(Khmer) Antony បានបញ្ចប់ការផ្ទេរពី Ajax ទៅកាន់ Man United ជាមួយនឹងការការ​ពិនិត្យសុខភាពនៅល្ងាចថ្ងៃអង្គារ៍។ ដើម្បីបិទកិច្ចព្រមព្រៀងនេះ កីឡាករប្រេស៊ីលប្រហែលជាត្រូវបោះបង់ចោលលេខអាវដែលខ្លួនពេញចិត្ត។

គាត់ពាក់អាវលេខ 11 ទាំងនៅ Ajax និងក្រុមជម្រើសជាតិប្រេស៊ីល ប៉ុន្តែវានៅតែជាកម្មសិទ្ធិរបស់ Mason Greenwood នៅ Man United ។ នោះគឺជាស្ថានភាពដ៏ស្មុគស្មាញមួយហើយលេខ១១នេះសម្រាប់ Man Utd មិនចាំបាច់​និយាយច្រើន​ទេ ដោយ​គ្រាន់តែដឹងថា Antony នឹង​ពាក់លេខអាវផ្សេងទៀត។ នេះមានន័យថា​គាត់​អាច​ពាក់លេខមយយចំនួនដែលទំនេរដូចជា៖

អាវ​លេខ ១៣៖

យើងកម្របានឃើញលេខនេះនៅលើទីលានសម្រាប់ Man United ដូចដែលវាត្រូវបានពាក់ចុងក្រោយដោយ Lee Grant ហើយមុននោះ Anders Lindegaard ។

អាវ​លេខ ១៥៖

អ្នក​ពាក់​លេខ​នោះ​ពីរ​នាក់​ចុង​ក្រោយ​គឺ Andreas Pereira និង Adnan Januzaj។ United នឹងសង្ឃឹមថាអាជីពរបស់ Antony នៅ Old Trafford នឹងទទួលបានជោគជ័យបន្ថែមទៀត។

អាវ​លេខ ២១៖

Edinson Cavani បានទុកលេខនេះនៅទំនេរ បន្ទាប់ពីពាក់វាអស់មួយរដូវកាល។

អាវ​លេខ ២៤៖

ស្ទើរតែជាលេខដែលទាក់ទាញបំផុតនៅ United វាត្រូវបានពាក់ចុងក្រោយដោយ Timothy Fosu-Mensah ។

អាវ​លេខ ២៧៖

អាវ​នេះ​ត្រូវ​បាន​ទុក​ឱ្យ​នៅ​ទំនេរ​ បន្ទាប់​ពី​ការ​ចាកចេញ​របស់ Alex Telles ក្នុង​លក្ខខណ្ឌ​ខ្ចី​ជើង​ទៅ Sevilla នៅ​រដូវក្តៅ​នេះ។

(Khmer) Liverpool កំពុង​ស្វែង​រក​ខ្សែ​បម្រើ។ កីឡាករ​ជាច្រើន​ត្រូវ​បាន​គេផ្សារ​ភ្ជាប់ទៅកាន់ពួកគេ ប៉ុន្តែ​មិន​ទាន់​មាន​ព័ត៌មាន​ថ្មី​ណា​មួយ​ដែល​សំខាន់​លើ Liverpool បន្ត​កិច្ច​ព្រមព្រៀង​សម្រាប់​កីឡាករ​ជាក់លាក់​ណា​មួយ​ឡើយ។

លោក Jurgen Klopp កំពុងជួបវិបត្តិរបួសនៅដើមរដូវកាលនៅក្លឹប ជាមួយនឹងកីឡាករក្រុមដំបូងចំនួន 10 នាក់ដែលគ្មាន​វត្តមានលេងជាទៀងទាត់។ មានការរំពឹងទុកជាច្រើនក្នុងរយៈពេលប៉ុន្មានសប្តាហ៍ថ្មីៗនេះដែលផ្សារភ្ជាប់ Liverpool ជាមួយនឹងការផ្លាស់ប្តូរសម្រាប់ខ្សែបម្រើ ទោះបីជា Klopp បានតាំងចិត្តក្នុងជំហរ​របស់គាត់ថាពួកគេនឹងសម្លឹងរកការនាំយកនរណាម្នាក់មក ប្រសិនបើវាសមហេតុផលសម្រាប់រយៈពេលយូរ។

គ្រូបង្វឹកសញ្ជាតិអាឡឺម៉ង់ដឹកនាំគឺដោយគ្មាន Thiago Alcantara, Naby Keita, Alex Oxlade-Chamberlain និង Curtis Jones ខណៈដែលអ្វីៗកំពុងស្ថិតស្ថេរ ដោយជម្រើសខ្សែបម្រើរបស់គាត់មាន​កម្រិតយ៉ាងខ្លាំង។ លោកPaul Robinson បានប្រាប់កាសែត Football Insider ថាគាត់គិតថា Liverpool នៅតែអាចផ្ទេរកីឡាករបន្ថែមបានខ្លះ។

«ខ្ញុំគិតថាមានឱកាសច្រើនដែល Liverpool នឹងចុះហត្ថលេខាលើខ្សែបម្រើ។ ខ្ញុំ​ប្រាកដ​ថា​មនុស្សមយយចំនួន​នៅ​ពី​ក្រោយ​ឆាក​ នៅ Liverpool កំពុង​ធ្វើ​ការ​យ៉ាង​ខ្លាំង។ ខ្ញុំ​គិត​ថា​ពួក​គេ​នឹង​សម្លឹង​រក​ការ​នាំ​យក​មួយ​ដែល​គួរ​ឱ្យ​ភ្ញាក់​ផ្អើល​ចូល​»។

«អ្នកអាចឃើញពីការសម្ភាសន៍របស់ Klopp ថាគាត់មិនសប្បាយចិត្តទេនៅពេលនេះ។ កង្វះ​ជម្រើស​ដែល​គាត់​មាន​ក្នុង​ក្រុម​របស់​គាត់​ដោយ​សារ​តែ​របួស​​អ្នក​ទាំង​អស់​គ្នាបាន​មើល​ឃើញ»។

«ខ្ញុំ​គិត​ថា​ពួក​គេ​នឹង​ខិត​ខំ​ ដើម្បី​នាំ​នរណា​ម្នាក់​ចូល​មុន​ពេល​បញ្ចប់​ទីផ្សារដោះដូរ។ ជារឿយៗពួកគេធ្វើជំនួញដោយស្ងប់ស្ងាត់ ហើយបន្ទាប់មកទាញទន្សាយចេញពីមួក»។

«ខ្ញុំគិតថាវានឹងកើតឡើងម្តងទៀត។ ខ្ញុំ​អាច​ឃើញ​ខ្សែ​បម្រើ​ម្នាក់​ចូល​មក​មុន​ពេល​កំណត់»។

អ្នកកាសែតដែលអាចទុកចិត្តបានលោក Paul Gorst ពន្យល់ពីមូលហេតុដែលស្ថានភាពពិបាកសម្រាប់ក្រុមហង្សក្រហមក្នុងការស្វែងរកកីឡាករដែលពួកគេត្រូវការក្នុងទីផ្សារដោះដូរកឡាករក្នុងដើមរដូវកាលនេះ។

លោក Gorst របស់កាសែត Liverpool Echo បានសរសេរថា៖ “ការស្វែងរករបស់ Liverpool នៅតែជាបញ្ហាមួយដ៏លំបាក ប៉ុន្តែទោះជាយ៉ាងណា ប្រភពរបស់ក្លឹបបានទទូចថា គុណភាពទាំងមូលនៃក្រុមធ្វើឱ្យមានការពិបាកក្នុងការស្វែងរក “កីឡាករត្រឹមត្រូវ” ដែល Klopp បាននិយាយជាញឹកញាប់នៅក្នុងសន្និសីទសារព័ត៌មានរបស់គាត់” ៕

(Khmer) Barcelona កំពុងពិភាក្សាជាមួយ Manchester United ជុំវិញការដោះដូរដែលអាចមានពាក់ព័ន្ធនឹង Sergino Dest និង Aaron Wan-Bissaka, បើ​តាម​ការ​ផ្សាយ​របស់​កាសែត​ Sport មាន​មូលដ្ឋាន​នៅទឹក​ដី Catalan។

កីឡាករទាំងពីរស្ថិតក្នុងចំណែកលើសនៅក្លិបរៀងៗខ្លួន ហើយពួកគេអាចកែប្រែអាជីពរបស់ពួកគេជាមួយនឹងការផ្លាស់ប្តូរទៅក្រៅប្រទេស។ Dest មិនត្រូវបានរាប់បញ្ចូលក្នុងក្រុម Barcelona ក្នុងរដូវកាលនេះទេ ខណៈដែល Bissaka បានឃើញសកម្មភាពត្រឹមតែ 4 នាទីប៉ុណ្ណោះ។

ខ្សែការពារស្តាំសញ្ជាតិអង់គ្លេសមានតម្លៃទីផ្សារត្រឹម​តែ 25 លានអឺរ៉ូ បើទោះបីជាគាត់បាន​ផ្ទេរ​មក​កាន់ Man United ក្នុងតម្លៃ 55 លានអឺរ៉ូកាលពីបីឆ្នាំមុនក៏ដោយ។ សម្រាប់ Dest គាត់បានលេងក្រោមការដឹកនាំរបស់ Erik Ten Hag នៅ Ajax ហើយអាចកសាងអាជីពរបស់គាត់ឡើងវិញក្រោមការដឹកនាំរបស់គ្រូបង្វឹកហូឡង់នៅ Old Trafford ។

ប្រភព៖ Sport

(Khmer) ក្រុមវៀតណាមអាយុក្រោម 20 ឆ្នាំនឹងទទួលសមភាគីមកពីប៉ាឡេស្ទីនជាផ្នែកនៃការរៀបចំរបស់ពួកគេសម្រាប់វគ្គជម្រុះនៃពានរង្វាន់ AFC U20 Asian Cup ឆ្នាំ 2023 នៅខែក្រោយ។

ការ​ប្រកួត​ត្រូវ​បាន​គ្រោង​ធ្វើ​នៅ​ថ្ងៃ​ទី 3 ខែ​កញ្ញា ឆ្នាំ 2022 នៅ​កីឡដ្ឋាន Viet Tri ក្នុង​ទីក្រុង Phu Tho។ ក្រុម​នេះ​កំពុង​ហ្វឹកហាត់​នៅ​មជ្ឈមណ្ឌល​បណ្តុះបណ្តាល J-Green Sakai ក្នុង​ទីក្រុង Osaka ប្រទេស​ជប៉ុន ជា​កន្លែង​ដែល​ពួក​គេ​បាន​ប្រកួត​មិត្តភាព​មួយ​ចំនួនរួច​មក​ហើយ។

មុននោះ ក្រុម U20 វៀតណាមបានចូលរួមប្រកួតក្នុងព្រឹត្តិការណ៍ AFF U19 Championship 2022 នៅទីក្រុង Jakarta ក៏ដូចជានៅ Thanh Nien U19 Youth Championship នៅទីក្រុង Binh Duong ផងដែរ។

សម្រាប់ការប្រកួតវគ្គជម្រុះនៃពានរង្វាន់ AFC U20 Asian Cup ឆ្នាំ 2023 វៀតណាមស្ថិតក្នុងពូល F ទល់នឹងម្ចាស់ផ្ទះឥណ្ឌូនេស៊ី ហុងកុង និងទីម័រខាងកើត ជាមួយនឹងការប្រកួតទាំងអស់ដែលត្រូវប្រកួតនៅកីឡដ្ឋាន Gelora Bung Tomo ក្នុងទីក្រុង Surabaya ។ ការប្រកួតដំបូងរបស់វៀតណាមនឹងធ្វើឡើងនៅថ្ងៃទី 14 ខែកញ្ញា ឆ្នាំ 2022 ទល់នឹងU-20​ហុងកុង។

(Khmer) អាវ​របស់​ក្រុម​ជម្រើស​ជាតិ​ជប៉ុន​ នៅ​តែ​ប្រើ​ពណ៌​ខៀវ​ ជាពណ៌សម្រាប់ឈុតក្នុងទឹកដី (Home)។ ចំណែក​ឈុត​ក្រៅ​ផ្ទះ​វិញ​ (Away) គឺ​ប្រើ​ពណ៌​ស​ខ្មៅ​ យ៉ាងសាមញ្ញ​តែ​មើល​ទៅគួរឲ្យទាក់ភ្នែក​។

ឯកសណ្ឋានបន្តផលិត និងរចនាដោយក្រុមហ៊ុន adidas ដែលជាម៉ាកសម្លៀកបំពាក់កីឡាដ៍ល្បីឈានមុខគេលំដាប់ពិភពលោករបស់ប្រទេសអាល្លឺម៉ង់។ លើក​នេះ​ អ្វីដែលជារឿងប្លែកនោះ គឺ​និមិត្តសញ្ញា​ឡូហ្គោ​នៅ​លើ​ទ្រូងខាងស្តាំតែម្តង។ វាលែងមានពាក្យ Adidas ទៀតហើយ។ ក្រុមហ៊ុន Adidas នឹង​ចេញ​លក់​ជា​ផ្លូវ​ការ​នូវ​ឈុត​នេះ ក្នុងខែនេះ ឬ​ខែ​ក្រោយ។

(Khmer) ខ្សែបម្រើ Paul Pogba ប្រាប់ប៉ូលីសបារាំងថា គាត់ត្រូវបានចាប់ធ្វើជាចំណាប់ខ្មាំងដោយក្រុមប្រដាប់អាវុធ ដែលទាមទារប្រាក់ចំនួន ១១លានផោន ជាផ្នែកនៃគម្រោងការចោទប្រកាន់ដ៏យូរមកហើយ បានរៀបចំដោយបងប្រុស និងមិត្តភក្តិរបស់គាត់។

កីឡាករ Paul Pogba ត្រូវបានគេរាយការណ៍មកថា រូបគេបានប្រាប់អាជ្ញាធរបារាំងអំពីផែនការចោទប្រកាន់នឹងបង្ខូចកេរ្តិ៍ឈ្មោះជាសាធារណៈ ដោយក្រុមមួយដែលបានចាប់គាត់យកទៅអាគារមួយ នៅទីក្រុងប៉ារីសកាលពីខែមីនា ហើយទាមទារប្រាក់ចំនួន ១១លានផោន ខណៈដែលពួកគេបានគំរាមដោយការប្រើប្រាស់កាំភ្លើងជាអំពើហឹង្សា។

កីឡាករវ័យ ២៩ឆ្នាំ ដែលបានឈ្នះពានរង្វាន់ World Cup ជាមួយប្រទេសបារាំងបាននិយាយថា បងប្រុសរបស់គាត់ Mathias Pogba គឺជាអ្នករៀបចំគម្រោង ចង់បានប្រាក់សម្រាប់ «សេវាការពារ» ដែលមានរយៈពេល ១៣ឆ្នាំមកហើយក៏បានតាមគាត់ទៅ Manchester ។

បុរសប្រដាប់អាវុធទាំងពីរនាក់បានប្រាប់ Pogba ថាពួកគេបាន «ការពារគាត់ដោយសម្ងាត់បំផុត» ក្នុងអំឡុងពេលជាងមួយទសវត្សរ៍មកនេះ រួមទាំងអំឡុងពេលនៅ Manchester United ទាំង២លើក។

ប្រភពតុលាការនៅទីក្រុងប៉ារីសបានបញ្ជាក់កាលពីថ្ងៃអាទិត្យថា ការស៊ើបអង្គេតត្រូវបានចាប់ផ្តើមពីបទប៉ុនប៉ងជំរិតទារប្រាក់ ហើយប្រភពជិតស្និទ្ធនឹងករណីនេះបានប្រាប់សារព័ត៌មាន Franceinfo ថា «បងប្រុសច្បង និងមិត្តភក្តិពីកុមារភាព» របស់ Pogba ត្រូវបានគេចោទជាជនសង្ស័យទាំងអស់ក្នុងករណីនេះ។

ដើមហេតុដំបូង វាកើតឡើងបន្ទាប់ពីបងប្រុសរបស់គាត់ Mathias Pogba ដែលបានអានឈ្នោះក្រុមបាល់ទាត់អង់គ្លេស Wrexham, Crewe និង Crawley Town ហើយសន្យាថានឹងបង្ហាញព័ត៌មាន  អំពីប្អូនបង្កើតរបស់គាត់ ដោយបង្ហោះវីដេអូដ៏ចម្លែកមួយ នៅលើប្រព័ន្ធផ្សព្វផ្សាយ Twitter ។

«សាធារណៈជន បារាំង អង់គ្លេស អ៊ីតាលី និងអេស្បាញ – និយាយជាមួយរួមគឺពិភពលោកទាំងមូល – ក៏ដូចជាអ្នកគាំទ្ររបស់ប្អូនប្រុសខ្ញុំ ហើយលើសពីនេះទៅទៀត ដូចជាក្រុមជម្រើសជាតិបារាំង និង Juventus មិត្តរួមក្រុមរបស់ប្អូនប្រុសខ្ញុំ ព្រមទាំងអ្នកឧបត្ថម្ភរបស់គាត់ ប្រហែលជាសមនឹងដឹងរឿងជាក់លាក់មួយអំពីគាត់»

ប៉ុន្តែកាលពីយប់មិញ Mathias បានបដិសេធការអះអាងនេះ នៅក្នុងការផ្ទុះកំហឹងនៅលើ Twitter ។ គាត់បានសរសេរថា៖ « Paul អ្នកពិតជាចង់បិទបាំងរឿងខ្ញុំនេះ ហើយបញ្ជូនខ្ញុំទៅគុក ខ្ញុំធ្លាប់សង្ស័យថាវានឹងក្លាយជាការពិត ឥលូវនេះការពិតរបស់ខ្ញុំកើតឡើងហើយ មិនដូចជាអ្នកឯងទេ»

Pogba បាននិយាយថាក្រុមក្មេងទំនើងចង់បាន ១៣លានអឺរ៉ូ – ស្មើនឹង១១លានផោន ហើយបានគំរាមកំហែងគាត់អស់រយៈពេល ៤ខែមកហើយ។ ការគំរាមកំហែងត្រូវបានធ្វើឡើង តាំងពីនៅទីក្រុង Manchester ក្នុងខែមេសា រហូតដល់បច្ចុប្បន្ន ដែលកីឡាករ Paul Pogba លេងនៅ Juventus។

នៅចុងខែមីនា ក្រុមក្មេងទំនើងនេះ ក៏ត្រូវបានគេនិយាយថាបាននាំ Pogba ទៅអាគារស្នាក់នៅ នៅជាយក្រុងប៉ារីស តំបន់ Lagny-sur-Marne ជាកន្លែងដែល Pogba ធំដឹងក្តី នៅទីនោះ សមាជិកក្រុមក្មេងទំនើងបានចោទប្រកាន់ Pogba ថាមិនបានជួយប្រាក់ផ្ទត់ផ្គង់ពួកគេ ចាប់តាំងពីគាត់បានក្លាយជាកីឡាករអាជីព។

ក្នុងអំឡុងពេលសម្ភាសជាមួយប៉ូលីស Paul Pogba បាននិយាយថាគាត់ជិតស្និទ្ធនឹងមិត្តភក្តិកុមារភាពរបស់គាត់ ហើយបានជួយប្រាក់ផ្ទត់ផ្គង់ពួកគេ តាមតែអាចធ្វើទៅបាន។

Paul Pogba កើត និងធំធាត់នៅតំបន់ Lagny-sur-Marne រួមជាមួយនឹងបងប្អូនពីរនាក់គឺ Mathias និង Florentin ដែលទាំងពីរនាក់នេះ ក៏ជាកីឡាករបាល់ទាត់អាជីពផងដែរ។

ប្រភព៖ Daily Mail
ប្រែសម្រួល៖ B8-sport

(Khmer) យោងតាមគេហទំព័រ 45 Sport បានចេញផ្សាយឲ្យដឹងថា ពានរង្វាន់លីគកំពូលកម្ពុជា ឬខេមបូឌានព្រីមៀរលីគ និងលីគទី២កម្ពុជា គ្រោងនឹងធ្វើការផ្លាស់ប្ដូរការចាប់ផ្ដើម និងការបញ្ចប់រដូវកាលរបស់ខ្លួនឲ្យដូចនៅតំបន់អឺរ៉ុប ដោយលេងឆ្លងឆ្នាំចាប់ពីឆ្នាំក្រោយតទៅ តាមរយៈការអនុវត្តរដូវកាល២០២៣-២០២៤ ។

អំឡុងខែមករា ដល់ខែមិថុនា ពុំមានការប្រកួតលីគឡើយ គេឃើញខែមករា មានចន្លោះពេលសម្រាប់ការប្រកួត ជើងឯកប្រចាំតំបន់អាស៊ីអាគ្នេយ៍ (AFF Mitsubishi Electric Cup 2022) ដែលបន្តពីខែធ្នូ ឆ្នាំ២០២២ (ពាននេះលេងពីថ្ងៃទី២០ ធ្នូ ២០២២ បញ្ចប់នៅថ្ងៃទី២០ ខែមករា ឆ្នាំ២០២៣)។

បន្ទាប់មកនៅខែកុម្ភៈ មានការប្រកួតខេមបូឌានលីគខាប់ ឆ្នាំ២០២៣ (Cambodian League Cup) នៅសប្ដាហ៍ទី៣ នៃខែកុម្ភៈ ដោយមានដល់ទៅ ៦ប្រកួតសម្រាប់វគ្គចែកពូល (អាចបានសេចក្ដីថាលេង ២ជើង) ហើយនឹងបញ្ចប់នៅថ្ងៃទី២៨ ខែមេសា ឆ្នាំ២០២៣។

យ៉ាងណាមិញនៅអំឡុងខែមីនា ថ្ងៃទី០១ ដល់ថ្ងៃទី១៨ គឺមានការប្រកួតជុំផ្ដាច់ព្រ័ត្រពានរង្វាន់ជើងឯកយុវជនអាស៊ីអាយុក្រោម ២០ឆ្នាំ (AFC U-20 Asian Cup 2023) ករណីក្រុម U-20 កម្ពុជាឆ្លងផុតវគ្គជម្រុះ ដែលកំពុងត្រៀមធ្វើការប្រកួតជម្រុះនៅខែក្រោយនេះ។ ហើយបន្ទាប់មកនៅថ្ងៃទី២០ ដល់ថ្ងៃទី២៨ ក៏មានការប្រកួតរបស់ក្រុមជម្រើសជាតិកម្ពុជាឈុតធំ ប្រកួតមិត្តភាពអន្តរជាតិ (FIFA Day) ផងដែរ។

ចូលដល់ខែឧសភា គឺជាខែពិសេសជាងគេ នោះគឺការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះផ្ទាល់ តែកីឡាបាល់ទាត់ចាប់ផ្ដើមមុនគេតាំងពីថ្ងៃទី៣០ ខែមេសា នឹងបញ្ចប់នៅថ្ងៃទី១៦ ខែឧសភា។ ខណៈខែឧសភា នេះក៏មានការប្រកួតជុំផ្ដាច់ព្រ័ត្រពានរង្វាន់ជើងឯកយុវជនអាស៊ីអាយុក្រោម ១៧ឆ្នាំ (AFC U-17 Asian Cup 2023) ករណីក្រុម U-17 កម្ពុជាឆ្លងផុតវគ្គជម្រុះ ដែលត្រូវប្រកួតត្រៀមធ្វើការជម្រុះនៅខែតុលា ឆ្នាំ២០២២ ខាងមុខនេះ។ លើសពីនេះទៅទៀត នៅខែឧសភា ក៏មានព្រឹត្តិការណ៍ពិសេសបន្ថែមទៀត ពោលគឺការប្រកួតបាល់ទាត់ពិភពលោក យុវជនអាយុក្រោម ២០ឆ្នាំ (FIFA U-20 World Cup) ដែលធ្វើនៅឥណ្ឌូនេស៊ី ប្រសិនបើ U-20 ឆ្លងផុតវគ្គជម្រុះហើយ បានឡើងទៅលេងជុំផ្ដាច់ព្រ័ត្រ រួចបានចំណាត់ថ្នាក់ពីលេខ១ ដល់លេខ៤ ទៀតនោះនឹងបានលេងក្នុងព្រឹត្តិការណ៍នេះជាលើកដំបូងក្នុងប្រវត្តិសាស្រ្តបាល់ទាត់កម្ពុជា។

ក្រោយពីព្រឹត្តិការណ៍ទាំងអស់នេះហើយ ទើបនៅខែមិថុនា ឆ្នាំ២០២៣ ទីផ្សាដោះដូរកីឡាករនឹងបើក ដើម្បីក្លិបទាំងអស់នាំចូលកីឡាកររៀងៗខ្លួន យោងតាមក្រដាសខាងក្រោមនេះហើយចំនុចដែលបញ្ជាក់ថាជាថ្ងៃចាប់ផ្ដើមគឺនៅត្រង់ចន្លោះដៃអាវពណ៌ខ្មៅ ត្រង់ចំនុចដែលមានពណ៌ក្រហម និងពណ៌បៃតង នៅជាប់គ្នា គឺបញ្ជាក់ថា ជាថ្ងៃប្រកួតរបស់លីគទី១ (ក្រហម) លីគទី២ (បៃតង)។ ហើយជាបន្តបន្ទាប់មកទៀតទើបបន្តការប្រកួតរហូតដល់ខែកុម្ភៈ ឆ្នាំ២០២៤ លីគទី២កម្ពុជា នឹងបញ្ចប់ ហើយនៅខែមេសា ឆ្នាំ២០២៤ ទើបបញ្ចប់ការប្រកួតខេមបូឌានព្រីមៀរលីគ រដូវកាល២០២៣-២៤ ទាំងស្រុង។

បញ្ជាក់ថា ប្រតិទិនប្រកួតនេះ មិនមានការបញ្ចូលពានរង្វាន់សម្តេចតេជោ ហ៊ុន សែន ជាមួយឡើយ ដោយសារស្ថិតក្រោមរៀបចំរបស់ស្ថាប័នផ្សេង និងម៉្យាងទៀតពុំប៉ះពាល់ឡើយដោយសារពានសម្តេចតេជោ ប្រកួតរៀងរាល់ថ្ងៃអង្គារ ឬថ្ងៃពុធ។

គេកត់សម្គាល់ដោយសារកត្តា២ នៃការដែលនាំមានការផ្លាស់ប្ដូរ៖

ទី១ ឆ្នាំ២០២៣ កម្ពុជា ត្រូវធ្វើម្ចាស់ផ្ទះស៊ីហ្គេម លើកទី៣២ នៅខែឧសភា ហើយជាការត្រៀមខ្លួនឲ្យបានកាន់តែល្អ មានដំណឹងថា ក្រុម U-23 កម្ពុជា នឹងត្រូវប្រមូលផ្ដុំហ្វឹកហាត់រយៈពេលយូរ ទាំងក្នុង និងក្រៅប្រទេស ដើម្បីត្រៀមសម្រាប់ការប្រកួតដែលជាកំណត់ត្រាប្រវត្តិសាស្ត្រ ក្នុងដំណើរឆ្ពោះទៅដណ្ដើមមេដាយមាស។

ទី២ ក្រុមហ៊ុនខេមបូឌានព្រីមៀរលីគ ចង់ធ្វើឲ្យមានលក្ខណៈស្ដង់ដារួម លើទីផ្សារដោះដូរកីឡាករ គឺស្របគ្នាទៅនឹងប្រទេសមួយចំនួន និងជាមួយគ្នាផងដែរពានរង្វាន់ AFC Cup ដែលកម្ពុជា មានសិទ្ធចូលរួមផងដែរនោះ នៅរដូវកាលក្រោយគេនឹងចាប់ផ្ដើមរដូវកាល ២០២៣-២០២៤ ផងដែរ។

នៅអាស៊ីអាគ្នេយ៍ មានប្រទេស ៣ហើយដែលអនុវត្តការរដូវកាលលីគរបស់ខ្លួនបែបនេះ ពោលគឺនៅលីគថៃ, លីគឥណ្ឌូនេស៊ី និងលីគហ្វីលីពីន ខណៈលីគម៉ាឡេស៊ី និងវៀតណាម ក៏មានដំណឹងថាគ្រោងនឹងប្ដូររដូវកាលបែបនេះនៅឆ្នាំក្រោយដូចគ្នាផងដែរ។

អត្ថបទរបស់៖ គេហទំព័រ 45 sport
រូបភាព៖ CPL