ក្រសែរភ្នែកជាច្រើនម៉ឺននាក់ របស់អ្នកគាំទ្រវិស័យបាល់ទាត់កម្ពុជា កំពុងតែរង់ចាំទស្សនាការបង្ហាញខ្លួនជាលើកដំបូង របស់កូនកាត់ខ្មែរ-អាមេរិក ថេឡរ នីកូឡាស់ ឌឿង (Nick Taylor) ជាមួយនឹងក្លិបព្រះខ័នរាជស្វាយរៀង ក្នុងក្របខណ្ឌពានរង្វាន់ Cambodian League Cup 2023 ដែលគ្រោងនឹងចាប់ផ្តើមប្រកួតដំបូងនៅចុងសប្តាហ៍នេះ។

យោងតាមបញ្ជីឈ្មោះផ្លូវការរបស់ក្លិបព្រះខ័នរាជស្វាយរៀង សម្រាប់ការប្រកួតពានរង្វាន់ Cambodian League Cup 2023 គឺមិនមានឈ្មោះ ថេឡរ នីកូឡាស់ ឌឿង (Nick Taylor) ឡើយ ក្នុងពានរង្វាន់មួយនេះ។ ដូច្នេះក៏កើតជាចម្ងល់មួយផងដែរ សម្រាប់មហាជនក្នុងស្រទាប់វិស័យបាល់ទាត់កម្ពុជា។

ជុំវិញចម្ងល់ខាងលើ ក្រុមការងារ B8-sport.net ក៏បានសាកសួរទៅកាន់ថ្នាក់ដឹកនាំក្លិបផងដែរ ដោយក្នុងនោះយើងទទួលបានចម្លើយថា៖

«ដោយសារតែទីផ្សារដោះដូរកីឡាករអន្តរជាតិ មិនទាន់បើក យើងមិនអាចទទួលបាន [វិញ្ញាបនបត្រផ្ទេរអន្តរជាតិ] International Transfer Certificate (ITC) របស់គាត់ពីសហរដ្ឋអាមេរិក ដូច្នេះយើងត្រូវរង់ចាំរហូតដល់ទីផ្សារដោះដូរកីឡាករត្រូវបានបើក ទើបយើងអាចទទួលបានឯកសារគ្រប់គ្រាន់ ដើម្បីចុះឈ្មោះ Nick Taylor តាមលក្ខខណ្ឌនៃតម្រូវការរបស់សហព័ន្ធបាល់ទាត់កម្ពុជា (FFC)។»

ក្លិបព្រះខ័នរាជស្វាយរៀង នឹងត្រូវធ្វើការប្រកួតដំបូងរបស់ខ្លួន នៃពានរង្វាន់ Cambodian League Cup 2023 ទល់នឹងក្លិបភ្នំពេញក្រោន នៅថ្ងៃទី១៨ ខែកុម្ភៈ នៅកីឡដ្ឋានស្តាតចាស់