ខ្សែការពារ Virgil van Dijk របស់ Liverpool បាន​ធ្វើ​ការ​ព្រមានមិត្តរួមក្រុម មុនពេលក្រុមរបស់គាត់ទៅលេង Old Trafford ដើម្បីប្រឈមមុខនឹងគូប្រជែង Manchester United នៅថ្ងៃទី 22 ខែសីហា។ គាត់បានសារភាពថាខណៈពេលដែលពួកគេមានលទ្ធផលល្អកាលពីរដូវកាលមុន ហង្សក្រហមនឹងត្រូវប្រឹងប្រែងដើម្បី ផ្តួលបិសាចក្រហមនៅការ​ប្រកួតក្នុង​រដូវកាល​នេះបន្តទៀត។

ក្រុមរបស់លោក Jurgen Klopp បានយកឈ្នះក្រុម Manchester United 5-0 នៅ Old Trafford កាលពីរដូវកាលមុន ដោយកីឡាករ Mohamed Salah ស៊ុតបានបីគ្រាប់។ Liverpool បានបន្តយកឈ្នះ 4-0 នៅលើទឹកដី Anfield នៅជុំទី២។ ទោះ​ជា​យ៉ាង​ណា មុន​ការ​ប៉ះ​គ្នា​នៅ​ថ្ងៃ​ចន្ទ ក្រុម​ទាំង​ពីរ​កំពុង​ជួប​ការ​លំបាក។

ក្រុម​របស់ Erik ten Hag បាន​ធ្លាក់​ចុះគុណភាព​យ៉ាង​ខ្លាំង ដោយ​បាន​ចាញ់​ការ​ប្រកួត​បើក​ឆាក Premier League របស់​ពួក​គេ​ទាំង​ពីរ។ ពួកគេចាញ់ 2-1 ទល់នឹង Brighton & Hove Albion ក្នុងផ្ទះ និង 4-0 ទល់នឹង Brentford ក្រៅផ្ទះ។ Manchester United អង្គុយនៅបាតតារាងជាលើកដំបូងចាប់តាំងពីឆ្នាំ 1992 ។

ទន្ទឹម​នឹង​នេះ Liverpool បាន​ទទួលត្រឹមតែស្មើ​ការ​ប្រកួត​បើក​ឆាក​របស់​ពួក​គេ​ទាំង​ពីរ។ ពួកគេស្មើ 2-2 ទល់នឹងក្រុម Fulham ដែលទើបឡើងមកពីលីគ២ និងស្មើ 1-1 ទល់នឹង Crystal Palace នៅកីឡដ្ឋាន Anfield ។ ដូច្នេះក្រុមទាំងពីរនឹងសម្លឹងរកការឈ្នះដំបូងនៃរដូវកាលរបស់ពួកគេនៅក្នុងការប្រកួត North West Derby នាពេលខាងមុខ។

ថ្លែងនៅមុនការប្រកួត Van Dijk បាននិយាយ (តាមរយៈ Manchester Evening News)៖«ពួកគេ [United] គឺជាក្រុមដ៏ល្អមួយ តាមគំនិតរបស់ខ្ញុំ ពួកគេមានកីឡាករល្អពេញទីលាន។ ជាក់ស្តែង ពួកគេមិនស្ថិតក្នុងស្ថានភាពល្អបំផុតដែលមានភាពជឿជាក់នោះទេ ប៉ុន្តែវាជាការប្រកួតដ៏ល្អឥតខ្ចោះ ដើម្បីផ្លាស់ប្តូរវាសម្រាប់ពួកគេ។

” យើងសម្លឹងមើលខ្លួនឯង ហើយយើងចង់ធ្វើឱ្យប្រាកដថា យើងត្រៀមខ្លួនសម្រាប់វា ហើយយើងនឹងប្រឹងប្រែងម្តងទៀតនៅសប្តាហ៍នេះ”។

“យើងចង់ឈ្នះ ហើយធ្វើអ្វីគ្រប់យ៉ាងដែលអាចធ្វើទៅបានដើម្បីឈ្នះនៅទីនោះ។ ប៉ុន្មានឆ្នាំមកនេះ វាបានបង្ហាញពីភាពលំបាកសម្រាប់ពួកយើងក្នុងការឈ្នះនៅទីនោះ។ ជាក់ស្តែងកាលពីឆ្នាំមុនគឺជាលទ្ធផលដ៏អស្ចារ្យ យើងមិនអាចបដិសេធបានឡើយ។ ឆ្នាំនេះ ពួកគេមានការចាប់ផ្តើមដ៏លំបាក ហើយយើងមិនមានការចាប់ផ្តើមដ៏ល្អបំផុតដែលយើងចង់បាននោះទេ ដូច្នេះវានឹងគួរឱ្យចាប់អារម្មណ៍”។