមក្នុងការផ្លាស់មកកាន់ Manchester United ផងដែរ ប៉ុន្តែ អ្វីៗបានបញ្ចប់ហើយ ដោយ រូបគេនឹងផ្លាស់ទៅកាន់ Spurs។

បើយោងទៅតាមសម្តីរបស់អ្នកកាសែតកីឡាដ៏ល្បីល្បាញលោក Fabrizio Romano បានលើកឡើងថា Brighton នឹងទទួលបានប្រាក់ចំនួន ២៩លានអឺរ៉ូ ពីការលក់ Bissouma រួមទាំងលក្ខខណ្ឌផ្សេងៗទៀតដែលឈានដល់ ៣៥លានអឺរ៉ូ (ឬប្រមាណ ៣៦.៥លានដុល្លារ) ខណៈ ការធ្វើតេស្តសុខភាពនឹងធ្វើឡើងជាផ្លូវការនៅក្នុងពេលឆាប់ៗដ៏ខ្លីខាងមុខនេះ៕

(Khmer) Darwin Nunez និង Luis Diaz មិន​ត្រឹម​តែ​ស្រដៀង​គ្នា​ក្នុង​ការ​ចូល​រួម​ជាមួយ Liverpool ពី​ក្លឹប​ព័រទុយហ្គាល់​ប៉ុណ្ណោះ​ទេ ប៉ុន្តែ​ពួក​គេក៏​កើត​ចេញ​ពី​អ្នក​ដែល​មាន​កម្រិតជីវភាពទាប ស្ទើ​ស្លាប់ស្ទើរស់ដូចគ្នា។ រឿង​រ៉ាវជីវិតរបស់​ពួក​គេទាំងពីរ​ស្រដៀងគ្នា អញ្ចឹង​ហើយ​ B8 Sport សូមលើកយក​មក​និយាយប្រាប់បង​ប្អូន។

Diaz មកពីជនជាតិដើមភាគតិចក្រីក្របំផុតមួយនៅក្នុងប្រទេសកូឡុំប៊ី ខណៈដែល Nunez ធំឡើងក្នុងស្ថានភាពលំបាកស្រដៀងគ្នានៅទីក្រុង Artigas ក្នុងប្រទេសអ៊ុយរូហ្គាយ។ Nunez បាននិយាយកាលពីប៉ុន្មានឆ្នាំមុនថា៖ “ខ្ញុំមិនភ្លេចថាខ្ញុំមកពីណាទេ ខ្ញុំមកពីគ្រួសារដ៏រាបទាប និងឧស្សាហ៍ព្យាយាម” ។

“ឪពុក​ខ្ញុំ​ធ្វើ​ការ​ប្រាំបី​ទៅ​ប្រាំបួន​ម៉ោង​ក្នុង​ការ​សំណង់​ ដើម្បី​ទិញ​របស់​ដែល​យើង​ត្រូវ​ការ​និង​ហូប។ ម្ដាយ​ខ្ញុំ​តែង​តែ​ជា​ស្ត្រី​មេផ្ទះ ហើយ​នឹង​ចេញ​ទៅ​តាម​ផ្លូវ​ដើម្បី​ប្រមូល​ដប​ទៅ​លក់»។

Nunez ក៏​បាន​និយាយ​ក្នុង​បទ​សម្ភាស​មួយ​ទៀត​ថា៖ «បាទ ខ្ញុំ​បាន​ចូល​គេង​ដោយ​ឯកាបំផុត ​ពេល​ពោះ​ទទេគ្មាន​អ្វីហូប»។

“តែអ្នកដែលចូលគេងដោយពោះទទេរជាងគេគឺម្តាយខ្ញុំ គាត់ធានាថា បងប្រុសខ្ញុំ និងខ្ញុំញ៉ាំមុន។ ម្តាយរបស់ខ្ញុំធ្លាប់ចូលគេងដោយមិនចូលរួមញ៉ាំអីទេ។ ខ្ញុំមិនដែលភ្លេចថាខ្ញុំមកពីណាទេ។ “

វាមានសុវត្ថិភាពក្នុងការនិយាយថា Nunez នៅតែមានមោទនភាពចំពោះផ្ទះរបស់គាត់។ កាលពីឆ្នាំមុន គាត់ថែមទាំងបានចែករំលែករូបថតផ្ទះកាលកុមារភាពរបស់គាត់នៅ Artigas នៅលើគណនី Instagram ។

គាត់បានសរសេរនៅក្នុងសារនោះថា៖ «ផ្ទះរបស់ខ្ញុំជាទីដែលខ្ញុំសប្បាយចិត្តអស់រយៈពេល ១៤ ឆ្នាំ!»

ឥឡូវនេះគាត់អាចនឹងក្លាយជាកីឡាករដែលមានតម្លៃថ្លៃបំផុតរបស់ Liverpool ដែលមិនធ្លាប់មាន ប្រសិនបើហង្សក្រហមត្រូវបង់ប្រាក់ 25 លានអឺរ៉ូបន្ថែមលើថ្លៃដើម 75 លានអឺរ៉ូ។

(Khmer) Manchester United បានភ្ជាប់ជាមួយនឹងការផ្ទេរ​យកខ្សែបម្រើ Vitinha របស់ Porto។  Manchester United ជ្រើសរើស​មិន​ចូលរួម​ក្នុង​ការ​ផ្ទេរ​យក Yves Bissouma របស់ Brighton ដែល​នឹង​ជិត​ទៅចូលរួម​ជាមួយ Tottenham ។ ជំនួសមកវិញ បិសាចក្រហមអាចមានអាទិភាពផ្សេងទៀត។

ខ្សែបម្រើចុងក្រោយគេដែលចង់ផ្លាស់ទៅ Old Trafford គឺខ្សែបម្រើ Vitinha របស់ Porto ដោយសារព័ត៌មានព័រទុយហ្គាល់បានភ្ជាប់គាត់ជាមួយនឹងការផ្ទេរ​នេះ។ តាម​របាយការណ៍របស់​កាសែត Daily Record, ក្លឹបនៅ Premier League មួយ​នេះគ្រោងនឹងចំណាយលើលក្ខខណ្ឌផ្ដាច់​កុងត្រា ហើយចាត់ទុក United ជាភាគីដែលចាប់អារម្មណ៍ជាងគេ។

ដូច្នេះ​តើ​អ្នក​ត្រូវ​ដឹង​អ្វី​ខ្លះ​អំពី Vitinha ហើយគាត់​នឹង​នាំ​អ្វីមក​កាន់  Manchester United?

Vitinha: ឯកសារការពិត

១) Vitinha វ័យ 22 ឆ្នាំគឺជាខ្សែបម្រើកណ្តាលដែលបង្ហាញខ្លួន​ក្នុងជម្រើស១១នាក់សម្រាប់ Porto កាលពីរដូវកាលមុន ខណៈដែលពួកគេបានឈ្នះពានរង្វាន់លីគកំពូលព័រទុយហ្គាល់។ គាត់ស៊ុតបញ្ចូលទីបានពីរគ្រាប់ និងបញ្ជូនបាល់ឱ្យមិត្តរួមក្រុមចំនួនបីលើក។

២) គាត់ធ្លាប់បានលេងនៅ Premier League រួចហើយដោយចំណាយពេលមួយផ្នែកនៃរដូវកាល 2020/21 ក្នុងការខ្ចីជើងនៅ Wolves ។ គាត់បានចាប់ផ្តើមការប្រកួតចំនួន ៥លើក និងបង្ហាញ 14 ដងជាអ្នកកីឡាករ​បម្រុង។ Wolves បានជ្រើសរើសមិនទទួលយកជម្រើសក្នុងការទិញក្នុងតម្លៃ 18 លានផោន ដែលជាការសម្រេចចិត្តមួយដែលពួកគេអាចនឹងសោកស្តាយនៅពេលនេះ។

៣) Vitinha ថ្មីៗនេះត្រូវបានកោះហៅចូលក្នុងក្រុមជម្រើសជាតិព័រទុយហ្គាល់ ហើយបាន​បង្ហាញខ្លួន៣​ប្រកួត​គិត​មក​ដល់​ពេល​នេះ។

៤) កិច្ចសន្យារបស់គាត់ជាមួយ Porto ដំណើរការរហូតដល់ឆ្នាំ 2024 តែប៉ុណ្ណោះ។តម្លៃផ្ដាច់​កុងត្រារបស់​គាត់​គឺ 40 លានអឺរ៉ូ របាយការណ៍ពី​ប្រភពដដែលថា តម្លៃខ្លួនបច្ចុប្បន្នរបស់កីឡាកររូបនេះគឺ៣៤លានផោន។

៥) Vitinha គឺ​ជា​កីឡាកររត់​ពេញ​ទីលាន​ក្នុងតំបន់បម្រើ។ គាត់ជាប់ចំណាត់ថ្នាក់លេខ 3 ក្នុងក្រុម Porto ក្នុងរដូវកាលមុន​ក្នុងនាម​ជាកីឡាករ​រំងាប់​បាល់បាន​ច្រើន​ជាង​គេ ហើយ​ក៏​ជាកីឡាករទីបួនដេលបង្កើតឱកាសច្រើន​ជាង​គេបើ​គិត​តាម​ស្ថិតិរបស់ WhoScored ។

ភ្នាក់ងាររបស់ Vitinha គឺជាអតីតខ្សែបម្រើ Chelsea និង Barcelona កីឡាករ Deco ដែលបានប្រាប់ A Bola កាលពីដើមរដូវកាលនេះថា៖«គាត់គឺជាកីឡាករបាល់ទាត់ដ៏អស្ចារ្យម្នាក់»។

“(Vitinha) បង្ហាញពីភាពចាស់ទុំដ៏ធំសម្បើម ទោះបីជានៅក្មេងអាយុក៏ដោយ។ គាត់យល់​ពីហ្គេមមិនដូចអ្នកផ្សេងទេ។ នៅពេលដែលគាត់អាចបញ្ចូលគ្នានូវគុណសម្បត្តិទាំងអស់នេះ គាត់ធ្វើឱ្យ Porto គ្មាន​នរណា​អាច​បញ្ឈប់​បាន ដែល​គេ​ប្រៀបប្រដូចជាអ្នកលេង​ព្យាណូក្នុង​វង់ដន្រ្តី​មួយអញ្ចឹង”។

កាសែតព័រទុយហ្គាល់ O Jogo បានរាយការណ៍នៅដើមរដូវកាលនេះថា Bayern Munich បានចូលរួមក្នុងការប្រណាំងប្រជែងដើម្បីចុះហត្ថលេខាលើគាត់។ ប៉ុន្តែការចុះហត្ថលេខាយក Ryan Gravenberch កាល​ពី​ថ្មី​ៗនេះ ធ្វើឱ្យក្លិប​អាល្លឺម៉ង់​ត្រូវ​ងាកចេញ។

អតីតគ្រូបង្វឹក Wolves លោក Nuno Santo បានកោតសរសើរពីសក្តានុពលរបស់គាត់ ដោយបានអត្ថាធិប្បាយតាមរយៈ Shropshire Live ថា៖ “យើងរីករាយជាមួយ Vitor ។ គាត់ជាកីឡាករវ័យក្មេង ប៉ុន្តែពោរពេញដោយទេពកោសល្យ និងគុណភាព”។

ការចាកចេញរបស់ Santo ហើយ​ការ​មក​ដល់​របស់លោក Bruno Lage នៅ Wolves ធ្វើឱ្យ​គម្រោងប្រើ​ប្រាស់​កីឡាករត្រូវប្ដូរ ហើយជ្រើសរើសមិនទទួល​យក​ជម្រើសរបស់ពួកគេដើម្បីចុះហត្ថលេខាលើ Vitinha។

រឿង​បន្ទាប់​សម្រាប់ Man Utd គឺ​អ្វី?

អាទិភាពខ្សែបម្រើនាំចូលរបស់ Man Utd គឺការចុះហត្ថលេខាលើ Frenkie de Jong ហើយវាមិនទាន់ច្បាស់ថាតើ Vitinha ត្រូវបានគេចាត់ទុកជាជម្រើសជំនួស ឬជាការបំពេញបន្ថែមដល់កីឡាករហូឡង់ឬ​ក៏​អត់?។ United អាចនឹង​ទិញបាន​ខ្សែបម្រើ​លើស​ពី​ម្នាក់។ លទ្ធផលដែលទំនងបំផុតនៅទីនេះ ប្រសិនបើយើងស្មានគឺ Vitinha បញ្ចប់ការចុះកុងត្រាថ្មីជាមួយ Porto ក្នុងរយៈពេលប៉ុន្មានសប្តាហ៍ខាងមុខនេះ។

រដូវកាលដ៏ល្អរបស់គាត់សម្រាប់ក្លឹបព័រទុយហ្គាល់បានឃើញតម្លៃរបស់គាត់កើនឡើង ហើយលក្ខខណ្ឌផ្ដាច់​កុងត្រារបស់គាត់គឺថោកណាស់ ដោយនៅសល់តែ 2 ឆ្នាំលើកិច្ចព្រមព្រៀងរបស់គាត់ផងដែរ វាសមហេតុផលណាស់ Porto ចង់បន្តកុងត្រារបស់គាត់។

ប្រសិនបើ United ធ្វើការផ្លាស់ប្តូរមួយ​នេះ នោះពិតជាល្អណាស់ ប៉ុន្តែយើងមិនបានស្និទជាមួយភាគីខាងកីឡាករព័រទុយហ្គាល់អ្្ចឹង​ហើយ​យើង​មិន​ដឹង​ថា​តើព័ត៌មាន​ជាប់​ទាក់​ទង​ទាំងនេះជាដំណឹងល្អឬ​ក៏​អត់​នោះទេ។

Vitinha គឺជាកីឡាករដ៏គួរឱ្យចាប់អារម្មណ៍មួយរូប ដែលពិតជាអាចកែលម្អខ្សែបម្រើរបស់ United ប៉ុន្តែយើងសូមណែនាំឱ្យបញ្ឈប់ការបញ្ជាទិញអាវដែលមានឈ្មោះរបស់គាត់នៅខាងក្រោយ៕

(Khmer) ប្រធាន LaLiga លោក Javier Tebas បាននិយាយកាលពីថ្ងៃចន្ទថា លីគអេស្ប៉ាញបានដាក់ពាក្យប្តឹង Manchester City រួចហើយ ជុំវិញកិច្ចព្រមព្រៀងចុះហត្ថលេខាលើ Erling Haaland ហើយនឹងចាត់វិធានការប្រឆាំងនឹងសំណើរបស់ PSG ទៅកាន់ Kylian Mbappe នៅសប្តាហ៍នេះ។

Man City បានឈ្នះការប្រជែងទិញ Haaland ពី Borussia Dortmund បន្ទាប់ពីបានបង់ប្រាក់៥៤លានផោនរបស់ខ្សែប្រយុទ្ធរូបនេះ ប៉ុន្តែកិច្ចព្រមព្រៀងនេះ រួមទាំងប្រាក់ខែ និងថ្លៃភ្នាក់ងារអាចលើសពី២៥០លានផោន។

កុងត្រាថ្មីរយៈពេល ៣ ឆ្នាំរបស់ Mbappe នឹងធ្វើឱ្យ PSG ផ្តល់ប្រាក់បៀវត្សរ៍ដល់កីឡាករសញ្ជាតិបារាំងរូបនេះក្នុងមួយឆ្នាំចន្លោះពី ៤០លានអឺរ៉ូ ទៅ ៥០ លានអឺរ៉ូ។ បន្ទាប់ពីការបន្តរបស់ Mbappe ត្រូវបានបញ្ជាក់កាលពីខែមុន ទោះបីជា Real Madrid ព្យាយាមចុះហត្ថលេខាលើកីឡាករវ័យ ២៣ ឆ្នាំក៏ដោយ LaLiga បាននិយាយថាពួកគេនឹងប្តឹងទៅ UEFA តុលាការរដ្ឋបាលបារាំង និងសហភាពអឺរ៉ុប។

Tebas បាននិយាយនៅក្នុងព្រឹត្តិការណ៍សារព័ត៌មាននៅទីក្រុង Valladolid ថា៖ “ខ្ញុំដាក់ពាក្យបណ្ដឹងនេះមិនសម្រាប់ Real Madrid ជាមួយនឹងបញ្ហា Mbappe ប៉ុណ្ណោះទេ ប៉ុន្តែខ្ញុំរក្សាជំហរសម្រាប់បាល់ទាត់អឺរ៉ុប” ។

“សប្តាហ៍នេះ យើងនឹងប្តឹង PSG ខណៈកាលពីសប្តាហ៍មុន យើងបានធ្វើវាជាមួយ City”។

Tebas បានប្រមូលផ្តុំគ្នាជាយូរមកហើយក្នុងប្រឆាំងនឹងអំណាចហិរញ្ញវត្ថុរបស់ក្លឹបដែលគាំទ្រដោយរដ្ឋដូចជា Manchester City និង PSG ។ គាត់និយាយថាក្លឹបទាំងពីរមិនគោរពច្បាប់ហិរញ្ញវត្ថុរបស់ UEFA ដែលធ្វើអោយទីផ្សារអស្ថិរភាព និងរំខានដល់តុល្យភាពនៃការប្រកួត។ Tebas បាននិយាយថា “ការអនុញ្ញាតឱ្យប្រតិបត្តិការទាំងនេះ … មានគ្រោះថ្នាក់ជាង (លីគកំពូលអឺរ៉ុប) Super League” ។

របាយការណ៍ប្រចាំឆ្នាំពីអាជ្ញាធរហិរញ្ញវត្ថុរបស់បាល់ទាត់បារាំង (DNCG) បាននិយាយនៅដើមខែនេះថា PSG បានរងការខាតបង់ចំនួន២២៤.៣លានអឺរ៉ូក្នុងឆ្នាំ 2020/21 ពោលគឺកើនឡើង 80 ភាគរយកាលពីឆ្នាំមុន។

LaLiga បានណែនាំប្រព័ន្ធនៃការរឹតបន្តឹងលើការចំណាយដ៏តឹងរ៉ឹងក្នុងឆ្នាំ 2013ដែលវានិយាយថា បង្កើនសមតុល្យការប្រកួតប្រជែងនៃលីគអេស្ប៉ាញ និងលើកទឹកចិត្តឱ្យក្លឹបទទួលយកវិធីសាស្រ្តរយៈពេលវែងក្នុងការចំណាយ។

ប៉ុន្តែប្រធាន UEFA លោក Aleksander Ceferin បាននិយាយនៅក្នុងបទសម្ភាសន៍ជាមួយ AFP មុនពេលការប្រកួតវគ្គផ្តាច់ព្រ័ត្រ Champions League កាលពីខែមុនថា លោកបានច្រានចោលការរិះគន់របស់ La Liga ចំពោះកិច្ចព្រមព្រៀងថ្មីរបស់ Mbappe ។

Ceferin បាននិយាយថា៖ “ខ្ញុំមិនយល់ស្របជាដាច់ខាត។ មានការប្រមាថច្រើនពេកនៅក្នុងកីឡាបាល់ទាត់ ហើយខ្ញុំគិតថាគ្រប់លីកគួរតែព្រួយបារម្ភអំពីស្ថានភាពរបស់ពួកគេ។ ខ្ញុំមិនគិតថាវាត្រឹមត្រូវទេដែលលីកមួយរិះគន់លីកផ្សេង។ តាមដែលខ្ញុំដឹង ការផ្តល់ជូនពី Real សម្រាប់ Mbappe គឺស្រដៀងទៅនឹងការផ្តល់ជូនរបស់ PSG”៕

(Khmer) ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៦ ឆ្នាំ២០២២ បានឈានមកដល់ការប្រកួតវគ្គជម្រុះថ្នាក់ជាតិ ដែលមានសមាសភាពក្រុមចំនួន ១២ ត្រូវប្រកួតប្រកួតប្រជែងយក ៦កៅអី ទៅចូលរួមវគ្គ១៦ ក្រុមចុងក្រោយថ្នាក់ជាតិ នាចុងខែកក្កដា ឆ្នាំ២០២២ខាងមុខ។

ក្រុមចំនួន១២ ដែលត្រូវប្រកួតជម្រុះពានសម្ដេចថ្នាក់ជាតិនេះ មាន៨ក្រុមមកពីក្របខណ្ឌ Cambodian League 2៖ សូលទីឡូអង្គរអែហ្វស៊ី សៀមរាបអែហ្វស៊ី ណិចស្ទេបអែហ្វស៊ី បន្ទាយមានជ័យអែហ្វស៊ី ព្រៃវែងអែហ្វស៊ី អាស៊ីអឺរ៉ុបយូណាយធីត កោះកុងអែហ្វស៊ី និងអាយ អេស អាយ ដង្កោរសែនជ័យ។ ចំពោះសមាសភាព ៤ក្រុមទៀតជាក្រុមជាប់ Top4 ថ្នាក់ខេត្ត ដែលរួមមាន៖ ភ្នំពេញហ្គាឡាក់ស៊ី ឧត្ដរមានជ័យ ឬទ្ធិសែន និងខេត្តកំពត។ ចំណែកឯក្រុមសាលាបាល់ទាត់ជាតិបាទី និងក្រុមខេត្តត្បូងឃ្មុំ មិនមានវត្តមានក្នុងការប្រកួតជម្រុះទេ ដែលធ្វើឲ្យក្រុម Top 2 Cambodian League 2 អគ្គិសនីកម្ពុជា និងនគរបាលជាតិកក់កៅអីវគ្គ១៦ក្រុមចុងក្រោយថ្នាក់ជាតិដោយស្វ័យប្រវត្តិ ជាមួយសមាជិក ៨ក្រុមនៃក្របខណ្ឌលីគកំពូលកម្ពុជា Cambodian Premier League ។

កាលបរិច្ឆេទប្រកួតជមុះថ្នាក់ជាតិពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៦ ឆ្នាំ២០២២នេះ នឹងចាប់ផ្ដើមពីថ្ងៃទី២១ ខែមិថុនា រហូតដល់ថ្ងៃទី៧ ខែកក្កដា ឆ្នាំ២០២២ រីឯការប្រកួតថ្នាក់ជាតិវិញចាប់ផ្ដើមប្រកួតពីវគ្គ១៦ក្រុមចុងក្រោយ រហូតដល់ការប្រកួតវគ្គផ្ដាច់ព្រ័ត្រ ចន្លោះពីថ្ងៃទី២០ ខែកក្កដា ដល់ថ្ងៃទី២៦ ខែតុលា ឆ្នាំ២០២២ខាងមុខនេះ៕

រូបភាព៖ HSC

(Khmer) យោងតាម Esport3 បានឱ្យដឹងថា Barcelona នឹងត្រូវបង់ប្រាក់ឱ្យ Gerard Pique ៨០លានអឺរ៉ូក្នុងប្រាក់បៀវត្សរ៍ពន្យារពេលក្នុងរយៈពេលពីររដូវកាលបន្ទាប់។ នេះ​គឺ​ស្រប​តាម​កិច្ច​ព្រម​ព្រៀង​ដែល​លោក​បាន​សម្រេច​ជាមួយ​នឹង​គណៈ​កម្មាធិការ​កាលពីលើក​មុន (ជំនាន់លោក Josep Maria Bartomeu Floreta)។

លោក Luis F. Rojo អ្នក​កាសែតរបស់ Marca រាយការណ៍ថា ដោយសារហេតុផលនេះ Barca ចង់ឱ្យកីឡាករវ័យ 35 ឆ្នាំចាកចេញនៅរដូវក្តៅនេះតែម្ដង។ នេះនឹងធ្វើឱ្យវាកាន់តែងាយស្រួលសម្រាប់ Barca ក្នុងការចុះហត្ថលេខា និងចុះឈ្មោះកីឡាករថ្មី ខណៈដែលពួកគេនឹងលុបចោលកិច្ចសន្យារបស់គាត់។

យោងតាមរបាយការណ៍ពីមុន Xavi បានប្រាប់ Pique រួចហើយថាគាត់នឹងមិនមែនជាកីឡាករដេល​នឹង​លេងក្នុងជម្រើសដំបូងទៀងទាត់ទៀតទេនៅរដូវកាលក្រោយ ហើយបានណែនាំឱ្យគាត់ចាកចេញ។ យ៉ាង​ណា​ក៏​ដោយ ខ្សែ​ការពារ​កណ្តាល​បច្ចុប្បន្ន​កំពុង​ប្រឆាំង​នឹង​គំនិត​នេះ។

នៅក្នុងរដូវកាល 2021/22 Pique បានលេង 39 ប្រកួតសម្រាប់ Barca (36 ចាប់ផ្តើមក្នុង១១នាក់) និងស៊ុតបញ្ចូលទីបាន 3 គ្រាប់។

(Khmer) វឿន វាសនា​កីឡាករបាល់​ទះជម្រើស​ជាតិ​កម្ពុជានិង​ក្លិប​វិសាខាមានឱកាស​បាន​ទៅ​លេង​នៅ​ក្លិបបាល់ទះវៀតណាម Long An ​ហើយ​ ខណៈការផ្ទេរនេះត្រូវបានទទួលស្គាល់ដោយ​សហព័ន្ធ​បាល់ទះ​​ពិភព​លោក ( FIVB)។

ស្មាត់ស្ដាំក្លិបបាល់ទះវិសាខា និងជម្រើសជាតិកម្ពុជា រូបនេះបានសម្រេចការផ្ទេរលើកិច្ចសន្យា២សប្ដាហ៍ ហើយម៉ោង៣រសៀលនេះនឹងមានសន្និសីទសារព័ត៌មានស្ដីពីការផ្ទេរកីឡាករ វឿន វាសនា (លេខ២០) ទៅចូលរួមជាមួយក្លិបបាល់ទះវៀតណាមមួយ​នេះផង​ដែរ។ តាម​ប្រភព​បថឋម​គឺ​កាសរ​ផ្ទេរ​នេះ​មាន​តម្លៃខ្ពង់ម៉ឺនដុល្លារ​តែ​យើង​មិនទាន់​ដឹង​មាន​តម្លៃប៉ុន្មានម៉ឺនដុល្លារ​ឱ្យ​ច្បាស់​នោះ​ទេ។

វឿន វាសនាគឺ​ជា​កីឡាករ​បាល់​ទះអាជីព​ ហើយ​រូប​គេ​ជាផ្នែក​មួយ​នៃ​ក្រុមជម្រើស​ជាតិ​កម្ពុជា​ឈ្នះមេដាយសំរឹទ្ធស៊ីហ្គេម​លើ​វិញ្ញាសាបាល់ទះ​ក្នុងសាល។ វឿន​ វាសនា​ ក៏ជាកីឡាករបាល់ទះវ័យក្មេងរបស់កម្ពុជាមួយរូបដែលបានចេញទៅប្រកបអាជីពនៅលីគកំពូលថៃដោយលេងឲ្យក្លិប Prince Finance ។ មែនទែន​ទៅ! ក្រៅ​ពីវាសនា​នេះ​កឺ​មាន​កីឡាករបាល់ទះជម្រើស​ជាតិកម្ពុជាទៅ​លេង​ក្រៅ​ប្រទេស​ដែរ​ដោយ​មាន​ដូចជា គួន ម៉ុម​ផ្ទេរ​ទៅ​លេង​នៅ​ឥណ្ឌូនេស៊ី និង​មាន​កីឡាករបាល់​ទះកាល​ពី​ប៉ុន្មានឆ្នាំមុន​ដេល​ផ្ទេរទៅ​លេង​នៅ​ក្លិប​ប្រទេស​ថៃ។

❌ ក្លិបបច្ចុប្បន្ន : វិសាខា
❌ តួនាទី : អ្នកវ៉ៃផ្ដាច់​ (ស្មាត់)
❌ អាយុ : ២១​ ឆ្នាំ
❌ កម្ពស់ : ១,៩២​ ម៉ែត្រ
❌ ទម្ងន់ : ៧៥​ គីឡូក្រាម
❌ ស្រុកកំណេីត : មោងឬស្សី​ បាត់ដំបង