(Khmer) ក្លិប Chelsea មានការព្រួយបារម្ភថា ការបណ្តេញលោក Mauricio Pochettino ចេញពីតំណែងនៅពេលនេះ វាអាចធ្វើឱ្យពួកគេស្ថិតក្នុងគ្រោះថ្នាក់នៃការបំពានច្បាប់ចំណាយរបស់ Premier League។

នេះហើយគឺជាកត្តាសំខាន់ដែលក្លិបកំពុងពិចារណា បើទោះជាអ្នកគាំទ្រនៅតែជជីកសួរថាតើពេលណាត្រូវផ្លាស់ប្តូរអ្នកចាត់ការថ្មី។គ្រូបង្វឹកអាហ្សង់ទីននៅសល់កុងត្រាប្រហែល ១៨ខែនៅកីឡដ្ឋាន Stamford Bridge ហើយប្រសិនបើបណ្តេញគាត់ចេញនៅពេលនេះ ក្លិប Chelsea ត្រូវសងជំងឺចិត្តជាង១២លានដុល្លារ។

រាល់ការទូទាត់ដែលបានព្រមព្រៀងមុនខែមិថុនា នឹងរាប់បញ្ចូលទៅក្នុងច្បាប់ស្តីពីប្រាក់ចំណេញ និងនិរន្តរភាព (PSR) របស់ Premier League នៅរដូវកាលនេះ ដែល Chelsea កំពុងប្រយុទ្ធរួចហើយដើម្បីជៀសវាងការបំពានច្បាប់ បន្ទាប់ពីចំណាយប្រាក់ជាង ១,២ពាន់​លានដុល្លារ លើកីឡាករថ្មីចាប់តាំងពីការចូលមកកាន់កាប់របស់ម្ចាស់ថ្មីគឺលោក Todd Boehly និង Clearlake ។

អ្នកជំនាញផ្នែកហិរញ្ញវត្ថុឯករាជ្យបានប៉ាន់ប្រមាណថា Chelsea ត្រូវការប្រមូលប្រាក់រាប់សិបលានពីការលក់កីឡាករនៅចុងខែមិថុនា ដើម្បីជៀសវាងការចោទប្រកាន់ពីបទបំពានដែនកំណត់នៃការចំណាយ ដែលជាបញ្ហាកាន់តែធ្ងន់ធ្ងរឡើង បន្ទាប់ពីការប៉ុនប៉ងបរាជ័យរបស់ពួកគេក្នុងការលក់កីឡាករក្នុងស្រុកដូចជា Armando Broja កាលពីខែមករា។

បច្ចុប្បន្នក្លិបត្រូវបានអនុញ្ញាតឱ្យខាតបង់អតិបរមា ១៣១ លានដុល្លារក្នុងរយៈពេល ៣ ឆ្នាំ ទោះបីជាមានការលើកលែងមួយចំនួនដូចជាការចំណាយលើហេដ្ឋារចនាសម្ព័ន្ធ បាល់ទាត់នារី និងការវិនិយោគលើយុវជនក៏ដោយ។

កញ្ចប់សំណងបន្ទាប់ពីបណ្តេញលោក Pochettino ចេញពីតំណែងវាមិនមែនជារឿងតូចតាចនោះទេ ខណៈដែលលោកក៏មានបុគ្គលិកដ៏ច្រើនទៀត ដែលបានមកដល់កាលពីរដូវក្តៅមានដូចជាៈ Jesus Perez, Miguel d’Agostino, Toni Jimenez និងកូនប្រុសរបស់គាត់ Sebastiano Pochettino ។

ម្ចាស់ក្លិបថ្មីរបស់ Chelsea បានចំណាយប្រាក់យ៉ាងច្រើនលើការបណ្តេញអ្នកចាត់ការទូទៅ ចាប់តាំងពីទិញក្លឹិបពីមហាសេដ្ឋីរុស្ស៊ីលោក Roman Abramovich ក្នុងខែឧសភា ឆ្នាំ ២០២២ គឺចំណាយទៅលើលោក Thomas Tuchel ជាង១២លានដុល្លារ ត្រឹមរយៈពេល៤ខែក្រោយមកដេញលោក Graham Potter សងសំណងអស់ជាង១៦លានដុល្លារ៕

(Khmer) ខ្សែការពារ Micky Van De Ven របស់មាន់ខ្នាយមាស Tottenham បានក្លាយជាកីឡាករដែលមានល្បឿនលឿនបំផុតនៅក្នុងក្របខ័ណ្ឌអង់គ្លេស Premier League រដូវកាលនេះ។នេះបើយោងតាមទិន្នន័យរបស់Sky Sport ដែលត្រូវបានសារព័ត៌មានDaily Mail ។

យោងតាមទិន្នន័យថ្មីចេញផ្សាយដោយ Sky Sports បានអោយដឹងថា កីឡាករវ័យ ២២ ឆ្នាំរូបនេះត្រូវបានគេកំណត់ថាជាអ្នករត់លឿនបំផុតនៅក្នុងលីកកំពូលអង់គ្លេសដែលមានល្បឿន ៣៧,៣៨ គីឡូម៉ែត្រក្នុងមួយម៉ោង។

ខ្សែការពារសញ្ជាតិហូឡង់បានចូលរួមជាមួយក្រុម Tottenham ពីក្លឹប Wolfsburg ក្នុងតម្លៃជាង៥៣លានដុល្លារកាលពីរដូវក្តៅ ។គាត់មិនសូវបានចូលទីលានប្រកួតទេដោយសារតែរបួសប៉ុន្តែគាត់បានវិលត្រឡប់មកវិញកាលពីខែមករានៅពេលTottenhamប៉ះជាមួយMan Utd។

ចំណែកឯខ្សែបម្រើស្លាបChiedozie Ogbene របស់ក្លឹប Luton ជាប់ចំណាត់ថ្នាក់ទី២ ក្នុងល្បឿន ៣៦,៩៣គីឡូម៉ែត្រក្នុងមួយម៉ោង។

ភាពរហ័សរហួនរបស់ Ogbene ត្រូវបានបង្ហាញនៅពេលដែលគាត់បានព្យាយាមរារាំង Dan Burn អំឡុងពេលប្រកួត ស្មើ ៤-៤ជាមួយ Newcastle កាលពីថ្ងៃសៅរ៍។

ជាមួយគ្នានេះដែរកីឡាករខ្សែប្រយុទ្ធ Pedro Neto របស់ក្លឹបWolves  ឈរលំដាប់ទី៣ តាមពីក្រោយ Ogbene ដែលមានល្បឿនអតិបរមា៣៦,៨៦ គីឡូម៉ែត្រក្នុងមួយម៉ោង។

ក្រៅពីនេះនៅមានកីឡាករដែលមានល្បឿនលឿន៤រូបទៀតរួមមាន៖ ខ្សែបម្រើ Dominik Szoboszlai (Liverpool) ៣៦,៧៦គីឡូម៉ែត្រក្នុងមួយម៉ោង ខ្សែការពារDara Oshea (Burnley ) ៣៦,៧៣ ខ្សែបម្រើ Anthony Gordon (Everton ) ៣៦,៦៨ និង ខ្សែបម្រើ Amado Onana (Everton )៣៦,៦៥ ៕

(Khmer) អ្នករៀបចំកម្មវិធីប្រកួតបាល់ទាត់អន្តរជាតិ FIFA បានប្រកាសកាលពីថ្ងៃអាទិត្យទី ៤ កុម្ភៈ ថា ការប្រកួតវគ្គផ្តាច់ព្រ័ត្រ World Cup ឆ្នាំ​២០២៦ នឹងធ្វើឡើងនៅកីឡដ្ឋាន MetLife ក្នុងទីក្រុង New York/New Jersey​សហរដ្ឋអាមេរិក។

ការប្រកាសនេះគឺធ្វើឡើងផ្ទុយទៅនឹងគម្រោងលើកមុន ដែលថាវគ្គផ្តាច់ព្រ័ត្រនឹងរៀបចំនៅក្នុងពហុកីឡដ្ឋានAT&T  ក្នុងរដ្ឋតិចសាស់ ។នេះបើយោងតាមការចេញផ្សាយរបស់AFPកាលពីថ្ងៃចន្ទទី ៥ កុម្ភៈ២០២៤។

ការដេញថ្លៃរបស់ទីក្រុងញូវយ៉កបានយកឈ្នះគូប្រជែងដ៏ខ្លាំងក្លាពីទីក្រុង Dallas ដើម្បីធានាបាននូវការប្រកួតផ្តាច់ព្រ័ត្រនៅថ្ងៃទី ១៩ខែកក្កដា ដែលជាការប្រកួតលើកដំបូងមានចំនួន៤៨ប្រទេស ដែលត្រូវបានរៀបចំឡើងដោយសហម្ចាស់ផ្ទះចំនួន៣គឺសហរដ្ឋអាមេរិក កាណាដា និងម៉ិកស៊ិក។

ការប្រកួតបើកឆាកនឹងធ្វើឡើងនៅកីឡដ្ឋាន Azteca ដ៏ល្បីល្បាញរបស់ម៉ិកស៊ិក នៅថ្ងៃទី ១១ខែមិថុនា។

លោក Gianni Infantino ប្រធាន FIFA បាននិយាយថា៖« ការប្រកួត FIFA World Cup ដែលពង្រើកដល់៤៨ក្រុម និងមានឥទ្ធិពលបំផុតដែលមិនធ្លាប់មានពីមុនមក មិនមែនជាសុបិនទៀតទេ ប៉ុន្តែការពិតដែលនឹងកើតឡើងក្នុងទម្រង់នៃការប្រកួតចំនួន១០៤នៅក្នុងកីឡដ្ឋានទំនើបបំផុតចំនួន ១៦នៅទូទាំងប្រទេសកាណាដា ម៉ិកស៊ិក និងសហរដ្ឋអាមេរិក »។

លោកបន្តថា៖« ចាប់ពីការប្រកួតបើកឆាកនៅពហុកីឡដ្ឋាន Estadio Azteca ដល់ការប្រកួតវគ្គផ្តាច់ព្រ័ត្រដ៏អស្ចារ្យនៅទីក្រុង New York New Jersey ទាំងកីឡាករ និងអ្នកគាំទ្រគឺជាស្នូលនៃផែនការដ៏ទូលំទូលាយរបស់យើងសម្រាប់ការប្រកួតផ្លាស់ប្តូទីតាំងដល់៣ប្រទេស ។វាមិនត្រឹមតែបង្កើតកំណត់ត្រាថ្មីប៉ុណ្ណោះទេ ប៉ុន្តែថែមទាំង បន្សល់ទុកនូវមរតកដែលមិនអាចលុបចោលបាន»។

Atlanta និង Dallas នឹងធ្វើជាម្ចាស់ផ្ទះក្នុងវគ្គពាក់កណ្តាលផ្តាច់ព្រ័ត្រ ខណៈដែលការប្រកួតចំណាត់ថ្នាក់លេខ ៣ នឹងត្រូវលេងនៅទីក្រុង Miami ។ ការប្រកួតវគ្គ ៨ ផ្តាច់ព្រ័ត្រនឹងប្រព្រឹត្តទៅនៅទីក្រុង Los Angeles, Kansas City, Miami និង Boston។

ទីក្រុងសរុបចំនួន១៦ នៅទូទាំងប្រទេសទាំងបីនឹងធ្វើជាម្ចាស់ផ្ទះការប្រកួតជាមួយនឹងការប្រកួតជាច្រើនដែលត្រូវបានធ្វើឡើងនៅសហរដ្ឋអាមេរិក។

ការប្រកួតបាល់ទាត់ពិភពលោកឆ្នាំ ១៩៩៤ ក៏ត្រូវបានប្រារព្ធឡើងនៅសហរដ្ឋអាមេរិកផងដែរ ហើយវគ្គផ្តាច់ព្រ័ត្របានធ្វើឡើងនៅ Rose Bowl ក្នុងទីក្រុង Pasadena ជិតទីក្រុង Los Angeles ។

កីឡដ្ឋាន MetLife ដែលមានកៅអី៨២៥០០ឆ្លងកាត់ទន្លេ Hudson ពីទីក្រុង New York តំបន់ East Rutherford រដ្ឋ New Jersey គឺជាពហុកីឡដ្ឋានរបស់បាល់បោះអាមេរិក NFL’s New York Giants និង New York Jets ប៉ុន្តែបានរៀបចំការប្រកួតបាល់ទាត់អន្តរជាតិជាច្រើន រួមទាំងការប្រកួតវគ្គផ្តាច់ព្រ័ត្រពានរង្វាន់ Copa America ២០១៦ ផងដែរ ។

(Khmer) កៅអីគ្រូបង្វឹករបស់លោក Mauricio Pochettino កំពុងស្ថិតក្រោមសម្ពាធកាន់តែខ្លាំង បន្ទាប់ពីដឹកនាំក្លិប Chelsea ចាញ់ Wolves ដោយលទ្ធផល 4-2 កាលពីថ្ងៃអាទិត្យ។

បរាជ័យយ៉ាងអាម៉ាស់ក្នុងទឹកដីបែបនេះធ្វើភរិយារបស់កីឡាករ Thiago Silva អំពាវនាវឱ្យម្ចាស់ក្លិបបណ្តេញបុរសសញ្ជាតិអាហ្សង់ទីនចេញពីតំណែង។ នេះបើយោងតាមការចេញផ្សាយរបស់កាសែតអង់គ្លេស The Sun កាលពីថ្ងៃចន្ទទី ៥ កុម្ភៈ ២០២៤។

ក្នុងអំឡុងប្រកួតតង់ទី ២ ភរិយា​របស់ Silva Belle បាន​បង្ហោះ​លើ​បណ្តាញ​សង្គម​ ​​ថា៖ «វា​ដល់​ពេល​ត្រូវ​ផ្លាស់​ប្តូរ​ហើយ។ បើ​អ្នក​រង់ចាំ​យូរ​ទៀត វា​នឹង​យឺត​ពេល​ហើយ»។

ក្រោយពីបង្ហោះបានរយៈពេលតិចជាងកន្លះម៉ោង មានអ្នកចូលមើលជិតមួយលាននាក់ ហើយមនុស្សជាច្រើនយល់ស្របនឹងមតិមិនខ្លាចរបស់នាង។ ប្រតិកម្ម​ថ្លែង​គាំទ្រ​មានដូច​ជា “អរគុណ​ដែល​អ្នកតែងតែ​និយាយ​ចេញពីបេះដូងរបស់​អ្នក។ សូម​ប្រាប់​ពួក​គេអោយផ្លាស់ប្តូរ។ ពន្យារ​ពេល​​កាន់​តែយូរ ​វាមិន​អាច​សម្រេច​បានទេ។

ទោះជាយ៉ាងណាក៏ដោយ មានអ្នកខ្លះមិនយល់ស្របនឹងការបង្ហោះរបស់នាងទេ ដោយនិយាយថា៖ «ប្តីរបស់នាងប្រហែលជាមិនសប្បាយចិត្តនឹងការបង្ហោះនេះទេ។ មើលទៅហាក់ដូចជាគ្មានវិជ្ជាជីវៈបន្តិច។ ទោះជាយ៉ាងណាក្តីរហូតមកដល់ពេលនេះគេមិនទាន់ឃើញមានប្រតិកម្មអ្វីពីក្លិប Chelsea ដែរ។

ក្លិប Chelsea ធ្លាក់មកដល់លេខ១១ហើយបន្ទាប់ពីចាញ់ពីប្រកួតចុងក្រោយនេះ៕

(Khmer) ឥឡូវនេះ Rasmus Hojlund ជាកីឡាករវ័យក្មេងបំផុតរបស់ Manchester United ដែលបានស៊ុតបញ្ចូលទីក្នុងការប្រកួត Premier League បួនប្រកួតជាប់ៗគ្នា នេះបើយោងតាម Opta Jose ។

នៅថ្ងៃខួបកំណើតវ័យ 21 ឆ្នាំរបស់ខ្លួន Hojlund បានស៊ុតបញ្ចូលទីគ្រាប់ទី១ក្នុងចំណោម៣គ្រាប់ក្នុងការប្រកួតមួយដែលបិសាចក្រហម Man Utd យកជ័យជម្នះ 3-0 លើក្រុម West Ham United នៅកីឡដ្ឋាន Old Trafford ។

នេះមានន័យថា Rasmus Højlund បានក្លាយជាកីឡាករក្មេងបំផុតដែលអាចរកគ្រាប់បាល់បានក្នុងការបង្ហាញខ្លួននៅ Premier League 4 ដងជាប់ៗគ្នាសម្រាប់ Manchester United ។ សូម្បីតែ Cristiano Ronaldo ដែលជាកីឡាករជើងខ្លាំងបំផុតរបស់ក្លិបកាលពីមុន ក៏បរាជ័យក្នុងការសម្រេចបានបែបនេះដែរ មុនពេលឈានដល់អាយុ 21 ឆ្នាំ។

Hojlund រកបាន 5 គ្រាប់រួចហើយនៅ Champions League សម្រាប់ Man United នៅរដូវកាលនេះ ប៉ុន្តែវាជាការអាម៉ាស់មួយដែល Man Utd មិនបានឡើងទៅវគ្គបន្ត។

គាត់បានចំណាយពេលយូរបន្តិចដែរ ក្នុងការស៊ុតបញ្ចូលទីនៅ Premier League ប៉ុន្តែឥឡូវនេះ Hojlund អាចរកឃើញទម្រង់លេងរបស់ខ្លួនឡើងវិញ ហើយគ្មាននរណាអាចបញ្ឈប់បាននោះទេ។ ក្រៅពីស៊ុតបញ្ចូលទី ខ្សែប្រយុទ្ធរូបនេះក៏បានបញ្ជូនបាល់ (Assist) បាន២ដងផងដែរ ៕

(Khmer) Xavi បានប្រាប់ប្រព័ន្ធផ្សព្វផ្សាយថា ៖«ពួកគេ [Real Madrid] ត្រូវបានអនុគ្រោះដោយអាជ្ញាកណ្តាលរៀងរាល់សប្តាហ៍។ វាគឺជាការពិត» ។

«ខ្ញុំយល់ស្របជាមួយ Cholo [Diego Simeone] នៅទីនេះ។ យើងមិនល្ងង់ទេ យើងឃើញវា មនុស្សខ្វាក់ក៏អាចមើលឃើញ។ វាអាស្រ័យលើអ្នក [សារព័ត៌មាន] រាយការណ៍អំពីវាតែប៉ុណ្ណោះ» ។

(Khmer) ក្រុមជម្រើសជាតិអង់គ្លេស​នឹង​ត្រូវ​ប្រកួត​មិត្តភាពជាមួយ​បូស្នី ក្នុង​កីឡដ្ឋាន St James’ Park នៅ​រដូវក្តៅ​នេះ មុននឹងការប្រកួត​អឺរ៉ូ​ ឆ្នាំ២០២៤។ ប្រសិនបើព័ត៌មានចុងក្រោយត្រូវបានបញ្ជាក់មែននោះ St James’ Park នឹងក្លាយជាកីឡដ្ឋានប្រកួតលើកដំបូងក្នុងរយៈពេល២០ឆ្នាំ។ នេះបើយោងតាមការចេញផ្សាយរបស់ M.allfootballapp.com ។

រយៈពេលជិត ២០ ឆ្នាំចាប់តាំងពីពួកគេបានលេងចុងក្រោយនៅ St James’ Park  នៅពេលដែល Steven Gerrard និង David Beckham បានស៊ុតបញ្ចូលទីក្នុងជ័យជម្នះ ២-០ លើក្រុម Azerbaijan ក្រោមការដឹកនាំដោយលោក Sven-Goran Eriksson។

តារា Newcastle ដូចជា Kieran Trippier, Anthony Gordon, Nick Pope និង Callum Wilson សង្ឃឹមថានឹងក្លាយជាផ្នែកមួយនៃផែនការ និងលក្ខណៈពិសេសរបស់លោក Southgate នៅក្នុងការប្រកួតនៅឯទឹកដីកំណើតរបស់ពួកគេ។

ទោះបីមិនទាន់បានបញ្ជាក់ច្បាស់លាស់ ប៉ុន្តែក្រុមរបស់លោក Gareth Southgate នឹងធ្វើដំណើរទៅកាន់ទីក្រុង Tyneside សម្រាប់ការប្រកួតកម្តៅសាច់ដុំនៅថ្ងៃចន្ទ ទី៣ ខែមិថុនា។

បូស្នីនឹងក្លាយជាក្រុមគូប្រជែង ដែលផ្តល់ឱកាសឱ្យគ្រូបង្វឹក Gareth Southgate សាកល្បងក្រុមរបស់គាត់ជាមួយនឹងក្រុមដែលមានទម្រង់លេងស្រដៀងគ្នានឹងស៊ែប៊ី និងស្លូវេនី ដែលពួកគេត្រូវប្រឈមមុខក្នុងវគ្គចែកពូល Euro ២០២៤ ។ ប្រទេសទាំងបីគឺសុទ្ធតែជាអតីតរដ្ឋយូហ្គោស្លាវី។

ជាមួយគ្នានេះដែរក្រុមជម្រើសជាតិអង់គ្លេសនឹងមានការប្រកួតមិត្តភាពចុងក្រោយនៅពហុកីឡដ្ឋាន Wembleyដែល​ត្រូវ​ប៉ះ​ប្រេស៊ីល និង​បែលហ្សិក នៅ​កីឡដ្ឋាន Wembley ក្នុង​ខែ​មីនា មុនពេលក្រុមធ្វើដំណើរទៅកាន់ប្រទេសអាល្លឺម៉ង់ ប្រកួតបើកឆាកជាមួយនឹងក្រុម ស៊ែប៊ី នៅថ្ងៃទី ១៦ខែមិថុនា៕

(Khmer) សមាគមកីឡាបាល់ទាត់ជប៉ុន(JFA)បាននិយាយកាលពីថ្ងៃព្រហស្បតិ៍ទី១ ខែកុម្ភៈ ថាខ្សែបម្រើស្លាប Junya Ito បានចាកចេញពីការប្រកួតពានរង្វាន់ Asian Cup នៅប្រទេសកាតា បន្ទាប់ពីមានស្ត្រីពីរនាក់បានចោទប្រកាន់គាត់ពីបទរំលោភផ្លូវភេទ។

ប៉ូលិស​ជប៉ុន​បាន​បើក​ការ​ស៊ើបអង្កេត​លើ​កីឡាករ​ វ័យ​៣០​ឆ្នាំ​ដែល​កំពុងលេង​ឱ្យ​ក្លឹបបាល់ទាត់​បារាំង Reims។Ito លេង​បាន​៥៤​ប្រកួត​ឱ្យ​ជប៉ុន​ស៊ុត​បាន​១៣​គ្រាប់។ អ្នកនាំពាក្យប៉ូលីសទីក្រុង Osaka ដែលធ្វើការនៅក្នុងនាយកដ្ឋានឧក្រិដ្ឋកម្មនិងការរំលោភផ្លូវភេទបានប្រាប់ AFP ថា យើងបានទទួលពាក្យបណ្តឹងព្រហ្មទណ្ឌប្រឆាំងនឹងគាត់ហើយបានចាប់ផ្តើមការស៊ើបអង្កេត។

ឧប្បត្តិហេតុដែលត្រូវបានលើកយកមកចោទប្រកាន់នេះបានកើតឡើងតាំងពីខែមិថុនាឆ្នាំមុន នៅសណ្ឋាគារមួយក្នុងទីក្រុង Osaka បន្ទាប់ពីការប្រកួតមិត្តភាពរវាងប្រទេសជប៉ុន និងប្រទេសប៉េរូ។

ទីភ្នាក់ងារព័ត៌មានជប៉ុន ក្យូដូ បានរាយការណ៍ថា លោក Junya Ito បានបដិសេធរាល់ការប្រព្រឹត្តខុស ខណៈមេធាវីរបស់គាត់បាននិយាយថា ការអះអាងនេះ គ្មានមូលដ្ឋានទេ។

យោងតាមមេធាវីដែលមិនបញ្ចេញឈ្មោះបាននិយាយថា ខណៈពេលដែល Ito បានចំណាយពេលជាមួយស្ត្រីពីរនាក់ គណនីរបស់ពួកគេមានភាពមិនស៊ីសង្វាក់គ្នា និងមិនមានភស្តុតាងជាក់ស្តែងដើម្បីគាំទ្រការចោទប្រកាន់របស់ពួកគេនោះទេ។ ទោះជាយ៉ាងណាក្តីលោក​បដិសេធ​មិន​ផ្តល់​ព័ត៌មាន​លម្អិត​បន្ថែម​ទេ រួម​ទាំង​អ្វី​ដែល​មាននៅក្នុងពាក្យ​បណ្តឹង​នោះផង។ គួររំឭកថាក្រុមជម្រើសជាតិជប៉ុនបានឡើងមកដល់វគ្គ៨ក្រុមចុងក្រោយត្រូវប៉ះជាមួយក្រុមជម្រើសជាតិអ៊ីរ៉ង់នៅថ្ងៃសៅរ៍នេះ៕