(Khmer) លោក Mano Polking គ្រូបង្វឹក​ក្រុម​ជម្រើសជាតិ​ថៃ​បាន​ពណ៌នា​ថា​ប្រទេស​នេះ​តែងតែ​ជា​ក្រុម​ល្អ​បំផុត​ក្នុង​វិស័យ​បាល់ទាត់​នៅ​អាស៊ីអាគ្នេយ៍ (អាស៊ាន)។

ការពិតនោះមិនអាចបដិសេធបានទេ បន្ទាប់ពីប្រទេសថៃបានឡើងជាជើងឯក AFF Mitsubishi Electric Cup ឆ្នាំ 2022  ហើយ​វាជាការដណ្តើមបានជើងឯកជាលើកទីប្រាំពីរចាប់តាំងពីពាន​រង្វាន់​នេះត្រូវបានប្រកួតប្រជែងជាលើកដំបូងក្នុងឆ្នាំ 1996 ។

ក្រៅ​ពីទទួល​បាន​ជើងឯកចំនួន​៧​លើក​ច្រើន​ជាង​គេ ក្រុម​ដំរី​ចម្បាំង​មួយនេះ ក៏​បាន​ក្លាយជាជើងឯករងផង​ដែរ ក្នុង​ការ​ប្រកួត​ឆ្នាំ 2007, 2008 និង 2012។ ជាការពិត វាក៏ជាលើកទីពីរជាប់ៗគ្នាដែរ ដែលលោក Polking បានលើកពាន AFF Cup ដោយជោគជ័យ បន្ទាប់ពីដឹកនាំថៃទៅភ្លក់រសជាតិកាពាន​រង្វាន់មួយនេះលើកដំបូងកាលពីឆ្នាំមុននៅប្រទេសសិង្ហបុរី។

Polking បាននិយាយនៅក្នុងសន្និសីទសារព័ត៌មានបន្ទាប់ពីការប្រកួតនេះបើយោងតាមប្រភព VN Express ថា៖ «ពានរង្វាន់ជើងឯកនេះគឺមានសារៈសំខាន់ខ្លាំងណាស់សម្រាប់ប្រទេសថៃ»។

«យើង​តែងតែ​ជា​ក្រុម​លេខ​មួយ ហើយ​ចង់​ទៅ​កាន់​តែ​ឆ្ងាយ​ជាង​កម្រិត​នៅ​អាស៊ីអាគ្នេយ៍»។

“ថៃត្រូវតែបង្ហាញពីសមត្ថភាពរបស់យើងក្នុងការប្រកួតធំៗដូចជា Asian Cup ដែលមានក្រុមខ្លាំងៗដូចជា ជប៉ុន កូរ៉េខាងត្បូង និងអារ៉ាប់រួម (UAE)»។

Mano Polking បានបន្ថែមថា៖«យើងត្រូវព្យាយាមឱ្យកាន់តែខ្លាំង និងបន្តធ្វើឱ្យប្រសើរឡើងនូវលទ្ធផលក្រុម»។

បន្ទាប់ពីលទ្ធផលស្មើ 2-2 ក្នុងសកម្មភាពដំបូងដែលធ្វើឡើងនៅទីក្រុងហាណូយ គ្រាប់បាល់តែមួយគ្រាប់របស់ប្រធានក្រុមគឺ Theerathon Bunmathan ក្នុងអំឡុងពេលសកម្មភាពត្រឡប់មកវិញគឺគ្រប់គ្រាន់ ដើម្បីបញ្ជាក់ពីជើងឯកដ៏មានអត្ថន័យសម្រាប់ ថៃ។កាន់តែផ្អែមល្ហែមជាងនេះទៅទៀត វាត្រូវបានធ្វើ​ឡើង នៅចំពោះមុខអ្នកគាំទ្រដ៏ស្មោះត្រង់របស់ពួកគេ ដែលបានមកទស្សនាឡើងជន់លិចកីឡដ្ឋាន Thammasat ក្នុង​ខេត្ត Pathum Thani ។