សមាគមកីឡាបាល់ទាត់នៃប្រទេសឥណ្ឌូនេស៊ី (PSSI) បានជូនដំណឹងដល់សហព័ន្ធកីឡាបាល់ទាត់អាស៊ាន (AFF) នៅថ្ងៃនេះថាពួកគេពិតបានដកខ្លួនចេញពីការប្រកួតពានរង្វាន់ AFF U23 Championship 2022 នាពេលខាងមុខ ដោយសារជំងឺកូវីដ-១៩។

សមាជិកមួយចំនួននៃក្រុម U23 ឥណ្ឌូណេស៊ី បានធ្វើតេស្តវិជ្ជមាន COVID-19 អំឡុងពេលធ្វើតេស្តមុនពេលចេញដំណើររបស់ពួកគេ ជាមួយនឹងក្រុមកីឡាករមួយចំនួនធំដាក់ឱ្យនៅដាច់ដោយឡែកសម្រាប់ការសង្កេតបន្ថែម បន្ទាប់​ពី​ពួកគេត្រូវបានគេកំណត់ថាជាទំនាក់ទំនងជិតស្និទ្ធរបស់សមាជិកវិជ្ជមានទាំងនេះ។

ប្រធាន AFF ឧត្តមសេនីយ៍ឯក ខៀវ សាម៉េត មានប្រសាសន៍ថា៖ “យើងមានការសោកស្ដាយជាខ្លាំងដែលបានទទួលព័ត៌មានពី PSSI ប៉ុន្តែយើងយល់យ៉ាងពេញលេញ និងយល់ចិត្តក្រុម U23 ឥណ្ឌូនេស៊ី។ ជំងឺរាតត្បាតបានប៉ះពាល់ដល់ប្រជាជនជាច្រើននៅក្នុងតំបន់អាស៊ាន ហើយបន្តប៉ះពាល់ដល់សហគមន៍របស់យើងសព្វថ្ងៃនេះ។ ខណៈពេលដែលយើងនឹងខកខានក្នុងការឃើញក្រុម U23 ឥណ្ឌូនេស៊ីការពារដំណែងជើងឯករបស់ពួកគេនៅឆ្នាំនេះ យើងជឿជាក់ថាសុខភាព និងសុវត្ថិភាពរបស់អ្នកទាំងអស់គ្នា មានសារៈសំខាន់បំផុត ហើយសូមជូនពរសមាជិកដែលរងផលប៉ះពាល់នៃក្រុម U23 ឥណ្ឌូនេស៊ី ឆាប់ជាសះស្បើយ”។

ឥណ្ឌូណេស៊ី គ្រោងនឹងចាប់ផ្តើមយុទ្ធនាការរបស់ពួកគេក្នុងពូល B នៅថ្ងៃទី ១៥ ខែកុម្ភៈ ទល់នឹងឡាវ នៅកីឡដ្ឋាន Prince Stadium។ កាលវិភាគប្រកួតដែលត្រូវបានកែសម្រួលនឹងត្រូវប្រកាសក្នុងពេលឆាប់ៗនេះ។