(Khmer) ការ​ប្រកួត​ក្នុងពាន​រង្វាន់ AFC Cup 2022 វគ្គ​ជម្រុះក្នុងពូល នឹង​ចាប់​ផ្ដើមនៅ​ថ្ងៃ​ទី១៨ ឧសភា ដល់ ៣០ មិថុនា ២០២២ ខណៈដែល​ក្រុម​បាល់​ទាត់​វិសាខារបស់​កម្ពុជា​ដែល​ដើម​ឡើយ​ត្រូវ​លេង​វគ្គជម្រុះ Playoff ជាមួយក្រុម Young Elephants ត្រូវ​ឡើង​មក​ឈរ​ក្នុងពូល H​ជាមួយ​ក្រុម Kuala Lumpur City របស់​ម៉ាឡេស៊ី Tampines Rovers របស់​សិង្ហបុរី និង​ក្រុម  PSM Makassar របស់​ឥណ្ឌូនេស៊ី។

ត​ទៅ​នេះ​យើង​និយាយ​អំពី​ការ​ប្រកួត​តែ​ក្នុងតំបន់​អាស៊ាន ដែល​មាន​៣ពូលគឺ​ G, H, I។ សម្រាប់​វិសាខា​ដែល​ឡើង​មក​ឈរ​ក្នុងពូល H​នេះ​គឺ​ដោយ​សារ​ក្លិប​មីយ៉ាន់ម៉ា​ចំនួន​២​គឺ Shan United និង​  Hantharwady United ត្រូវដកខ្លួនចេញ។ ដូច្នេះ ក្រុម Young Elephants  ដែល​ត្រូវ​លេង​នៅ​ក្នុងវគ្គ​ជម្រុះ Playoff ត្រូវឡើង​មក​ក្នុង​វគ្គ​ជម្រុះ​ក្នុងពូលដោយ​ឈរ​ក្នុងពូល G ជាមួយ Kaya F.C.–Iloilo, Bali United, និងក្លិប Kedah Darul Aman ។

ដោយ​ឡែក!​សម្រាប់​ក្រុមក្នុងពូល I ដែល​មាន Viettel,  Hougang United និង Phnom Penh Crown មាន​តែ​៣​ក្រុម​តែ​ប៉ុណ្ណោះ ហើយ​គ្មាន​ការ​បន្ថែមក្រុម​ណា​ទៀត​នោះ​ទេ។ ដោយ​ឡែក​សម្រាប់​រូបមន្ត​ដែល​គិត​សម្រាប់​ការ​ប្រកួត​វគ្គ​ជម្រុះក្នុងពូលនៃតំបន់​អាស៊ាន​គឺ ដោយសារពូល I មានក្រុមតែ 3 ប៉ុណ្ណោះ លទ្ធផល និង​ពិន្ទុទល់នឹងក្រុមចំណាត់ថ្នាក់លេខ 4 ក្នុងពូល G និង H មិនត្រូវបានពិចារណាសម្រាប់ចំណាត់ថ្នាក់ទេ។

ក្រុម​ដែល​ឈរ​ចំណាត់​ថ្នាក់​លេខ១​ក្នុងពូល​ទាំងបី( G, H, I) នឹង​ត្រូវ​ឡើង​ទៅ​វគ្គ​ជម្រុះវគ្គពាក់កណ្តាលផ្តាច់ព្រ័តប្រចាំតំបន់ ឬ​ហៅ​ថា Zonal semi-finals ហើយ​ក្រុម​លេខ​២​ស្ថិត​ក្នុងករណីក្រុម​ដែល​អាច​ឡើង​ទៅវគ្គពាក់កណ្តាលផ្តាច់ព្រ័តប្រចាំតំបន់(Possible Zonal semi-finals)។