(Khmer) ម្ចាស់ពានកីឡាករល្អជាងប្រចាំលីគកំពូលកម្ពុជារដូវកាលឆ្នាំ២០២០ ខ្សែប្រយុទ្ធ ម៉ាត់ នូរុណ បានបង្ហាញការលេងយ៉ាងល្អនៅដើមរដូវកាលនេះ ទាំងការសាមគ្គីគ្នាជាមួយមិត្តរួមក្រុមទាំងមូល និងជាពិសេសការសហការគ្នាជាមួយខ្សែប្រយុទ្ធវ័យក្មេងសៀង ចន្ធា។ ជ័យជំនះរបស់បឹងកេត ៣ប្រកួត ក្នុងចំណោម៥សប្ដាហ៍នៃ Cambodian Primier League កន្លងទៅនេះ ជាការរួមចំណែកដ៏ធំមួយរបស់ពួកគេ ដោយកីឡាករម៉ាត់ នូរុណអាចរកគ្រាប់បាល់បានចំនួន​៤គ្រាប់ និងជាកីឡាករខ្មែរដែលស៊ុតចូលទីច្រើនជាងគេនៅបច្ចុប្បន្ននេះ។

ក្នុងកម្មវិធី Talk To The Press មុនការប្រកួតរបស់បឹងកេត កីឡាករ ម៉ាត់ នូរុណ បាននិយាយពីការលេងជាមួយ សៀង ចន្ធា បែបនេះ៖ «សម្រាប់ការសហកាគ្នាជាក្រុមពួកយើងធ្វើបានល្អ ហើយចំពោះការសហការគ្នារវាងខ្ញុំនឹងសៀង ចន្ធា ខ្ញុំគិតថាការលេងជាមួយចន្ធា ងាយស្រួលលេងច្រើន ពីព្រោះគាត់ជាកីឡាករដែលមានបញ្ចេកទេសល្អ ពេលគាត់ឲ្យបាល់មកកាន់យើង ធ្វើឲ្យយើងងាយស្រួលក្នុងការលេងបន្ត ហើយខ្ញុំសប្បាយចិត្តក្នុងការលេងជាមួយគេ»។

បញ្ជាក់ជូនបងប្អូនថា ក្លិបបឹងកេតនឹងត្រូវបើកទ្វាកីឡដ្ឋាន Cambodia Airway របស់ខ្លួនស្វាគមន៍ក្រុមភ្ញៀវមកពីខេត្តតាកែវគីរីវង់សុខសែនជ័យ នៅថ្ងៃសៅរ៍ចុងសប្ដាហ៍នេះវេលាម៉ោង០៣៖៤៥នាទី និងមានការផ្សាយផ្ទាល់ពី AMS Sports ផងដែរ៕

រូបភាព៖ ក្លិបបាល់ទាត់បឹងកេត