(Khmer) កិច្ចសម្ភាសន៍ផ្លូវការជាមួយ ទំព័រហ្វេសប៊ុក Khmer-View ខ្សែបម្រើកូនកាត់ខ្មែរ – នូវែលហ្សេឡង់ កីឡាករ លឹម អារុណរ៉េយមិន បានបង្ហាញចំណាប់អារម្មណ៍ជុំវិញ រកគ្រាប់បាល់ជាលើកដំបូង ក្នុងការប្រកបអាជីពនៅលីគកំពូលកម្ពុជា ជាមួយក្លិប Tiffy Army FC៖

«ខ្ញុំពិតជាសប្បាយចិត្តខ្លាំងមែនទែន នៅពេលរកបាន ១ គ្រាប់លើកដំបូងក្នុងក្រុម។ មិនត្រឹមប៉ុណ្ណោះ ឪពុក ម្តាយ ក៏ដូចជាប្អូនរបស់ខ្ញុំ ក៏សប្បាយចិត្តខ្លាំងផងដែរ នៅពេលខ្ញុំអាចធ្វើវាបាន។ ប៉ុន្តែអ្វីសំខាន់គឺក្រុមឈ្នះទោះបីជាអាចរកគ្រាប់បាន ឬមិនបានក៏ដោយ។ ខ្ញុំចង់អរគុណដល់លោកគ្រូ ភា សុភ័ត្រា ដែលបានផ្តល់ឱកាសឱ្យចូលលេងការប្រកួត។ ចាប់តាំងពីមកទីនេះ (Tiffy Army FC) ខ្ញុំមានជំជឿជាក់លើខ្លួនឯងច្រើនជាងមុន ដោយសារពីមុនមិនសូវមានឱកាសលេង ប៉ុន្តែឥឡូវនេះខ្ញុំមានឱកាសលេង ដូច្នេះហើយ ខ្ញុំនឹងព្យាយាមអភិវឌ្ឍន៍ខ្លួនឱ្យកាន់តែប្រសើរជាងនេះទៀត ដើម្បីជួយក្រុមឈ្នះការប្រកួត ពីព្រោះវាសំខាន់បំផុត»។

លឹម អារុណរ៉េយមិន បន្តទៀតថា៖ «ខ្ញុំយល់ឃើញថាកីទ្បាករនៅទីនេះ ពួកគេមានស្មារតីខ្លាំងនៅពេលជាក្រុម ក៏ដូចជាជួយគ្នា និងគាំទ្រគ្នា ហើយប្រសិនបើបន្តធ្វើវាបែបនេះទៀតខ្ញុំគិតថាវានឹងទទួលបានជោគជ័យ។ ដោយទ្បែក សម្រាប់ផលលំបាករបស់ខ្ញុំនៅទីនេះ គឺមិនសូវចេះនិយាយខ្មែរច្បាស់ អ៊ីចឹងហើយ ការហ្វឹកហាត់ និងប្រកួត ហាក់បីជាមានភាពលំបាកតិចតួច ជាពិសេសនៅពេលស្តាប់កីទ្បាករផ្សេងៗនិយាយគ្នា។ ម៉្យាងទៀត មុននឹងមកទីនេះខ្ញុំមិនបានលេង ១០ ប្រកួត ដូច្នេះហើយ ខ្ញុំប្រហែលជាខ្សោយកម្លាំងតិចតួច។ ប៉ុន្តែឥឡូវនេះ ខ្ញុំលេងបាន ៦ ប្រកួតហើយ អ៊ីចឹងហើយ ខ្ញុំត្រូវតែអភវិឌ្ឍន៍កម្លាំងរាល់ថ្ងៃ ក៏ដូចជាព្យាយាមហាត់ និងយល់ពីតាក់តិចរបស់លោកគ្រូ ភា សុភាត្រា ខ្លាំងជាងមុនបន្ថែមទៀត»។

គួរបញ្ជាក់ថា កីទ្បាករ លឹម អារុណរ៉េយមិន បានស៊ុតបញ្ចូលទី ១ គ្រាប់អោយក្រុមយកឈ្នះលើក្រុមភ្ញៀវវិសាខាក្នុងលទ្ធផល ២-១ សម្រាប់ការប្រកួតលីគសប្តាហ៍ទី ១៦ កាលពីចុងសប្តាហ៍មុន។ នេះក៏ជាគ្រាប់បាល់លើកដំបូងរបស់ លឹម អារុណរ៉េយមិន នារដូវកាលនេះផងដែរ៕