(Khmer) យោងតាមរបាយការណ៍ចេញផ្សាយដោយស្ថាប័នគ្រប់គ្រងបាល់ទាត់អឺរុប UEFA ដែលត្រូវបានសារព័ត៌មានរ៉យទ័រដកស្រង់យកមកចុះកាលពីថ្ងៃព្រហស្បតិ៍ទី ១៥ កុម្ភៈបានឱ្យដឹងថ ក្រុមបិសាចក្រហម Manchester United គឺជាក្រុមដែលមានតម្លៃថ្លៃបំផុតមិនធ្លាប់មាននៅក្នុងទ្វីបអឺរ៉ុប សម្រាប់រដូវកាល២០២២-២៣។

របាយការណ៍ European Club Finance and Investment Landscape បាននិយាយថាក្លិប United មានតម្លៃជាង១,៥ពាន់លានដុល្លារ លើសពីកំណត់ត្រាឆ្នាំ២០២០ ដែលកាន់កាប់ថដោយក្លិប Real Madrid ដែលមានតម្លៃ ១,៤លានដុល្លារ។

ការគណនានេះរួមទាំងថ្លៃឈ្នួលផ្ទេរកីឡាករជាច្រើនមានដូចជា Antony (១០៦លានដុល្លារ) កីឡាករ  Harry Maguire​ (១០០លានដុល្លារ) ក្នុងឆ្នាំ២០១៩ និងជាង៩១លានចំណាយលើ Jadon Sancho ក្នុងឆ្នាំ២០២១។ តួ​លេខ​នេះ​ក៏​រួម​បញ្ចូល​ប្រាក់​៧៥លាន​ដែល​ចំណាយ​លើ Casemiro របស់ Real Madrid ក្នុង​ឆ្នាំ​២០២២។គូប្រជែង Manchester City របស់ Man Utd ឈរនៅលេខពីរសម ជាមួយនឹងតម្លៃ១,២ពាន់លានដុល្លារ។

របាយការណ៍ខាងលើបានបន្ថែមថាក្លិបចំនួន៤មានប្រាក់ចំណូលខ្ពស់គឺ Real Madrid មាន៩០៣លានដុល្លារ, Manchester City មាន៨៩៨ លានដុល្លារ,Barcelonaមាន៨៧៥ លានដុល្លារ និង Paris St Germain មាន៨៦៧លានដុល្លារ។

ក្របខណ្ឌ Premier League មាន៩ក្រុមដែលស្ថិតក្នុងចំណោមក្រុមទាំង២០ដែលរកចំណូលបានច្រើនជាងគេជាមួយនឹងប្រាក់ចំណូលជាមធ្យម៣៤៧លានដុល្លារ។

ចំណែកឯក្របខណ្ឌ La Liga របស់អេស្ប៉ាញជាប់ចំណាត់ថ្នាក់លេខ ២ជាមួយនឹងប្រាក់ចំណូលចំនួន ៣,៥ ពាន់លានដុល្លារ។ Bundesliga របស់អាល្លឺម៉ង់  ៣,៤ពាន់លានដុល្លារ អ៊ីតាលី Serie A របស់អ៊ីតាលី ២,៦ពាន់លានដុល្លារ និង Ligue 1 របស់បារាំង ២,១ ឈរនៅកំពូលទាំងប្រាំ។

របាយការណ៍បានបន្ថែមថានៅក្នុងឆ្នាំ២០២២ប្រាក់ចំណូលរបស់ក្លឹបលំដាប់កំពូលទាំង ២០ របស់អង់គ្លេសគឺស្ទើរតែខ្ពស់ដូចប្រាក់ចំណូលសរុបរបស់ក្លិបទាំង៦៤២នៅក្នុងប្រទេសចំនួន៥០ដែលមានចំណាត់ថ្នាក់បាតតារាង៕

(Khmer) កីឡាកររបស់ក្រុមជម្រើសជាតិតោកំណាចអង់គ្លេសកំពុងប្រឈមមុខនឹងការធ្វើដំណើរតាមរថយន្តក្រុងរយៈពេល៦ម៉ោង ដើម្បីទៅដល់ទីកន្លែងប្រកួតពានរង្វាន់អឺរ៉ុបរបស់ពួកគេជាមួយនឹងក្រុមជម្រើសជាតិប្រទេសដាណឺម៉ាកនៅរដូវក្តៅនេះ ដោយសារតែច្បាប់និរន្តរភាពរបស់ UEFA ។នេះបើយោងតាមការចេញផ្សាយរបស់Daily Mail ។

UEFA បានប្តេជ្ញាធ្វើឱ្យការប្រកួតពានរង្វាន់យូរ៉ូរដូវក្តៅ នៅប្រទេសអាល្លឺម៉ង់មានបរិស្ថានខៀវបំផុត ដែលមិនធ្លាប់មានជាមួយនឹងគម្រោងចំណាយប្រាក់ជាង ៣១លានដុល្លារលើវិធានការនិរន្តរភាពជាច្រើន ដែលរួមមានការស្នើសុំឱ្យក្រុមជម្រើសជាតិនីមួយៗ ជៀសវាងការធ្វើដំណើរតាមយន្តហោះប្រសិនបើអាចធ្វើទៅបាន។ ការណែនាំរបស់ UEFA ត្រូវបានគេយល់ថា វាសមហេតុផលក្នុងការរំពឹងថាក្រុមជម្រើសជាតិនានានឹងធ្វើដំណើរប្រហែល ៣ម៉ោងតាមផ្លូវគោក ឬផ្លូវដែក ដើម្បីកាត់បន្ថយការបំភាយឧស្ម័ន ទោះបីជាវាមិនត្រូវបានកំណត់ដាច់ខាតក៏ដោយ។

Daily Mail បានរាយការណ៍ថាបន្ទាប់ពីប្រជុំជាមួយលោក Gareth Southgate សមាគមបាល់ទាត់អង់គ្លេស FA បានសម្រេចធ្វើតាមការណែនាំរបស់ UEFA សម្រាប់ការប្រកួតពូល C ទីពីររបស់អង់គ្លេសជាមួយក្រុមដាណឺម៉ាកនៅទីក្រុង Frankfurt ដែលមានចម្ងាយជាង ២៨៩ គីឡូម៉ែត្រ ពីជំរុំហ្វឹកហាត់របស់ពួកគេនៅឯ Golfrestort Weimarer Land ក្បែរទីក្រុងLeipzig ។

ការប្រកួតក្នុងពូលពីរផ្សេងទៀតរបស់អង់គ្លេសនៅ Gelsenkirchen និង Cologne ទល់នឹងក្រុមជម្រើសជាតិ ស៊ែប៊ី និងស្លូវេនី គឺត្រូវប្រើពេលជាង ៤ម៉ោងពីជំរំរបស់ពួកគេតាមផ្លូវថ្នល់ ដូច្នេះការធ្វើដំណើរតាមរថយន្តក្រុងត្រូវបានគេចាត់ទុកថាជាការពិបាក។ ទោះបីជាយ៉ាងណាក៏ដោយ ការធ្វើដំណើរតាមរថយន្តក្រុងរយៈពេល ៣ម៉ោងវានៅតែមិនធម្មតាសម្រាប់កីឡាករលំដាប់អភិជន ដែលភាគច្រើនមានទម្លាប់ក្នុងការហោះហើរក្នុងរយៈពេលប៉ុន្មាននាទីដើម្បីធ្វើដំណើរទៅប្រកួតជាមួយក្លឹបរបស់ពួកគេ។

Arsenal ត្រូវបានរិះគន់យ៉ាងខ្លាំងដោយអ្នកធ្វើយុទ្ធនាការបរិស្ថានចំពោះការហោះហើររយៈពេល ១៤នាទីទៅកាន់ Norwich សម្រាប់ការប្រកួតក្របខ័ណ្ឌ Premier League កាលពីប៉ុន្មានឆ្នាំមុន ខណៈដែលក្លឹបផ្សេងទៀតតែងតែហោះហើរចម្ងាយខ្លីជាឧទាហរណ៍ដូចជាក្លឹបManchester United ធ្វើដំណើរទៅកាន់ Leicester City តាមយន្តហោះ។

ការសម្រេចចិត្តរបស់ FA ក្នុងការធ្វើដំណើរតាមរថយន្តក្រុងនឹងបន្ថែមទៅលើពេលវេលាធ្វើដំណើររបស់កីឡាករ ដោយសារអាកាសយានដ្ឋានដែលនៅជិតសណ្ឋាគារបំផុតរបស់ពួកគេមានចម្ងាយត្រឹមតែ៤៨គីឡូម៉ែត្រនៅតំបន់ Erfurt-Weimar ដែលការហោះហើររយៈពេល ៣១នាទីទៅកាន់ទីក្រុង Frankfurt ។

សមាគមបាល់ទាត់អង់គ្លេស FA និងប្រទេសប្រកួតប្រជែងផ្សេងទៀតមានពេលរហូតដល់ថ្ងៃទី២៤ ខែកុម្ភៈ ដើម្បីដាក់ផែនការធ្វើដំណើររបស់ពួកគេទៅកាន់ UEFA ៕

(Khmer) កិច្ចព្រមព្រៀងទិញភាគហ៊ុនក្លិប Manchester United ២៥% របស់មហាសេដ្ឋីអង់គ្លេសលោក Jim Ratcliffe ត្រូវបានអនុម័តដោយក្របខ័ណ្ឌកំពូលអង់គ្លេស Premier League ។

កិច្ចព្រមព្រៀងដែលមានតម្លៃប្រហែល១,៣ពាន់លានដុល្លារត្រូវរង់ចាំដំណាក់កាលទី២ដើម្បីសុំការយល់ព្រមពីសមាគមបាល់ទាត់អង់គ្លេស​(FA) ដែល លោក Ratcliffe បាននិយាយថាវាអាចនឹងត្រូវបញ្ចប់នៅពាក់កណ្តាលខែកុម្ភៈ ដើម្បីបើកផ្លូវឱ្យគាត់គ្រប់គ្រងប្រតិបត្តិការបាល់ទាត់នៅ Old Trafford ។

ម្ចាស់ក្លិបដែលជាគ្រួសារ Glazer នឹងរក្សាភាគហ៊ុនភាគច្រើននៅក្នុងក្លិប ប៉ុន្តែ ក្រុមហ៊ុន Ineos Group របស់មហាសេដ្ឋីអង់គ្លេស Ratcliffe នឹងគ្រប់គ្រងប្រតិបត្តិការបាល់ទាត់។

នៅក្នុងសេចក្តីថ្លែងការណ៍មួយរបស់លីគបានអោយដឹងថា ឥឡូវនេះPremier League កំពុងរង់ចាំការបញ្ជាក់ពីការបញ្ចប់ប្រតិបត្តិការ ខណៈដែលការបញ្ជាក់ថាលោក Ratcliffe អាយុ៧១ ឆ្នាំជាម្ចាស់ភាគហ៊ុនក៏បានចុះហត្ថលេខា​លើធម្មនុញ្ញរបស់ម្ចាស់ក្លិបផងដែរ។

កិច្ចព្រមព្រៀងរបស់លោក Ratcliffe ត្រូវបានយល់ព្រមនៅថ្ងៃបុណ្យណូអែល និងរួមបញ្ចូលផងដែរនូវទឹកប្រាក់ចំនួន​៣០០លានដុល្លារសម្រាប់ការវិនិយោគនាពេលអនាគតទៅក្នុងកីឡដ្ឋាន Old Trafford ។

អ្នកជំនួញរូបនេះបានយល់ព្រមទិញភាគហ៊ុនកម្រិតB ២៥% ខណៈភាគហ៊ុនភាគច្រើនកាន់កាប់ដោយគ្រួសារ Glazer ដែលជាម្ចាស់ក្លិបស្មើនឹង ៦៩ %  និងមានសិទ្ធិបោះឆ្នោតស្ទើរតែទាំងអស់ហើយ២៥% នៃភាគហ៊ុនកម្រិត A របស់ខ្លួន ត្រូវបានចុះបញ្ជីនៅផ្សារហ៊ុនញូវយ៉កហើយ ភាគហ៊ុនមានតម្លៃ ៣៣ ដុល្លារក្នុងមួយហ៊ុន។

រហូតមកដល់ពេលនេះ៣៦,៧% នៃភាគហ៊ុនកម្រិត A ត្រូវបានដេញថ្លៃរួចហើយលើសពីភាគហ៊ុន២៥ % របស់លោក Ratcliffe បានយល់ព្រមទិញ។

ការគ្រប់គ្រងក្លិបកីឡាមានន័យថា Ineos នឹងគ្រប់គ្រងប្រតិបត្តិការ និងសាលាបាល់ទាត់បុរស និងស្ត្រីរបស់ក្លប Man Utd ។ពួកគេក៏នឹងទទួលបានកៅអីពីរនៅលើក្រុមប្រឹក្សាភិបាល Manchester United PLC និង Manchester United Football Club ។

លោក Ratcliffe បានធ្វើដំណើរទៅ Old Trafford និងកន្លែងហ្វឹកហាត់ជាច្រើនដងរួចមកហើយ ខណៈពេលដែលគាត់កំពុងរង់ចាំកិច្ចព្រមព្រៀងដើម្បីទទួលបានការយល់ព្រមចុងក្រោយ។ គ្រួសារ Glazer បានទិញ Manchester United ក្នុងតម្លៃជាង៩៩៥ លានដុល្លារក្នុងឆ្នាំ ២០០៥។

នៅក្នុងខែវិច្ឆិកា ឆ្នាំ២០២២គ្រួសារអាមេរិកបាននិយាយថា ពួកគេកំពុងពិចារណាលក់ ដើម្បីស្វែងរកជម្រើសជាយុទ្ធសាស្រ្តថ្មី៕

(Khmer) ពិតជាយីអ៊ុនដាក់ អារក្សជាន់មែន មិន​ត្រឹម​តែ​គ្មានការងារធ្វើប៉ុណ្ណោះទេ លោក Jose Mourinho ​ក៏​កំពុង​ប្រឈម​នឹង​បញ្ហា​លុយកាក់​ដែរថែមទៀត។ គ្រូបង្វឹកសញ្ជាតិព័រទុយហ្គាល់ ដែលទើបត្រូវបានក្លិប Roma បណ្តេញចេញកាលពីខែមុននេះ ត្រូវរងការផាកពិន័យយ៉ាងធ្ងន់ធ្ងរ ពីអាជ្ញាធរពន្ធដាររបស់ប្រទេសអេស្ប៉ាញ បើទោះជាគាត់ទំនងជាមាន​លុយគ្រប់គ្រាន់សម្រាប់សងក៏ដោយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន AFP។

លោក Mourinho មាន​បណ្តឹងបើក​ចំហមួយដែល​គាត់​បាន​ប្តឹង​ឧទ្ធរណ៍​ពី​ការ​គេច​ពន្ធ​ពី​អំឡុង​ឆ្នាំ ២០១០-១២ នៅពេល​ដែលគាត់​ដឹកនាំក្លិប Real Madridក៏ប៉ុន្តែបណ្តឹងឧទ្ធរណ៍របស់គាត់ត្រូវបានបដិសេធដោយតុលាការកំពូលហើយគាត់នឹងត្រូវបង្ខំឱ្យបង់ប្រាក់ពិន័យចំនួនជាង៧១ម៉ឺនដុល្លារបន្ថែមពីលើការទូទាត់ចំនួនជាង១លានដែលសរុបទាំងអស់ចំនួន ១,៨លានដុល្លារ។

ខណៈដែលគាត់បានរួចផុតពីការចោទប្រកាន់ជុំវិញករណីបង់ពន្ធក្នុងឆ្នាំ ២០១០ អាជ្ញាធរពន្ធបានរកឃើញថាគាត់មិនបានបង់ពន្ធត្រឹមត្រូវសម្រាប់ឆ្នាំ ២០១១ និង ២០១២ ។ គាត់បានចោទប្រកាន់ថា Real Madrid បានបង់ថ្លៃឈ្នួលភ្នាក់ងារទៅ Jorge Mendes ដោយមិនគិតជាមួយប្រាក់ឈ្នួលរបស់គាត់ទេ។

លោក Mourinho ក្លាយជាបុគ្គលដែលមានកេរ្តិ៍ឈ្មោះខ្ពស់ចុងក្រោយគេក្នុងប្រទេសអេស្ប៉ាញ ដែលបានប្រព្រឹត្តកំហុសចំពោះការបង់ពន្ធ។

គួររំឭកថានៅក្នុងប្រទេសអេស្ប៉ាញ ស្ទើរតែគ្រប់កីឡាករ និងគ្រូបង្វឹកដែលទៅធ្វើការឬលេងនៅទីនោះតែងតែប្រឈមមុខជាមួយនឹងការបង់ពន្ធ៕

(Khmer) ទីបំផុតក្របខ័ណ្ឌបាល់ទាត់អ៊ីតាលី Serie A នៅតែរក្សាក្រុមចំនួន២០ដដែល បន្ទាប់ពីក្រុមចំនួន១៦ នៃក្លឹបបច្ចុប្បន្នបានបោះឆ្នោតប្រឆាំងនឹងការកាត់បន្ថយមកនៅ១៨ក្រុមវិញ។ នេះបើយោងតាមការចេញផ្សាយរបស់បណ្តាញសារព័ត៌មានBBC។ នៅឯកិច្ចប្រជុំម្ចាស់ភាគហ៊ុននៅទីក្រុង Milan  មានតែក្លឹបចំនួន៤ប៉ុណ្ណោះរួមមានៈ Juventus, Inter Milan, AC Milan និង Roma ដែលបានបោះឆ្នោតសម្រាប់សំណើកាត់បន្ថយចំនួនក្រុមកំពូលរបស់អ៊ីតាលី។

មូលហេតុជំរុញឱ្យមានការកាត់បន្ថយចំនួនក្រុមគឺក្នុងកិច្ចខិតខំប្រឹងប្រែងដើម្បីកាត់បន្ថយចំនួនប្រកួត និងបង្កើនគុណភាពនៃបាល់ទាត់តាមការផ្តល់ជូន ប៉ុន្តែត្រូវការសម្លេងភាគច្រើន(១៤ក្លឹប) ដើម្បីឆ្លងកាត់កំណែទម្រង់។

លោក Scaroni ប្រធានក្លឹបAC Milan បាននិយាយថា «តាមពិតទៅ! ក្លឹបដូចជាពួកយើង ដែលត្រូវប្រកួតអន្តរជាតិ ហើយមានកីឡាករជាច្រើនត្រូវកោះហៅទៅក្រុមជម្រើសជាតិ តែងតែត្អូញត្អែរអំពីការប្រកួតច្រើនពេក។ កីឡាករ​ត្រូវប្រកួត​ក្នុង​ទ្វីប ​ប្រកួត​ក្រុម​ជម្រើស​ជាតិ​របស់​ពួក​គេ ពាន​រង្វាន់ Italian Cup និង​លីគ។ ទាំងអស់នេះ​នាំ​ឱ្យ​មាន​ការ​ប្រកួត​ជាច្រើន ​ដែល​មិន​អាច​ទ្រាំទ្រ​បាន ហើយ​ដែល​ជា​មូលហេតុ​នៃ​ការ​រង​របួស​ជា​ច្រើន»

ទម្រង់បច្ចុប្បន្ននៃលីគកំពូលអ៊ីតាលី Serie A មានចំនួន២០ក្រុម ដែលបានបង្កើតឡើងតាំងពីឆ្នាំ២០០៤-០៥ ។ សម្រាប់សំណើកំណែទម្រង់ក៏ត្រូវបានអនុម័តផងដែរ ខណៈដែលលីកអ៊ីតាលីជំរុញឱ្យមានស្វ័យភាព(ការគ្រប់គ្រងដោយខ្លួនឯង)បន្ថែមទៀត ស្រដៀងទៅនឹង Premier League នៅប្រទេសអង់គ្លេស។

កំណែទម្រង់ទាំងនោះនឹងត្រូវបានបង្ហាញនៅឯមហាសន្និបាតវិសាមញ្ញនៃសហព័ន្ធបាល់ទាត់អ៊ីតាលី (FIGC) ក្នុងខែមីនា។ លោក Lorenzo Casini ប្រធាន Serie A បាននិយាយថា «បច្ចុប្បន្នប្រព័ន្ធនេះមិនផ្តល់ឱ្យលីគកំពូល Serie A នូវស្វ័យភាព និងទម្ងន់នៃការសម្រេចចិត្ត ដែលវាគួរតែមានទាក់ទងនឹងទម្ងន់សេដ្ឋកិច្ចផងដែរ៕»

(Khmer) Rasmus Hojlund បានបន្ថែមគ្រាប់ទី 5 របស់ខ្លួនក្នុង Premier League ជាមួយគុណ​ផលលេង​យ៉ាង​ល្អក្នុងជ័យជម្នះ 2-1 លើ Aston Villa កាលពីយប់មិញ។ ឥឡូវនេះគាត់បានស៊ុតបញ្ចូលទីក្នុងការប្រកួត Premier League 5 លើកចុងក្រោយរបស់ Manchester United នៅអាយុ 21 ឆ្នាំ 7 ថ្ងៃ នេះបើយោងតាមអ្នកកត់ត្រាស្ថិតិ Statman Dave ។

នេះមានន័យថា Rasmus Højlund គឺជាកីឡាករក្មេងជាងគេទី2 ដែលស៊ុតបញ្ចូលទី​ក្នុងការបង្ហាញខ្លួន 5 ដងជាប់ៗគ្នាក្នុង Premier League តាមពីក្រោយ Nicolas Anelka កាលលេងឲ្យ Arsenal ក្នុងខែវិច្ឆិកា ឆ្នាំ 1998 (១៩ឆ្នាំ និង ២៣៩ថ្ងៃ)។

Anelka ត្រូវ​បាន​គេ​ចាត់​ទុក​យ៉ាង​ទូលំទូលាយ​ ថា​ជា​ខ្សែ​ប្រយុទ្ធ​ដ៏​ល្អ​បំផុត​មួយ​រូប ​ដែល​បាន​លើក​ពានលីគ​កំពូល​របស់​អង់គ្លេស។ វា​ជា​សក្ខីភាព​មួយ​ចំពោះ​កីឡាករដ៏មានទេពកោសល្យ​ដូចជា Hojlund ដែលមាន​ឈ្មោះក្នុងបញ្ជីល្អបែបនេះ។

គិត​ត្រឹម​នាទីនេះ Hojlund រកបាន 11 គ្រាប់ហើយក្នុងរដូវកាលដំបូងរបស់ខ្លួន នៅ Man United បន្ថែមពីលើការបញ្ជូនបាល់ចំនួន 2 ដងក្នុងក្របខ័ណ្ឌកំពូលរបស់អង់គ្លេស។

(Khmer) អតីតគ្រូបង្វឹករបស់បិសាចក្រហម Manchester United លោក Sir Alex Ferguson បានអះអាងថា Tottenham នឹងមិនឈ្នះពានរង្វាន់ Premier League ឡើយ។ នេះបើយោងតាមការចេញផ្សាយរបស់Daily Mail ។

លោកAnge Postecoglou ទទួលបានការសរសើរយ៉ាងខ្លាំងចំពោះការងារ ដែលគាត់បានធ្វើ ចាប់តាំងពីគាត់ត្រូវបានតែងតាំងជាគ្រូបង្វឹករបស់ Tottenham កាលពីរដូវក្តៅបន្ទាប់ពីចាកចេញពី Celtic ។ Spurs ដែល​បាន​ឈរ​លើ​កំពូល​តារាង​កាល​ពី​ខែ​តុលា បច្ចុប្បន្ន​កំពុង​ស្ថិត​ក្នុង​ចំណាត់​ថ្នាក់​លេខ​៤ ដែលជាចំណាត់ថ្នាក់មួយក្នុងការប្រជែងយកជើងឯក ប៉ុន្តែលោក Ferguson មាន​អារម្មណ៍​ថា​ពួក​គេ​នឹង​មិន​ឈ្នះ​ពាន​នោះ​ទេ។

នៅពេលសួរដោយលោក Matt Chapman អ្នកកាន់កម្មវីធីរបស់ទូរទស្សន៍ Sky Sports Racing ថាតើ Tottenham អាចនឹងឈ្នះពានPremier League ដែរឬទេ? លោកFerguson បានសើចមុននឹងឆ្លើយតបថា «ទេ»។ លោកFerguson បានបន្តទៀតថា ឆ្នាំ១៩៦១ គឺជាលើកចុងក្រោយ ដែលពួកគេបានឈ្នះវា។នោះជាពេលវេលាដ៏យូរ។ សម្រាប់រដូវកាលនេះLiverpool និងMan City មានឥទ្ធិពលខ្លាំងនៅក្នុងការឈ្នះពាន Premier League។

នៅពេលត្រូវបានចោទសួរថា តើ Spurs ទំនងជាឈ្នះពានលីគ មុនពេល Man Utd ឈ្នះពានម្តងទៀតដែរឬទេ? គាត់បានឆ្លើយថា “គ្មានឱកាសទេ!” ក្រោមការដឹកនាំរបស់ Erik ten Hag ក្រុម United មានរដូវកាលដ៏លំបាកមួយ ដោយបានចាញ់ ៩ប្រកួតក្នុងចំណោម ២៣ប្រកួតក្នុងលីករបស់ពួកគេ។

Tottenham ឈ្នះពានរង្វាន់លីគចុងក្រោយគឺនៅក្នុងរដូវកាល១៩៦០-៦១ នៅពេលដែលលោក Bill Nicholson កាន់តំណែងជាគ្រូបង្វឹក។ លោក Ferguson បានឈ្នះពានរង្វាន់លីកដ៏អស្ចារ្យចំនួន ១៣ ដងក្នុងនាមជាអ្នកចាត់ការទូទៅរបស់ Man Utd មុនពេលចូលនិវត្តន៍ក្នុងឆ្នាំ២០១៣បន្ទាប់ពីអាជីពដឹកនាំដ៏មានកិត្តិយស៕

(Khmer) តារាម៉ូដែលជនជាតិអ៊ីតាលីនាង Paola Saulino បានអះអាងថា កីឡាករបាល់ទាត់នៅ Premier League តែពីរភាគរយប៉ុណ្ណោះដែលស្មោះត្រង់នឹងប្រពន្ធរបស់ពួកគេ  នេះបើយោងតាមការចេញផ្សាយរបស់ Dail Mail កាលពីថ្ងៃសុក្រទី ៩កុម្ភៈ ឆ្នាំ២០២៤។

Saulino បានបន្ថែមថា៖« Walker មិនមែនជាករណីដ៏កម្រនោះទេ ហើយបានអះអាងថា កីឡាករបាល់ទាត់ Premier League ត្រឹមតែ ២% ប៉ុណ្ណោះដែលស្មោះ»។

Paola Saulino បាននិយាយថានាងត្រូវបានទាក់ទងដោយកីឡាករបាល់ទាត់ជាច្រើននៅលើប្រព័ន្ធផ្សព្វផ្សាយសង្គមហើយបាននិយាយថា នាងបានដេកជាមួយកីឡាករបីនាក់មកពីក្របខណ្ឌកំពូលរបស់អង់គ្លេសហើយនាង​ជឿថាការក្បត់គឺជាធម្មជាតិរបស់បុរស។

Walker តារាឆ្នើមរបស់ក្រុម Manchester City បានធ្វើការសុំទោសជាសាធារណៈ បន្ទាប់ពីបានសារភាពថាគាត់បានធ្វើរឿងឆ្កួត ៗ និងការសម្រេចចិត្តដែលល្ងង់ខ្លៅ បន្ទាប់ពីទំនាក់ទំនងរបស់គាត់ជាមួយនឹង Lauryn Goodman បានលេចចេញមកកាលពីដើមឆ្នាំនេះ។

នាងបានប្រាប់ Daily Star ថា៖«នៅក្នុងជីវិតរបស់ខ្ញុំ ខ្ញុំមានទំនាក់ទំនងជាមួយបុរសមកពី Premier League ចំនួន៣នាក់ ដែលក្រោយមកខ្ញុំបានរកឃើញថាពួកគេបានភ្ជាប់ពាក្យ ឬរៀបការរួចហើយ។ ខ្ញុំមានការខកចិត្តយ៉ាងខ្លាំង»។

នាងបានការពារសកម្មភាពរបស់ Walker បើទោះបីជាខ្សែការពារអង់គ្លេសរូបនេះកំពុងរងការរិះគន់យ៉ាងខ្លាំងបន្ទាប់​ពីការលាតត្រដាងអំពីកូនសម្ងាត់របស់គាត់ ។

នាងបាននិយាយថា៖«ជាដំបូង ខ្ញុំមិនភ្ញាក់ផ្អើលចំពោះអ្វីដែល Kyle បានធ្វើនោះទេ។ ខ្ញុំជឿដោយស្មោះថា ការក្បត់គឺជារឿងធម្មជាតិក្នុងជីវិត។ ខ្ញុំពិតជាអាណិត Walker ណាស់ ព្រោះកីឡាករបាល់ទាត់ ៩៨ % ធ្វើបែបនេះ ប្រហែលជាមិនបង្កើតជីវិតស្របគ្នានោះទេ ប៉ុន្តែវាងាយស្រួលណាស់ក្នុងការមានប្រពន្ធ និងកូនពីរ ឬបីនាក់នៅរាយប៉ាយ» ៕