(English) យោងតាមការចុះផ្សាយរបស់សារព័ត៌មាន BBC បានឱ្យដឹងថាក្លិប Brighton បានច្រានចោលសំណើពី Al-Nassr ក្នុងការសុំទិញខ្សែប្រយុទ្ធសញ្ជាតិជប៉ុន Kaoru Mitoma ដែលជាតួអង្គសំខាន់របស់ក្រុម។  ប្រភពដដែលបានបន្តថា ការដេញថ្លៃនេះត្រូវបានគេជឿថាមានតម្លៃ ៦៥ លានអឺរ៉ូ  ប៉ុន្តែប្រភពដែលមានការយល់ដឹងអំពីស្ថានភាពនិយាយថា Brighton មិនចាំបាច់លក់ និងច្រានចោលការផ្តល់ជូននេះចេញពីដៃនោះទេ។ ទោះជាយ៉ាងណាក៏ដោយ គេរំពឹងថា Al-Nassr នឹងត្រឡប់មកវិញជាមួយនឹងការដេញថ្លៃខ្ពស់ជាងនេះ។

ខណៈពេល Brighton មានទំនុកចិត្តលើតួនាទីរបស់ពួកគេ ហើយជឿថា Mitoma មិនមានការចង់ចាកចេញនោះទេ ចំនួនទឹកប្រាក់ដែលពាក់ព័ន្ធយ៉ាងហោចណាស់ត្រូវបានពិចារណាយ៉ាងម៉ត់ចត់ដោយកីឡាករវ័យ ២៧ ឆ្នាំ ហើយវាមិនអាចត្រូវបានបដិសេធទាំងស្រុងថាកិច្ចព្រមព្រៀងនឹងឈានដល់នោះទេ។ Mitoma ទើបតែចុះកុងត្រាថ្មីជាមួយនឹង Brighton កាលពីខែតុលា ឆ្នាំ២០២៣ ដែលមានសុពលភាពរហូតដល់ខែមិថុនា ឆ្នាំ២០២៧ ឯណោះ។ រូបគេជាកីទ្បាករតែមួយគត់ដែលល្បីល្បាញជាងគេនៅ Brighton ហើយមន្ត្រីក្លិបបានដឹងយ៉ាងច្បាស់អំពីផលប៉ះពាល់ពាណិជ្ជកម្មដែលរូបគេបង្កើតនៅក្នុងប្រទេសជប៉ុន ដោយសារពួកគេបានទៅលេងប្រទេស មុនពេលចាប់ផ្តើមយុទ្ធនាការបច្ចុប្បន្ន។ Mitoma បានចូលរួមជាមួយនឹងក្លិប Brighton ដែលផ្ទេរពី Kawasaki Frontale ក្នុងឆ្នាំ ២០២១។

Mitoma បានបង្ហាញខ្លួនចំនួន ៩២ ប្រកួត និងស៊ុតបញ្ចូលទីបាន ១៨ គ្រាប់នៅក្នុងការប្រកួតទាំងអស់ ហើយជាកីឡាកររបស់ Brighton តែមួយគត់ដែលបានបង្ហាញខ្លួននៅក្នុងការប្រកួត Premier League ទាំង ២៣ លើកនៅរដូវកាលនេះ។  ក្លិប Al-Nassr ដែលមាន Cristiano Ronaldo, Sadio Mane និង Aymeric Laporte ទើបតែបញ្ចប់ក្នុងការចុះកិច្ចសន្យានាំយកខ្សែប្រយុទ្ធ Jhon Duran ពី Aston Villa ក្នុងតម្លៃ ៦៥ លានផោន ខណៈដែលទីផ្សារដោះដូរកីទ្បាករនៅ Saudi Pro-League នឹងបិទបញ្ចប់នៅថ្ងៃនេះហើយ៕

ប្រភព៖ BBC