សមត្ថភាពក្នុងការគ្រប់គ្រងតំបន់បម្រើកណ្តាលដោយភាពច្នៃប្រឌិត និងចក្ខុវិស័យក្នុងកម្រិតខ្ពស់បំផុត វាគឺជាជំនាញដោយឡែកមួយរបស់ខ្សែបម្រើសញ្ជាតិ​អាឡឺម៉ង់ Toni Kroos ។

ការពិតនេះ! ធ្វើឱ្យគាត់ក្លាយជាខ្សែបម្រើដ៏ឆ្នើមម្នាក់ក្នុងពិភពលោកក្នុងយុគបាល់ទាត់សម័យទំនើបនេះ បន្ថែមពីលើជើងឯក ឬពានរង្វាន់ផ្សេងៗដែលគាត់បានឈ្នះចាប់តាំងពីបានចូលរួមក្នុងវិស័យបាល់ទាត់អាជីព។

ទោះជាយ៉ាងណាក៏ដោយ វាពិតជាមានរឿងមួយទៀតដែលធ្វើឲ្យគាត់កាន់តែជិតស្និទ្ធក្នុងចិត្តអ្នកគាំទ្របាល់ទាត់ជុំវិញពិភពលោក នោះគឺភាពស្មោះត្រង់របស់ Kroos ចំពោះស្បែកជើងបាល់ Adipure 11pro ដែលផលិតដោយម៉ាកល្បីឈ្មោះ adidas នៅពេលធ្វើសកម្មភាពលើទីលាន។ មិនដូចកីឡាករបាល់ទាត់ផ្សេងទៀតដែលនឹងផ្លាស់ប្តូររសជាតិរបស់ពួកគេប្រសិនបើមានម៉ូដែលស្បែកជើងចេញថ្មី ប៉ុន្តែ Kroos នៅតែស្មោះត្រង់ចំពោះស្បែកជើងបាល់ទាត់ដែលមានពណ៌រួមបញ្ចូលគ្នានៃសខ្មៅនិង ‘លាយពណ៌ផ្ទៃមេឃ’ ចាប់តាំងពីឆ្នាំ 2013 ។ Toni Kroos ច្បាស់ជាមានហេតុផលផ្ទាល់ខ្លួនក្នុងការបន្តប្រើប្រាស់ស្បែកជើងនេះ បើទោះបីជាគេដឹងថា adidas បានចេញម៉ូដថ្មីៗជាច្រើនក៏ដោយ។ Kroos បាននិយាយនៅក្នុងភាពយន្តឯកសារពិសេសអំពីខ្លួនគាត់ថា៖

“ប្រសិនបើវាជាមធ្យោបាយផ្សេងទៀត ខ្ញុំនឹងមានអារម្មណ៍មិនស្រួល” ។

“ខ្ញុំដឹងថាមនុស្សនិយាយថាខ្ញុំឆ្កួត ប៉ុន្តែជាក់ស្តែងសម្រាប់ខ្ញុំ វាមានសារៈសំខាន់ខ្លាំងណាស់ក្នុងការឃើញស្បែកជើងពណ៌សនៅពេលខ្ញុំពាក់ ចូរមើលចុះ”។

“ខ្ញុំ​មិន​ដឹង​ថា​វា​ជា​បញ្ហា​ផ្លូវចិត្ត​មួយ​ដែល​ខ្ញុំ​មាន​ឬ​អត់​ទេ ប៉ុន្តែ​ស្បែក​ជើង​របស់​ខ្ញុំ​ត្រូវ​តែ​ពណ៌​ស​ពេលដែល​ខ្ញុំ​លេង”។

អតីតមិត្តរួមក្រុមរបស់គាត់នៅក្លឹប Real Madrid កីឡាករ Gareth Bale ក៏បានបង្ហាញផងដែរថា Kroos មានស្បែកជើងពណ៌សពី 3 ទៅ 4 គូហើយគាត់ផ្ទាល់បានសម្អាតស្បែកជើងរបស់គាត់ដោយខ្លួនឯងដោយមិនរំពឹងថានឹងមាន Kitman ជួយសម្អត់ឱ្យនោះទេ។

“យើងមានអារម្មណ៍ថាគាត់មិនទុកចិត្ត kitman របស់ក្លិបយើងក្នុងការសម្អាតស្បែកជើងរបស់គាត់។ ដូច្នេះ គាត់​នឹង​សម្អាត​ស្បែក​ជើង​របស់​គាត់​ជា​និច្ច ដើម្បី​ឱ្យ​ប្រាកដថា​វា​ស្អាត និង​ល្អឥតខ្ចោះ»។

ក្នុងពេលជាមួយគ្នានេះ វាក៏បានផ្ទុះឡើងផងដែរ នៅក្នុងការប្រកួតវគ្គផ្តាច់ព្រ័ត្រ European Champions League (UCL) ឆ្នាំ 2021/22 ទល់នឹង Liverpool កាលពីខែឧសភាឆ្នាំមុន នៅពេលដែលស្បែកជើង Adipure 11pro ដែល Kroos ប្រើគឺស្ថិតក្នុងស្ថានភាពអាក្រក់(ចាស់ យារ និង​ទក់សាច់)រួចទៅហើយ។

យោងតាមប្រភពនៃទំព័រហ្វេសប៊ុកពីប្រទេសថៃ Understuds ដែលផ្តោតលើការជ្រើសរើសស្បែកជើងបាល់ទាត់ក្នុងចំណោមកីឡាករបាល់ទាត់ពិភពលោក Kroos ពិតជាទទួលបានស្បែកជើងថ្មីពី adidas ជាមួយនឹង “ព័ត៌មានលម្អិតនៃការប្រកួត” នៃការប្រកួតចុងក្រោយដែលសរសេរនៅលើស្បែកជើង។ ទោះជាយ៉ាងណាក៏ដោយ ប្រហែលជាដោយសារតែកត្តាផាសុកភាព (ពាក់អាចាស់ស្រួលជាង) កីឡាករវ័យ 32 ឆ្នាំរូបនេះនៅតែជ្រើសរើសពាក់ ‘អាវុធ’ ចាស់របស់គាត់ក្នុងអំឡុងពេលសកម្មភាពនៅឯកីឡដ្ឋាន Stade De France ទីក្រុងប៉ារីស។

កាន់តែផ្អែមល្ហែមជាងនេះទៅទៀតនោះ វាគឺជាជើងឯក UCL លើកទីបួនដែលគាត់ឈ្នះជាមួយ Real Madrid ដោយប្រើស្បែកជើងបាល់ទាត់ដូចគ្នា។ ស្បែក​ជើងដែលមានអត្ថន័យមួយនេះ គេមិនឃើញ Kroos ពាក់ទៀតទេ ហើយគាត់ហាក់ដូចជាបានប្រើស្បែកជើងថ្មី ប៉ុន្តែនៅតែមានម៉ូដែលដូចគ្នាក្នុងអំឡុងពេលការប្រកួត Super Cup ទល់នឹង Eintracht Frakfurt និង La Liga លើកដំបូងទល់នឹង Almeria កាលពីយប់មិញ។ ច្បាស់ស្បែកជើងងាចាស់ខ្លាំងរបស់គាត់ពាក់លែងកើត ហើយ​ពាក់អាថ្មីតែម៉ូតដដែល។ សួរថា​អាចាស់នុះបោះចោលទេ? ទេ! វាពិតជាមានតម្លៃសម្រាប់គាត់។

ទោះបីជាវាគ្រាន់តែជាការជ្រើសរើសស្បែកជើងបាល់ទាត់មួយគូក៏ដោយ វាច្បាស់ណាស់ក្នុងការប្រាប់អំពី ‘រឿងស្នេហាស្មោះស្ម័គ្រ’ តែមួយគត់របស់ Toni Kroos ចំពោះស្បែកជើងបាល់ទាត់ដែលគាត់ចូលចិត្ត។