(Khmer) «ខ្ញុំចង់​ឃើញកម្ពុជាទៅលេង​នៅ World Cup មុនពេលខ្ញុំស្លាប់»នេះ​ជាសម្ដី​របស់​លោក Keisuke Honda និយាយទៅកាន់​កីឡាករ​របស់​លោកក្នុង​ពិធីសំណេះ​សំណាល​ក្រោយ​ការ​ប្រកួតរបស់​ជម្រើសជាតិកម្ពុជា ខណៈដែល​លោក​នឹង​អស់​ភារកិច្ចក្នុង​ការ​ដឹកនាំ​ក្រុមឈុត​ហើយ។

លើសពី​នេះ​ តាម​រយៈ​វីដេអូឃ្លីបដែល​ផុស​ដោយ​ សហព័ន្ធកីឡាបាល់ទាត់កម្ពុជា លោក​បាន​ផ្ដាំផ្ញើ​ឱ្យ​ក្រុម​កីឡាករកម្ពុជាខំប្រឹង​ហ្វឹកហាត់ ​ស្គាល់ខ្លួន​ឯង ហើយ​ធ្វើ​ឱ្យ​បាន​ល្អបំផុតក្នុង​ការ​ប្រកួតក្រោយៗ​ផង​ដែរ។

លើស​ពី​នេះសហព័ន្ធកីឡាបាល់ទាត់កម្ពុជា ក(បានការថ្លែងអំណរគុណយ៉ាងជ្រាលជ្រៅទៅកាន់អ្នកចាត់ការទូទៅ លោក Keisuke Honda សម្រាប់ការចូលរួមចំណែក ចំណាយពេលវេលាផ្ទាល់ខ្លួន និងខិតខំប្រឹងប្រែងជាមួយក្រុមជម្រើសជាតិកម្ពុជា “ឈុតធំ” នាពេលកន្លងមក ពោលគឺចាប់តាំងពីខែសីហា ឆ្នាំ២០១៨ ដល់ខែមករា ឆ្នាំ២០២៣ នេះ ដោយការប្រកួតរវាងក្រុមជម្រើសជាតិកម្ពុជា ទល់នឹងក្រុមជម្រើសជាតិថៃ​ គឺជាការប្រកួតចុងក្រោយរបស់លោក ជាមួយនឹងក្រុមជម្រើសជាតិកម្ពុជា “ឈុតធំ”។

លោក Keisuke Honda នឹងបន្តភារ:កិច្ចរបស់ខ្លួនក្នុងបេសកកម្មចុងក្រោយ ក្នុងនាមជាគ្រូបង្វឹករបស់ក្រុមជម្រើសជាតិកម្ពុជា “អាយុក្រោម ២២ឆ្នាំ” ដែលគ្រោងនឹងចាប់ផ្ដើមប្រមូលផ្ដុំហ្វឹកហាត់នៅក្នុងខែកុម្ភះ ដើម្បីត្រៀមខ្លួនសម្រាប់ការប្រកួតកីឡា SEA Games នៅខែឧសភា ឆ្នាំ២០២៣ ខាងមុខនេះ។