(Khmer) សហព័ន្ធបាល់កម្ពុជា បានប្រកាសជាផ្លូវការ បញ្ជីរាយនាមផ្លូវការកីឡាការិនី២០នាក់ចុងក្រោយ សម្រាប់ចូលរួមការប្រកួតព្រឹត្តិការណ៍ Sea Games ខែក្រោយនេះ។

ក្រុមជម្រើសជាតិបាល់ទាត់នារីកម្ពុជា នឹងស្ថិតនៅក្នុងពូល A ជាមួយក្រុមជម្រើសជាតិវៀតណាម និង ហ្វីលីពីន ខណៈ បញ្ជីឈ្មោះ កីឡាការិនីទាំង ២០ខាងលើ នឹងបន្តហ្វឹកហាត់នៅមជ្ឈមណ្ឌលសាលាបាល់ទាត់ជាតិបាទី រហូតដល់ថ្ងៃធ្វើដំណើរដែលអាចនឹងចាកចេញជាមួយក្រុមបុរស នៅថ្ងៃទី០៤ ខែឧសភា ឆ្នាំ២០២២។

នេះ​គឺ​ជាលើកដំបូងបំផុត​ហើយ​សម្រាប់​ក្រុមជម្រើស​ជាតិ​នារី​កម្ពុជា​ដែលចូល​រួម​ក្នុង​ព្រឹត្តិការណ៍​ស៊ីហ្គេម បន្ទាប់​ពីស្ងាត់​សកម្មភាពចូល​រួម​ក្នុងពាន​រង្វាន់​និង​ព្រឹត្តិការណ៍កីឡាករអន្តរជាតិ​អស់​មួយរយៈ។ សកម្មភាពចុងក្រោយ​ជម្រើស​ជាតិកម្ពុជាចូលរួមក្នុងពាន​រង្វាន់ AFF Women’s Championship 2018 ដែល​ធ្វើ​ឡើងក្នុង​ប្រទេស​ឥណ្ឌូនេស៊ី។

កីឡាការិនីបាល់ទាត់កម្ពុជា បាន ជាវៃ និយាយពេលជាប់​ឈ្មោះ​ក្នុងជម្រើសជាតនារីកម្ពុជាក្នុងស៊ីហ្គេមថា៖ «នេះមិនមែនជាលើកទីមួយដែលបានចូលរួមក្រុមជម្រើសជាតិ ប៉ុន្តែនេះលើកទីមួយដែលចូលរួមក្រុមជម្រើសជាតិសម្រាប់ស៊ីហ្គេម ខ្ញុំពិតជាមានមោទនភាពណាស់ នឹងធ្វើអោយអស់ពីសមត្ថភាព។ នេះជាអី្វដែលខ្ងុំចូលចិត្ត មិនដែលបោះបង់វាម្តងណាឡើយ។ អរគុណខ្លួនឯងដែលដើរទៅមុន ទោះជាម្នាក់ឯងក៏ដោយ”៕