(Khmer) “ក្នុងពូលនេះសុទ្ធតែសំខាន់ ជាក្រុមខ្លាំងៗ ។ សម្រាប់ខ្ញុំ ក្រុមដែលមានអទិភាពនឹងឡើងទៅវគ្គបន្តគឺក្រុម viettel FC របស់វៀតណាម”។ នេះគឺជាចំណាប់អារម្មណ៍របស់លោក កែវ សុខង៉នអ្នកចាត់ការទូទៅរបស់ក្លិបភ្នំពេញក្រោន ក្រោយដឹងថាក្លិបរបស់លោកស្ថិតក្នុងពូល I នៃពានរង្វាន់ AFC Cup 2022 វគ្គជម្រុះក្នុងតំបន់អាស៊ាន(ASEAN ZONE)។
“ប៉ុន្តែសម្រាប់ ភ្នំពេញក្រោន យើងបានរៀបចំរួចរាល់ផងដែរ ។ យើងនឹងព្យាយាមឱ្យអស់លទ្ធភាពឆ្លងផុតពីវគ្គ Group Stage នេះ”។
ក្រុមភ្នំពេញក្រោនមានកៅអីលេងពាន AFC Cup 2020 វគ្គជម្រុះក្នុងពូលនេះ បន្ទាប់ពីទទួលបានជើងឯកពានរង្វាន់ Metfone Cambodian League រដូវកាល២០២១ ហើយពួកគេស្ថិតក្នុងពូល I ជាមួយក្រុម Viettel FC របស់វៀតណាម Hougang United (Hougang United FC) របស់សិង្ហបុរី និងក្រុមHantharwady United FC របស់មីយ៉ាន់ម៉ា។
ក្រុមមួយទៀតរបស់កម្ពុជាគឺ វិសាខាអេហ្វស៊ី នឹងត្រូវលេងវគ្គជម្រុះ Playoff ជាមួយក្រុមឡាវ Young Elephant ហើយក្រុមដែលឈ្នះត្រូវឡើងទៅពូល G៕
