(Khmer) ការចំណាយទិញដូរកីឡាកនៅក្នុងខែមករារបស់ Premier League ធ្លាក់ចុះយ៉ាងខ្លាំងបន្ទាប់ពីបំបែកកំណត់ត្រាចំនួនបីជាប់ៗគ្នាខណៈក្រុមទាំងអស់បានចំណាយលុយលុយសរុប៩១១លានដុល្លារតិចជាងការដោះដូររដូវរងារឆ្នាំ២០២៣ ។

ការចំណាយរួមគ្នានៃក្លឹបកំពូលទាំង២០ របស់ Premier League ធ្លាក់ចុះជាង១២៧លានដុល្លារ ដែលជាការចំណាយទាបបំផុតក្នុងខែមករា២០២៤ ដែលមានចំនួន៩១១លានដុល្លារបើធៀបទៅនឹងឆ្នាំ ២០២៣ដែលចំណាយអស់ជាង១ពាន់លានដុល្លារ។ នេះបើយោងតាមក្រុមហ៊ុនសេវាកម្មហិរញ្ញវត្ថុ Deloitte ។

អ្វីដែលគួរអោយកត់សម្គាល់ទៀតនោះ គឺការចំណាយត្រឹមតែ៣៨លានដុល្លារប៉ុណ្ណោះ ។ នៅថ្ងៃផុតកំណត់បិទទ្វារដោះដូរ ធ្លាក់ចុះគួរឱ្យកត់សម្គាល់មួយ បើធៀបទៅនឹងការចំណាយនៅថ្ងៃដូចគ្នាកាលពី ១២ខែមុន ដែលមានចំនួនសរុបរហូតដល់៣៥០លានដុល្លារ។

របាយការដដែលក៏បានអោយដឹងដែរថា មានការផ្ទេរកីឡាករអចិន្ត្រៃយ៍ចំនួន១៧នាក់ ដែលធ្វើឡើងដោយក្លឹបនៅ Premier League ក្នុងអំឡុងពេលទីផ្សារដោះដូរខែមករានេះ ជាមួយនឹងកិច្ចព្រមព្រៀងខ្ចីជើងចំនួន១៣នាក់បន្ថែមទៀត រួមទាំងកិច្ចសន្យាអចិន្ត្រៃយ៍ចំនួន៧ និងកិច្ចសន្យាខ្ចីជើ៦ដែលបានកើតឡើងនៅថ្ងៃផុតកំណត់ ។

ទោះបីជាចំនួនសរុបនៃការដោះដូរខែមករាតិចតួចក៏ដោយ រដូវកាល ២០២៣-២៤ នៅតែមានការចំណាយផ្ទេរខ្ពស់បំផុតទី ២ដែលមិនធ្លាប់មាន ដោយមាន៣,៩ពាន់លានដុល្លារ ត្រូវបានចំណាយ នៅទូទាំងទីផ្សារដោះដូរកីឡាករទាំងពីរ ដែលជំរុញដោយការចំណាយបំបែកកំណត់ត្រារបស់ក្លឹបនៅរដូវក្តៅ។

ដោយឡែកការចំណាយនៅទូទាំងលីគធំៗទាំងប្រាំរបស់អឺរ៉ុប ដូចជា Serie A របស់អ៊ីតាលី, La Liga របស់អេស្ប៉ាញ, Ligue 1 របស់បារាំង និង Bundesliga របស់អាល្លឺម៉ង់ បានកើនឡើងដល់៤៩៤លានដុល្លារ ពីចំនួន២៧៨ លានដុល្លារក្នុងងទីផ្សារខែមករា ឆ្នាំ២០២៣ ៕

(Khmer) ក្រុមហ៊ុនលក់ដេញថ្លៃ Bonhams របស់អង់គ្លេសបានបញ្ជាក់ថា កុងត្រារបស់ Lionel Messi ដែលធ្វើពីក្រដាសជូតមាត់ នៅពេលគាត់មានអាយុ ១៣ឆ្នាំ ចុះហត្ថលេខាលើកិច្ចសន្យាដំបូងជាមួយ Barcelona នឹងត្រូវដាក់លក់ដេញថ្លៃ នៅខែមីនា ក្នុងតម្លៃចាប់ផ្តើម ៣៨១០០០ ដុល្លារ។ នេះបើយោងតាមការចេញផ្សាយរបស់ Reuter។ ក្រដាសដ៏មានតម្លៃនេះនឹងស្ថិតក្នុងការដាក់ឲ្យដេញថ្លៃចាប់ពីថ្ងៃទី ១៨-២៧ ខែកុម្ភៈ ខាងមុខនេះ។

ប្រធានផ្នែកប្រមូលចងក្រងសៀវភៅល្អៗ និងសាស្ត្រាស្លឹករឹតរបស់ក្រុមហ៊ុនដេញថ្លៃ Bonhams លោក Ian Ehling បាននិយាយថា នេះគឺជាវត្ថុដ៏គួរឱ្យរំភើបបំផុតមួយ ដែលខ្ញុំមិនធ្លាប់មានពីមុនមក។ វាពិតប្រាកដជាក្រដាសជូតមាត់ ប៉ុន្តែវាជាក្រដាស់ដ៏ល្បីល្បាញដែលចាប់ផ្តើមអាជីពរបស់ Lionel Messi ។

ក្រដាសនេះ ត្រូវបានចុះហត្ថលេខាក្នុងខែធ្នូ ឆ្នាំ២០០០ រវាងលោក Carles Rexach ដែលពេលនោះជានាយកកីឡារបស់ Barca ជាមួយលោក Jorge Messi ឪពុករបស់ Messi និងភ្នាក់ងារ Horacio Gaggioli ដើម្បីជ្រើសរើសយកយុវជនអាហ្សង់ទីន។

សរសេរដោយទឹកថ្នាំពណ៌ខៀវ កិច្ចព្រមព្រៀងនៅលើក្រដាស់នោះមានខ្លឹមសារថា ទីក្រុងបាសេឡូណា ថ្ងៃទី១៤ ខែធ្នូ ឆ្នាំ២០០០ ដោយមានវត្តមានលោក Messrs Minguella , Horacio ភ្នាក់ងាររបស់Messi និង លោក Carles Rexach ប្រធានផ្នែកកីឡាក្លឹប FC Barcelona យល់ព្រមទំនួលខុសត្រូវ ដោយមិនគិតពីមតិប្រឆាំងណាមួយឡើយ។ ដើម្បី​ចុះ​ហត្ថលេខា​លើ​កីឡាករ Lionel Messi យើង​រក្សា​តាម​ចំនួន ​ដែល​បាន​ព្រមព្រៀង​គ្នា។

រយៈពេលត្រឹមតែ១ខែ បន្ទាប់ពីបានចូលរួមជាមួយក្លឹបBarcelona  ខ្សែប្រយុទ្ធ Messi ក្លាយជាអ្នកស៊ុតបញ្ចូលទីបំបែកកំណត់ត្រារបស់ក្លឹប។ គាត់បានបង្ហាញខ្លួនជាលើកដំបូងនៅអាយុ១៦ ឆ្នាំ និងស៊ុតបញ្ចូលទីបាន ៦៧៤ គ្រាប់ក្នុង៧៨២ ប្រកួតសម្រាប់ក្លឹបអ្នកមានបុណ្យ។ កីឡាករវ័យ ៣៦ ឆ្នាំបាន​ជួយBarcelona ឈ្នះ​ពានសរុប៣៥ ដែលក្នុងនោះរួមបញ្ចូលទាំងពាន La Liga ១០ ដង និង Champions League ៤ ដង​នៅ Barcelona មុន​ពេល​ចាកចេញ​ទៅ Paris St-Germain ក្នុង​ឆ្នាំ ២០២១។

បច្ចុប្បន្នកីឡាករមុខស្លូតរូបនេះកំពុងលេងអោយក្លឹបបាល់ទាត់អាមេរិកInter Miami និងបានជួយអោយក្លឹបនេះឈ្នះពានLeague Cup ២០២៣ ជាលើកដំបូង៕

(Khmer) Marcus Rashford កីឡាករដែលកំពុងមានរឿងអាស្រូវនាំស្រីចូលក្លឹប និងមិនទៅចូលរួមប្រកួតជាមួយក្លឹប Man Utd ក្រោមហេតុផលថា ឈឺជាប់ចំណាត់ថ្នាក់កំពូលតារាង ជាកីឡាករដែលប្រើប្រាស់រថយន្ត Rolls-Royce Cullinan Blue Shadow ថ្លៃបំផុតនៅ Premier League។ នេះបើយោងតាមការសិក្សាថ្មីមួយដែលត្រូវបាន Daily Mail ដកស្រង់យកមកចុះផ្សាយកាលពីថ្ងៃអង្គារទី៣០ ខែមករា ២០២៤ ។

ខ្សែប្រយុទ្ធរបស់ Man United ត្រូវបានគេចាត់ថ្នាក់កំពូលតារាងក្នុងចំណោមតារាបាល់ទាត់ ដែលប្រើរថយន្តថ្លៃបំផុតទាំង២០ ដែលពួកគេបានទិញក្នុងឆ្នាំ២០២៣ ។

Rashford ដែលទទួលបានប្រាក់ឈ្នួលជិត៤០ម៉ឺន ក្នុងមួយសប្តាហ៍បានចំណាយប្រាក់ជាង៧៦ម៉ឺនដុល្លារកាលពីខែសីហាសម្រាប់រថយន្ត Rolls Royce ទី៣ ម៉ូដែល Cullinan Blue Shadow ថ្មី ដែលត្រូវបានប្តូរពណ៌ទៅជា Stardust Blue ដើម្បីបទបែនទៅតាមបរិយាកាសស្រទាប់ផែនដីខាងក្រៅ។វាជារថយន្តមួយក្នុងចំណោមរថយន្ត៦២គ្រឿង ដែលផលិតដោយអ្នកសាងសង់បេតិកភណ្ឌជនជាតិអង់គ្លេស ។គិតមកដល់ពេលនេះតម្លៃរថយន្តសរុបរបស់Rashford គឺជិត ៤ លានដុល្លារ។

យោងតាមក្រុមហ៊ុនទីផ្សាររថយន្ត Motoring AutoTrader  ដែលបានវិភាគទិន្នន័យ បានដាក់តម្លៃជាមធ្យមនៃម៉ូដែលរថយន្តRolls Royce Cullinan ដែលបានប្រើរួចហើយក្នុងតម្លៃជាង ៤១ម៉ឺនដុល្លារ ថ្លៃជាងរថយន្តរបស់ Gabriel Martinelli មកពីក្លឹបកាំភ្លើងធំArsenal  ១២ម៉ឺនដុល្លារ។ រថយន្ត Lamborghini Urus របស់​ខ្សែ​បម្រើ​ស្លាប Arsenal ដែល​ជា​រថយន្ត​​កម្មសិទ្ធិ​របស់​អ្នក​ប្រមូល​ទិញ Rashford ផងដែរ​គឺ​មាន​តម្លៃ​ជា​មធ្យមជាង២៧ម៉ឺនដុល្លារ។

Jack Grealish ដែលជាមិត្តរួមក្រុមជម្រើសជាតិអង់គ្លេសរបស់Rashford ក៏បើកឡានម៉ាកនេះដែរ ប៉ុន្តែម៉ូដែលរបស់គាត់មានតម្លៃជាមធ្យមជាង២៦ម៉ឺនដុល្លារ ដែលធ្វើអោយគាត់ឈរលំដាប់ទី៣ ក្នុងតារាង។

អ្វីដែលគួរអោយភ្ញាក់ផ្អើលនោះកីឡាករបាល់ទាត់ដែលរកចំណូលបានជាង១លានដុល្លារក្នុង១សប្តាហ៍ ច្រើនជាងគេបំផុតនៅ Premier League គឺ Erling Haaland ឈរនៅចំណាត់ទី ៨ក្នុងតារាងដោយលោកជិះរថយន្តម៉ូដែលAudi RS6 Avant តម្លៃត្រឹមតែជាង១០ ម៉ឺនដុល្លារ៕

(Khmer) ថ្លែងទៅកាន់ Sportskeeda លោក Paul Merson បាននិយាយថា៖ “Manchester United កំពុងតែនាំមុខក្នុងលទ្ធផល 2-0 ប៉ុន្តែត្រូវបានក្រុម Newport County តាមស្មើក្នុងលទ្ធផល 2-2 នៅដើមវគ្គទី២ក្នុងការប្រកួត FA Cup»។

«ពួកគេបានឈ្នះការប្រកួតនេះពិតមែន ប៉ុន្តែការពិតដែលថា ពួកគេបានបញ្ចេញក្រុមដែលពោរពេញដោយកម្លាំង និងថាមពលលេងជាមួយក្រុមតូចមួយ ហើយស្ថិតក្នុងការភ័យខ្លាចបែបនេះ។ វាគឺជាឧទាហរណ៍ដ៏គួរឱ្យភ្ញាក់ផ្អើលដែលពួកគេមិនស្ថិតក្នុងតំបន់ Top 4»។

«ប្រសិនបើ Wolves ឈ្នះការ​ប្រកួតនេះ ពួកគេនឹងឡើងពីលើ Man United ក្នុងតារាងលីគ។ ដោយសារវាជា Man United អ្វីគ្រប់យ៉ាងនឹងត្រូវបានលើកតម្កើង ប៉ុន្តែខ្ញុំមានអារម្មណ៍ចំពោះ Erik ten Hag ជាពិសេសបស្ថានភាពជាមួយ Marcus Rashford បានជះឥទ្ធិពលមកលើក្រុម»។

«ខ្ញុំ​គិត​ថា Wolves នឹង​ឈ្នះ​ការប្រកួតមួយ​នេះ ហើយ​បញ្ចប់​ក្តី​សង្ឃឹម​របស់ Man United ក្នុង​ការ​បញ្ចប់​ចំណាត់​ថ្នាក់​កំពូល​ទាំង​បួន​ម្តង និង​អ្វីៗគ្រប់យ៉ាង»។

ការទស្សន៍ទាយរបស់ Merson៖ Wolves 2-1 Man United

បញ្ជីបញ្ហារបស់ Man United បានកើនឡើងកាលពីសប្តាហ៍មុន ដោយ Rashford រាយការណ៍ថាឈឺក្នុងការហ្វឹកហាត់ដើម្បីទៅជប់​លៀង​​​នៅ Belfast ប៉ុន្មានម៉ោងក្រោយមក។

កីឡាករវ័យ 26 ឆ្នាំរូបនេះបានត្រលប់មកហ្វឹកហាត់វិញហើយ បន្ទាប់ពីជួបជាមួយ Ten Hag ប៉ុន្តែនេះពិតជាមិនអាចជួយអ្នកចាត់ការឱ្យបិសាចក្រហមឱ្យមានទំនុកចិត្តវិលត្រលប់មកវិញនោះទេ។

(Khmer) ស្ថាប័នគ្រប់គ្រងបាល់ទាត់អង់គ្លេសរួមមាន FA, Premier League, EFL និង PGMOL បាននិយាយនៅក្នុងសេចក្តីថ្លែងការណ៍រួមមួយថា យើងមានការព្រួយបារម្ភយ៉ាងខ្លាំង អំពីឧប្បត្តិហេតុនៃអំពើហិង្សា ការរើសអើង និងការលុកលុយចូលទីលានប្រកូត។ នេះបើយោងតាមការចេញផ្សាយរបស់សារព័ត៌មានReuter ។

សេចក្តីថ្លែងការណ៍រួមបាននិយាយថា សកម្មភាពនៃការរើសអើង អំពើហិង្សា និងការចូលទៅក្នុងទីលានប្រកួត គឺជាបទល្មើសព្រហ្មទណ្ឌទាំងអស់ ហើយអ្នកដែលប្រព្រឹត្តិត្រូវទទួលទោសព្រហ្មទណ្ឌ បទបញ្ជាហាមឃាត់បាល់ទាត់ និងការហាមមិនអោយចូលទស្សនាក្នុងពហុកីឡដ្ឋានពេញមួយជីវិត។ទោះបីជាយើងយល់ថាអាកប្បកិរិយានេះត្រូវបានប្រព្រឹត្តិដោយជនមួយចំនួនតូចក៏ដោយ យើងចង់រំលឹកអ្នកគ្រប់គ្នាថាសកម្មភាពទាំងនេះនឹងមិនត្រូវបានអត់ឱនឱ្យទេ។

សេចក្តីថ្លែងការណ៍​មិន​បាន​លើក​ឡើង​ពី​វិធានការ ឬ​ការ​ដាក់​ទណ្ឌកម្ម​ថ្មី​ណា​មួយ​ដើម្បី​ការពារ​អាកប្បកិរិយា​បែប​នេះ​ទេ។ សេចក្តីថ្លែងការណ៍រួមក៏ត្រូវបានចុះហត្ថលេខាដោយសមាគមអ្នកគាំទ្របាល់ទាត់ (FSA) ដែលជាស្ថាប័នតំណាងសម្រាប់អ្នកគាំទ្របាល់ទាត់ និងអង្គភាពប៉ូលីសបាល់ទាត់ចក្រភពអង់គ្លេស (UKFPU) ។ ពួកគេ​បាន​បន្ថែម​ថា​​យើង​នឹង​ធ្វើ​ការ​ជា​សមូហភាព​ជាមួយ​ប៉ូលិស​ដើម្បី​នាំ​ជន​ល្មើស​មក​កាត់​ទោស​ និង​កម្ចាត់​វា​ចេញ​ពី​ល្បែង​របស់​យើង។

សូមរំឭកថា ការព្រួយបារម្ភនេះបានកើតឡើង បន្ទាប់ពីការប្រកួតពានរង្វាន់ FA Cup កាលពីថ្ងៃអាទិត្យ រវាងក្រុម Wolves និងក្រុម West Brom ត្រូវបានរំខានដោយការប៉ះទង្គិចគ្នាដែលពាក់ព័ន្ធនឹងអ្នកគាំទ្ររបស់ភាគីទាំងពីរដែលបានធ្វើឱ្យមនុស្សជាច្រើនរងរបួស។

កាល​ពី​ថ្ងៃ​សៅរ៍សប្តាហ៍មុន អ្នក​ទស្សនា​ម្នាក់​បាន​លុកលុយ​ទីលាន​នៅ Vale Park ហើយ​បាន​ដេញ​អាជ្ញាកណ្តាល​ចេញ​ពី​ទីលាន​ក្នុង​អំឡុង​ពេល​ការ​ប្រកួត​នៅ League One រវាង Port Vale និង Portsmouth។

កាលពីដើមខែនេះ Mike Maignan អ្នកចាំទីរបស់ក្លឹប Milan បានប្រឈមមុខនឹងការរើសអើងជាតិសាសន៍ពីអ្នកគាំទ្រក្លឹបUdinese ដែលធ្វើឲ្យមានការថ្កោលទោសពីប្រធាន FIFA លោក Gianni Infantino និងអ្នកផ្សេងទៀត។

កាលពីខែធ្នូ ខ្សែប្រយុទ្ធ Carlton Morris របស់ Luton បានរាយការណ៍ពីការអត្ថាធិប្បាយរើសអើងជាតិសាសន៍ពីហ្វូងមនុស្សអំឡុងពេលការប្រកួត Premier League របស់ពួកគេនៅ Sheffield United ដែលជំរុញឱ្យមានការស៊ើបអង្កេតរបស់ប៉ូលីស។

(Khmer) ប៉ូលីសថៃបានព្រមានអ្នកគាំទ្រ Liverpool កុំឱ្យចាញ់បោកមនុស្សក្លែងបន្លំធ្វើជាលោក Xabi Alonso គ្រូបង្វឹកក្លឹប Leverkusen ដែលកំពុងបោកប្រាស់តាមអ៊ីនធឺណិត ស្របពេលដែលសារព័ត៌មានជាច្រើនបានផ្សាយថា លោកអាចនឹងមកជំនួស Jurgen Klopp នៅ Anfield នៅរដូវក្តៅ។នេះបើយោងតាមការចេញផ្សាយរបស់AFP ។

ការិយាល័យស៊ើបអង្កេតកណ្តាលរបស់ប្រទេសថៃបានប្រាប់អ្នកគាំទ្រឱ្យប្រុងប្រយ័ត្នចំពោះសារមេរោគដែលបង្ហាញនៅលើគណនី Instagram របស់ជគ្រូបង្វឹកសញ្ជាតិអេស្ប៉ាញដែលស្នើសុំការបរិច្ចាគចំនួន 300 បាតស្មើនឹង៨,៥ ដុល្លារអាមេរិកដើម្បីជួយបង់ថ្លៃសំបុត្រយន្តហោះរបស់គាត់។

សារដែលសរសេរជាភាសាថៃនៅលើ Instagram មានខ្លឹមសារថា ខ្ញុំជា Xabi Alonso ខ្ញុំនឹងទៅដឹកនាំ Liverpool នៅរដូវកាលក្រោយ ប៉ុន្តែខ្ញុំខ្វះលុយសម្រាប់ជើងហោះហើររបស់ខ្ញុំទៅ Liverpool។

ប៉ូលិសបានប្រាប់អ្នកគាំទ្រ Liverpool អោយរក្សាភាពស្ងប់ស្ងាត់។ Xabi មិន​ទាន់​ជា​អ្នក​គ្រប់​គ្រងក្លឹបLiverpool ​នៅ​ឡើយ​ទេ ប៉ុន្តែ​មាន​អ្នក​បោក​ប្រាស់​រួច​ហើយ។ ប៉ូលីសបានបន្ថែមថាសារដែលអ្នកជំនាញមើលទៅហាក់ដូចជាបានមកពីគណនី Instagram ផ្លូវការរបស់ Alonso គឺជា អ្នកបោកប្រាស់ដែលធ្វើពុតជា Xabi។

គួររំឭកថាបាល់ទាត់ Premier League មានប្រជាប្រិយភាពខ្លាំងនៅក្នុងប្រទេសថៃ ហើយ Liverpool ស្ថិតក្នុងចំណោមក្រុមដែលទទួលបានការគាំទ្រល្អបំផុត ដោយមានអាវក្រហម និងសម្ភារៈរបស់ក្លឹបផ្សេងៗទៀតត្រូវបានគេយកទៅតុបតែងតាំងពីមនុស្សរហូតដល់រថយន្តតាក់ស៊ី និងហាង៕

(Khmer) ក្របខ័ណ្ឌបាល់ទាត់កំពូលអង់គ្លេសPremier League ត្រូវបានផ្តល់ភ្លើងខៀវឲ្យលោកអាជ្ញាកណ្តាលមានសិទ្ធិពន្យល់ពីការសម្រេចចិត្តរបស់ខ្លួនដែលបានមកពីវីដេអូជំនួយការអាជ្ញាកណ្តាល(VAR) ដល់អ្នកគាំទ្រក្នុងអំឡុងពេលប្រកួតនៅរដូវកាលក្រោយ។ នេះគឺជាការផ្លាស់ប្តូរដ៏សំខាន់មួយថ្មីទៀត ដែលធ្វើអោយវិស័យបាល់ទាត់កាន់តែមានភាពសុក្រិត។ នេះបើយោងតាមការចេញផ្សាយរបស់សារព័ត៌មានDaily Mail។

ប្រភពដដែលបានឲ្យដឹងថាអ្នកបង្កើតច្បាប់បាល់ទាត់របស់ក្រុមប្រឹក្សាសមាគមបាល់ទាត់អន្តរជាតិ(IFAB) បានផ្តល់សិទ្ធិដល់អាជ្ញាកណ្តាលក្នុងការពន្យល់ដល់អ្នកគាំទ្រនៅក្នុងពេលប្រកួត។ ការសម្រេចនេះបានធ្វើឡើងបន្ទាប់ពីការសាកល្បងដោយជោគជ័យក្នុងការប្រកួតក្លឹបបាល់ទាត់នៅម៉ិកស៊ិក និងការប្រកួតពានរង្វាន់ព័រទុយហ្គាល់ League Cup នៅក្នុងខែនេះ។ ការបញ្ជាក់ទទួលស្គាល់ត្រូវបានគេរំពឹងថានឹងធ្វើឡើងនៅមុនកិច្ចប្រជុំប្រចាំឆ្នាំនៅខែមីនា​ខណៈការសម្រេចចិត្តចុងក្រោយនឹងធ្វើឡើងនៅខែមិថុនា ។

ការអនុម័តរបស់IFAB អោយមានការពន្យល់ពីអាជ្ញាកណ្តាលត្រូវបានធ្វើឡើងបន្ទាប់ពីមានការសាកល្បងរយៈពេល ១២ ខែនៅក្នុងការប្រកួតផ្សេងៗនៅទូទាំងពិភពលោក។

អាជ្ញាកណ្តាលជាច្រើនរួមទាំងលោក Anthony Taylor បានប្រើប្រព័ន្ធនេះជាលើកដំបូងកាលពី១២ខែមុននៅឯការប្រកួត Club World Cup ក្នុងប្រទេសម៉ារ៉ុក មុនពេលការសាកល្បងត្រូវបានពង្រីកដល់ការប្រកួតបាល់ទាត់ពិភពលោកបុរសយុវជនអាយុក្រោម ២០ ឆ្នាំ និងការប្រកួតបាល់ទាត់ពិភពលោកស្ត្រីកាលពីចុងឆ្នាំ២០២៣។

ជាមួយគ្នានេះដែរ Premier League ទំនងជានឹងណែនាំប្រព័ន្ធមួយ ដែលស្រដៀងនឹងអ្វីដែលធ្លាប់ប្រើក្នុងព្រឹត្តិការណ៍ Women’s World Cup កាលពីឆ្នាំមុននៅប្រទេសអូស្ត្រាលី ដែលអាជ្ញាកណ្តាលបានប្រកាស និងពន្យល់ពីការសម្រេចចិត្តរបស់ពួកគេទៅកាន់ក្រុមអ្នកគាំទ្រសតាមរយៈមីក្រូហ្វូន បន្ទាប់ពីមើលការចាក់សារឡើងវិញជាបន្តបន្ទាប់នៅលើអេក្រង់ ដែលបំពាក់នៅចំហៀងទីលានប្រកួត។

មន្ត្រី Premier League ដែលចូលរួមក្នុងការសាកល្បងនឹងពាក់មីក្រូហ្វូនក្នុងអំឡុងពេលប្រកួតដែលភ្ជាប់ទៅឧបករណ៍​បំពងសំឡេងនៅក្នុងកីឡដ្ឋានដើម្បីជូនដំណឹងដល់អ្នកគាំទ្រអំពីការពិនិត្យ VAR ប៉ុន្តែទោះជាយ៉ាងណារបាយការណ៍សន្ទនារវាងអ្នកកាន់កាប់VAR និងអាជ្ញាកណ្តាលក្នុងរយៈពេល៩០នាទី នៅតែអាចរក្សាឯកជនភាពដដែល៕

(Khmer) Paris Saint-Germain ត្រូវបានគេរាយការណ៍ថានឹងធ្វើតេស្តការតាំងចិត្តរបស់ Man United ក្នុងការរក្សា Marcus Rashford នៅរដូវក្តៅនេះ បន្ទាប់ពីកីឡាកររូប​នេះមានបញ្ហាវិន័យមួយរេយៈចុងក្រោយជាមួយក្លិប ។

ម្ចាស់ជើងឯក Ligue 1 PSG មួយនេះបានបរាជ័យ ២​លើក​ហើយ ក្នុងការទាក់ទាញកីឡាករវ័យ 26 ឆ្នាំទៅកាន់ទីក្រុងប៉ារីសកាលពីរដូវក្តៅមុន មុនពេល Rashford ចុះហត្ថលេខាលើកិច្ចព្រមព្រៀងថ្មីជាមួយ Man Utd។

ទោះបីជាខ្សែប្រយុទ្ធត្រូវបានគេនិយាយថាមិនមែនជា “គោលដៅកំពូល” របស់ពួកគេក៏ដោយ ក៏ប្រភពបាននិយាយថា PSG បានលួងលោម និង​ពិនិត្យស្ថានភាពចាកចេញ​របស់​កីឡាកររូប​នេះ​ជាមួយ​នឹង​សំណើ​ថ្មី ដើម្បីចូះកុងត្រានៅចុងបញ្ចប់នៃរដូវកាលនេះ។

PSG ចាត់ទុក​កីឡាករ​អង់គ្លេស​រូបនេះ​ថា​ ជា​អ្នក​ជំនួស​កន្លែង Kylian Mbappe ​ដ៏មាន​សក្តានុពល​ បន្ទាប់​ពីកីឡាករបារាំងរូប​នេះបានជាប់ទាក់ទងជាមួយ Real Madrid ។ ទោះជាយ៉ាងនេះក្តី វាមិនច្បាស់ទេថា តើបិសាចក្រហមនឹងពិចារណាអនុញ្ញាតឱ្យគាត់ ចាកចេញឬក៏យ៉ាងណា។