(Khmer) វីរបុរសបាល់ទាត់កម្ពុជា ព្រឹទ្ធាចារ្យកីឡា ប៉ែន ផាតបានសហការគ្នាជាមួយក្រុមហ៊ុនផលិតសម្លៀកបំពាក់កីឡាដ៏ល្បីកម្ពុជា NT Sport បង្កើតសាលាបាល់ទាត់មួយមានឈ្មោះថា ពស់កេងកង។
ផ្ដល់ព័ត៌មានតាមរយៈសារអេឡិចត្រូនិកមកកាន់ក្រុមការងារគេហទំព័រ B8 Sport លោកតាប៉ែន ផាតបានមានប្រសាសន៍ថា វាគឺជារឿងពិតដែលលោកបានបង្កើតសាលាបាល់ទាត់ពស់កេងកង់នេះ ដោយសហការជាមួយម្ចាស់ក្រុមហ៊ុន NT Sport។
“ដូចដែលខ្ញុំបាននិយាយកាលពីពេលមុនៗហើយថា ខ្ញុំចង់ធ្វើអ្វីមួយ គឺបង្កើតសាលាយុវជនថ្នាលដើម្បីឱ្យបាល់ទាត់ប្រទេសយើងដើរទាន់គេ ដើរទាន់ប្រទេសជិតខាង។ អញ្ចឹងហើយ! បានជាខ្ញុំបានពិភាក្សាជាមួយម្ចាស់ NT Sport ហើយក៏និយាយត្រូវគ្នា ហើយគាត់បានឱ្យខញុំមករួមការងារក្នុងសាលាបាល់ទាត់នេះ ដែលខ្ញុំជាម្ចាស់ និងជាអ្នកគ្រប់គ្រង ហើយខាង NT Sport ក៏ជាម្ចាស់”។
លោកតាបានបន្តទៀតថា៖ “សាលានេះទើបតែបង្កើតបាន២ថ្ងៃទេ ហើយចាំមើលថាមានសិស្សណាខ្លះគេមកចុះឈ្មោះ ហើយយើងនឹងរៀបចំតាមដំណើរដែលគ្រោងទុក ដើម្បីយុវជន ក្មេងមានទេពកោសល្យល្អ ដោយផ្ដោតពង្រឹងផ្នែកបច្ចេកទេស និងវិន័យ សម្រាប់អនាគតរបស់ពួកគេនិងអនាគតបាល់ទាត់កម្ពុជា”។
មែនទែនទៅ! សាលាបាល់ទាត់ ពស់កែងកង បានប្រកាសជ្រើសរើសយុវជនតាំងពីថ្ងៃទី០៣ខែមករាឆ្នាំ២០២២។ ក្នុងជំហានដំបូង! សាលានឹងរើសយកចំនួន៥០នាក់ ដោយមានបន្ថែមឈុតកីឡាមួយឈុត ហើយតម្លៃនាំការចុះឈ្មោះហ្វឹកហាត់គឺ២០ដុល្លារក្នុងម្នាក់។ កន្លែងចុះឈ្មោះគឺនៅហាង NT Sport ជិតស្ពានអាកាសផ្សារដីហុយ ចំណែកទីតាំងហ្វឹកហាត់នៅជិត ហ្សេនជូរី ជិតដល់ព្រលានយន្តហោះលើផ្លូវ២០៥។
