(Khmer) ក្រុមជម្រើសជាតិ​កម្ពុជា​នឹង​ត្រូវ​ធ្វើដំណើ​ទៅ​កាន់​កីឡដ្ឋាន Thammasat Stadium ដែល​ជា​ទឹក​ដី​របស់​ជម្រើសជាតិ​ថៃ​​ហើយ​ត្រូវ​គ្នា​ក្នុង​ការ​ប្រកួត​ចុង​ក្រោយ​នៃ​ពូល​A សម្រាប់​ពាន​រង្វាន់ AFF Mitsubishi Electric Cup  ស្រប​ពេល​កម្ពុជា​ត្រូវ​ការ​ឈ្នះ​ក្រុម​ម្ចាស់ផ្ទះ​ដែល​ជា​ម្ចាស់​ជើងឯក​៦​សម័យកាល​មួយនេះ​ដើម្បី​មានឱកាស​ឡើង​ទៅវគ្គពាក់កណ្ដាលផ្ដាច់​ព្រ័ត្រ។

បើ​និយាយ​អំពី​ប្រវត្តិជួបគ្នា​ក្នុងពាន​រង្វាន់​មួយនេះដែល​ចាប់​ផ្ដើម​តាំង​ពីឆ្នាំ១៩៩៦ (Tiger Cup)កម្ពុជានឹងថៃ​មិនដែលជួបគ្នា​សោះឡើយ ហើយ​មិន​ថា​វគ្គជម្រុះដំបូង​ឬ វគ្គជម្រុះសន្សំពិន្ទុក្នុងពូល​ក្ដី​គឺ​ឃ្វៀងគ្នារហូត។ មិនដែលជួប​គ្នា​ក្នុងពាន​រង្វាន់ AFF Cup នេះ​មិន​បាន​មានន័យ​ថា ពួក​គេ​មិន​ដែលជួបគ្នាក្នុងពាន​រង្វាន់​ផ្សេងទៀត​នោះទេ។

តាម​កំណត់​ត្រារបស់ 11v11 ក្រុមជម្រើសជាតិកម្ពុជាឈុតធំ ​ធ្លាប់​ជួប​ជម្រើសជាតិ​ថៃបាន៦​ដង​ដែរគិត​ចាប់​ពី​ឆ្នាំ១៩៥៧រហូត​ដល់​ឆ្នៃ២០០១ ដែល​ក្នុង​នោះ​កម្ពុជា​ចាញ់​៥​ដង​និង​ស្មើ​ម្ដង​គត់ ហើយ​មិន​ដែលឈ្នះទេ​សម្រាប់ជំនួបឈុត​ធំ​នេះ។

សម្រាប់​ពាន​រង្វាន់ AFF Mitsubishi Electric Cup ក្នុង​ឆ្នាំ​នេះ​វិញ វាជា​លើក​ដំបូង​ហើយ​សម្រាប់​ក្រុម​ទាំងពី​ត្រូវ​ជួប​គ្នា។ កម្ពុជា​ត្រូវ​ការ​ឈ្នះ​ជាចាំបាច់​ ដើម្បី​មានឱកាស​ឡើង​ទៅ​វគ្គពាក់កណ្ដាលផ្ដាច់​ព្រ័ត្រជាលើក​ដំបូង​ក្នុង​ប្រវត្តិសាស្រ្តរបស់ខ្លួន ខណៈថៃ​ទប់​បាន​ត្រឹម​ស្មើ​ក៏​ឡើង​ទៅដែរក្នុង​នាមជាក្រុមការពារតំណែងជើងឯក។