Luton Town បានបង្កើតប្រវត្តិសាស្ត្រមួយតាមរយៈការប្រកួតជម្រុះក្នុងក្របខ័ណ្ឌ English Premier League ជាលើកដំបូង បន្ទាប់ពីបានយកឈ្នះលើក្រុម Coventry City ក្នុងការប្រកួតវគ្គ Playoff ផ្តាច់ព្រ័ត្រក្របខ័ណ្ឌ Championship នៅកីឡដ្ឋាន Wembley កាលពីថ្ងៃសៅរ៍។
Luton បានបើកការស៊ុតបញ្ចូលទីមុនគេតាមរយៈ Jordan Clark នៅនាទីទី 23 មុនពេល Coventry តាមស្មើតាមរយៈការស៊ុតរបស់ Gustavo Hamer នៅនាទីទី 66 ។ ការប្រកួតត្រូវអូសបន្លាយដល់ការទាត់ប៉េណាល់ទីបន្ទាប់ពីត្រូវបានស្មើ 1-1 រហូតដល់ម៉ោងបន្ថែម១៥នាទី២ដង។
ទោះជាយ៉ាងណាក៏ដោយ កីឡាករ Fankaty Dabo របស់ Coventry ទាត់បាល់ប៉េណាល់ទីចុងក្រោយមិនចូល ហើយជ័យជម្នះបានមកលើ Luton Town ។
Luton Town, who were non-League in 13-14, are now in the Premier League. Incredible doesn’t even describe it. Kenilworth Road stadium hosts a little more than 10,000. Oak Road End is so unique. You go through turnstiles between houses + their back gardens pic.twitter.com/VYHsHLxQIG
— Luis Miguel Echegaray (@lmechegaray) May 27, 2023
Luton Town នឹងចូលរួមជាមួយក្រុម Sheffield United និង Burnley ក្នុងក្របខ័ណ្ឌ English Premier League នៅរដូវកាលក្រោយ។ ពួកគេពិតជាបានលេងនៅក្នុងលីគកំពូលអង់គ្លេសក្នុងរដូវកាល 1991 ដល់ 1992 មុនពេលប្ដូរឈ្មោះមកជា English Premier League (EPL)។
ដំណើររបស់ក្លឹបនេះទៅក្របខ័ណ្ឌ English Premier League មិនងាយស្រួលទេ ហើយពោរពេញទៅដោយបញ្ហាប្រឈម និងហួសពីការស្មាន។ ពួកគេជាក្រុមដែលលេងនៅលីគក្រៅប្រព័ន្ធរបស់បាល់ទាត់អង់គ្លេស ឬអាចនិយាយបានថា លីគពាក់កណ្ដាលអាជីពក្នុងរដូវកាល 2009 ដល់ 2014 ហើយចាប់តាំងពីពេលនោះមក ពួកគេបានចាប់ផ្តើមឡើងបន្តិចម្ដងៗ។
ធ្លាប់ជួបប្រទះនឹងបញ្ហាហិរញ្ញវត្ថុដែលធ្វើឲ្យក្លឹបធ្លាក់ចុះយ៉ាងខ្លាំងរហូតដល់ជាប់គាំងនៅលីគទាបបំផុត។ ទោះបីជាយ៉ាងណាក៏ដោយ វាមិនបានរារាំងពួកគេពីការផ្លាស់ប្តូរផ្សេងៗ ដើម្បីសម្រេចបាននូវមហិច្ឆតានៃការលេងនៅលីគកំពូលអង់គ្លេសនោះទេ។ នាយកប្រតិបត្តិ Luton Town លោក Gary Sweet បាននិយាយថា ៖«ការចំណាយពេល 5 ឆ្នាំនៅក្នុង Non-League បានផ្តល់ឱ្យយើងនូវមេរៀនដ៏មានតម្លៃនៅក្នុងដំណើរការនៃការអភិវឌ្ឍមូលដ្ឋានគ្រឹះ និងស្ថេរភាពដែលបន្តផ្តល់ផលប្រយោជន៍ដល់ក្លឹបរហូតមកដល់សព្វថ្ងៃនេះ»។
អ្វីដែលគួរឱ្យចាប់អារម្មណ៍ជាងនេះទៅទៀតនោះ Luton Town នឹងស្ថិតក្នុងការចាប់អារម្មណ៍នៅរដូវកាលក្រោយ ដោយសារតែក្លឹបយក្សមួយចំនួនដូចជា Manchester United, City, Liverpool និង Arsenal នឹងមានឱកាសទទួលបានបទពិសោធន៍លេងនៅកីឡដ្ឋាន Kenilworth Road។
កីឡដ្ឋានដ៏ពិសេសនេះហ៊ុំព័ទ្ធដោយតំបន់លំនៅដ្ឋានប្រជាពលរដ្ឋ ហើយមានសមត្ថភាពផ្ទុកត្រឹមតែ 10,356 កៅអីប៉ុណ្ណោះ។ វាជាកីឡដ្ឋានតូចបំផុតរបស់ English Premier League ដែលមានទីតាំងនៅខាងក្រោយផ្ទះ និងនៅក្រោមបន្ទប់គេង។
ទោះជាយ៉ាងណាក៏ដោយ កីឡដ្ឋាននឹងត្រូវបានកែលម្អដើម្បីបំពេញតាមស្តង់ដារ Premier League របស់អង់គ្លេស ដូចជា កន្លែងឈររបស់សន្តិសុខ កន្លែងប្រព័ន្ធផ្សព្វផ្សាយ បន្ថែមអំពូលភ្លើង គុណភាព CCTV ជាដើម។
ការឈ្នះរង្វាន់ដែលមានតម្លៃចន្លោះពី 135 លានផោនដល់ 265 លានផោនពីការផ្សព្វផ្សាយអាចជួយក្រុមចំណាយសម្រាប់ការធ្វើឱ្យប្រសើរឡើងនូវកីឡដ្ឋានដែលមានតម្លៃ 10 លានផោន។ ដំណើរការធ្វើឱ្យប្រសើរឡើងនេះ ត្រូវបានគេរំពឹងថានឹងបញ្ចប់នៅឆ្នាំ 2026 ហើយវានៅតែបន្តដោយមិនគិតពីទីតាំងរបស់កីឡដ្ឋានក្នុងរយៈពេល 4 ឆ្នាំ។
