អតីតខ្សែបម្រើ Chelsea និង Man United កីឡាករ Nemanja Matic បានបើកចំហរអំពីភាពខុសគ្នារវាងក្លិបទាំងពីរកំឡុងពេលគាត់លេងនៅ Premier League ។

កីឡាករវ័យ 36 ឆ្នាំបានប្រាប់ The Athletic ថា៖ “ភាពខុសគ្នាដែលខ្ញុំទទួលបាន បន្ទាប់ពី Chelsea គឺនៅ Chelsea អ្វីគ្រប់យ៉ាងគឺអំពីលទ្ធផល និងការឈ្នះពានរង្វាន់»។

«នៅទីនោះគឺជាស្មារតីនៅក្នុងក្លិបទាំងមូល សូម្បីតែអ្នកកាត់ស្មៅក៏ចង់ឈ្នះពានដែរ។ លោក Roman Abramovich គ្រាន់តែសួរយើងអំពីលទ្ធផលតែប៉ុណ្ណោះ»។

«នៅ United គេនិយាយពីគំនិតក្នុងការធ្វើជំនួញច្រើនជាង។ ខ្ញុំចាប់ផ្តើមគិត បន្ទាប់ពីចូលរួមបានពីរបីខែនៅក្នុងក្លិប»។

«ខ្ញុំបានមកដល់ United ជាមួយភាពស្រេកឃ្លានក្នុងការឈ្នះពានរង្វាន់ ដូចដែលខ្ញុំមាននៅ Chelsea ប៉ុន្តែមួយជំហានម្តងៗ ខ្ញុំចាប់ផ្តើមមានអារម្មណ៍ថាពានរង្វាន់មិនមែនជាការផ្តោតអារម្មណ៍នោះទេ»។

«ខ្ញុំយល់ថាប្រាក់ខែរបស់យើងត្រូវតែទទួលបាន ប៉ុន្តែខ្ញុំមានអារម្មណ៍ថាលទ្ធផលមិនមែនជាការផ្តោតអារម្មណ៍ដូចនៅ Chelsea ទេ។ ខ្ញុំប្រហែលជាធ្វើការងារផ្នែកពាណិជ្ជកម្មត្រឹមតែពីរនៅ Chelsea ហើយនៅ United វាច្រើនជាងនេះទៅទៀត»។

Matic បានចាកចេញពី Chelsea ទៅ Man United ក្នុងឆ្នាំ 2017 ហើយស្នាក់នៅ Old Trafford អស់រយៈពេល 5 ឆ្នាំ។ ចាប់តាំងពីពេលនោះមក រចនាសម្ព័ន្ធកម្មសិទ្ធិបានផ្លាស់ប្តូរនៅក្លិបទាំងពីរ។

នៅថ្ងៃព្រហស្បតិ៍ Matic អាចប្រឈមមុខនឹងអតីតក្លិបមួយរបស់គាត់ ខណៈដែល Lyon កំពុងជួប Man United ក្នុងក្របខ័ណ្ឌ Europa League ។

(English) ក្រុមអង់គ្លេសត្រូវបានធានាយ៉ាងហោចណាស់ប្រាំក្រុមនៅក្នុងក្របខណ្ឌ Champions League រដូវកាលក្រោយ បន្ទាប់ពីក្រុម Arsenal យកឈ្នះលើក្រុម Real Madrid ក្នុងជើងទីមួយនៃវគ្គ 1/4 ផ្តាច់ព្រ័ត្រ។ ការឈ្នះមួយនៅក្នុងការប្រកួតអ៊ឺរ៉ុបទាំងបីនឹងអាចទទួលបានកៅអីទី ៥ សម្រាប់ប្រទេសអង់គ្លេស។ ចំណែកឯកៅអី ២ បន្ថែមទៀតត្រូវបានផ្តល់រង្វាន់ដល់ប្រទេសដោយផ្អែកលើចំណាត់ថ្នាក់របស់ពួកគេនៅក្នុងតារាងមេគុណរបស់ Uefa ។

Liverpool និង Arsenal ក៏សម្លឹង​រក​ការ​បញ្ចប់​ក្នុង​ចំណាត់​ថ្នាក់​កំពូល​ក្នុង Premier League ដោយ​មាន Nottingham Forest, Chelsea, Newcastle, Manchester City, Aston Villa, Brighton និង Bournemouth ដែល​ឈរ​នៅ​លេខ​រៀង​ទី​១០ កំពុងប្រជែងគ្នា។

អង់គ្លេសអាចមានក្រុមរហូតដល់ប្រាំពីរក្នុង Champions League នៅឆ្នាំ២០២៥-២៦ ប្រសិនបើ Aston Villa ឈ្នះការប្រកួតនៅឆ្នាំនេះ ប៉ុន្តែបរាជ័យក្នុងវគ្គជម្រុះតាម Premier League ហើយប្រសិនបើ Manchester United ឬ Tottenham ឈ្នះ Europa League ។

អ៊ីតាលី​ស្ថិត​នៅ​លំដាប់​ទី​ពីរ​ក្នុង​ចំណាត់​ថ្នាក់​មេគុណ ដោយ​មាន​អេស្ប៉ាញ និង​អាល្លឺម៉ង់​តាម​ពី​ក្រោយ។ពិន្ទុមេគុណត្រូវបានទទួលបានតាមរយៈលទ្ធផលនៃការប្រកួតគឺ ២ពិន្ទុសម្រាប់ការឈ្នះ និងមួយសម្រាប់ស្មើ។ពិន្ទុដែលរកបានដោយក្លឹបមកពីលីកក្នុងស្រុកដូចគ្នាត្រូវបានបូកបញ្ចូល និងបែងចែកដោយចំនួនក្លឹបដែលលីកមាននៅអឺរ៉ុប៕

ប្រភព៖ BBC

Vinicius កំពុងការលំបាកតាំងពីលទ្ធផលក្រឡាប់ចាក់រឿងមិនឈ្នះ Ballon d’Or ខណៈដែលទម្រង់លេងរបស់គាត់ធ្លាក់ចុះបន្តិចម្ដងៗ ហើយ Kylian Mbappe កំពុងតែប្រជែងយកភាពសំខាន់របស់គាត់នៅ Real Madrid ។

មួយរយៈកាលចុងក្រោយ កីឡាករសញ្ជាតិប្រេស៊ីលបានដោះស្រាយបញ្ហាជាច្រើនដូចជា ការព្យួរ ការរងរបួស និងអស់កម្លាំង ដែលធ្វើឱ្យវាក្លាយជារដូវកាលដ៏លំបាកបំផុតរបស់គាត់នៅក្លិប។ ហើយកាលពីប៉ុន្មានថ្ងៃមុន លោក Carlo Ancelotti បានដកសិទ្ធិស៊ុតបាល់ប៉េណាល់ទីទៅឱ្យ Mbappe ទៀតផង។

យោងតាម Fichajes ឥឡូវនេះ Manchester United ចាប់អារម្មណ៍ក្នុងការចុះហត្ថលេខាលើ Vinicius ។ របាយការណ៍នេះបញ្ជាក់ថា United មើលឃើញគាត់ជាតួអង្គសំខាន់ក្នុងការកសាងគម្រោងរបស់ពួកគេឡើងវិញ ហើយត្រៀមខ្លួនជាស្រេច ដើម្បីផ្ទេរយកគាត់ ប្រសិនបើពួកគេមានលក្ខណៈគ្រប់គ្រាន់សម្រាប់ការប្រកួត Champions League នៅរដូវកាលក្រោយ។

United មិនអាចឈានដល់ Champions League តាមរយៈចំណាត់ថ្នាក់ Premier League បានតេ ហើយពួកគេត្រូវតែឈ្នះ Europa League ដើម្បីមានសិទ្ធិ។ ប្រសិនបើពួកគេអាចធ្វើបែបនេះបាន Fichajes អះអាងថាពួកគេនឹងដាក់សំណើ 200 លានអឺរ៉ូសម្រាប់ខ្សែប្រយុទ្ធវ័យ 24 ឆ្នាំ។

Real Madrid មិនទទួលបានសំណើណាមួយសម្រាប់ Vinicius ហើយលក្ខខណ្ឌផ្ដាច់កុងត្រារបស់គាត់នៅតែថ្លៃពោលគឺ១ពាន់លានអឺរ៉ូ៕

(English) យោងតាម របាយការណ៍ពីសហព័ន្ធអន្តរជាតិប្រវត្តិសាស្រ្ត និងស្ថិតិកីឡាបាល់ទាត់ (IFFHS) ស្តីពីចំណាត់ថ្នាក់ របស់លីគបាល់ទាត់ជាតិនានាជុំវិញពិភពលោក ដែលប្រកួតមិនចាញ់បានយូរបំផុត ដែលត្រូវបានគេហទំព័រ Givemesport.com ដកស្រង់ចេញផ្សាយកាលពីថ្ងៃអង្គារទី​០៨ ខែមេសា ឆ្នាំ២០២៥ បានឱ្យដឹងថា ក្លិបបាល់ទាត់ Lincoln របស់ប្រទេសហ្ស៊ីប្រាល់តា (Gibraltar) ដែលធ្លាប់ឈ្នះពានរង្វាន់ Gibraltar Premier Division ១៤ ដងជាប់ៗគ្នា ​គឺជាក្លិបដែលប្រកួតមិនធ្លាប់ចាញ់រយៈពេលវែងបំផុតក្នុងតំបន់អឺរ៉ុបនៅក្នុងសតវត្សរ៍ទី​២១។

ក្លិបនេះរក្សាបានការប្រកួតមិនចាញ់ចំនួន ៨៨ គិតចាប់ពីឆ្នាំ ២០០៩- ២០១៤ ក្នុងរយៈពេល ១៩៥៩ ថ្ងៃ។ សម្រាប់រដូវកាល ២០២៤-២៥ ដែលទេីបបញ្ចប់កាលពីពេលថ្មីៗនេះ ក្លិប Lincoln ឈរលេខ ២ ក្នុងតារាង។ ចំណែកឯក្លឹបបាល់ទាត់អេហ្ស៊ីប Al Ahly ឈរលំដាប់ថ្នាក់លេខ២ រក្សាការប្រកួតមិនចាញ់បាន ៧១ប្រកួតក្នុងចន្លោះឆ្នាំ ២០០៤-២០០៧។ ចំណាត់ថ្នាក់លេខ៣បានទៅលេីក្លិប Sheeriff របស់ប្រទេសម៉ុលដាវី ក្នុងចន្លោះឆ្នាំ ២០០៦-២០០៨ រក្សាការប្រកួតមិនចាញ់បាន ៦៣ប្រកួត៕

(English) ម្ចាស់ក្លិប Inter Miami លោក David Beckham កំពុងពិចារណាដាក់សំណើរទៅកាន់កីឡាករ Kevin De Bruyne ដើម្បីនាំយកតារាឆ្នើមរូបនេះមកចាប់ដៃគូជាមួយ Lionel Messi ។

ចំណាប់អារម្មណ៍របស់ លោក Beckham បានកើតឡើងបន្ទាប់ពី De Bruyne បានប្រកាសកាលពីសប្តាហ៍មុនថាគាត់នឹងចាកចេញពី Manchester City នៅចុងបញ្ចប់នៃរដូវកាលដោយមិនគិតថ្លៃ។ ឥឡូវនេះ Inter Miami កំពុងស្វែងរកលទ្ធភាពនៃការចុះហត្ថលេខាកីឡាករម្នាក់បន្ថែមទៀត ទោះបីជា Angel Di Maria ក៏បានលេចចេញជាគោលដៅដ៏មានសក្តានុពលតែ Inter Miami មិនអាចជាទីសំចតរបស់អ្នកទាំងពីរក្នុងពេលតែមួយបានឡើយ។ Messi ដែលជាមិត្តរួមក្រុមអន្តរជាតិរបស់ Di Maria ជាមួយអាហ្សង់ទីន គឺជាមិត្តជិតស្និទ្ធនឹងអតីតខ្សែបម្រើស្លាប Manchester United ដែលបច្ចុប្បន្ននៅជាមួយ Benfica ។

ជាមួយគ្នានេះដែរDe Bruyne ក៏មានការចាប់អារម្មណ៍យ៉ាងខ្លាំងពី Saudi Pro League កាលពីឆ្នាំមុន ប៉ុន្តែបានសម្រេចចិត្តស្នាក់នៅជាមួយ City សម្រាប់យុទ្ធនាការទី១០។ Inter Miami មាន​កីឡាករ​អតិបរមា​ចំនួន​បី​នាក់​ដែល​បាន​កំណត់​រួច​ហើយ​គឺ Messi, Sergio Busquets និង Jordi Alba ៕

(English) យោងតាមគេហទំព័រ Tribuna ចេញផ្សាយកាលពីថ្ងៃច័ន្ទទី០៧ ខែមេសា ឆ្នាំ២០២៥ បានឱ្យដឹងថា៖ ក្លិប Everton បានចំណាយប្រាក់ជាង ៨០២ លានផោនលើការសាងសង់កីឡដ្ឋានថ្មីរបស់ខ្លួន ដោយតម្លៃនៅតែកើនឡើង។ នៅចុងបញ្ចប់នៃរដូវកាលនេះ ក្លិបនឹងចាកចេញពី Goodison Park ដែលជាផ្ទះរបស់ខ្លួនតាំងពីឆ្នាំ ១៨៩២។ ចាប់ផ្តើមរដូវកាលក្រោយ Everton នឹងលេងនៅកីឡដ្ឋានថ្មីរបស់ពួកគេដែលមានកៅអីចំនួន ៥៣,០០០ ដែលមានទីតាំងនៅតំបន់ Bramley-Moore Dock ។

ការ​សាង​សង់​គឺ​ស្ថិត​នៅ​ក្នុង​ដំណាក់​កាល​ចុង​ក្រោយ​របស់​ខ្លួន។ ដើមឡើយ ក្លិបមានបំណងរក្សាគម្រោងនេះក្នុងកញ្ចប់ថវិកា ៥០០ លានផោន។ ទោះបីជាយ៉ាងណាក៏ដោយ យោងតាមរបាយការណ៍ហិរញ្ញវត្ថុចុងក្រោយរបស់ក្លិប គិតត្រឹមថ្ងៃទី៣០ ខែមិថុនា ឆ្នាំ២០២៤  Everton បានចំណាយអស់ ៨០២,១២១,៣៥៣ ផោនរួចហើយ។ នេះមានន័យថា គម្រោងនេះបានចំណាយថវិកាច្រើនជាង ៦០% ហើយការចំណាយសរុបត្រូវបានគេរំពឹងថានឹងកើនឡើងបន្ថែមទៀត នេះបើតាម The Sun កត់សំគាល់៕

(English) Southampton ត្រូវបានកាត់ចេញពីក្របខណ្ឌបាល់ទាត់កំពូលអង់គ្លេស English Premier League បន្ទាប់ពីបរាជ័យ ៣-១ នៅក្នុងទឹកដីក្រុម Tottenham កាលពីថ្ងៃអាទិត្យ។ នេះវាមានន័យថា Southampton ត្រូវបានត្រលប់ទៅក្របខណ្ឌ Championship វិញភ្លាមៗ និងគួរឱ្យអស់សំណើច ក្នុងរយៈពេលតិចជាង ១១ ខែ បន្ទាប់ពីពួកគេបានមកដល់ទីនេះតាមរយៈការប្រកួត Play off ឈ្នះក្រុម Leeds នៅ Wembley ។ Southampton បំបែកកំណត់ត្រានៅ Premier League ជាក្រុមដំបូងគេដែលត្រូវបានកាត់ចោល ខណៈដែលនៅសល់ចំនួន ៧ ប្រកួតទៀតទេីបចប់រដូវកាល។

ក្លិប Ipswich និង Derby ត្រូវបានកាត់ចេញពីក្របខណ្ឌកំពូលជាមួយនឹងការប្រកួតចំនួន ៦ ដែលនៅសល់ក្នុងឆ្នាំ ១៩៩៤-៩៥  និង ២០០៧-០៨ រៀងគ្នា។ បន្ថែមពីនេះទៀតក្រុមរបស់លោក Ivan Juric ក៏ជាក្រុមមួយដែលគួរឱ្យខ្មាស់អៀន បើធៀបពិន្ទុសរុបនៅ Premier League គឺទាបជាង Derby ក្នុងឆ្នាំ ២០០៧-០៨ ដែលមាន ១១ ពិន្ទុ។ Southampton ឈ្នះតែ ២ ប្រកួតគត់ក្នុង ៣១ ប្រកួតគឺ ២-៤-២៥ មានត្រឹមតែ ១០ ពិន្ទប៉ុណ្ណោះ៕

(English) យោងតាម Celebrity Net Worth ដែលត្រូវបានគេហទំព័រ legit.ng ដកស្រង់យកមកចុះផ្សាយកាលពីថ្ងៃអាទិត្យទី០៥ ខែមេសា ឆ្នាំ២០២៥ បានឱ្យដឹងថា Frank Lampard មានទ្រព្យសម្បត្តិតម្លៃជាង ៩០ លានដុល្លារ ដែលបានមកពីប្រាក់ចំណូលក្នុងកំឡុងពេលជាកីឡាករ និងអាជីពជាអ្នកគ្រប់គ្រង។

គាត់មានវិមានតម្លៃ ១០ លានដុល្លារនៅទីក្រុងឡុងដ៍ ជាកន្លែងដែលគាត់រស់នៅជាមួយប្រពន្ធរបស់គាត់ឈ្មោះ Christine ដែលគាត់បានរៀបការនៅឆ្នាំ ២០១៥ និងកូនរបស់គាត់ Freddie និង Patricia ។ Lampard មិន​មែន​ជា​មនុស្ស​អស្ចារ្យ​ទេ ហើយភាគច្រើនបានរក្សា​ជីវិត​ក្រៅ​ទីលានដោយស្ងប់ស្ងាត់ ប៉ុន្តែ​រឿង​ខ្លះ​ដែល​គាត់​មិន​អាច​លាក់​បាន​គឺ​ជា​នាឡិកា​ដៃ​ដែល​មាន​តម្លៃ​ថ្លៃ​របស់​គាត់។

យោងតាម ​​watchopea គាត់ជាម្ចាស់នាឡិកាដៃ ម៉ាកយីហោដ៏ល្បីរបស់ក្រុមហ៊ុន Patek Philippe ដែលមានតម្លៃសរុបជាង ២,៧លានដុល្លារ ហើយត្រូវបានគេប្រទះឃើញពាក់វាក្នុងឱកាសផ្សេងៗគ្នា។ គាត់ជាម្ចាស់ Patek Cubitus 5822P ដែលមានតម្លៃ ជាង១៧ម៉ឺនដុល្លារ ដែលត្រូវបានគេប្រទះឃើញពាក់អំឡុងពេលគាត់ជាអ្នកចាត់ការក្លឹប Everton ក្របខ័ណ្ឌ English Premier League ។ គាត់ក៏ជាម្ចាស់ Patek Nautilus ចំនួនប្រាំពីរផ្សេងទៀតរួមមាន៖ 5711/1A-014 ដែលមានតម្លៃ ២៩ ម៉ឺនដុល្លារ, 5990/1R មានតម្លៃ ៣៥ ម៉ឺនដុល្លារ, 5711/111P ដែលមានតម្លៃជាង ៧៥ ម៉ឺនដុល្លារ, 5976/1G មានតម្លៃ ៤៥ ម៉ឺនដុល្លារ, 5726A តម្លៃជាង ៧៥០០០ ដុល្លារ 5980/1R តម្លៃ ១៨ ម៉ឺនដុល្លារ និង 5711/1P មានតម្លៃកន្លះលានដុល្លារ៕

(English) ប្រធាន UEFA លោក Aleksander Ceferin បាននិយាយថា៖ ការពង្រីកការប្រកួតបាល់ទាត់ពិភពលោកឆ្នាំ២០៣០ដល់៦៤ក្រុមគឺជាគំនិតអាក្រក់។ Ceferin គឺជាអនុប្រធាន FIFA ដែលជាផ្នែកមួយនៃកិច្ចប្រជុំតាមអ៊ីនធឺណិតកាលពីថ្ងៃទី៦ខែមីនារបស់ក្រុមប្រឹក្សាគ្រប់គ្រងរបស់ស្ថាប័នបាល់ទាត់ពិភពលោក នៅពេលដែលសំណើដែលមិននឹកស្មានដល់ត្រូវបានធ្វើឡើងដោយប្រតិភូមកពីប្រទេសអ៊ុយរូហ្គាយ។ លោក បាននិយាយនៅក្នុងសន្និសីទសារព័ត៌មានបន្ទាប់ពីកិច្ចប្រជុំប្រចាំឆ្នាំរបស់ UEFA នៅទីក្រុង Belgrade ប្រទេសស៊ែប៊ីថាសំណើនេះប្រហែលជាគួរឱ្យភ្ញាក់ផ្អើលសម្រាប់ខ្ញុំជាងអ្នកទាំងអស់គ្នា។ ខ្ញុំគិតថាវាជាគំនិតអាក្រក់។ លោកបន្តថា វាមិនមែនជាគំនិតល្អសម្រាប់ការប្រកួត World Cup ខ្លួនឯងនោះទេ ហើយវាក៏មិនមែនជាគំនិតល្អសម្រាប់ការប្រកួតជម្រុះរបស់យើងផងដែរ។

ការបន្ថែមក្រុមចំនួន ១៦ ទៀតទៅ ៤៨ ក្រុមដែលនឹងបង្ហាញខ្លួននៅឆ្នាំក្រោយនៅអាមេរិកខាងជើងហាក់ដូចជាមានការគាំទ្រពីប្រធាន FIFA លោក Gianni Infantino ដែលជាធម្មតាគាំទ្រការពង្រីកការប្រកួតប្រជែងជាមធ្យោបាយមួយដើម្បីរៃអង្គាសប្រាក់ និងជំរុញការអភិវឌ្ឍន៍វិស័យបាល់ទាត់ជាសកល។ ជុំវិញនឹងបញ្ហានេះដែរ អ្នករិះគន់ចំពោះសំណើ ៦៤ក្រុមបានបញ្ជាក់ថាវានឹងធ្វើឱ្យគុណភាពនៃការប្រកួតចុះខ្សោយដោយសារតែចំនួនប្រកួតនឹងកេីនដល់១២៨ ធ្វើឱ្យតម្លៃកម្មវិធីជម្រុះនៅក្នុងទ្វីបភាគច្រើនត្រូវបានផ្តល់ជូនកៅអីបន្ថែម។ ជុំវិញនឹងបញ្ហានេះ FIFA មិន​បាន​ផ្តល់​ព័ត៌មាន​លម្អិត​អំពី​របៀប និង​ពេល​ណា​ដែល​ខ្លួន​នឹង​ពិចារណា​សំណើ​នេះ​ទេ។ FIFA មានសមាជប្រចាំឆ្នាំរបស់ខ្លួននៃសហព័ន្ធសមាជិកចំនួន ២១១នៅថ្ងៃទី ១៥ ខែឧសភា នៅរដ្ឋធានី Asuncion ប្រទេសប៉ារ៉ាហ្គាយ៕